मत्ती 4 - जीवन को च्यानणो (सेकावाटी नया नियम की पोथ्या)

ईसुनै बिचास्यो जाबो

¹ जणा पबितर आत्मा ईसुनै उजाड़ म लेगी जिऊँ सेतानऊँ बो बिचास्यो जावै।

² बो चाळिस दिन अर चाळिस रात निरहार रिह्यो। अर जद भूखऊँ बिकी आंतड़ी ऐठबा लागी।

³ जणा बिचास्बाळो सेतान बिकन आर ओडायो, “ज तू परमेसर को बेटो ह जणा आ भाठाऊँ बोल क रोटी बण जावै।”

⁴ ईसु बिनै जुबाब दिओ, पबितर सास्तर म मांडेड़ो ह क, “मिनख रोटीऊँई कोनी जीवै पण बो हरेक बि बचनऊँ जखा परमेसर आपका मुंडाऊँ बोलै ह जीवै ह।”

⁵ बिकै पाछै सेतान बिनै पबितर नगरी यरूसलेम म लेगो अर मनदर की चोटी प खड़्यो कर दिओ।

⁶ अर बिऊँ बोल्यो, “ज तू सचमई परमेसर को बेटो ह जणा अठैऊँ तळै कुदज्या।” क्युं क पबितर सास्तर म मांडेड़ो ह क, “परमेसर आपका ईस्बर नगरी दुतानै हुकम देसी, अर तेरा पगा म कांकरो गडै इऊँ पेलीई बे तनै हात्युहात बोचलेसी।”

⁷ ईसु बिऊँ बोल्यो, “पबितर सास्तर म ओबी मांडेड़ो ह क: “‘तू तेरा परबु परमेसरनै मना बिचासजे।’ ”

⁸ बिकै पाछै सेतान बिनै एक उचासा डूँगर प लेगो अर सगळो जगत को राजपाट अर ठाट-बाट दिखायो।

⁹ अर बोल्यो, “ज तू मेरै आगै गोडा टे'कर मनै धोकै जणा म ओ सगळो राजपाट तनै दे देस्युँ।”

¹⁰ जणा ईसु बिनै बोल्यो, “हे सेतान दूर भागज्या!” पबितर सास्तर म मांडेड़ो ह: “तू परबु परमेसर किई भगती करजे अर बिकिई सेवा करजे।”

¹¹ जणा सेतान बिकनऊँ चलेगो अर, ईस्बर नगरी दुत आर बिकी देखभाळ करबा लाग्या।

ईसु की सेवा की सरूआत

¹² जद ईसु अंय्यां सुण्यो क यहून्नानै केद कर लिओ गयो ह जणा बो गलिल म चलेगो।

¹³ अर बो नासरतनै छोडर कफरनूम नगर म जखो दरिआव क किनारै जबलुन अर नपताली दिसावर म ह बठै जार रेह्बा लाग्यो,

¹⁴ जिऊँ यसाया परमेसर की खेबाळो जखा बचन बोल्या हा बे पूरा होवै,

¹⁵ “जबलुन अर नपताली दिसावर जखो यरदन नदि क अगुणी दिसा म ह। गलिल जखी परमेसरनै नइ ध्यारबाळा मिनखा की भौम ह।

¹⁶ जखा अँधेरा म बेठ्या हा, बे च्यानणो देख्या; अर जखा मोत का काळ म हा बाकै उपर बी च्यानणो चमक्यो।”

¹⁷ जद ईसु कफरनूम म हा बि टेमई परचार करबो चालू कर्यो, “थे पापऊँ तौबा करो! क्युं क ईस्बर नगरी को राज सांकड़ै ह।”

ईसु चेलानै टाळ्यो

¹⁸ एक बर ईसु गलिल दरिआव क किनारै-किनारै जार्यो हो जणा दो भायानै देख्यो बामैऊँ एक को नाम समोन जिनै पतरस बी खेता हा; अर बिकाळो भाई अंदरिआस हो बे दरिआव म जाळ गेरर्या हा; क्युं क बे मछी पकड़बाळा हा।

¹⁹ ईसु बाऊँ बोल्यो, “मेरै गेल आओ, म थानै मिनखानै भेळा करबा की सीख देस्युँ।”

²⁰ बे तावळासा आपका जाळ फेकर ईसु क गेल होलिआ।

²¹ बठैऊँ क्युंक दूर चालबा क पाछै ईसु देख्यो क जब्दि का बेटा याकूब अर बिको भाई यहून्ना आपका बाप क सागै न्याव म जाळ सुदार्या हा बानै आपकै कनै बुलायो।

²² बे बी तावळासा न्याव अर आपका बापनै छोडर बिकै गेल होलिआ।

ईसु रोगलानै निरोगो कर्यो

²³ ईसु गलिल नगरी की सगळी झघा म घूमतो होयो अर अरदास करबाळी झघा म परमेसर का राज का चोखा समचार क बारां म बतातो अर लोगा का रोग अर कमजोरीनै दूर करतो रिह्यो।

²⁴ सगळा सिरीया देस म बिकी चरचा फेलगी अर लोग सगळा रोगलानै जखा भात-भात का रोगाऊँ रोगला हा, जखा पिड़ा म पड़्या हा, फेंट होईड़ा, जामै दोरा आता हा अर हवा भेयड़ा मिनखानै बिकन ल्याया अर बो बा सगळानै निरोगो कर दिओ।

²⁵ इ बजेऊँ गलिल अर दिकापुलिस, यरूसलेम, यहूदिआ अर यरदन नदि क परलै नाकै की नगर्या का मिनख हा बाकी घणीसारी भीड़ की भीड़ बाकै गेल होगी।