मत्ती 15 - जीवन को च्यानणो (सेकावाटी नया नियम की पोथ्या)

बडका का रिती-रिवाज

¹ यरूसलेमऊँ क्युंक फरिसी अर सास्तरानै सीखाबाळा आर ईसुऊँ बुज्या,

² “थारा चेला म्हारा बूडा बडका की रिती-रिवाजनै क्युं कोनी मानै। बे रोटी खाबाऊँ पेली आपणी रिती गेल हात क्युं कोनी धोवै?”

³ ईसु बाऊँ बोल्यो, “थे थारा बडका का रिती-रिवाजनै मानर परमेसर का हुकमानै तोड़ द्‍यो हो।

⁴ क्युं क परमेसर बोल्यो ह, ‘थे थारा माँ-बापा को मान करज्यो। अर ज कोई मिनख आपका माँ-बापा को मान कोनी करै बिनै मार देणो चाए।’

⁵ पण थे मिनखानै सीखाओ हो क, ‘ज थारा माँ-बाप थारूँ क्युं माँगै जणा बाऊँ खेवो क बा तो म परमेसरनै चढा दिनी ह।’

⁶ इ बात की बजेऊँ बिनै बिका माँ-बाप को मान करबा की जुर्त कोनी अंय्यां कर थे थारा रिती-रिवाजऊँ परमेसर का हुकमानै कोनी मानो।

⁷ ओ ढोंग्यो थारा बारां म परमेसर की खेबाळो यसाया सई खयो ह,

⁸ “अ मिनख होठाऊँ तो मेरो मान करै ह; पण आको हियो मेरूँ बोळो दूर ह।

⁹ अ बेकार म मेरी भगती करै ह, लोगा का आदेसानै धरम की सीख बोलर सीखावै ह।”

मिनखनै सूगलो करबाळी बाता

¹⁰ बिकै पाछै ईसु भीड़नै आपकै कनै बुलायो अर खेबा लाग्यो, “सुणो अर समजो।

¹¹ मिनख मुंडा म जोक्यु बी खावै ह बो बिनै सूगलो कोनी करै, पण बिका मुंडाऊँ निकळबाळा सबद बिनै सूगलो करै ह।”

¹² जणा चेला ईसु कनै आर खेबा लाग्या, “गरूजी थानै बेरो ह के फरिसी थारी बाताऊँ चिड़गा?”

¹³ जणा ईसु बोल्यो, “जि बोजानै मेरो ईस्बर नगरी परम-पिता कोनी लगायो बो उपाड़्यो ज्यासी।

¹⁴ बाकी बातई मना करो क्युं क बे आँदा मिनखा का नेता बण्या फिरै ह। अर ज आँदो आँदानै गेलो दिखावै जणा बे दोन्यु खाडा म जा पड़ै।”

¹⁵ पतरस बोल्यो, “गरूजी म्हानै बि सूगलो करबाळी बात की मिसाल को मतबल समजाओ।”

¹⁶ ईसु बोल्यो, “थे इब ताँई अणभोळ म पड़्या हो के?

¹⁷ थे कोनी जाणो मुंडा म खाईड़ी चिजा हिया म कोनी जावै पण पेट क मांयनै जावै अर निकळ जावै ह।

¹⁸ पण जखी बाता मिनखा का मुंडाऊँ बारनै निकळै ह बे बाता बाका हियाऊँ आवै ह अर बेई मिनखानै सूगलो करै ह।

¹⁹ क्युं क हियाऊँ बुरा बिचार, हत्या, रंडीबाजी, कुकरम, चोरी, झूठी गुवाई अर बुराई निकळै ह।

²⁰ बिना हात धोया रोटी खाबो मिनखनै सूगलो कोनी करै पण अ बाताई मिनखा का हियानै सूगलो करै ह।”

कनानी कूणबा की लूगाई को बिस्वास

²¹ ईसु बठैऊँ चालर सूर अर सैदा गयो।

²² बठै एक कनानी कूणबा की लूगाई ईसुनै हेलो देर बोली, “परबु दाऊद का बेटा, मेर प दया कर! मेरी छोरीनै ओपरी बलाय दिन घालरी ह।”

²³ पण ईसु बिऊँ क्युंई कोनी बोल्यो, जणा ईसु का चेला ईसु कनै आया अर अरदास कर खया, “आ लूगाई आपणै गेल-गेल कूकती आरी ह इनै भेजो।”

²⁴ जणा ईसु बि लूगाईऊँ बोल्यो, “मनै परमेसर खाली इजरायल का मिनखा ताँई भेज्यो ह। बे गुमेड़ी लल्ड्या की जंय्यां ह क्युं क बे परमेसर का राज को गेलो भूलगा।”

²⁵ जणा बा लूगाई ईसु क आगै गोडा टेक अर हात जो'ड़र खई, “ओ परबु मेरी मदद करो।”

²⁶ ईसु बिऊँ बोल्यो, “टाबरा की रोटी गंडक्ड़ा क आगै गेरबो चोखो कोनी।”

²⁷ जणा बा बोली, “आ तो सई बात ह परबु, पण मालिक की थाळीऊँ बचेड़ी झूठ गंडक्ड़ाई तो खावै ह।”

²⁸ ईसु बिकी इ बातनै सुणर बोल्यो, “हे लूगाई तू बोळो बिस्वास करै ह। इ ताँई जा जंय्यां तू चावै ह बंय्यांई तेरै सागै होवै।” अर बिकी छोरी जदकी जदई निरोगी होगी।

बोळासारा रोगलानै निरोगो करबो

²⁹ ईसु बठैऊँ गलिल दरिआव क किनारै गयो अर डूँगरी प चढर बेठगो।

³⁰ अर मिनखा की भीड़ बिकन भेळी होती जारी ही। कोई तो आपका लंगड़ा लुलानै, कोई आँदानै, कोई गुँगा-बोळानै, अर कई भात-भात का रोगलानै बिकन ल्यार बिकै पगा म गेरर्या हा अर बो बा सगळा रोगलानै निरोगो करो हो।

³¹ लंगड़ा-लुला चालै लाग्या, बैरा सुणबा लाग्या, गुँगा बोलबा लाग्या अर आँदा देखबा लाग्या। आ कामानै देखर बे सगळा मिनख ताजूब कर्या अर इजरायल का परमेसर की जे-जैकार करी।

च्यार झार मिनखा को पेट भर्यो

³² ईसु चेलानै कनै बुलार बानै बोल्यो, “मनै इ भीड़ प तरस आर्यो ह, क्युं क अ मिनख तीन दिनाऊँ मेरै सागै हीं अर आकै कनै खाबा ताँई बी क्युंई कोनी म आनै भूखा पेट बिदा कोनी करूं, क्युं क ज म आनै अंय्यां भेजस्युं जणा अ भूखा मरता चकर खार गिर पड़सी।”

³³ चेला बोल्या, “इ उजाड़ म अत्ता मिनखा को पेट भरबा ताँई रोटी कठैऊँ आसी?”

³⁴ ईसु बानै बुज्यो, “थारै कनै कत्ती रोट्या ह?” बे बोल्या, “सात रोटी अर क्युंक छोटी मछ्या ह।”

³⁵ जणा ईसु बा मिनखानै जमीन प तळै बेठबा ताँई हुकम दिओ।

³⁶ अर बा सात रोट्या अर मछ्यानै लेर परमेसर को धनेवाद कर्यो। अर बानै तोड़-तो'ड़र चेलानै देतो गयो अर चेला लोगानै परोसता गया।

³⁷ सगळा मिनख खार धापगा अर चेला रोट्याऊँ भरेड़ा सात चोल्या बठैऊँ उठाया।

³⁸ जदकी खाबाळा म लूगाया अर टाबरा क अलावा च्यार झार तो मोट्यार-मोट्यारई हा।

³⁹ ईसु बा मिनखानै बिदा करबा क पाछै न्याव म बेठर मगदन दिसावर चलेगो।