मत्ती 10 - जीवन को च्यानणो (सेकावाटी नया नियम की पोथ्या)

भेजेड़ा बारा चेला

¹ ईसु आपका बारा चेलानै आपकै कनै बुलार बानै सूगली ओपरी बलायानै काडबा की अर रोगलानै निरोगो करबा अर कमजोरीनै दूर करबा को अधिकार दिओ।

² बा बारानै भेजेड़ा चेला खेर बुलायो जाका नाम अंय्यां ह: सऊँ पेल्या तो समोन जिनै पतरस बी खेवै ह बिको भाईड़ो अंदरिआस, जब्दि को बेटो याकूब अर बिको भाईड़ो यहून्ना,

³ फलिपूस, बरतुल्मै, थोमा, चुंगी लेबाळो मत्ती, हलफई को बेटो याकूब अर तद्दे,

⁴ देस भगत समोन, अर यहूदा इस्करोती ओ बोई ह जखो ईसुनै धोकाऊँ पकड़ायो हो।

चेलानै अधिकार देबो

⁵ ईसु बा बारानै ओ अधिकार दिओ अर हुकम देर भेज्यो: “गैर-यहूदि मिनखा की नगरी म मना जायो अर नइ सामरी नगरी म जायो।

⁶ पण इजरायल का मिनखा क कनैई जायो जखा गुमेड़ी लल्ड्या की जंय्यां ह।

⁷ अर बाकन जाओ अर हेलो पाड़ो क ‘ईस्बर नगरी को राज सांकड़ै आगो ह’

⁸ अर रोगलानै निरोगा करो, मरेड़ानै जीवाओ, कोढ्या का कोढनै धोवो अर ओपरी बलायानै भगाओ। जंय्यां थानै सितमित म मिल्यो ह थे बी सितमित म द्‍यो।

⁹ थे नइ तो सोनो-चाँदी ल्यो नइ तामा का सीक्का अर नइ बटूओ लिज्यो।

¹⁰ अर नइ गेला ताँई झोळो नइ कुर्तो, नइ चपल नइ हात म लाठी लिज्यो, क्युं क ध्यानग्यानै रोट्या को तो हक होवैई ह।

¹¹ थे जद बी कोई नगरी नहिस गाँव म जाओ जणा पेल्या बेरो करज्यो क बठै गत को मिनख कूण ह। अर जद ताँई थे बठैऊँ नइ जाओ बाकै सागैई रेहज्यो।

¹² जि घर की थळी प पग धरो जणा बि घर का मिनखानै आसिरबाद दिज्यो।

¹³ ज बि घर का मिनखा म एक जणो बी आसिरबाद क जोगो होसी जणा थारो आसिरबाद बिकै लागसी। नहिस तो थारो आसिरबाद ओज्यु थारै कनै आज्यासी।

¹⁴ अर ज कोई थारो मान कोनी करै अर नइ थारी बाता सुणै जणा थे बि घर अर बि नगरीऊँ बारनै आर थारी पगा की धूळ झाड़ दिज्यो। अंय्यां कर थे बानै आ चेता दिज्यो क परमेसर बानै सजा देसी क्युं क बे बिकी बात कोनी सुणी।

¹⁵ म थारूँ सची खेऊँ हूँ जद न्याय होसी, बि दिन बि नगरी की दसा सदोम अर अमोरा नगरीऊँ बी बेकार होसी।

भेजेड़ा चेलानै ईसु चेतायो

¹⁶ “सुणो म थानै ल्याळ्या क मांयनै लल्ड्या की जंय्यां भेजर्यो हूँ। इ ताँई थे साँप जंय्यां चलाक अर कबूतर की जंय्यां भोळा रेहज्यो।

¹⁷ अर थे मिनखाऊँ हुस्यार रेहज्यो क्युं क बे थानै पकड़र पंचा क हाता सूप देसी अर बे थानै अरदास करबाळी झघा लेज्यार बेत पड़वासी।

¹⁸ थे मेरै बारां म सीख द्‍यो हो इ बजेऊँ थानै राजा अर अधिकार्या क सामै लेज्यायो जासी, पण थानै बि टेम यहूदि अर गैर-यहूदि मिनखा म मनै साबित करबा को मोको मिलसी।

¹⁹ जद बे थानै पकड़सी जणा थे आ चिंत्या मना करज्यो क थानै इब काँई खेणो ह क्युं क बि घड़ी पबितर आत्मा थानै बतासी काँई खेणो ह।

²⁰ क्युं क बोलबाळा थे कोनी पण थारा परम-पिता की पबितर आत्मा थारै मऊँ होर बोलसी।

²¹ सागे भाई-भाण भाई-भाणानै पकड़ा'र मरवासी, माँ-बाप टाबरानै मरवासी अर टाबर माँ-बापा क सामै होर बानै मरवा गेरसी।

²² मेरा नाम की बजेऊँ लोग थारूँ नफरत करसी पण जखो मिनख आपकी अंतघड़ी ताँई सक्यु सेह्सी बोई बचायो ज्यासी।

²³ बे थानै थारी एक नगरी म सतावै जणा थे दुसरी नगरी म भागजाज्यो। अर म थारूँ सची खेऊँ हूँ इजरायल देस की सगळी नगर्या म थारै घूमबाऊँ पेलीई मिनख को बेटो आज्यासी।

²⁴ क्युं क चेलो गरूऊँ बडो कोनी होवै अर नइ दास आपका मालिकऊँ बडो होवै ह।

²⁵ इ ताँई चेलानै गरूजी क बराबर होबा म अर दासनै मालिक क बराबर होबा मई सबर राखबो चाए। अर जद बे मिनख घर का मालिकनैई बालजबुल खेवै ह जणा बिका घर का मिनखा क सागै तो ओर बी बुरो सलुक करसी!

मिनखाऊँ मना डरो पण परमेसरऊँ डरो

²⁶ “इ ताँई थे बा मिनखाऊँ मना डरो, क्युं क जोक्यु बी लुखेड़ो ह बिनै परमेसर चोड़ामै ल्यासी अर जखो बी ओला म ह बिनै सामै ल्यासी।

²⁷ इ ताँई म जोक्यु बी थानै अँधेरा म बोल्यो हूँ थे बिनै दिन का च्यानणा म जोरऊँ बोलो अर जखी बाता म थानै ओला म खेऊँ हूँ बाको थे कोठा प चढर हेलो पाड़ो।”

²⁸ “थे बा मिनखाऊँ मना डरो जखा थारी कायानै नास कर सकीं हीं पण थारी आत्मानै नास कोनी कर सकीं। पण परमेसरऊँ डरो जखो थारी आत्मा अर काया दोन्यानै नरक म गेर'र नास कर सकै ह।

²⁹ क्युं क एक डबली हाळा सीक्का की दो चिड़कल्या कोनी बिकै के? पण बामैऊँ एक बी धरती प मरै ह जणा बाकै बारां म थारा परम-पितानै बेरो होवै ह।

³⁰ अठै ताँई क परमेसर थारै सीर का एक-एक बाळ बी गिण राख्या ह।

³¹ इ ताँई डरो मना क्युं क परमेसर की नजर्या म थारो मोल तो चिड़कल्याऊँ बी बोळो ह।

मिनखा क सामै ईसुनै मानबो

³² “जखो बी मिनख लोगा क सामै मनै मान लेसी जणा म बी ईस्बर नगरी म रेह्बाळा परम-पिता क सामै बानै मानस्युं।

³³ पण जखो बी मिनख मनै लोगा क सामै कोनी मानसी जणा म बी ईस्बर नगरी म रेह्बाळा परम-पिता क सामै बिनै कोनी मानस्युं।

ईसु क जोगो कूण

³⁴ “थे अंय्यां मना सोचो क म धरती प मिनखा को सुळजेटो कराबा आयो हूँ पण म तो बानै लड़ाबा आया हूँ।

³⁵ म ओ करबा आयो हूँ क बेटो बाप क खिलाप, बेटी माँ क खिलाप अर भू सासू क खिलाप होवै।

³⁶ मिनख का बेरी बिका घरकाई होसी।”

³⁷ “जखो बी मिनख मेरूँ बेत्ती आपका माँ-बापानै नहिस आपका बाळबच्चानै परेम करै बो मेरै जोगो कोनी।”

³⁸ अर जखो बी मेरै ताँई दुख दरद सेह्बा ताँई अर मरबानै त्यार कोनी बो मेरो चेलो होबा जोगो कोनी।

³⁹ “जखो बी आपका पिराण बचावै ह बो बिकी हानी उठावै ह, अर जखो बी मेरी बजेऊँ आपका पिराण देवै ह बो बिनै पासी।

फळ

⁴⁰ “जखो बी थारो मान करै ह, बो मेरो बी मान करै ह; अर जखो मेरो मान करै ह बो मनै अधिकार क सागै भेजबाळा परमेसर को बी मान करै ह।

⁴¹ जखो बी परमेसर की खेबाळा को आ जा'णर मान करै ह की बो परमेसर की खेबाळो ह बिनै बोई फळ मिलसी जखो परमेसर की खेबाळानै मिलै ह। अर जखो बी धरमी मिनख को आ सोचर मान करै ह क बो धरमी मिनख ह जणा बिनै बी बोई फळ मिलसी जखो धरमी मिनखनै मिलणो चाए।

⁴² अर म थानै सची खेऊँ हूँ ज कोई आ छोटा मऊँ एकनै बी मेरो चेलो जा'णर एक गिलास पाणी प्यावै, बिनै बिको फळ मिलसी।”