मत्ती 16 - जीवन को च्यानणो (सेकावाटी नया नियम की पोथ्या)

ईस्बर नगरी की सेलाणी की माँग।

¹ फरिसी अर सदुकी ईसु कनै आया। क्युं क बे ईसुनै फसाबो चावा हा इ ताँई बे ईसुनै बोल्या, “थानै परमेसर भेज्यो ह इ बातनै साबित करबा ताँई म्हानै कोई ईस्बर नगरी की सेलाणी दिखाओ।”

² ईसु बाऊँ बोल्यो, “जद सूरज ढळज्यावै ह जणा थे अकासनै लाल देखर खेवो हो मोसम चोखो रेह्सी।

³ अर दिन उगताई जद थे अकासनै काळो-पिळो देखो जणा बोलो हो आज तो बरसात आसी। थे अकासनै देखर मोसम को हाल तो बताद्‍यो हो पण आ दिना म परमेसर काँई करर्यो ह बिनै कोनी समज सको।

⁴ इ जुग की बुरी अर कुकरमी पिडी ईस्बर नगरी की सेलाणी माँगै ह। पण योना की बातानै छोडर कोईबी सेलाणी कोनी दिखाई ज्यासी।”

सदुकी अर फरिसीया को खमिर

⁵ ईसु का चेला दरिआव क परलै नाकै चलेग्या पण बे आपकै सागै रोटी लेबो भूलगा।

⁶ जणा ईसु बानै चेतार ओडायो, “थे फरिसी अर सदुकीया का खमिरऊँ बचर रेहज्यो।”

⁷ पण बे आपसरी म सोचबा लाग्या क, “ईसु आ बात इ ताँई बोलै ह क्युं क आपा रोटी कोनी ल्याया।”

⁸ ईसु बाकी इ बातनै भापगो अर बाऊँ बोल्यो, “थोड़ो बिस्वास राखबाळो थे आ क्युं सोचो हो क म्हें रोट्या लेबो भूलगा?

⁹ थारै हाल बी क्युंई पलै कोनी पड़ी के? थानै याद कोनी के, जद म पाच झार मिनखानै पाच रोट्याऊँ धपायो हो जणा बचेड़ी रोट्या का टुकड़ा का थे कत्ता चोल्या भर'र उठाया हा?

¹⁰ अर जद म च्यार झार मिनखानै सात रोट्याऊँ धपायो हो जणा बचेड़ी रोट्या का टुकड़ा का थे कत्ता चोल्या भर'र उठाया हा?

¹¹ थारै क्युंई पलै कोनी पड़ै, म थानै रोट्या ताँई कोनी पण थानै फरिसीया अर सदुकीया की बातानै नइ मानबा ताँई बोलुँ हूँ। क्युं क आकी बाता खमिर की जंय्यां काम करै ह।”

¹² जणा जार बाकै पलै पड़ी क ईसु बानै रोट्या ताँई कोनी खियो पण फरिसीया अर सदुकीया की गळत सीखऊँ बचबा ताँई ओडायो ह।

पतरस बोल्यो ईसुई मसी ह

¹³ ईसु जद कैसरिया फलिपी नगरी म आयो जणा बो चेलानै बुजबा लाग्यो क, “लोग मेरा बारां म काँई खेवै ह क म कूण हूँ?”

¹⁴ बे बोल्या, “कई तो थानै बतिस्मो देबाळो यहून्ना, कई एलिआ, कई यरमिआ अर कई परमेसर की खेबाळा मऊँ एक खेवै ह।”

¹⁵ जणा ईसु बानै बोल्यो, “पण थे मनै काँई खेवो हो?”

¹⁶ समोन पतरस बोल्यो, “थे सऊँ सक्‍तिसाली अर जीवता परमेसर का बेटा मसी हो।”

¹⁷ ईसु अंय्यां सुणर बिनै बोल्यो, “ओ समोन योना का बेटा तू भागहाळो ह क्युं क आ बात तू कोई मिनख की सुणर कोनी बोली पण तेर प ईस्बर नगरी म रेह्बाळो मेरो परम-पिता परगट करी ह।

¹⁸ म तेरूँ आबी बोलुँ हूँ तू पतरस ह जिको मतबल ढाड होवै ह। तू निम की जंय्यां होसी जिपै म मेरी बिस्वासी मंडळी बणास्युं अर इपै पताळ को जोर कोनी चालसी।

¹⁹ म तनै परमेसर का राज की ताळ्या दि ह, जिऊँ जोक्यु तू धरती प बंद करसी बिनै परमेसर ईस्बर नगरी म बंद कर देसी अर जोक्यु तू धरती प खोलसी बिनै परमेसर ईस्बर नगरी म बी खोल देसी।”

²⁰ आ बाता क पाछै ईसु आपका चेलानै चेतार ओडायो क थे कोईनैई मना खिज्यो क म मसी हूँ।

ईसु आपकी मोत क बारां म चेलानै बतायो

²¹ बि टेमई ईसु चेलानै बताबा लाग्यो क, “मनै यरूसलेम जाणो पड़सी अर बठै परधान याजक, यहूदि नेता अर सास्तरानै सीखाबाळा मनै बोळो दुख देसी, अर मार गेरसी पण म तीसरा दिन ओज्यु जिंदो हो जास्युं।”

²² आ बात सुणर पतरस बानै एकला म लेगो अर दकालर बोल्यो, “परबु थारै सागै अंय्यां कदैई नइ होवै।”

²³ ईसु पतरस कानि मुड़र बोल्यो, “सेतान! मेरै कनैऊँ चल्योजा, तू मनै अंय्यां करबाऊँ रोकबो चावै ह, क्युं क तू परमेसर की जंय्यां कोनी सोचै पण मिनखा की जंय्यां सोचै ह।”

²⁴ ईसु चेलानै खेबा लाग्यो, “जखो बी मेरै गेल होबो चावै ह बो खुदनै तज'र, आपकी सुळी उठार मेरै गेल होले।

²⁵ जखो बी खुदका पिराण बचाबो चावै ह बो बिनै खोसी अर जखो बी मेर ताँई खुदका पिराण तजसी, बो आपका पिराण बचासी।

²⁶ अर ज कोई मिनख आपका पिराणा की हानी उठार सगळा जगतनै जीत ले जणा बिनै काँई फाईदो? कोई चिज क बदला म मिनख खुदका पिराण दे सकै ह के?

²⁷ जद मिनख को बेटो ईस्बर नगरी दुता क सागै परम-पिता की मेमा म आसी जणा बो मिनखानै बाका कामा गेल फळ देसी।”

²⁸ ईसु बाऊँ बोल्यो, “म थानै सची खेऊँ हूँ अठै खड़्या मिनखा मऊँ कई तो अंय्यां का हीं क बे जद ताँई मिनख का बेटानै बिका राज म आतो नइ देखलीं जद ताँई बे कोनी मरै।”