मरकुस 1 - जीवन को च्यानणो (सेकावाटी नया नियम की पोथ्या)यहून्ना बतिस्मो देबाळा को हेलो ( मत्ती 3:1–12 ; लूका 3:1–18 ; यहून्ना 1:19–28 ) 1 परमेसर का बेटा ईसु मसी को चोखो समचार अंय्यां चालू होयो। 2 जंय्यां क यसाया परमेसर की खेबाळा की पोथी म मंडर्यो ह: “देख म तेरो गेलो बणाबा ताँई तेरै पेल्या मेरा हलकारानै भेजूँ हूँ। 3 उजाड़ म एक हलकारो हेलो मारै ह क, ‘परबु ताँई गेलो बणाओ, अर बिको गेलो सिदो-सपाट करो।’” 4 पाणी को बतिस्मा देबाळो यहून्ना उजाड़ क मांय आयो अर बो बठै पाणी को बतिस्मो देतो अर परचार करतो हो क, “थे थारा पापऊँ तौबा कर पाणी को बतिस्मो लेल्यो। जिऊँ परमेसर थारा पापनै माफ कर देसी।” 5 यहूदिआ दिसावर अर यरूसलेम नगरी का घणकराक मिनख बिकी सुणबा बिकन गया। अर बे बठै जार आपका पापनै मान्या जिऊँ बो बानै यरदन नदि म पाणी को बतिस्मो दिओ। 6 यहून्ना ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बांद्या करतो हो। बो टिड्या अर जंगली सहद खाया करतो हो। 7 अर बो मिनखा म परचार करतो हो क, “मेरै पाछै एक जणो आर्यो ह। बो मेरूँ बोळो म्हान ह, अर म तो बिकाळा जूता का सळू खोलबा जोगोई कोनी 8 अर म तो थानै पाणी को बतिस्मो द्युँ हूँ। पण बो थानै पबितर आत्मा को बतिस्मो देसी।” ईसु को बतिस्मो अर बिचास्यो जाबो ( मत्ती 3:13—4:11 ; लूका 3:21 , 22 ; 4:1–13 ) 9 बा दिना म अंय्यां होयो ईसु गलिल का नासरतऊँ आयो अर बठै यरदन नदि म यहून्नाऊँ पाणी को बतिस्मो लिओ। 10 जंय्यांई बो पाणी मऊँ बारनै निकळ्यो बो देख्यो की अकास खुलगो अर पबितर आत्मा कबूतर की जंय्यां बिपै उतरी। 11 अर बादळा मऊँ हेलो आयो, “तू मेरो लाडलो बेटो ह, म तेरूँ बोळो राजी हूँ।” 12 इकै पाछै पबितर आत्मा बिनै हात्युहात जोर देर उजाड़ म लेगी। 13 उजाड़ म चाळिस दिना ताँई सेतान बिनै बिचासतो रिह्यो अर बो बठै जंगली जिनावरा क सागै रेह्तो अर ईस्बर नगरी दुत बिकी खेचळ करता हा। ईसु को सेवा करबो ( मत्ती 4:12–22 ; लूका 4:14 , 15 ; 5:1–11 ) 14 ईसु क गलिल जाबाऊँ पेली यहून्नानै कोठड़ी क मांयनै बंद कर दिओ गयो हो। ईसु गलिल म जार बठै परमेसर को चोखो समचार लोगानै सुणाबा लाग्यो। 15 बो खयो, “परमेसर को राज सांकड़ै आबा को ठिक टेम आगो ह। जिमै परमेसर राज करसी। इ ताँई थे पापऊँ तौबा करो अर परमेसर का चोखा समचार प बिस्वास करो।” मछवारानै ईसु बुलायो 16 जद ईसु गलिल दरिआव क किनारै-किनारै जार्यो हो। जणा बो समोन अर समोन का भाई अंदरिआसनै देख्यो। बे मछी पकड़बाळा हा, अर बि टेम बे मछी पकड़बा ताँई दरिआव म जाळ गेरर्या हा। 17 ईसु बाऊँ बोल्यो, “मेरै गेल आओ म थानै परमेसर ताँई मिनखानै ल्याबाळो बणास्युं।” 18 बे जाळनै छोडर बिकै गेल होलिआ। 19 अर बे जंय्यांई थोड़ासा आगै ढळ्याक जणा बानै जब्दि को बेटो याकूब अर बिको भाई यहून्ना दिख्यो बे न्याव म जाळ सुदार्या हा। 20 ईसु बानै तावळोसो आपकै कनै बुलायो अर बे आपका बाप जब्दिनै मजुरा क कनै छोडर खुद बिकै गेल होगा। मिनख मऊँ ओपरी बलाय काडी। ( लूका 4:31–37 ) 21 अर बे कफरनूम नगर गया अर यहूदिआ का आबाळा अरामहाळा दिन ईसु अरदास करबाळी झघा गयो अर मिनखानै परबचन सीखाबा लाग्यो। 22 लोग बिका बचनानै सुणर ताजूब म पड़गा। क्युं क बो बानै सास्तरानै सीखाबाळा की जंय्यां परबचन कोनी देतो हो, पण अधिकार क सागै सीख देतो हो। 23 बा यहूदिआ का अरदास घर म एक मिनख हो जिकै मांय सूगली ओपरी बलाय ही अर बो चाणचुक्योई जोरऊँ बार घालर 24 बोल्यो, “ओ ईसु नासरी थारो म्हारो काँई लेणदेण के तू म्हानै तबा करबा ताँई आयो ह, म जाणू हूँ क तू परमेसर को खरो मिनख ह!” 25 बिकै अंय्यां बोलताई ईसु बिनै दकाल्यो अर बिनै खयो, “तू चुपचाली रेह अर इमैऊँ बारनै निकळज्या।” 26 सूगली ओपरी बलाय बि मिनखनै मरोड़र बार घालती बिमैऊँ निकळगी। 27 इ बातऊँ सगळा मिनख चोरंगा होगा। अर आपसरी म बुजबा लाग्या, “आ बेधड़क सीखाबाळी नई सीख काँई ह? अर ओ सूगली ओपरी बलायनै बी अधिकार क सागै ओडावै ह, अर बे इको खयो मानै ह।” 28 अर आ कारनामा की टो-टो गलिल अर बिकन का सगळा गाँवा म होगी। ईसु बोळा रोगलानै निरोगो कर्यो ( मत्ती 8:14–17 ; लूका 4:38–41 ) 29 बो तावळोसो यहूदिआ का अरदास घरऊँ निकळर याकूब अर यहून्ना क सागै समोन अर अंदरिआस क घरा गयो। 30 समोन की सासू क उन होरी ही जि बजेऊँ बा बिछावणा म पड़ी ही बिकै बारां म बे ईसुनै जदकी जद बताया 31 ईसु बिकन जार बिको बावळ्यो पकड़र बिनै उठायो अर बा निरोगी होगी अर जणा बा बाकी सेवा-पाणी करबा लागी। 32 दिन आथ्या पाछै लोग रोगलानै अर जिकै मांयनै फेंट होईड़ी ही बानै बिकन ल्याया। 33 अर पूरी की पूरी नगरी बारना क आगै उल्ट पड़ी। 34 ईसु बा रोगलानै निरोगो कर्यो जखा भात-भात की पिड़ा म हा। अर ओपरी बलाय बी काडी। अर बो बा ओपरी बलायनै बोलबा कोनी देतो हो क्युं क बे बिनै जाणै ही। गलिल म ईसु को परचार ( लूका 4:42–44 ) 35 बो भागपाट्याई आपका घरनै छोडर उजाड़ म चलेगो अर बो बठै अरदास करबा लाग्यो। 36 समोन अर बिका साती-संगी ईसुनै ढुंढबा निकळ्या। 37 बे बिनै ढुंढ लिओ अर बोल्या, “सगळा मिनख तनै ढुंढै ह।” 38 इ बातनै सुणर ईसु बाऊँ बोल्यो, “आओ ल्यो आपा दुसरी नगर्या म चालां, जिऊँ म बठै का मिनखानै बी चोखो समचार दे सकूँ इ ताँई तो म आयो हूँ।” 39 अर बो गलिल की सगळी अरदास करबाळी झघा म परमेसर को हेलो देतो गयो अर कई मिनखा मऊँ ओपरी बलायानै भगायो। ईसु एक कोढी को कोढ धोयो ( मत्ती 8:1–4 ; लूका 5:12–16 ) 40 ईसु कनै एक कोढी आयो अर बो ईसुऊँ हात जो'ड़र अरदास करबा लाग्यो अर बोल्यो, “ज थे चाओ तो मेरो कोढ धो सको हो।” 41 ईसुनै बिपै तरस आयो अर बो बिपै हात धर बिऊँ खयो, “म चाऊँ हूँ, तेरो कोढ धुपज्या।” 42 अर बि कोढी को कोढ हात्युहातई धुपगो। 43-44 ईसु बिनै चेतार ओडायो, “देख तू इ बात क बारां म कोईनैई मना खिजे अर याजक क कनै जार खुदनै दिखा, अर मूसा की रीत गेल जंय्यां मंडेड़ो ह तेरो कोढ धुपबा की गुवाई म तू चढावो चढा।” 45 पण बो बारनै जार सगळा म आ बात फेला दि जिऊँ ईसु बि नगरी म चोड़ै-धाड़ै कोनी जा सक्यो। पण बो उजाड़ म रिह्यो। अर बठै बी लोग च्यारूमेरूँ बिकन आर्या हा। |
(c) 2010-2017, New Life Computer Institute. All rights reserved