मत्ती 9 - जीवन को च्यानणो (सेकावाटी नया नियम की पोथ्या)

हवा भेयड़ा मिनखनै निरोगो करबो।

¹ ईसु एक न्याव म बेठर दरिआव क परलै नाकै खुदकी नगरी कफरनूम म आग्या।

² जणा लोग एक भाळ भेयड़ा मिनखनै खाटली म घालर बाकन ल्याया। ईसु बाका बिस्वासनै देखर बि हवा भेयड़ा मिनखनै ओडायो, “हिमत राख, तेरा पाप धुपगा!”

³ जणा क्युंक सास्तरानै सीखाबाळा यहूदि मिनख आपसरी म बतळाबा लाग्या, “ओ अंय्यां बोलर परमेसर की बुराई करै ह।”

⁴ ईसु बाकी हिया की बातानै जा'णर बाऊँ बोल्यो, “थे थारा हिया म बुरो क्युं सोचो हो?

⁵ सोरो काँई ह? के अंय्यां ओडाबो ‘तेरा पाप धुपगा’ नहिस अंय्यां ओडाबो, ‘खड़्यो होर डोल-फिर?’

⁶ जिऊँ थे आ जाण सको की इ धरती प पाप धोबा को हक मिनख का बेटा कनै ह।” इकै पाछै ईसु बि हवा भेयड़ा मिनखनै बोल्यो, “खड़्यो होर तेरी खाटलीनै लेर तेरै घरा चल्योजा।”

⁷ बो मिनख खड़्यो होर आपकै घरा चलेगो।

⁸ लोग आ देखर डरग्या। बे परमेसर की जे-जैकार करबा लाग्या क बे मिनखनै ताजूब का काम करबा को हक दिओ ह।

ईसु को मत्तीनै बुलाबो

⁹ जद ईसु बठैऊँ जार्यो हो जणा बे चुंगी चोकी प एक मिनखनै बेठ्या देख्या। बिको नाम मत्ती हो। ईसु बिऊँ बोल्यो, “मेरै गेल होले।” जणा बो खड़्यो होर बाकै गेल होलिओ।

¹⁰ अर जद ईसु आपका चेला क सागै मत्ती क घरा रोटी खाबा ताँई बेठ्या जणा बठै बाकै सागै रोटी खाबा ताँई चुंगी लेबाळा अर पापी मिनख बी बेठ्या।

¹¹ बानै सागै बेठ्या देखर क्युंक फरिसी ईसु का चेलानै खया, “थारो गरूजी तो चुंगी लेबाळा अर पापी मिनखा क सागै खावै अर उठा-बेठी करै ह?”

¹² आ सुणर ईसु बाऊँ बोल्यो, “निरोगा मिनखानै बेद की जुर्त कोनी होवै, रोगलानैई बेद की जुर्त पड़ै ह।

¹³ इ ताँई थे जाओ अर सास्तर म मांडेड़ा इ बचन को मतबल काँई ह बिनै समजो, ‘म बलिदान कोनी चाऊँ पण दया चाऊँ हूँ। म धरम्या ताँई कोनी आयो पण पाप्यानै बुलाबा आयो हूँ।’”

बरत क बारां म सुवाल

¹⁴ इकै पाछै यहून्ना बतिस्मो देबाळा का चेला ईसु कनै गया अर बानै बुजबा लाग्या, “थारा चेला बरत क्युं कोनी करै? जदकी म्हें अर फरिसी बार-बार बरत करां हां।”

¹⁵ जणा ईसु बानै खेबा लाग्या, “ब्या की टेम जद बिंद आपका भाईला क सागै ह जणा बिका भाईला दुख मनावै ह के? पण बे दिन आसी जद बनड़ो बाऊँ न्यारो कर्यो जासी जणा बे बरत करसी।

¹⁶ कोईबी पुराणा गाबा प नया सुती गाबा की कारी कोनी लगावै, अर ज कोई लगा बी ले जणा नई कारी भेळी होर बि गाबल्यानै दुणो पाड़ गेरै।

¹⁷ अंय्यांई नई अँगूरी पुराणी बखाल म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर अँगूरी अर बखाल दोन्युई खराब हो जावै। इ ताँई लोग नई अँगूरी नई बखाल मई भरीं हीं।”

मरेड़ी छोरीनै जिंदो करबो अर रोगली लूगाईनै निरोगो करबो।

¹⁸ ईसु जद अ बाता बानै बतार्याई हा क अत्ता मई एक यहूदि सभा को एक परधान बाकन आयो अर बाकै धोक खार बाऊँ अरदास करतो बोल्यो, “इबी-इबी मेरी छोरी मरी ह। ज थे चालर बिकै उपर हात धरद्‍यो जणा बा ओज्यु जी ज्यासी।”

¹⁹ बिकी बाता सुणर ईसु खड़्यो होर आपका चेलानै सागै लेर बिकै सागै चालबा लाग्यो।

²⁰ बठै एक लूगाई ही जिकै बारा बरसाऊँ न्याह्णी को रोग हो। बा ईसु क गेलनै आर बाका कुर्ता की कोर क हात अड़ा दिनी।

²¹ क्युं क बा सोच्या करती ही क, “ज म ईसु का कुर्ता की कोर क हात अड़ा देस्युँ जणा म निरोगी होज्यास्युं।”

²² गेलनै मुड़र ईसु बिनै देखर बोल्यो, “बेटी हिमत राख। तू तेरा बिस्वास की बजेऊँ निरोगी करी गई ह।” अर बा लूगाई जदकी जद निरोगी होगी।

²³ जद ईसु बि यहूदि परधान क घरा पुग्या जणा बे देख्या क लोग बि छोरी क मरबा की बजेऊँ रोइ पिटी करबा लागर्या हीं।

²⁴ जणा ईसु बा मिनखाऊँ बोल्या, “थे अठैऊँ बारनै चल्या जाओ आ छोरी मरी कोनी पण सोवै ह।” आ सुणर लोग बाको मजाक उडाबा लाग्या।

²⁵ अर जद लोगानै बठैऊँ बारनै काड दिओ गयो जणा ईसु मांयनै जार बि छोरी को हात पकड़्यो जिऊँ बा छोरी जीगी।

²⁶ इ बात की चरचा च्यारूमेर फेलगी।

ईसु आँदानै आँख्या दिनी

²⁷ अर जद ईसु बठैऊँ जार्या हा जणा दो आँदा मिनख बाकै गेल होलिआ अर हेलो देर खेबा लाग्या, “हे दाऊद का बेटा, म्हारै प दया कर।”

²⁸ अर जद ईसु घर क मांयनै बड़गा जणा बे मिनख बी बाकन गया। बानै देखर ईसु बाऊँ बुज्यो, “के थानै बिस्वास ह क म थानै ओज्यु आँख्या दे सकूँ हूँ?” बे बोल्या, “हाँ म्हराज!”

²⁹ जणा ईसु बाकी आँख्या क हात अड़ार खयो, “जंय्यां थारो बिस्वास ह बंय्यांई थारै सागै होवै।”

³⁰ अर बे आँदा देखबा लाग्या। अर ईसु बानै अंय्यां चेतायो क, “इकै बारां म खिनई मना खिज्यो।”

³¹ पण बे बठैऊँ जार बि झघा म बा बाता को ढींढोरो पिट दिओ।

गुँगा मिनखनै निरोगो करबो

³² जद ईसु बठैऊँ जार्या हा जणा लोग एक गुँगानै जिकै फेंट होईड़ी ही बिनै ईसु कनै लेर आया।

³³ अर जद बिकै मांयनैऊँ बी ओपरी बलायनै काड दिनी जणा बो मिनख बोलबा लाग्यो, जणा बठै भीड़ ही जखी ताजूब कर खेबा लागी, “म्हें इजरायल म अंय्यां को काम पेली कदैई कोनी देख्यो।”

³⁴ पण बठै खड़्या फरिसी खेबा लाग्या, “क ओ भूता का नाथ की सक्‍तिऊँ ओपरी बलायानै काडै ह।”

ईसुनै लोगा प दया आई

³⁵ ईसु नगरी-नगरी गाँव-गाँव जार अरदास करबाळी झघा म सीखातो हो अर परमेसर क राज क बारां म चोखा समचार को हेलो पाड़तो, लोगा का रोगनै दूर करतो होयो फिर्या करतो हो।

³⁶ अर ईसु जद बी भीड़नै देखतो बानै बापै तरस आतो क्युं क बे बि लल्डी की जंय्यां हा जिको गुवाळ्यो कोनी होवै ह जिकै बजेऊँ बा अठिनै-बठिनै रूळती फिरै ह।

³⁷ जणा ईसु आपका चेलानै खेबा लाग्यो, “लावणी आएड़ा खेत तो बोळा हीं पण ध्यानग्या थोड़ा हीं।

³⁸ इ ताँई थे खेत का धणी परमेसरऊँ अरदास करो जिऊँ बे लावणी करबा ताँई ध्यानग्यानै भेजै।”