मत्ती 26 - जीवन को च्यानणो (सेकावाटी नया नियम की पोथ्या)

ईसुनै मारबा की जाळ-साजी

¹ बे बाता खेबा क पाछै ईसु चेलाऊँ खयो,

² “थानै बेरो ह दो दिना क पाछै फसै को त्युंहार ह। अर मिनख को बेटो धोकाऊँ सुळी प चढाबा ताँई पकड़ायो जासी।”

³ जणा परधान याजक अर यहूदि नेता केफा नाम का म्हायाजक क घर का आँगणा म भेळा होया।

⁴ अर बे बठै जाळ-साजी करी क ईसुनै कंय्यांसिक छळऊँ पकड़र मारां।

⁵ पण बे आपसरी म बतळाया, “आपा ईसुनै त्युंहार क दिन कोनी मारां। ज आपा त्युंहार क दिन इनै मारां जणा के बेरो जनता दंगो कर दे।”

ईसु क उपर ईतर गेर्यो

⁶ जद ईसु बेतनिया म समोन क घरा हो। ओ बोई समोन ह जिको कोढ ईसु धोयो हो।

⁷ जद ईसु रोटी खार्यो हो जणा बठै एक लूगाई संगमरमर की बरनी म जटामासी को मेंगो ईतर लेर आई। अर बा लूगाई बि बरतननै खोलर बिकै मांयनै जत्तो बी ईतर हो बिनै ईसु क सीर प उंदका दिनी।

⁸ चेला अंय्यां देखर चिड़गा अर खया, “आ लूगाई इ ईतरनै क्याले खराब करी ह?

⁹ इनै चोखा दामा म बेचर इऊँ जखा रिपीआ मिलता बानै गरीबा म बाट्यो जा सको हो।”

¹⁰ ईसु बाकी इ बातनै भापर बानै बोल्यो, “थे इ लूगाईनै क्युं तंग करो हो? आ तो मेरो मान करी ह।

¹¹ गरीब तो थारै सागै सदाई रेह्सी, पण म थारै सागै सदाई कोनी रेहस्युं।

¹² आ मनै गाडबाऊँ पेल्याई मेरी काया प ईतर उंदकाई ह।

¹³ म थानै सची खेऊँ हूँ, सगळा जगत म जठै बी चोखो समचार को हेलो पाड़्यो ज्यासी, बठै इ लूगाईनै अर इका कामनै याद कर्यो ज्यासी।”

ईसुनै धोको देबा ताँई यहूदा को करार

¹⁴ जणा यहूदा इस्करोती जखो बारा चेला मऊँ एक हो परधान याजका क कनै गयो अर बाऊँ बोल्यो,

¹⁵ “ज म ईसुनै थारै हात पकड़ा द्‍युँ जणा थे मनै काँई देस्यो?” जणा बे बिनै चाँदी हाळा तीस सीक्का देबा की बात प राजी होगा अर बिनै तीस सीक्का गिणर दे दिआ।

¹⁶ बि टेमऊँई यहूदा ईसुनै पकड़ाबा की ताक म मोको ढुंढबा लाग्यो।

चेला क सागै आखरी फसै

¹⁷ बिना खमिर की रोटी हाळै त्युंहार क पेला दिन चेला ईसु कनै आर बुज्या, “तू कठै चावै ह क म्हें तेरै ताँई फसै की रोटी खाबा की त्यारी करां?”

¹⁸ ईसु बानै ओडायो, “नगरी क मांय फलाणीया मिनख क कनै जायो अर बिऊँ बोलज्यो, ‘गरूजी खयो ह, मेरो टेम सांकड़ै ह, म मेरा चेला क सागै तेरै घरा फसै को त्युंहार मनास्युं।’”

¹⁹ अर बे चेला ईसु क खया गेल बि नगरी म फसै की रोटी त्यार करी।

²⁰ जद दिन आथगो ईसु बारा चेला क सागै रोटी खाबा बेठ्यो।

²¹ जद बे सागै बेठर रोटी खार्या हा। जणा ईसु आपका चेलानै बोल्यो, “म थानै सची खेऊँ हूँ थारै मऊँ एक जणो जखो अठै मेरै सागै जिमर्यो ह बो मनै धोकाऊँ पकड़ासी।”

²² बे ईसु की इ बातनै सुणर बोळा दुखी होया अर बे ईसुनै एक-एक कर बुजबा लाग्या, “परबु बो म तो कोनीनै?”

²³ पण ईसु बोल्यो, “जखो मेरै सागै इ कचोळा म टिमोवै ह बोई मनै धोकाऊँ पकड़ासी।

²⁴ मिनख का बेटानै तो मरनोई ह जंय्यां क पबितर सास्तर म मंडेड़ो ह। पण कत्ती बुरी दसा ह बि मिनख की जिकी बजेऊँ मिनख को बेटो पकड़ायो जासी। इऊँ चोखो तो ओ होतो क बो मिनख जलमतोई नइ।”

²⁵ जणा बिनै धोकाऊँ पकड़ाबाळो यहूदा बोल्यो, “हे गरूजी बो म हूँ के?” ईसु बोल्यो, “हाँ अंय्यांई जंय्यां तू बोल्यो ह।”

परबुभोज

²⁶ बे जिमर्याई हा क ईसु रोटी लेर परमेसरनै धनेवाद देर रोटीनै तोड़्यो अर आपका चेलानै आ खेतो रोटी बाटी, “ल्यो आ मेरी काया ह।”

²⁷ इकै पाछै ईसु कचोळो लिओ अर परमेसरनै धनेवाद देर बो कचोळो आपका चेलानै दिओ अर खयो, “थे सगळा इमैऊँ पीओ।

²⁸ क्युं क इ कचोळा की अँगूरी मेरा लोय को नयो करार ह। ओ लोय बोळा मिनखानै पापऊँ माफ करबा ताँई बहायो ज्यासी।

²⁹ म थानै सची खेऊँ हूँ म इबऊँ आ अँगूरी जद ताँई कोनी पीस्युं जद ताँई मेरा परम-पिता का राज म थारै सागै नई नइ पीऊँ।”

³⁰ इकै पाछै बे एक गीत गार जेतून का डूँगर प चलेग्या।

पतरस ईसुनै पिछाण्बाऊँ मना करसी

³¹ जद बे गेला म हा जणा ईसु चेलाऊँ बोल्यो, “थे सगळा कानि-कानि होज्यास्यो। क्युं क पबितर सास्तर म मंडेड़ो ह: “‘म गुवाळ्यानै मारस्युं अर लल्ड्या तीनतेरा होज्यासी।’

³² “पण म ओज्यु जिंदो होर थारूँ अगाऊ गलिल जास्युं।”

³³ जणा पतरस खयो, “चाए सगळा तनै छोडर भाग जावै पण म तनै कोनी छोडूँ।”

³⁴ ईसु बिऊँ खयो, “म तनै सची खेऊँ हूँ आज रात मुरगा क बांग देबाऊँ पेल्या तू तीन बार मेरै बारां म खेसी क, ‘म इनै कोनी जाणू।’”

³⁵ जणा पतरस खयो, “ज मनै थारै सागै ज्यान बी देणी पड़ी जणा बी म पिछै कोनी हटूँ।” अर बाकी का सगळा चेला बी अंय्यांई बोल्या।

गतसमनी का बाग म अरदास

³⁶ इकै पाछै चेला ईसु क सागै गतसमनी नाम की झघा गया अर बठै ईसु आपका चेलानै बोल्यो, “म बठै जार अरदास करूं थे अठैई बेठ्या रेहज्यो।”

³⁷ ईसु आपकै सागै पतरस अर जब्दि का दोन्यु छोरा याकूब अर यहून्नानै लेगो। ईसु बोळो दुख-दुबळो होर्यो हो।

³⁸ ईसु बाऊँ बोल्यो, “मेरो हियो बोळो उदास ह अठै ताँई की म मरबाळोसो होर्यो हूँ। थे अठैई मेरै सागै चेता म रेहज्यो।”

³⁹ इकै पाछै ईसु बठैऊँ चिनोसोक दूर जार धरती प मोदो पसर अरदास करबा लाग्यो, “मेरा परम-पिता ज आ हो सकै तो मनै इ पिड़ा म मना गेरो पण म चाऊँ जंय्यां नइ पण थे चाओ बंय्यांई होवै।”

⁴⁰ ईसु अरदास कर आपका चेला कनै गयो। अर बानै सुत्यो देखर पतरसनै बोल्यो, “थे बोळा कचा निकळ्या जखो थे मेरै सागै थोड़ी-घणी देरई कोनी जाग सक्या?

⁴¹ थे जागता रेह्ओ अर अरदास करो जिऊँ थे बिचास्या नइ जाओ। आत्मा तो चावै ह पण आ काया माड़ी ह।”

⁴² अर ईसु दुसरकै अरदास करबा ताँई चलेगो अर अरदास म खयो, “परम-पिता ज मेरो दुख भोगबो जरूरी ह जणा थे जखो चाओ हो बोई मेरै सागै होवै।”

⁴³ अर ओज्यु बो चेला कनै गयो अर बानै सुत्यो देख्यो बाकै आँख्या म निंद चढरी ही।

⁴⁴ बो बानै छोडर ओज्यु गयो। अर जंय्यां पेल्या अरदास करी बंय्यांई बोलर बो तीसरकै बी अरदास करी।

⁴⁵ ओज्यु ईसु चेला क कनै गयो अर बोल्यो, “हाल बी थे अरामऊँ सुत्या हो। देखो बा घड़ी आगी जद मिनख को बेटो पाप्या क हात म सूप्यो जार्यो ह।

⁴⁶ थे खड़्या होवो अर देखो मनै पकड़ाबाळो आबाळो ह।”

ईसुनै धोकाऊँ पकड़ायो

⁴⁷ ईसु अंय्यां बोलर्योई हो, क यहूदा जखो बारा चेला मऊँ एक हो बो आपकै सागै परधान याजक, सास्तरीआ अर यहूदि नेता का हुकमऊँ घणीसारी भीड़ लेर बठै आयो। बाकन तलवार अर लाठ्या बी ही।

⁴⁸ धोकाऊँ पकड़ाबाळो पेल्याई भीड़नै बता दिओ हो क, “जिको म माखो ल्युं बोई ईसु ह थे बिनै पकड़ लिज्यो।”

⁴⁹ अर यहूदा तावळोसो ईसु कनै जार खयो, “गरूजी नमस्कार” अर बो बिको माखो लिओ।

⁵⁰ ईसु बिनै खयो, “जि काम ताँई तू आयो ह बो काम कर।” जणा बे बिनै पकड़ लिआ।

⁵¹ ईसु क सागैहाळा मऊँ एक जणो तलवार का'डर म्हायाजक का एक दास को कान काट गेर्यो।

⁵² जणा ईसु बिनै बोल्यो, “तेरी तलवार ओटी घाल ले जखा तलवारऊँ मारै ह बो तलवारऊँ मार्यो ज्यासी।

⁵³ के थे कोनी जाणो म मेरा परम-पितानै मदद करबा ताँई बुला सकूँ हूँ। अर बो ईस्बर नगरी दुता की बारा सेनाऊँ बी बेत्ती मेरै ताँई भेज देसी।

⁵⁴ ज म अंय्यां करस्युं जणा सास्तर म मंडेड़ो कंय्यां पूरो होसी क्युं क अंय्यां होणोई ह?”

⁵⁵ बि टेमई ईसु भीड़नै खेबा लाग्यो, “म कोई डाकू हूँ के जखो थे मनै पकड़बा ताँई तलवार अर लाठ्या लेर आया हो? म रोजकी मनदर म रेह्तो अर सीख देतो हो जणा तो थे मनै कोनी पकड़्या।

⁵⁶ पण अ सगळी बाता जखी परमेसर की खेबाळा पबितर सास्तर म मांडी ह बानै पूरो होणोई ह।” अर ईसु का चेला बिनै छोडर भागगा।

यहूदि पंचायत म ईसु

⁵⁷ बे ईसुनै केफा नाम का म्हायाजक क कनै लेग्या अर बठै बडा परधान याजक अर यहूदि नेता अर सास्तरी आर भेळा होगा।

⁵⁸ पतरस बाकै गेल-गेल आयो अर म्हायाजक क आँगणा म चोकीदारा क सागै आ देखबा ताँई क इब काँई होसी बठै बेठगो।

⁵⁹ परधान याजक अर सगळी पंचायत का मिनख ईसुनै मारबा ताँई बिकै खिलाप झूठी गुवाई देबाळानै ढुंढबा लाग्या।

⁶⁰ पण बानै अंय्यां की कोई गुवाई कोनी मिली जखी बाकै काम आ सकै। जदकी बोळा मिनख बाकै खिलाप झूठी गुवाई दि ही। आखीर म दो मिनख आगै आया

⁶¹ अर बे खया, “ओ खेवै ह म परमेसर का मनदरनै ढार बिनै तीन दिना क पाछै ओज्यु खड़्यो कर सकूँ हूँ।”

⁶² जणा म्हायाजक खड़्यो होर ईसुनै बुजबा लाग्यो, “तू जुबाब क्युं कोनी देवै अ सगळा तेरै खिलाप गुवाई देर्या हीं।”

⁶³ पण ईसु चुपचालोई रिह्यो। जणा ओज्यु म्हायाजक बिऊँ बोल्यो, “म थानै जीवता परमेसर की सोगन देऊँ हूँ, म्हानै बता तू परमेसर को बेटो मसी ह के?”

⁶⁴ ईसु बोल्यो, “हाँ जंय्यां थे बोलो हो म बोई हूँ। अर थे मिनख का बेटानै सऊँ सक्‍तिसाली परमेसर क दाया हात बेठर राज करता देखस्यो। अर थे मनै ईस्बर नगरीऊँ बादळा मऊँ आतो बी देखस्यो।”

⁶⁵ म्हायाजक बिकी आ बात सुणर आपका गाबल्या पाड़र खयो, “इब ओर गुवा की जुर्त कोनी ह। ओ अंय्यां खेर परमेसर की बुराई करै ह अर थे सगळा इकी बाता सुण्या हो।

⁶⁶ इब थारो काँई फेसलो ह?” जणा बे खया, “ओ तो मोत को हकदार ह।”

⁶⁷ जणा पाछै बामैऊँ कई बिकै मुंडा प थूक्यो अर बिकै मुका मार्या अर बिकै थपड़ मार्या,

⁶⁸ अर खया, “तू मसी हनै इब भबिस्वाणी कर बता तनै कूण मार्यो?”

ईसुनै जाणबाऊँ पतरस को मुकरबो

⁶⁹ हाल पतरस बारला आँगणा म बेठ्यो हो, जणा एक दासी बिकन आर बोली, “तू बी तो बि गलिली ईसु क सागै हो।”

⁷⁰ पण पतरस सगळा क सामै नटगो अर बोल्यो, “तू जखो बोलरी ह बा मेरै तो क्युंई पलै कोनी पड़ै।”

⁷¹ अर बो बारली गुवाड़ी का बारना कनै चलेगो जणा एक ओर दासी बिनै देखर बठै खड़्या मिनखानै बोली, “ओ मिनख ईसु नासरी क सागै हो।”

⁷² ओज्यु पतरस नटगो अर सोगन खार बोल्यो, “म बिनै कोनी जाणू।”

⁷³ क्युंक देर पाछै बठै खड़्या मिनख पतरस क कनै गया अर खया, “सचमई तू ईसु क सागैहाळा मऊँ एक ह क्युं क तेरी बोलीऊँ बेरो चालै ह क तू गलिल को ह।”

⁷⁴ जणा पतरस सोगन खार बोल्यो, “म बि मिनखनै कोनी जाणू ज म बिनै जाणू तो परमेसर मनै सजा देवै।” अत्ता मई मुरगो बांग दिनी।

⁷⁵ जणा पतरसनै ईसु की खेईड़ी बा बात याद आई क, “मुरगा क बांग देबाऊँ पेल्या तू तीन बार मेर ताँई खेसी म इनै कोनी जाणू।” अर बो बारनै चलेगो अर पछाड़ा घा'लर रोबा लाग्यो।