मरकुस 10 - जीवन को च्यानणो (सेकावाटी नया नियम की पोथ्या)

तलाक की सीख

¹ इकै पाछै ईसु बठैऊँ बिदा होर यरदन नदि क पार यहूदि भौम म आगो। अर भीड़ की भीड़ बिकन भेळी होगी, ईसु बानै आपकी बाण गेल सीखाबा लाग्यो।

² जदई फरिसी बिकन आर ईसुनै बिचासबा ताँई बिऊँ बुजबा लाग्या क आपणा बिधान म कोई मोट्यार आपकी लूगाईनै छोड सकै ह के?

³ ईसु बाऊँ बोल्यो, “मूसा थानै काँई हुकम दिओ ह?”

⁴ बे बोल्या, “मूसा तो तलाकनामो मांडर देबा ताँई बोल्यो ह।”

⁵ ईसु बाऊँ बोल्यो, “मूसा आ आदेसानै थारै मन की कल्डाईनै देखता मांड्यो ह।

⁶ पण जद परमेसर आ सरस्टि बणायो हो जदऊँई बो बानै: ‘नर अर नारी कर बणायो हो।

⁷ इ ताँई मोट्यार आपका माँ-बापनै छोडर आपकी लूगाई क सागै रेह्‍वै

⁸ अर बे दोन्यु एक जीव होज्यासी, अर बे इब दो कोनी, पण एक जीव ह।’

⁹ “इ ताँई जिनै परमेसर जोड़्यो ह, बिनै मिनख न्यारो नइ करै।”

¹⁰ जद ईसु घर क मांयनै हो जणा चेला बिनै इ बात क बारां म ओज्यु बुजबा लाग्या।

¹¹ ईसु बाऊँ बोल्यो, “जखो मिनख आपकी लूगाईनै छोडर दुसरो ब्या करै ह बो कुकरम करै ह क्युं क बो आपकी पेलड़ी लूगाई क बिस्वास जोगो कोनी।

¹² अर लूगाई आपका मोट्यारनै छोडर दुसरो ब्या करै ह जणा बा बी कुकरम करै ह।”

ईसु टाबरानै आसिरबाद दिओ

¹³ लोग टाबरानै ईसु कनै लेर आया बे चावै हा क ईसु बा टाबरा क सीर प हात म्हेलै पण चेला बानै दकाल्या।

¹⁴ ईसु झाळ्या म भर'र चेलानै ओडायो, “थे टाबरानै मेरै कनै आबा द्‍यो। अर आ टाबरानै मना नटो, क्युं क परमेसर को राज आ जंय्यां कोई ह।”

¹⁵ ईसु बाऊँ बोल्यो, “म थानै सची-सची खेऊँ हूँ क जखो मिनख परमेसर का राजनै टाबरा की जंय्यां कोनी अपणावै बो परमेसर का राज म कोनी बड़ सकै।”

¹⁶ ईसु बा टाबरानै कनै लेर बाकै सीर प हात धर'र बानै आसिरबाद दिओ।

पिसाळो मिनख ईसु कनै आयो

¹⁷ जद ईसु बठैऊँ निकळर गेला म जार्यो हो बठै एक मिनख भागतो होयो ईसु कनै आयो अर बो गोडा टे'कर हात जोड़र ईसुऊँ बुजबा लाग्यो, “ओ चोखा गरूजी म अजर-अमर जीवन पाबा ताँई काँई करूं?”

¹⁸ ईसु बिऊँ बोल्यो, “तू मनै चोखो क्युं बोलै ह? परमेसरनै छोडर कोईबी चोखो कोनी,

¹⁹ तू परमेसर का हुकमनै तो जाणै ह जंय्यां मंडेड़ो ह: ‘तू कुकरम मना करजे, चोरी मना करजे, हत्या मना करजे, झूठी गुवाई मना दिजे, छळ मना करजे, अर माँ-बापा को मान करजे।’”

²⁰ बो मिनख ईसुनै बोल्यो, “ओ म्हान गरूजी अ हुकम तो म टाबरपुणाऊँई मानतो आयो हूँ।”

²¹ ईसु बिकै कानि देख्यो अर बिनै परेमऊँ बोल्यो, “तेरै मांयनै एक बात की कमी ह। तू जा अर तेरै कनै जोक्यु बी ह बिनै बेचर गरीबानै देदे। तनै ईस्बर नगरी म धन मिलसी, अर तू मेरै गेल होले।”

²² इ बातनै सुणर बिको मुंडो लटकग्यो अर बो दुखी होर बठैऊँ चलेगो, बो पिसाळो मिनख हो।

²³ ईसु च्यारूमेर देखर आपका चेलानै बोल्यो, “जखा मिनखा को मो धन म ह बा मिनखा को ईस्बर नगरी म जाणो बोळो ओखो ह।”

²⁴ चेला ईसु की इ बातनै सुणर ताजूब करबा लाग्या इ ताँई ईसु बाऊँ ओज्यु बोल्यो, “मेरा टाबरो परमेसर का राज म जाणो कतो ओखो ह?

²⁵ पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।”

²⁶ बे बोळो ताजूब कर आपसरी म बतळाबा लाग्या, “ज अंय्यां की बात ह जणा कूण बचायो ज्यासी?”

²⁷ ईसु बाकै कानि देखर बोल्यो, “आ मिनखाऊँ अणहोती बात ह, पण परमेसर सक्यु कर सकै ह।”

²⁸ जणा पतरस ईसुनै बोल्यो, “म्हें सक्यु तज'र तेरै गेल आया हा।”

²⁹ ईसु बोल्यो, “म थानै सची-सची खेऊँ हूँ ज कोई मेरै ताँई अर चोखा समचार ताँई घर, सागे भाई-भाण, माँ-बापा, टाबर-टिकरा, अर खेतनै छोड दिओ ह

³⁰ बिनै अठैई इ जुग म सो गुणा घर, सागे भाई-भाण, माँ, टाबर-टिकर अर खेत मिलसी अर सागै की सागै अजर-अमर जीवन मिलसी।

³¹ पण बोळा ह जखा की आज बूज ह बाकी बूज कोनी होसी अर जखा की बूज कोनी बाकी बूज होज्यासी।”

तीसरका ईसु आपकी मोत क बारां म बतायो

³² बे यरूसलेम जार्या हा गेला म ईसु आपका चेला क आगै-आगै चालर्यो हो। चेला ताजूब म पड़ग्या अर बाकै सागै जखा मिनख हा बे डरर्या हा। ईसु आपका बारा चेलानै एक कानि लेगो अर बानै बताबा लाग्यो क मेरै सागै काँई-काँई बितबाळी ह।

³³ ईसु बानै बोल्यो, “थे सुणो आपा यरूसलेम म जार्यां हां, मिनख का बेटानै धोकाऊँ पकड़र परधान याजका अर सास्तरानै सीखाबाळानै सूप दिओ ज्यासी। अर बे बिनै जानऊँ मारबा की सजा देर परमेसरनै नइ ध्यारबाळा मिनखा का हाता म सूप देसी।

³⁴ बिको तमासो बणायो जासी अर बिपै थूकिंगा अर तड़ा मारसी बिनै जानऊँ मार देसी पण बो तीसरा दिन ओज्यु जिंदो होज्यासी।”

याकूब अर यहून्ना की अरदास

³⁵ जब्दि का बेटा याकूब अर यहून्ना ईसु कनै आया अर ईसुऊँ बोलबा लाग्या, “ओ गरूजी म्हें चावां हां क जोक्यु बी म्हें थारूँ माँगा, बो थे म्हानै द्‍यो।”

³⁶ ईसु बिनै बुज्यो, “थे मेरूँ काँई चाओ हो?”

³⁷ बे ईसुनै बोल्या, “थारै मेमाभर्या राज म थे म्हानै थारै दाया-बाया बेठबा को सोभाग द्‍यो।”

³⁸ ईसु बाऊँ बोल्यो, “थे कोनी जाणो क थे काँई माँगो हो। जखो पिड़ाऊँ भर्यो बाटको म पीबा जार्यो हूँ के थे बिनै पी सको हो? अर जखो दुखा को बतिस्मो म लेबा जार्यो हूँ के थे बिनै ले सको हो?”

³⁹ बे ईसुनै बोल्या, “म्हें अंय्यां कर सकां हां!” ईसु बाऊँ बोल्यो, “थे ओ बाटको बी पीस्यो अर ओ दुखा को बतिस्मो बी लेस्यो जखो म लेबाळो हूँ।

⁴⁰ पण मेरै दाया अर बाया बेठबा को हक म कोनी दे सकूँ क्युं क जखा ताँई परमेसर आ झघा बणाई ह बानैई बो आ झघा देसी।”

⁴¹ जद दस चेला इ बातनै सुण्या जणा बे याकूब अर यहून्ना प लाल-ताता होगा।

⁴² ईसु बानै आपकै कनै बुलायो अर बाऊँ बोलबा लाग्यो, “थे जाणो हो क परमेसरनै नइ ध्यारबाळा मिनखा का राजा मिनखा प हुकम चलावीं हीं अर बाका सरदार जोर जमावीं हीं।

⁴³ पण थारै म अंय्यां कोनी थारै म जखो बी बडो बणबो चावै बो सगळा को दास बणै।

⁴⁴ अर थारै म जखो बी सऊँ पेलो होबो चावै बो सगळा को दास बणै।

⁴⁵ मिनख को बेटो सेवा-पाणी कराबा ताँई कोनी आयो। पण सेवा-पाणी करबा अर बोळासारा मिनखानै छुटाबा ताँई आपका पिराण देबा आयो ह।”

आँदा बरतिमाईनै सुजबा लाग्यो

⁴⁶ बे यरियो गाँव क मांयनै आया अर ईसु क सागै बिका चेला अर घणीसारी भीड़ ही बे यरियो मऊँ निकळर जार्या हा, जणा तिमाई को बेटो बरतिमाई जखो आँदो मंगतो हो बो सड़क क किनारै बेठ्यो हो

⁴⁷ जद बो सुण्यो क ईसु नासरी अठैऊँ जार्यो ह बो जोर-जोरऊँ खेबा लाग्यो, “ओ दाऊद का बेटा ईसु मेर प दया करजे।”

⁴⁸ लोग बिनै दकालर बोल्या, “तू चुपचालो रेह पण बो ओर बी जोर-जोरऊँ खेबा लाग्यो ओ दाऊद का बेटा मेर प दया करजे।”

⁴⁹ ईसु बिकी सुणर डटगो अर ओडायो, “बिनै मेरै कनै ल्याओ।” अर बे लोग बी आँदानै बुलाया अर बिनै बोल्या, “राजी हो अर खड़्यो हो तनै ईसु बुलावै ह।”

⁵⁰ बो आपका गाबा बगार बेगोसो उठ्यो अर ईसु कनै आयो।

⁵¹ ईसु बिनै बोल्यो, “तू के चावै ह क म तेरै ताँई करूं?” बो आँदो मिनख बोल्यो, “ओ गरूजी म देखबो चाऊँ हूँ।”

⁵² ईसु बोल्यो, “चल्यो जा तेरो बिस्वास तनै निरोगो कर दिओ ह।” जणा बो बठैई देखबा लागगो अर ईसु क गेल होलिओ।