मरकुस 12 - जीवन को च्यानणो (सेकावाटी नया नियम की पोथ्या)

अँगूरा की बाड़ी का ठेकेदार

¹ ईसु बाऊँ मिसाल देर खेबा लाग्यो, “एक बार अंय्यां होयो एक मिनख अँगूरा को बाग लगायो अर बि बाग क च्यारूमेर बाड़ बांदी। अर बठैई अँगूरा को रस काडबा ताँई कूंड अर निगरानी करबा ताँई एक मचाण बणायो। अर इकै पाछै बो इ बागनै ठेका प देर दिसावर चलेगो।

² अँगूर पकबा की रुत म बो मिनख दिसावरऊँ आपका दासनै बा किसाना क कनै अँगूरा का बाग म भेज्यो जिऊँ बे बा किसानाऊँ अँगूरा को हिसाब ले सकै।

³ पण बे किसान बि दासनै पकड़र मार्या अर बिनै रितोई भेज दिओ।

⁴ इकै पाछै अँगूरा का बाग को मालिक दुसरा दासनै बठै भेज्यो पण बे किसान बिनै बी मार्या अर बिको सीर फोड़र बिकी बेजती कर्या।

⁵ बो मालिक तीसरा दासनै बठै भेज्यो पण बे किसान बि दासनै मार गेर्या। अंय्यांई बो बोळा दासानै भेज्यो पण बे किसान कयानै तो पिट्या अर कयाकी जान लेली।

⁶ इकै पाछै बि बाग का मालिक क कनै भेजबा ताँई बिको लाडलो बेटोई बच्यो। अर बो आ सोचर क बे इको तो आदर करसी। इ बजेऊँ बो आपका बेटानै बठै भेज्यो।

⁷ बे किसान मालिक का बेटानै आतो देख आपसरी म बतळाबा लाग्या, ‘ओ अठै को वारिस ह। आओ आपा मिलर इनै मार देवां। अंय्यां करबाऊँ अँगूरा को बाग आपणो होज्यासी।’

⁸ अर बे सगळा किसान मिलर बिनै मार दिओ अर अँगूरा का बाग क बारनै बगा दिओ।

⁹ इ बातनै सुणर अँगूरा का बाग को मालिक बा किसाना क सागै काँई करसी?” बो बठै ज्यासी अर बा किसानानै मारसी अर अँगूरा को बाग दुसरा किसानानै दे देसी।

¹⁰ थे सास्तर म ओ बचन कोनी बाच्यो के: “जि भाठानै कारिगर ख्याई जोगो कोनी जाण्या बोई भाठो कूणानै समाबाळो निकळ्यो।

¹¹ अर ओ आँख्या क सामै अजूबो ह इनै परबु कर्यो ह।”

¹² बठै खड़्या सास्तरी समजगा क ओ आ मिसाल बापैई बोली ह। इ बजेऊँ बे ईसुनै केद करबा ताँई कोई गेलो ढुंढबा लाग्या। पण बे मिनखाऊँ डरता हा जिऊँ बे बिनै बठैई छोडर चलेग्या।

चुंगी देबा की सीख

¹³ बे ईसुनै फसाबा ताँई फरिसीया अर हेरोद का गुट का क्युंक मिनखानै बिकन भेज्या।

¹⁴ बे ईसु कनै गया अर बिऊँ बोलबा लाग्या, “ओ गरूजी म्हें जाणा हां क तू बोळो ईमानदार ह अर तू इ बात की परवा कोनी करै क लोग तनै काँई खेवै ह अर तेरा बारां म काँई सोचै ह। अर तू मिनखा को मुंडो देखर बाता कोनी करै पण परमेसर क कनै जाबा ताँई जखो गेलो ह बिनै तू सच-सच बतावै ह। पण म्हें तनै बुजां हां क कैसरनै चुंगी देणी चाए क कोनी?”

¹⁵ ईसु बाकी चालनै भापगो अर बाऊँ बोल्यो, “थे मनै क्युं बिचासो हो? थे मेर कनै एक सीक्को ल्याओ जिऊँ म देखूँ।”

¹⁶ बे ईसुनै एक सीक्को दिओ। अर ईसु बाऊँ बुज्यो, “इपै किकी सकल अर किको नाम ह?” बे बोल्या, “कैसर की।”

¹⁷ ईसु बाकी इ बातनै सुणर बोल्यो, “जखो कैसर को ह बो कैसरनै द्‍यो अर जखो परमेसर को ह बो परमेसरनै द्‍यो।” बे ईसु की इ बातनै सुणर ताजूब म पड़गा।

मर्या पाछै जीबा प सुवाल

¹⁸ इकै पाछै सदुकी ईसु कनै आया अ मानी हीं क मरेड़ी काया ओज्यु कोनी जीवै अर बे ईसुनै बुजबा लाग्या,

¹⁹ “ओ गरूजी मूसा म्हारै ताँई मांड्यो ह क जिको भाई मर जावै अर बिकी लूगाई क कोई टाबर नइ होवै जणा मरबाळा को भाई बिकी लूगाईऊँ ब्या करले जिऊँ बो आपका भाई को वंस बढावै।

²⁰ एक बार सात भाई हा। बामैऊँ बडोड़ा को ब्या होयो अर क्युंक दिना क पाछै बो मरग्यो बिकी लूगाई क कोई टाबर-टिकर कोनी हो।

²¹ बिको दुसरो भाई बिऊँ ब्या कर लिओ अर बो बी क्युंक दिना क पाछै मरग्यो अर बिऊँ बी बिकै कोई टाबर कोनी होयो। तीसरो भाई बी अंय्यांई कर्यो अर बिकै सागै बी बोई होयो।

²² अर अंय्यांई सात्यु का सात्यु बे ओलादई मरगा अर बिकै पाछै बा लूगाई बी मरगी।

²³ बे ईसुनै बुजबा लाग्या क सगळी मरेड़ी काया ओज्यु जिसी बि दिन बा सात मऊँ किकी लूगाई होसी। क्युं क बे सात्युई बिनै ब्याली ही।”

²⁴ ईसु बाऊँ बोल्यो, “थे आ बातानै गळत लेली क्युं क थे सास्तरानै अर परमेसर की सक्‍तिनै कोनी जाणो।

²⁵ जद मरेड़ी काया ओज्यु जिसी जणा बाको ब्या कोनी होसी पण बे ईस्बर नगरी म ईस्बर नगरी दुता की जंय्यां होसी।

²⁶ अर जठै ताँई मरेड़ी काया क जीबा को सुवाल ह, थे मूसा की पोथी म ओ कोनी बाच्यो के? जद परमेसर बळती झाड़ी मऊँ बिऊँ खयो: ‘म अब्राहम को परमेसर हूँ, इसाक को परमेसर हूँ अर याकूब को परमेसर हूँ।’

²⁷ “इको मतबल ओ ह क बे मरगा पण बे मरेड़ा कोनी जिंदा हीं जणाई बो मर्या खप्या को कोनी पण जीता-जागता को परमेसर ह। थे तो भेम म पड़्या हो।”

सगळा मऊँ बडो हुकम

²⁸ बठै एक यहूदि सास्तरानै सीखाबाळो आयो अर बो बानै बठै जिरै करता अर ईसु बा सदुकीयानै सागेड़ो जुबाब देर्यो हो आ देखर बो ईसुनै बुज्यो, “सगळा हुकमा मऊँ कूणसो बडो ह?”

²⁹ ईसु बिऊँ बोल्यो, “सगळा मऊँ बडोड़ो ओ ह। ‘सुणो इजरायलीओ आपणा परमेसरनै छोडर कोई परबु कोनी ह।

³⁰ अर थे आपका सगळा हियाऊँ सगळी आत्माऊँ सगळी बुदीऊँ अर आपकी सगळी सक्‍तिऊँ परमेसरऊँ परेम करो।’

³¹ अर दुसरो हुकम ओ ह ‘तू तेरा पड़ोसीऊँ बंय्यांई परेम कर जंय्यां तू खुदऊँ परेम करै ह।’ “आ हुकमाऊँ बडो कोईबी हुकम कोनी।”

³² यहूदि सास्तरानै सीखाबाळा ईसु की इ बातनै सुणर बोल्या, “ओ गरूजी थारो ओ खेबो बी सच ह क परमेसर एकई ह अर बिनै छोड दुसरो कोई कोनी।

³³ आपका सगळा हियाऊँ सगळी बुदीऊँ अर आपकी सगळी सक्‍तिऊँ परमेसरऊँ परेम करो अर आपका पड़ोसीऊँ खुदकी जंय्यां परेम करो। अर अ दोन्यु सगळा होमबली अर चढावाऊँ बढकै ह।”

³⁴ जि चतराईऊँ बो जुबाब दिओ हो बिकी सुणर ईसु बिऊँ खयो, “तू परमेसर का राजऊँ घणी दूर कोनी।” इकै पाछै कोईसाकी ईसुऊँ सुवाल बुजबा की हिमत कोनी बगी।

मसी किको बेटो ह?

³⁵ इकै पाछै ईसु मनदर म परबचन देतोई बोल्यो, “सास्तरानै सीखाबाळा क्याले बोलीं हीं क, मसी दाऊद को बेटो ह?

³⁶ पण दाऊद खुद पबितर आत्माऊँ भर'र बोल्यो हो: ‘परबु (परमेसर) मेरा परबुऊँ खियो जद ताँई म तेरा दुस्मनानै तेरै पगा तळै नइ कर द्‍युँ मेरै दाया हात बेठ्यो रेह।’

³⁷ “दाऊद खुदई मसीनै परबु बोलै ह जणा मसी दाऊद को बेटो कंय्यां हो सकै ह?” घणीसारी भीड़ ईसु की बातानै राजी हियाऊँ सुणै ही।

सास्तरानै सीखाबाळाऊँ बचर रेहज्यो

³⁸ ईसु बानै सीखातोई बोल्यो, “थे सास्तरानै सीखाबाळाऊँ बचज्यो जानै लामा-लामा चोळा पेरबो अर घूमबो चोखो लागै ह अर बे चावीं हीं क लोग बजारा म बाको आदर करीं।

³⁹ अर बे अरदास करबाळी झघा अर जिमणार म उची गद्दि प बिराजबा की मनस्या राखै ह।

⁴⁰ बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।”

सचो दान

⁴¹ ईसु मनदर की दानपेटी क सामै बेठर देखर्यो हो क लोग दानपेटी म कंय्यां दान घालीं हीं। पिसाळा तो बढचढ'र दान घालर्या हा।

⁴² बाकै पाछै बठै एक गरीबणी खाली होईड़ी आई अर बा बी दानपेटी क मांय दो डबली हाळा सीक्का घाली अ सीक्का क्युंक पिसा जत्ता होता हा।

⁴³ ईसु आपका चेलानै आपकै कनै बुलायो अर बाऊँ बोल्यो, “म थारूँ सची बोलुँ हूँ आ गरीबणी खाली होईड़ी लूगाई दुसरा सगळा मिनखाऊँ बेत्ती दान घाली ह।

⁴⁴ क्युं क सगळा तो आपकी बढती मऊँ घाल्या पण आ खाली होईड़ी आपकी सगळी कमाई इमै घाल दि। इकै कनै अत्तोई हो जिऊँ इको चूलो बळतो।”