मत्ती 20 - जीवन को च्यानणो (सेकावाटी नया नियम की पोथ्या)

अँगूरा की बाड़ी का मजुर

¹ “ईस्बर नगरी को राज एक जमीदार की जंय्यां ह। बो एक दिन सुआरै उठर आपका अँगूरा का बाग म काम कराबा ताँई मजुरियानै ढुंढबा निकळ्यो।

² बो मजुरानै दिन की एक दिनार म पुक्‍तो कर काम करबा ताँई आपका अँगूरा का बाग म भेज दिओ।

³ नो बजैसीक बो जमीदार ओज्यु आपका घराऊँ निकळ्यो, अर बिनै बजार म क्युंक ठाला-भुला मिनख मिल्या।

⁴ अर बानै ओडायो, ‘थे माखाळा अँगूरा का बाग म जार काम प लागज्याओ म थानै बाजीब मजुरी देस्युँ।’

⁵ दोपारासिक अर तीनेक बजैसीक बो ओज्यु बजार गयो। अर बिनै ओर मजुर मिल्या बानै बी बो बंय्यांई खयो।

⁶ अर बो जमीदार पाचेक बजैसीक ओज्यु आपका घराऊँ निकळ्यो अर बिनै बजार म क्युंक मिनख अठिनै-बठिनै डोलता-फिरता मिल्या। बो बानै बुज्यो, ‘थे दिनभर ठाला-भुला क्याले हांडर्या हो?’

⁷ बे बोल्या, ‘म्हानै कोई मजुरी पई कोनी राख्यो।’ बो जमीदार बोल्यो, ‘थे माखाळा अँगूरा का बाग म जार काम प लागज्याओ।’

⁸ अर संज्या क अँगूरा का बाग को मालिक आर मुनिमनै बोल्यो, ‘मजुरियानै बुलार बाको हिसाब कर दे, सुण जखा सऊँ आखरी म आया हा बानै सऊँ पेली दिजे अर जखा पेली आया बानै सऊँ आखरी म दिजे।’

⁹ जणा बो बा मजुरियानै जखा पाचेक बजैसीक आया हा बानै एक-एक दिनार मजुरी दिनी।

¹⁰ जणा सऊँ पेली काम प लागबाळा मजुरिया आ सोचर आया क, ‘म्हानै तो आऊँ बेत्ती मिलसी’ पण बानै बी एक-एक दिनार मजुरी मिली।

¹¹ अर बे सीक्का तो ले लिआ पण जमीदार प बड़बड़ाबा लाग्या।

¹² अर खेबा लाग्या, ‘म्हें तो दिनभर तपती तावड़ी म काम कर्या अर बे मजुर तो एक घंटाई काम कर्या। अर थे म्हानै बाकै बराबरई मजुरी दिनी।’

¹³ जणा बो जमीदार बामैऊँ एक मजुरियानै खयो, ‘म तेरै सागै काँई बुरो कर्यो हूँ। जद म तनै काम प राख्यो हो जणा तनै मजुरी म एक दिनार म पुक्‍तो कोनी कर्यो हो के?

¹⁴ जखो थारो बणै ह बिनै लेज्या, अर म बानै बी जखा थारै पाछै आर काम कर्या हा थारा बराबर देबो चाऊँ हूँ।

¹⁵ मेरा धन क सागै म क्युं बी करूं इको हक मनै कोनी के? म चोखो मिनख हूँ इ ताँई तू जळै ह के?’

¹⁶ अंय्यांई जखा पिछै हीं बे आगै होसी अर जखा आगै हीं बे पिछै होसी।”

तीसरकै ईसु आपकी मोत क बारां म बोल्यो

¹⁷ ईसु आपका बारा चेला क सागै यरूसलेम जार्यो हो जणा बो बानै एक नाकै लेगो अर चालतो-चालतो खेबा लाग्यो,

¹⁸ “सुणो आपा यरूसलेम जार्यां हां बठै मिनख को बेटो धोकाऊँ परधान याजका अर धरमसास्तरी क हाता सूप्यो ज्यासी। बे बिनै मोत की सजा सुणार,

¹⁹ परमेसरनै नइ ध्यारबाळा मिनखा क हाता म सूप देसी अर बे बिको तमासो बणासी अर बिकै तड़ा मारसी। अर सुळी प चढासी। पण बो तीसरा दिन ओज्यु जिंदो होज्यासी।”

याकूब अर यहून्ना ताँई अरदास

²⁰ बि टेमई जब्दि का बेटा की माँ आपका बेटानै लेर ईसु कनै आई। अर धोक खार बोली, “म थारूँ क्युं माँगबो चाऊँ हूँ।”

²¹ जणा ईसु बिनै बुज्यो, “तू काँई चावै ह?” बा बोली, “थे मनै बचन द्‍यो, थे थारा राज म मेरा आ दोन्यु बेटा म एकनै थारा दाया अर दुसरानै बाया हात बिठास्यो।”

²² ईसु बोल्यो, “थे कोनी जाणो थे काँई माँगो हो? म जखी पिड़ा भोगबाळो हूँ, थे बिनै भोग सको हो के?” बे बोल्या, “हाँ भोग सकां हां।”

²³ ईसु खयो, “थे पक्काई भोगस्यो पण मेरै दाया-बाया बिठाबा को हक म कोनी दे सकूँ। मेरै दाया-बाया तो बेई बेठसी जिनै मेरो परम-पिता बिठासी।”

²⁴ जणा दसु चेला आ बात सुणर बा दोन्यु भाईड़ा प लाल-ताता होगा।

²⁵ जणा ईसु बानै कनै बुलार खेयो, “थे जाणो हो परमेसरनै नइ ध्यारबाळा मिनखा का परधान आपका निचला प हुकम चलार आ दिखावै ह क बे राजाऊँ बेसी हीं।

²⁶ पण थे अंय्यां मना करज्यो। ज थारै म कोई बडो होबो चावै बो सगळा को दास बणै।

²⁷ अर थारै म जखो बी सऊँ पेलो होबो चावै बो थारो दास बणै।

²⁸ थे मिनख का बेटा की जंय्यां बणो जखो सेवा-पाणी कराबा ताँई कोनी आयो। पण सेवा-पाणी करबा अर बोळासारा मिनखानै छुटाबा ताँई आपका पिराण देबा आयो ह।”

आँदानै आँख्या दिनी

²⁹ जद बे यरियो नगरीऊँ जार्या हा जणा बोळीसारी भीड़ बाकै गेल होलिनी।

³⁰ बठैई गेला म दो आँदा मिनख बेठ्या हा। अर जद बे सुण्या क ईसु अठैऊँ जार्यो ह। जणा बे जोरऊँ हेलो मार्यो, “परबु! दाऊद का बेटा म्हारै प दया करजे!”

³¹ बानै अंय्यां बोलतो देखर भीड़ बानै दकालर बोली, “चुपचाला रेह्ओ।” पण बे ओर बी जोरऊँ हेलो देबा लाग्या, “परबु! दाऊद का बेटा म्हारै प दया कर!”

³² जणा ईसु रूक'र बानै बुलायो अर बाऊँ बोल्यो, “थे काँई चाओ हो, म थारै ताँई करूं?”

³³ बे बोल्या, “परबु म्हें देखबो चावां हां।”

³⁴ ईसुनै बापै तरस आयो अर बे बाकी आँख्या क हात अड़ायो अर बे जदकी जदई देखबा लाग्या। अर ईसु क गेल होलिआ।