मत्ती 12 - जीवन को च्यानणो (सेकावाटी नया नियम की पोथ्या)

अरामहाळा दिन क बारां म सुवाल

¹ यहूदिआ मिनखा क अरामहाळा दिन ईसु अर बाकाळा चेला खेता क मांयनैऊँ जार्या हा जणा चेलानै भूख लागी इ ताँई बे खेत मऊँ ग्युं की बाळ्या तोड़-तो'ड़र खाबा लाग्या।

² फरिसी बानै अंय्यां करता देख ईसुनै बोल्या, “थारा चेला अरामहाळा दिन बो काम क्युं करै जखो आपणा नेम-कायदा म बरजेड़ो ह।”

³ ईसु बाकी बाता सुणर बानै बोल्यो, “थे सास्तर म ओ कोनी बाच्या क जद दाऊद अर बिकाळा सिरी भूखा हा जणा बे काँई कर्या हा?

⁴ बो आपका सात्या क सागै परमेसर का तम्मू म जार परमेसर क चढाईड़ी रोट्या खाई जानै याजक सिवाय ओरनै बरजेड़ो हो।

⁵ थे मूसा का नेम-कायदा म ओ कोनी बाच्या क अरामहाळा दिन मनदर का याजकई बिमै अरामहाळा दिन का नियमनै तोड़ै ह जणा बी बानै कोई क्युंई कोनी बोलै।

⁶ पण म थानै खेऊँ हूँ अठै जखो ह बो मनदरऊँ बी बडो ह।

⁷ ज थे सास्तरा म जखो मांडेड़ो ह बिकै बारां म जाणता तो थे ओ बी जाणता की म मिनखाऊँ ओ चाऊँ हूँ क बे दया करीं नइ क ज्यानबरा की बलि चढावीं। जिऊँ थे बा मिनखानै जखा खरा हीं दोसी नइ बताओ।

⁸ क्युं क मिनख को बेटो अरामहाळा दिन को बी परबु ह।”

हवा भेयड़ा मिनख का हातनै निरोगो करबो

⁹ ईसु बठैऊँ चालर यहूदि मिनखा की अरदास करबाळी झघा गयो।

¹⁰ बठै एक मिनख हो बिकै एक हात क हवा भेगी ही, बठै क्युंक मिनख हा बे ईसु प दोस लगाबा ताँई बुज्या, “अरामहाळा दिन खिनै निरोगो करबो ठिक ह के?”

¹¹ ईसु बानै बोल्यो, “म थानै बुजूँ हूँ जिकै कनै एक लल्डी हो अर बा खाडा म पड़ज्या जणा थे अरामहाळा दिन बिनै बारनै कोनी काडो के?

¹² जदकी मिनख को मोल तो लल्डीऊँ बेत्ती ह। इ ताँई अरामहाळा दिन भलाई करबो चोखो ह।”

¹³ जणा ईसु बि हवा भेयड़ा मिनखनै बोल्यो, “तेरा हातनै सिदो करले।” बो हातनै सिदो कर लिओ अर बिको हात दुसरा हात की जंय्यां पेली हो बंय्यांई निरोगो होगो।

¹⁴ जणा बे फरिसी बठैऊँ चलेग्या अर ईसुनै कंय्यांसिक मारां इकी साजिस रचबा लाग्या।

परमेसर आपका दासनै टाळ्यो

¹⁵ ईसु बाकी चाल समजगो अर बठैऊँ चलेगो। पण भीड़ बाकै गेल होलिनी। ईसु सगळा रोगलानै निरोगो कर्यो।

¹⁶ ईसु बा मिनखानै चेतायो, “थे मनै परगट मना करो।”

¹⁷ ओ इ ताँई होयो जंय्यां क यसाया परमेसर की खेबाळो जखो बचन खया ह बे पूरा होवै,

¹⁸ “देखो ओ मेरो दास ह जिनै म टाळ्यो हूँ, ओ मेरो लाडलो ह, जिऊँ म बोळो राजी हूँ। म मेरी पबितर आत्मा इकै उपर उतारस्युं, अर ओ धरती का सगळा मिनखा म हेलो पाड़सी क परमेसर ईमानदारीऊँ बाको न्याय करसी।

¹⁹ ओ नइ तो खिऊँ लड़सी, अर नइ गळी-कुचळ्या म कूकसी।

²⁰ जद ताँई बो धरती प धारमिक्‍ता नइ फेलादे बो खिनई नास कोनी करै। चाए कोई अटकेड़ी पान्नी की जंय्यां हो नहिस दिआ की बुत्तबाळी लोय की जंय्यां कमजोर हो।

²¹ अर धरती का सगळा मिनख बिका नाम पई आस लगासी।”

ईसु अर बालजबुल

²² लोग ईसु कनै एक मिनखनै ल्याया जिमै फेंट होईड़ी ही जिकी बजेऊँ बो आँदो अर गुँगो हो अर ईसु बिनै निरोगो कर दिओ जिकी बजेऊँ बो देखबा अर बोलबा लागगो।

²³ लोग इनै देखर ताजूब म पड़गा अर खेबा लाग्या क, “ओ दाऊद को बेटा मसी ह?”

²⁴ पण फरिसी बाकी बातानै सुणर खेबा लाग्या, “ईसु भूता का नाथ बालजबुल की सक्‍तिऊँ बानै काडै ह।”

²⁵ ईसु बाकी हिया की बातानै जा'णर बाऊँ बोल्यो, “जि राजपाट म फूट पड़ज्या जणा बिको नास होज्यावै ह। अर जि नगरी नहिस घर म फूट पड़ज्या जणा बो कंय्यां बस्यो रेह सकै ह?

²⁶ अर ज सेतान सेतान कोई बेरी होबा लाग्यो जणा बिको राज कंय्यां बण्यो रेह्सी?

²⁷ अर ज म बालजबुल की मददऊँ ओपरी बलायानै भगाऊँ, जणा थाकाळा चेला बी बालजबुल की सक्‍तिऊँ भगाता होगा? जणा इ बात ताँई बेई थानै गळत साबित करसी।

²⁸ अर ज म परमेसर की पबितर आत्माऊँ ओपरी बलायानै भगाऊँ, जणा इऊँ आ साबित होवै ह क परमेसर को राज थारै सांकड़ैई ह।

²⁹ ज कोई मिनख कोई तगड़ा मिनख को घर लूटबो चावै ह जणा पेली बि घर का तगड़ा मिनखनै बांदसी बिकै पाछैई बि घरनै लूट सकै ह।

³⁰ जखो मेरै सागै कोनी बो मेरै खिलाप अर जखो मिनखानै मेरा चेला होबा ताँई भेळो कोनी करै बो बानै मेरूँ दूर लेज्यावै ह।

³¹ इ ताँई म थानै खेऊँ हूँ मिनखा का मुंडाऊँ करेड़ी सगळी बुराई अर पाप माफ हो सकीं हीं, पण जखो पबितर आत्मा की बुराई करै ह बिनै माफी कोनी।

³² अर ज कोई मिनख का बेटानै भलो-बुरो खेवै ह जणा बिनै परमेसर माफ कर सकै ह। पण जखो मिनख पबितर आत्मा क खिलाप क्युं खेवै ह जणा बिनै नइ तो इ जुग म अर नइ आबाळा जुग म माफी ह।

झिसो पेड़ भिसो फळ

³³ “थे जाणो हो ज थानै फळ खाणो ह तो थानै फळ कोई दरख्त लगाणो पड़सी, क्युं क हर दरख्त क खाबाळा फळ कोनी लागै। अर दरख्त आपका फळाऊँ पिछाण्यो जावै ह।

³⁴ हे सपोलो! जद थेई बुरा हो जणा थारै मुंडाऊँ चोखी बाता कंय्यां बोलस्यो? क्युं क जखो मांयनै होसी बोई बारनै आसी।

³⁵ चोखो मिनख आपका चितऊँ चोखी बात काडै अर बुरो बुरीई चितै।

³⁶ पण न्यायहाळै दिन सगळा मिनखानै आपकी खेईड़ी बुरी बाता को लेखो देणो पड़सी।

³⁷ क्युं क तेरी खेईड़ी बाता की बजेऊँई तनै दोसी नहिस निरदोस साबित कर्यो ज्यासी।”

ईसुऊँ ईस्बर नगरी की सेलाणी की माँग

³⁸ सास्तरानै सीखाबाळा अर फरिसी ईसु कनै आया अर बे ईसुऊँ बोल्या, “ओ गरूजी थे म्हानै कोई ईस्बर नगरी की सेलाणी दिखाओ।”

³⁹ पण ईसु बाऊँ बोल्यो, “इ जुग की बुरी अर कुकरमी पिडी ईस्बर नगरी की सेलाणी माँगै ह। पण म थानै खेऊँ हूँ योना परमेसर की खेबाळा की बातानै छोडर कोई सेलाणी आ लोगानै कोनी दिखाई ज्यासी

⁴⁰ जंय्यां योना तीन दिना ताँई मछी क पेट म रिह्यो हो बंय्यांई मिनख को बेटो बी तीन दिना ताँई धरती तळै रेह्सी।

⁴¹ जद न्याय होसी बि दिन निनवे नगरी का मिनख इ जुग का मिनखा क सागै खड़्या होसी अर आपै दोस लगासी क्युं क निनवे का मिनख योना को परचार सुणर पापऊँ तौबा कर लिआ हा। पण अठै जखो ह बो योनाऊँ बी बडो ह।

⁴² सिबा की राणी न्यायहाळै दिन इ पिडी प दोस मंढसी क्युं क बा धरती का इ कूणाऊँ बि कूणा म सुलेमान कनै ज्ञान लेबा गई ही पण अठै जखो ह बो सुलेमानऊँ बी बोळो बडो ह।

ओपरी बलाय को पाछो आबो

⁴³ “जद कोई सूगली ओपरी बलाय मिनख मऊँ निकळै ह। जणा बा अराम ढुंढती उजाड़ म डोलै अर जद बिनै बठैबी अराम कोनी मिलै।

⁴⁴ जणा बा खेवै ह म मेरा पुराणीया घर म जिमैऊँ म आई हूँ पाछी चली जास्युं। अर बा पाछी आवै जणा बो बिनै भार्यो-झाड़्यो अर जच्यो-जचायो लाधै।

⁴⁵ जणा बा जार खुदऊँ बी सात बुरी ओपरी बलायानै आपकै सागै कर बिकै मांयनै बड़ जावै। अर बि आदमी की दसा पेलड़ीऊँ घणी बुरी होज्यावै। इ जुग का मिनखा की दसा बी अंय्यांई होसी।”

ईसु की माँ अर भाई

⁴⁶ जद ईसु भीड़ऊँ बतळार्यो हो जणा बठै बाकी माँ अर भाईड़ा आर बारनै खड़्या होगा। बे ईसुऊँ बातचित करबा ताँई बिनै उडिकबा लाग्या।

⁴⁷ जणा भीड़ मऊँ कोई मिनख ईसुनै बोल्यो, “थारी माँ अर भाईड़ा बारनै खड़्या हीं बे थारूँ बाताचिता करबो चावै ह।”

⁴⁸ ईसु बिकी इ बातनै सुणर बिनै बोल्या, “कूण मेरी माँ ह अर कूण मेरो भाई ह?”

⁴⁹ अर ईसु आपका चेला कानि हात कर बोल्यो, “देखो अ मेरी माँ अर भाईड़ा हीं।

⁵⁰ क्युं क जखा बी मिनख मेरा ईस्बर नगरी परम-पिता की इंछ्या गेल चालै ह बेई मेरा सागे भाई-भाण अर माँ ह।”