मत्ती 1 - जीवन को च्यानणो (सेकावाटी नया नियम की पोथ्या)

ईसु की पिडी

¹ अब्राहम का बेटा, दाऊद का बेटा ईसु मसी ताँई की पिडी अंय्यां ह:

² अब्राहम को बेटो इसाक अर इसाक को बेटो याकूब अर याकूब क यहूदा अर बिका भाई होया।

³ फरिस अर जोरह यहूदा का बेटा हा अर आकी माँ को नाम तामार हो। फरिस हेजरोन को बाप हो। हेजरोन ऐराम को बाप हो।

⁴ ऐराम अमिनादाब को बाप हो। अमिनादाब नहसोन को बाप हो। नहसोन सलमोन को बाप हो।

⁵ सलमोन अर बिकी लूगाई राहाब क बोआज जलम लिआ। बोआज अर बिकी लूगाई रूत क ओबेद पैदा होयो। ओबेद यिसै को बाप हो।

⁶ अर यिसै राजा दाऊद को बाप हो। सुलेमान दाऊद को बेटो हो। जखो बि लूगाई क जलम लिओ जखी पेल्या उरीया की लूगाई ही।

⁷ सुलेमान रहबाम को बाप हो। अर रहबाम अबिया को बाप हो। अबिया को बेटो असाफ हो।

⁸ अर असाफ ओसापात को बाप हो। अर ओसापात को बेटो ओराम हो। अर ओराम उजिया को बाप हो।

⁹ उजिया ओताम को बाप हो। अर ओताम अहाज को बाप हो। अर अहाज हिजकिया को बाप हो।

¹⁰ अर हिजकिया मनसे को बाप हो। मनसे अमोन को बाप हो। अर अमोन ओसिया को बाप हो।

¹¹ इजरायल का मिनखानै गुलाम बणार जद बेबिलोन लेज्यायो जार्यो हो जणा बि टेम का ओसिया क यकुन्या अर बिकाळा भाई होया।

¹² बेबिलोन म लेजाबा क पाछै यकुन्या क सालतिएल होयो। अर सालतिएल को बेटो जरूबाबील हो।

¹³ जरूबाबील अबिउद को बाप हो। अबिउद इल्याकीम को बाप हो। अर इल्याकीम अजोर को बाप हो।

¹⁴ अजोर को बेटो सदोक हो। सदोक अखीम को अर अखीम अलिऊद को बाप हो।

¹⁵ अलिऊद को बेटो एलिआजर हो। अर एलिआजर मतान को बाप हो। अर मतान को बेटो याकूब हो।

¹⁶ अर याकूब युसूफ को बाप हो। जखो मरीयम को मोट्यार हो। मरीयम क ईसु जलम लिओ जखो मसी खुवावै ह।

¹⁷ अर अंय्यां अब्राहमऊँ लेर दाऊद ताँई चोदा पिडी जलम लिनी। दाऊदऊँ लेर बंदि बणार बेबिलोन लेजाया जाबा ताँई चोदा पिडी होई। बठै पुग्या पाछै मसी क जलम ताँई चोदा पिडी होई।

ईसु मसी को जलम

¹⁸ ईसु मसी को जलम अंय्यां होयो; जद बिकी माँ मरीयम की सगाई युसूफ क सागै होई जणा बाको ब्या होबाऊँ पेली मरीयम पबितर आत्मा की सक्‍तिऊँ आसऊँ होई।

¹⁹ जणा बिको होबाळो मोट्यार युसूफ आपकी धारमिक्‍ता क चलतै मरीयमऊँ सगाई तोड़बा की मन म करी। पण बो लोगा म मरीयम की बदनामी बी कोनी चातो हो इ ताँई बो बिनै चुपचालोई छोडबा को बिचार कर्यो।

²⁰ युसूफ बा बाता क बारां म सोचर्योई हो क परबु को ईस्बर नगरी दुत युसूफ क सपना म आर बोल्यो, “युसूफ! दाऊद का बेटा, तू मरीयमनै ब्यार ल्याबा म मना डर, क्युं क जखो बिकै पेट म ह बो मिनखऊँ कोनी पण पबितर आत्मा की सक्‍तिऊँ ह।

²¹ बा एक बेटो जलमसी जखो आपका मिनखानै बाका पापऊँ बचासी। तू बिको नाम ईसु राखजे, जिको मतबल ह! परबु आपका मिनखानै बचावै।”

²² ओ इ ताँई होयो ह क्युं क जखा बचन परबु आपका दासा क जरिए बोल्यो ह, बे पूरा होवै:

²³ “देखो, एक कुंआरी छोरी आसऊँ होसी अर एक बेटो जलमसी अर बिको नाम इम्मानुअल राख्यो ज्यासी बिको मतबल ह परमेसर म्हारै सागै ह।”

²⁴ जद युसूफ निंदऊँ जाग्यो जणा बो बंय्यांई कर्यो जंय्यां ईस्बर नगरी दुत बिनै करबा को हुकम दिओ हो। बो मरीयमनै ब्यार आपकै घरा लिआयो।

²⁵ पण जद ताँई बा बेटो नइ जलमी युसूफ बिकन कोनी गयो। अर युसूफ बेटा को नाम ईसु राख्यो।