मत्ती 21 - जीवन को च्यानणो (सेकावाटी नया नियम की पोथ्या)

यरूसलेम म ईसु की जे-जैकार

¹ जद ईसु अर बाकाळा चेला यरूसलेम क सांकड़ै जेतून डूँगरी की ढळान प बेतफगे अर बेतनिया क कनै आया। जणा ईसु आपका चेला मऊँ दो जणानै

² अंय्यां बोलर भेज्यो, “सामला गाँव म जाओ। थानै बि गाँव म एक गधेड़ी अर बिको बच्यो बांदेड़ो मिलसी बानै खोलर मेरै कनै ल्याओ।

³ अर थानै कोई बुजै थे ओ काँई करो हो? जणा बिनै बोलज्यो, परबुनै इकी जुर्त ह जणा बो थारै सागै बानै भेज देसी।”

⁴ ओ इ ताँई होयो ह, क्युं क परमेसर की खेबाळा का बचन पूरा हो:

⁵ सिओन की छोरीऊँ खेओ क बिको राजा बिकन आर्यो ह; बो खुदनै छोटो कर्यो ह, हाँ बो गधेड़ी का बच्या प बेठ्यो ह।

⁶ बिकै पाछै बे चेला गया अर जंय्यां ईसु बानै ओडायो हो बंय्यांई कर्यो।

⁷ अर बे बि गधेड़ी अर बिका बच्यानै ले आया अर बापै बेठबा ताँई बाकै उपर गाबा गेर्या जणा ईसु गधेड़ी का बच्या प बेठगो।

⁸ बोळा मिनख गेला म आपका गाबा बिछा दिआ। अर कई दरख्ताऊँ डाळ्यां तोड़-तो'ड़र गेला म बिछा दिनी।

⁹ अर जखा मिनख बाकै आगै-पिछै चालर्या हा बे जोर-जोरऊँ खेर्या हा; “दाऊद का बेटा की जे हो! परबु क नामऊँ आबाळो धने ह। ईस्बर नगरी म रेह्बाळा की जे हो।”

¹⁰ अर जद बे यरूसलेम म बड़्या जणा सगळी नगरी म खळबळी माचगी। अर लोग बुजबा लाग्या, “ओ कूण ह?”

¹¹ अर लोगई जुबाब देर्या हा, “ओ गलिल का नासरत को परमेसर की खेबाळो ईसु ह।”

ईसु मनदर म

¹² ईसु मनदर म गयो अर बठै जत्ताबी बेचबाळा अर खरीदबाळा हा, बानै बठैऊँ बारनै काडबा लाग्यो। बो रिपीआ को लेणदेण करबाळा का पाटियानै बगा दिओ अर कबूतर बेचबाळा का तक्‍तानै उंदो कर दिओ।

¹³ इकै पाछै बो बानै बोल्यो, “पबितर सास्तर म मंडर्यो ह: “‘मेरो मनदर अरदास करबा को घर खुवासी। पण थे इनै डाकूआ की खोळ बणा दि।’”

¹⁴ मनदर म क्युंक आँदा, लुला-लंगड़ा हा बे ईसु कनै आया अर बो बानै निरोगो कर्यो।

¹⁵ जद परधान याजक अर यहूदि धरमसास्तरी बा ताजूब का कामानै देख्या। जणा बे टाबरानै मनदर म जोर-जोरऊँ आ खेता सुण्या क, “दाऊद का बेटा की जे हो! ओ धने ह।” आ सुणर बे झाळ्या म भरगा।

¹⁶ अर ईसुऊँ बुजबा लाग्या, “तनै सुणै ह के बे काँई खेर्या हीं?” ईसु बाऊँ बोल्यो, “हाँ सुणू हूँ। थे सास्तर म ओ कोनी बाच्यो, बो टाबर टिकराऊँ अर दुद पिता नान्याऊँ आपकी मेमा कराई ह।”

¹⁷ अर ईसु बानै बठैई छोडर बेतनिया चलेगो अर रातनै बठैई रिह्यो।

ईसु अंजीर का दरख्तनै दूरसिस दिओ

¹⁸ भागपाट्याई जद ईसु यरूसलेम नगरी म जार्यो हो जणा बिनै भूख लागी।

¹⁹ गेला म एक अंजीर को दरख्त देखर ईसु बिकन गयो, पण बि दरख्त म पत्तानै छोडर क्युंई कोनी लाध्यो। जणा बो बि दरख्तऊँ बोल्यो, “तेरै कदैई फळ कोनी लागै!” अर बो दरख्त जदकी जदई सूकगो।

²⁰ अर चेला आ देखर ताजूब करताई ईसुनै बुज्या, “ओ अंजीर को दरख्त हात की हात कंय्यां सूकगो?”

²¹ जणा ईसु बानै बोल्यो, “म थानै सची खेऊँ हूँ, ज थे बिस्वास करो अर भेम नइ करो। जणा जखो म कर्यो हूँ बोई नइ पण ज थे इ डूँगरऊँ खेस्यो क समदर क मांयनै जा पड़ जणा बंय्यांई होज्यासी।

²² बिस्वासऊँ अरदास म जोक्यु बी माँगस्यो, बो थानै मिलसी।”

ईसु का अधिकार प सुवाल

²³ जद ईसु मनदर म सीख देर्यो हो जणा परधान याजक अर यहूदि नेता ईसु कनै आर बुज्या, “थे अ बाता की अधिकारऊँ करो हो? अर थानै ओ अधिकार कूण दिओ?”

²⁴ ईसु बाऊँ बोल्यो, “म थानै एक सुवाल बुजूँ हूँ, ज थे मनै बिको जुबाब देद्‍यो। जणा म बी थानै बता देस्युँ क म की अधिकार करूं हूँ।

²⁵ यहून्नानै पाणी को बतिस्मो देबा को अधिकार कठैऊँ मिल्यो? परमेसरऊँ नहिस मिनखाऊँ?” अर बे आपसरी म बतळाता होया खेबा लाग्या, “ज आपा खेवां क परमेसरऊँ जणा बो आपानै खेसी बिको बिस्वास क्युं कोनी कर्या?

²⁶ अर ज आपा खेस्यां मिनखाऊँ जणा मिनखा को डर ह, क्युं क मिनख बिनै परमेसर की खेबाळो मानी हीं।”

²⁷ जणा बे ईसुनै बोल्या, “म्हानै कोनी बेरो।” इपै ईसु बी बाऊँ बोल्यो, “जणा म बी कोनी बताऊँ क म अ बाता की अधिकारऊँ करूं हूँ!

दो बेटा की निती-कथा

²⁸ “थे काँई सोचो हो? एक मिनख क दो छोरा हा। बो बडोड़ा छोरा क कनै गयो अर बिनै ओडायो, ‘अँगूरा का बाग म जा अर काम कर।’

²⁹ पण बो बोल्यो, ‘मेरो मन कोनी।’ बिकै पाछै बी बो चलेगो।

³⁰ अर बो बाप दुसरा छोरा कनै गयो अर बिनै बी बंय्यांई ओडायो। अर बो छोरो बोल्यो, ‘हाँ जास्युं।’ पण कोनी गयो।

³¹ बताओ आ दोन्या म कूणसो ह, जखो बाप चाओ हो बो कर्यो?” बे बोल्या, “बडोड़ियो छोरो कर्यो।” जणा ईसु बाऊँ बोल्यो, “म थानै सची खेऊँ हूँ, चुंगी लेबाळा अर बेस्या परमेसर का राज म थारूँ पेल्या ज्यासी।

³² अंय्यां म इ ताँई खेर्यो हूँ क्युं क यहून्ना बतिस्मो देबाळो थानै धारमिक्‍ता को गेलो दिखाबा ताँई आयो पण थे बिको बिस्वास कोनी कर्या। पण चुंगी लेबाळा अर बेस्या बिको बिस्वास कर्या। पण थे बानै देखर बी थारा हियानै कोनी बदल्या अर नइ बिपै बिस्वास कर्या।

अँगूरा का बाग का ठेकेदारा की निती-कथा

³³ “एक मिसाल ओर सुणो: एक जमीदार हो। बो अँगूरा को बाग लगायो अर बिकै च्यारूमेर बाड़ बांदी। अर अँगूरा को रस काडबा ताँई खाडो खोदर एक घरट लगायो अर रूखाळी ताँई एक मचाण बणाई। अर अँगूरा का बागनै किराया प देर दूर दिसावर चलेगो।

³⁴ अर जद अँगूर लागबा की रुत आई जणा बो मालिक ठेकेदारा कनै आपका दासानै अधिकार क सागै भेज्यो क बे अँगूरा को हिस्सो लेर आवै।

³⁵ पण बे ठेकेदार बा दासानै पकड़र कयानै तो पिट्या, कया क भाठा मार्या अर कयानै ज्यानऊँ मार गेर्या।

³⁶ अर बो मालिक ओज्यु बा दासाऊँ बेत्ती दासानै अधिकार क सागै बाकन भेज्यो पण बे ठेकेदार बाकै सागै बी बोई बरताव कर्यो।

³⁷ आखीर म बो आपका बेटानै बाकन आ सोचर भेज्यो क बे इको तो मान करसी।

³⁸ पण जद बे ठेकेदार बिका बेटानै देख्या जणा आपसरी म खेबा लाग्या, ‘ओ तो बिको वारिस ह, आओ इनै मारद्‍यां अर इकी जायजादनै हड़पल्यां।’

³⁹ अर बे बिनै पकड़र बिकै धका मार'र अँगूरा का बागऊँ बारनै लेग्या अर मार गेर्या।

⁴⁰ जणा इब थे बताओ जद बो अँगूरा का बाग को मालिक आसी जणा बा ठेकेदारा क सागै काँई करसी?”

⁴¹ जणा बे ईसुऊँ बोल्या, “बे कुटिचर हा इ ताँई बो बानै बेरहमीऊँ मारसी अर अँगूरा को बाग दुसरानै ठेका प दे देसी जखा बिनै अँगूरा की रुत म बिकी पाँती दे।”

⁴² ईसु बाऊँ बोल्यो, “थे सास्तर को ओ बचन कोनी बाच्या के: “‘जि भाठानै चेजारा ख्याई जोगो कोनी समज्यो, बोई कूणा को भाठो निकळ्यो? अर ओ परबु कर्यो ह जखो आपणी आँख्या क सामै अचम्मो ह।’

⁴³ “इ ताँई म थारूँ खेऊँ हूँ, परमेसर को राज थारूँ खोस लिओ ज्यासी अर बा मिनखानै दे दिओ ज्यासी जखा बिकै खया गेल बरताव करै ह।

⁴⁴ अर जखो बी इ ढाड प पड़सी, बो टुकड़ा-टुकड़ा होज्यासी अर आ ढाड जिपै पड़सी बिनै पिस गेरसी।”

⁴⁵ परधान याजक अर बडका आ मिसालानै सुण्या जणा बे समजगा क ओ आपणा बारामई बोलर्यो ह।

⁴⁶ जणा बे ईसुनै पकड़बा की कोसिस करी। पण मिनखाऊँ डरग्या क्युं क मिनख ईसुनै परमेसर की खेबाळो मानता हा।