मत्ती 11 - जीवन को च्यानणो (सेकावाटी नया नियम की पोथ्या)

ईसु अर बतिस्मो देबाळो यहून्ना

¹ ईसु आपका बारा चेलानै हुकम देबा क पाछै बठैऊँ परचार करबा अर सीख देबा ताँई नगर्या म चलेगो।

² जद यहून्ना काळ-कोठड़ी म मसी का कामा की चरचा सुणी जणा बो आपका चेलानै ईसु कनै आ बुजबा ताँई भेज्यो,

³ “थे बेई हो के जखा आबाळा हा नहिस म्हें ओरनै उडिकां?”

⁴ ईसु बाऊँ बोल्यो, “थे जोक्यु बी सुणो अर देखो हो बो सक्यु यहून्नानै जार बताद्‍यो।

⁵ आँदा ओज्यु देखीं हीं, लंगड़ा चालीं हीं, कोढ्या को कोढ धोयो जार्यो ह। बैरा सुणर्या हीं, मुरदानै जीवायो जार्यो ह अर गरीबा म चोखा समचार को परचार कर्यो जार्यो ह।

⁶ भागहाळा ह बे जखा मेरै प बिस्वास करै ह।”

⁷ अर जद यहून्ना का चेला बठैऊँ चाल पड़्या जणा ईसु लोगानै बतिस्मो देबाळा यहून्ना क बारां म खेबा लाग्यो, “थे उजाड़ म काँई देखबा गया हा, भाळऊँ हालता कूचानै?

⁸ जणा काँई देखबा गया हा? के किमती गाबा पेरेड़ा मिनखनै? सुणो जखा किमती गाबा पेरीं हीं बे राजा का म्हेलमाळ्या म रेह्‍वै।

⁹ जणा काँई देखबा गया हा? के परमेसर की खेबाळानै, पण म थानै बोलुँ हूँ जिनै थे देखबा गया हा बो परमेसर की खेबाळाऊँ बी बढकै ह।

¹⁰ ओ बो ह जिकै बारां म पबितर सास्तर म मंडर्यो ह: “देख म मेरा हलकारानै अधिकार क सागै तेरै अगाऊ भेजूँ हूँ। जखो लोगा का हियानै तेरै ताँई त्यार करसी।”

¹¹ “म थानै सची खेऊँ हूँ लूगाईऊँ जलमेड़ा सगळा मिनखा म बतिस्मो देबाळा यहून्नाऊँ बडो कोई मिनख कोनी जलम्यो। पण ईस्बर नगरी का राज म छोटाऊँ छोटो बी बिऊँ बडो ह।

¹² बतिस्मो देबाळा यहून्ना की टेमऊँ लेर परमेसर का राज क सागै मारपीट करी जावै ह अर बे मारपीट करबाळा जोरामादी बि राजनै लेबा की कोसिस करै ह।

¹³ यहून्ना की टेम ताँई सगळा परमेसर की खेबाळा अर मूसा का नेम-कायदा परमेसर को समचार देता हा।

¹⁴ ज थारै मऊँ कोई इ बातनै मानबो चावै क आबाळो एलिआ ओई ह, जणा बो इनै मानले।

¹⁵ जिकै कान ह बो बानै खोलल्यो।

¹⁶ म इ पिडी का मिनखा की बराबरी किऊँ करूं? अ तो गुवाड़ म बेठ्या बा टाबरा की जंय्यां ह जखा एक दुसरानै हेलो देर खेवै ह।

¹⁷ ‘म्हें थारै ताँई बाजो बजाया पण थे नाच्याई कोनी। म्हें थारै ताँई बार घाली पण थे रोयाई कोनी।’

¹⁸ बतिस्मो देबाळो यहून्ना आयो बो ओरा की जंय्यां नइ तो चोखो खातो हो अर नइ अँगूरी पीतो हो जणा बी लोग खया इकै मांयनै ओपरी बलाय ह।

¹⁹ मिनख को बेटो ओरा की जंय्यां खातो-पीतो आयो अर बे खेवै ह, ‘ओ पेटू अर दारूड़ो ह चुंगी लेबाळा अर पाप्या को भाईलो ह।’ परमेसर की बुदी प चालबाळा आपका करमाऊँ बिकी बुदीनै सई साबित करै ह।”

परमेसर की सुणाई नइ करबाळी नगर्या प धिक्कार

²⁰ ईसु बा नगर्यानै दिदकारबा लाग्यो जाकै मांयनै बे बोळासारा चमत्कार कर्या हा। क्युं क बठै का मिनख आपका पापऊँ तौबा कोनी कर्या।

²¹ “खुराजीन अर बेतसदा म रेह्बाळा मिनखा प हाय ह अत्ता-अत्ता ताजूब का काम आ नगर्या म कर्या गया, ज अ काम सूर अर सैदा नगर्या म कर्या जाता जणा बठै का मिनख बोरी का गाबा पेर'र खुद प राख बुरकार, कदकाई दिखा देता क बे पापऊँ तौबा कर लिआ हीं।

²² पण न्यायहाळै दिन थारी दसा सूर अर सैदाऊँ बोळी बेत्ती बुरी होसी।

²³ अर कफरनूम म रेह्बाळो थे के राजी होवो हो, की ईस्बर नगरी जास्यो? पण थानै तो सिदो नरक म पटक्यो जासी। क्युं क थारै मांयनै जखा चमत्कार कर्या गया हा बे सदोम नगरी म कर्या जाता जणा बा नगरी आज ताँई भसी रेह्ती।

²⁴ पण म थारूँ खेऊँ हूँ न्यायहाळै दिन थारा मिनखा की दसा सदोम नगरी का मिनखाऊँ बेत्ती खराब होसी।”

ईसुनै मानबाळानै सुक-स्यांती मिलसी

²⁵ बठैई ईसु बोल्यो “ओ परम-पिता ईस्बर नगरी अर धरती का मालिक म तेरो गुणगान करूं की तू आ बातानै ज्ञान्याऊँ अर स्याणाऊँ लखोर राखी अर गुठा छाप प आका भेदानै खोल्या।

²⁶ क्युं क ओ थारी नजर्या म चोखो हो।

²⁷ मेरै हाता म मेरो परम-पिता सक्यु सूप्यो ह अर परम-पिता क अलावा कोईबी बेटानै कोनी जाणै अर कोईबी बेटा क अलावा परम-पितानै कोनी जाणै। अर बे मिनख बापनै जाणै ह जिनै बेटो बतावै ह।”

²⁸ ईसु बाऊँ बोल्यो, “हे आखता होयड़ो अर बोजऊँ दबेड़ा मिनखो मेरै कनै आओ म थानै अराम देस्युँ।

²⁹ थे मेरी हाळीनै लेल्यो अर बिनै लादल्यो अर थे मेरूँ सीखो क्युं क म सिदो-सादो अर मेरो हियो दयाऊँ भरेड़ो ह। जिऊँ थानै बी अराम मिलसी

³⁰ क्युं क मेरी हाळी अराम दायक अर मेरो बोज हळको ह।”