मत्ती 17 - जीवन को च्यानणो (सेकावाटी नया नियम की पोथ्या)

ईसु को रूप बदलबो

¹ छ दिना क पाछै ईसु आपका चेला मऊँ पतरस, याकूब अर बिका भाई यहून्नानै सागै लेर डूँगरी प गयो।

² बठै बा चेला क सामै ईसु को रूप बदलगो। बिको मुंडो बी सूरज की जंय्यां भळका मारबा लाग्यो अर गाबा चमकबा लाग्या।

³ अर बठै बाकै सामै एलिआ अर मूसा परगट होया, बे ईसुऊँ बतळावै हा।

⁴ पतरस बानै देखर ईसुऊँ बोल्यो, “ओ परबु आ कत्ती चोखी बात ह क आपा अठै हां! ज थे चाओ तो म अठै तीन पंडाळ बणा द्‍युँ एक थारै ताँई एक मूसा ताँई अर एक एलिआ ताँई।”

⁵ पतरस अंय्यां बोलर्योई हो क एक भळकतो बादळ आर बानै ढक लिओ अर बि बादळ मऊँ हेलो आयो, “ओ मेरो लाडलो बेटो ह। जिऊँ म बोळो राजी हूँ थे इकी मानो।”

⁶ अर चेला ओ हेलो सुणर बोळा डरग्या अर उंदा मुंडै गिरगा।

⁷ जणा ईसु बाकै हात अड़ार ओडायो, “खड़्या होवो डरो मना।”

⁸ अर बे उठर देख्या जणा बानै बठै ईसुनै छोडर कोईबी कोनी दिख्यो।

⁹ अर जद बे डूँगरीऊँ तळै आर्या हा जणा ईसु बा तीन्यानै चेतार हुकम दिओ, “जोक्यु बी थे देख्या हो बिकै बारां म कोईनैई क्युंई मना खिज्यो जद ताँई क मिनख को बेटो मरेड़ा मऊँ ओज्यु जीवतो नइ होज्या।”

¹⁰ जणा चेला बिनै बुज्या, “यहूदि धरमसास्तरी क्याले बोलै ह क, ‘एलिआ को पेल्या आबो पक्को ह?’”

¹¹ ईसु बाऊँ बोल्यो, “आ सची ह क्युं क परमेसर कोल बचन कर्यो ह क मसी क आबा ताँई लोगा का हियानै त्यार करबा एलिआ आसी।

¹² पण म थारूँ खेऊँ हूँ एलिआ तो आरई गयो। पण आपणा नेता बिनै देखर बी कोनी पिछाण्या अर जंय्यां बे बिकै सागै करबो चावा हा बंय्यांई बिकै सागै कर्यो। अर बे मिनख का बेटा क सागै बी बंय्यांई करसी।”

¹³ पण चेला समज्या क, “ओ आपानै बतिस्मो देबाळा यहून्ना क बारां म बोलर्यो ह।”

ईसु छोरा मऊँ ओपरी बलाय काडी

¹⁴ जद ईसु भीड़ कनै आयो जणा बठै एक मिनख बिकन आयो अर धोक खाई।

¹⁵ अर बोल्यो, “हे परबु थे माखाळा छोरा प दया करो! बिनै जद बी मिरगी आवै ह जणा बो बोळो तड़फै ह अर बो आग अर पाणी म गिर जावै ह।

¹⁶ म बिनै थारा चेला कनै ल्याओ हो पण बे बिनै निरोगो कोनी कर सक्या।”

¹⁷ ईसु बिकी बात सुणर बोल्यो, “अरै भेम करबाळो अर कुटिचर मिनखो, म कद ताँई थारै सागै रेहस्युं? अर थानै भोगस्युं? बि छोरानै मेरै कनै ल्याओ।”

¹⁸ ईसु बि ओपरी बलायनै बि छोरा मऊँ निकळबा ताँई दकाल्यो अर बा बलाय बिमैऊँ निकळगी अर बो छोरो बि घड़ीई निरोगो होगो।

¹⁹ अर जद ईसु एकलो हो जणा चेला बिनै बुज्या, “म्हें बि बलायनै क्युं कोनी काड सक्या?”

^20-21 ईसु बाऊँ बोल्यो, “थारै म बिस्वास की कमी ही। म थारूँ सची खेऊँ हूँ ज थारै म राई क दाणो जत्तो बी बिस्वास होसी अर थे इ डूँगरऊँ बोलस्यो अठैऊँ हटर बठै चल्योजा जणा बो चल्यो ज्यासी। थारै ताँई क्युंई बी अणहोतो कोनी।”

ईसु ओज्यु आपकी मोत क बारां म बतायो

²² ईसु आपका चेला क सागै गलिल म गयो अर बानै खयो, “मिनख को बेटो मिनखा क हाता म सूप्यो जाबाळो ह।

²³ बे बिनै मार गेरसी पण परमेसर तीसरा दिन बिनै ओज्यु जिंदो कर देसी।” चेला आ बात सुणर दुखी होया।

मनदर को कर चुकाबो

²⁴ जद बे कफरनूम म आया जणा मनदर को कर लेबाळा, पतरसनै बुज्यो, “थारो गरूजी मनदर को कर देवै ह के?”

²⁵ पतरस बोल्यो, “हाँ देवै ह।” अर जद पतरस घरा आयो जणा बिकै कर हाळी बात चलाबाऊँ पेलीई ईसु बिनै बोल्यो, “ओ समोन तू काँई सोचै ह? इ धरती का राजा किऊँ-किऊँ लगान लेवै ह? आपका बेटाऊँ नहिस पराया मिनखाऊँ।”

²⁶ पतरस बोल्यो, “परायाऊँ लेवै ह।” अंय्यां सुणर ईसु बोल्यो, “जणा तो बेटा कर कोनी देवीं।

²⁷ पण आपा आको अपमान कोनी करां इ ताँई दरिआव क किनारै काँटो गेर अर जखी पेली मछी हात आवै बिको मुंडो पा'ड़र देखजे तनै बिकै मुंडा म एक सीक्को मिलसी। बिनै तेरै अर मेरै ताँई कर म दे दिजे।”