लूका 9 - जीवन को च्यानणो (सेकावाटी नया नियम की पोथ्या)बारा चेलानै भेजबो ( मत्ती 10:5–15 ; मरकुस 6:7–13 ) 1 ईसु आपका बारा चेलानै एक सागै बुलार, बानै ओपरी बलायानै काडबा अर रोगलानै निरोगा करबा की सक्ति अर अधिकार दिओ। 2 इकै पाछै बो बानै परमेसर का राज को हेलो पाड़बा अर रोगलानै निरोगो करबा को अधिकार देर बारनै भेज्या। 3 अर बो बानै खयो, “गेला ताँई थारी जुर्त को क्युंई समान मना ल्यो नइ तो लाठी नइ झोळो, नइ रोटी-टुक, नइ रिपीआ अर नइ पेरबा ताँई न्यारा कुर्ता। 4 थानै जि घर म आदरमानऊँ बुलायो जावै, जणा थे बि घर मई रेहज्यो जद ताँई की थे बा नगरी नइ छोड द्यो। 5 अर जि जठै थारी सुणाई कोनी होवैक जणा बठै का मिनखानै चेताबा ताँई थारा पगा की धूळ झाड़ दिज्यो।” 6 जणा बे बठैऊँ बिदा लेर गाँव-गाँव जार परमेसर को चोखो समचार सुणाया अर मिनखानै निरोगा कर्या। हेरोद को भेम ( मत्ती 14:1–12 ; मरकुस 6:14–29 ) 7 अर जोक्यु होर्यो हो बि बात की भणक जद गलिल का राजपाल हेरोदनै लागी जणा बो घबरागो क्युं क क्युंक खेर्या हा क “यहून्ना मरेड़ाऊँ ओज्यु जिंदो होगो।” 8 अर क्युंक खेर्या हा क, “एलिआ धरती प उतर्यो ह।” क्युंक खेर्या हा क, “परमेसर की खेबाळा पुराणीया मऊँ कोई जिंदो होयो ह।” 9 पण हेरोद बोल्यो, “यहून्ना को सीर तो म खुद कटवा दिओ हो। इब ओ कूण आगो जिका बारां म, म अ बाता सुणर्यो हूँ?” जणा हेरोद बिऊँ मिलबा की कोसिस करी। पाच झारऊँ बेत्ती मिनखानै जिमाबो ( मत्ती 14:13–21 ; मरकुस 6:30–44 ; यहून्ना 6:1–14 ) 10 जणा पाछै ईसु कनै आर बे भेजेड़ा चेला जोक्यु बे कर्या बिकी जाणकारी बिनै दि। जणा बो बानै आपकै सागै लिओ अर बे चुपचाला बेतसदा नाम की नगरी म गया। 11 पण इ बात को बेरो लोगानै पड़गो अर भीड़ की भीड़ बिकै गेल-गेल होली। बो राजी-राजी बाऊँ मिल्यो अर बानै परमेसर का राज क बारां म बतायो अर जखा रोगला हा बानै निरोगो कर्यो। 12 जद दिन आथबा लाग्योक जणा बे बारा का बारा बिकन आर बोल्या, “इ भीड़नै इब बिदा कर जिऊँ अ आसपड़ोस का गाँव अर ढाण्यां म जार आपका खाबा-पीबा अर आसरा को जोगाड़ करीं क्युं क आपा इ उजाड़ म पड़्या हां।” 13 बो बोल्यो, “थेई आनै खाबा ताँई क्युं द्यो।” जणा जुबाब म चेला बोल्या, “आपणै कनै तो बस पाच रोटी अर दो मछी ह पण आ तो हो सकै क, म्हें जावां अर आ सगळा ताँई रोटी मोल ल्यावां।” 14 बठै लगभग पाच झार तो मोट्यार-मोट्यारई हा। जणा ईसु चेलानै ओडाया, “आनै पचास-पचास की पंगत म बिठा द्यो।” 15 बे बंय्यांई कर्या जंय्यां बाऊँ खयो गयो। बे सगळानै पंगत म बिठा दिआ। 16 जणा ईसु बा पाच रोट्या अर दो मछ्यानै लेर उपर देखर परमेसर को धनेवाद कर्यो अर बाका टुकड़ा कर-कर चेलानै देतो गयो क बे लोगानै जिमावै। 17 अर जद सगळा खार धापगा जणा बचेड़ा रोट्या का टुकड़ाऊँ चेला बारा चोल्या भर्या। पतरस मानी ईसुई मसी ह ( मत्ती 16:13–19 ; मरकुस 8:27–29 ) 18 एक बार ईसु एकलो अरदास करर्यो हो बि टेम बिका चेला बिकन आया, जणा ईसु बाऊँ बुज्यो, “म कूण हूँ, इ बारां म लोग काँई खेवै ह?” 19 बे खया, “घणकराक तो तनै बतिस्मो देबाळो यहून्ना खेवै। पण क्युंक बोलीं तू एलिआ ह। अर क्युंक तो तनै पुराणा जमाना को परमेसर की खेबाळो समजीं हीं जखो जिंदो होर आगो।” 20 बो बाऊँ बोल्यो, “इब आ बताओ थे मेरै बारां म काँई समजो हो क, म कूण हूँ?” जणा पतरस खयो, “तू परमेसर कानिऊँ भेजेड़ो मसी ह।” 21 ईसु बा सगळानै सूल चेतार हुकम दिओ, “इकै बारां म कोईनैई मना खिज्यो।” ईसु आपकी मोत क बारां म बोल्यो ( मत्ती 16:20–28 ; मरकुस 8:30—9:1 ) 22 ईसु आपका चेलानै खियो, “आ तो होणी ह क मिनख को बेटो बोळा दुख उठासी। अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी।” 23 बो बा सगळाऊँ खयो, “ज कोई मेरै गेल आबो चावै ह बो खुदनै तज'र, आपकी सुळी उठार मेरै गेल होले। 24 इऊँ ओ होसी क जखो बी आपका पिराण बचाबो चावै बो बाकी हानी उठासी। अर जखो बी मेरै ताँई आपका पिराण तजसी बो बिनै बचासी। 25 ज आदमी सगळी दुनियानै जीत ले अर आत्मानै खोदे नहिस बिकी हानी उठावै जणा बिनै काँई फाईदो? 26 जखो बी, मिनखा क सामै मनै अर मेरा बचनानै मानबाऊँ सरम करसी, जणा मिनख को बेटो बी बाऊँ नातो राखबो आपकी बेजती मानसी जद बो पबितर ईस्बर नगरी दुता, आपका परम-पिता अर खुदकी मेमा म आसी। 27 म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह की बे जद ताँई परमेसर का राजनै कोनी देखले जद ताँई बानै मोत कोनी आवै।” ईसु एलिआ अर मूसा क सागै ( मत्ती 17:1–8 ; मरकुस 9:2–8 ) 28 आ बाता क सपता भर पाछै ईसु पतरस याकूब अर यहून्नानै सागै लेर डूँगर प अरदास करबा गयो। 29 अर जद बो अरदास करर्यो हो जणा बिकी सकल बदलगी अर बिका गाबा भळका मारता धोळा धप होगा। 30-31 अर बठै दो जणा परमेसर का परताब क सागै परगट होया जिमैऊँ एक मूसा अर दुसरो एलिआ हो। बे ईसु की मोत क बारां म ईसुऊँ बतळार्या हा जिनै बो परमेसर की मरजी यरूसलेम म पूरी करबाळो हो। 32 पतरस अर बिकाळा साती निन्दा म हा जद बे सूल चेतो कर्यो जणा बे बिकी मेमा का तेज अर बा दो जणानै जखा बिकै सागै खड़्या हा देख्या। 33 अर जंय्यांई बे बिऊँ बिदा ले हाक, जणा बि टेम पतरस बिऊँ बोल्यो, “म्हराज कतो चोखो ह क म्हें अठै हां! म्हानै तीन पंडाळ बणाबा दे, एक थारै ताँई, एक मूसा ताँई, एक एलिआ ताँई।” बो सचमई कोनी जाणतो हो क बो काँई बोलर्यो हो। 34 बो हाल ताँई खेर्योई हो क अत्ता मई एक बादळी आई अर बा सगळानै ढकली जिऊँ चेला डरग्या। 35 बि टेम हात्युहात बादळा मऊँ हेलो आयो, “ओ मेरो बेटो ह जिनै म टाळ्यो हूँ थे इकी सुणो।” 36 ओ हेलो होबा क पाछै बानै ईसु क सिवाय बठै कोई कोनी दिख्यो। अर बे अ बात आप ताँई राखी। अर जोक्यु बे देख्या बिको जिकर बा दिना म बे खिनई कोनी कर्या। ईसु एक छोरा मऊँ बलाय काडी ( मत्ती 17:14–18 ; मरकुस 9:14–27 ) 37 आगलै दिन जद ईसु अर बिका तीन चेला डूँगरीऊँ तळै उतर्या जणा बानै मिनखा को रेळो अगाऊ लाध्यो। 38 बि रेळा मऊँ एक जणो कू'कर बोल्यो, “गरूजी म थारूँ हात जोड़ खेऊँ हूँ मेरा छोरा की तिथ ल्यो। मेरै तो बो एकई ह। 39 बिमै क्युं रळेड़ो ह अर बो आपको असर दिखावै जणा मेरो छोरो बूताऊँ बारनै होज्यावै, अर मुंडा होर झाग बगावै, बिनै बुर्या तरोड़ै-मरोडै़ अर छोरानै छोडबा को नामई कोनी ले अर बिनै दिन घालरी ह। 40 म थाकाळा चेलाऊँ अरदास करी क बिमैऊँ बिनै काड दे पण बाऊँ तो पार कोनी पड़ी।” 41 जणा ईसु बोल्यो, “अरै भेम करबाळो अर कुटिचर मिनखो, म कद ताँई थारै सागै रेहस्युं अर थानै भोगस्युं? जा अर तेरा छोरानै अठै ल्या।” 42 जद बो छोरो आर्यो हो जणा बिच मई बा सूगली ओपरी बलाय बिनै रोड़ली अर मरोड़ी देर जमीन प दे मारी। जणा ईसु जोरऊँ बि बलायनै दकालर बि छोरा मऊँ बिनै काड दि। अर छोरानै राजी-खुसी बिका बापनै समळा दिओ। 43 बे सगळा परमेसर का इ बडा कामऊँ ताजूब म पड़गा। अर जद मिनख ईसु का करेड़ा सगळा कामा प ताजूब करर्या हा, बि टेमई ईसु आपका चेलाऊँ बोल्यो, ईसु आपकी मोत क बारां म ओज्यु बोल्यो ( मत्ती 17:22 , 23 ; मरकुस 9:30–32 ) 44 “थे इ बात प कान लगाओ क मिनख को बेटो मिनखा क हाता म सूप्यो जासी।” 45 पण अ बाता बाकै पलै कोनी पड़ी। अर अ बाता बाऊँ लुखायड़ी ही जणा बे कोनी जाण सक्या। अर बे आ बातानै बुजबाऊँ डरता हा। सऊँ बडो कूण ( मत्ती 18:1–5 ; मरकुस 9:33–37 ) 46 एक बर अंय्यां होई क, ईसु का चेला आपसरी म इ बात प जिदबा लागगा क, आपणा म सऊँ बडो कूण? 47 पण ईसु बाका मना का बिचार जाणतो हो जणा बो एक टाबरियानै लेर आपकै कनै खड़्यो कर्यो, 48 अर बाऊँ बोल्यो, “जखो कोई मेरै ताँई इ टाबरिया को मान करै बो मेरो बी मान करै। अर जखा मेरो मान करीं बे मनै भेजबाळा परमेसर को बी मान करीं हीं। इ बजेऊँ जखो थार मऊँ सऊँ छोटो ह बोई सऊँ बडो ह।” जखो थारै सामै कोनी बो थारै कानि ह ( मरकुस 9:38–40 ) 49 जणा यहून्ना बोल्यो, “ओ म्हराज, म्हें एक आदमीनै देख्या जखो तेरा नामऊँ ओपरी बलाय काडर्यो हो, अर म्हें बिनै अंय्यां करबा ताँई नट्या क्युं क बो आपणै मालो कोनी हो।” 50 ईसु बोल्यो, “बिनै मना रोको क्युं क जखो थारै सामै कोनी बो थारै कानि ह।” सामरी नगरी 51 जद ईसु का ईस्बर नगरी म उठाया जाबा का दिन सांकड़ै हा जणा बो यरूसलेम जाबा ताँई आपका हियानै पक्को कर लिओ। 52 अर बो आपकै अगाऊ दुत भेज्या जखा रेह्बा खाबा को सलिको देखबा सामरीया का एक गाँव म गया। 53 पण सामरीया का मिनख बठै बानै बड़बा कोनी दिआ क्युं क बो यरूसलेम जार्यो हो। 54 आ देखर बिकाळा चेला याकूब अर यहून्ना बिऊँ बोल्यो, “थे बोलो तो म्हें हुकम करां क अकासऊँ आग बरसै अर आनै बाळ गेरै।” 55 पण बो पाछो मुड़र बानै दकाल्यो 56 जणा पाछै ईसु अर बिकाळा चेला दुसरा गाँव चलेग्या। ईसु को चेलो बणबा को मोल ( मत्ती 8:19–22 ) 57 जद बे गेला म जार्या हा, जणा एक मिनख ईसुऊँ बोल्यो, “थे जठै बी जास्यो म बी थारै गेल जास्युं।” 58 ईसु बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।” 59 बो दुसरा मिनखनै बोल्यो, “मेरै गेल होले।” जणा बो मिनख बोल्यो, “ओ म्हराज मनै पेली जाबा दे की म मेरा बापनै गाड्याऊँ।” 60 जणा ईसु बोल्यो, “मरेड़ा मिनखानै बाका मरेड़ानै गाडबा दे। पण तू जा अर परमेसर का राज को हेलो पाड़।” 61 एक जणो ओर बोल्यो, “ओ परबु म तेरै गेल चल्यो चालस्युं पण पेली मनै मेरा घरकाऊँ बिदा लेबा दे।” 62 जणा ईसु बोल्यो, “जखो मिनख आपको हात हळ प धर'र गेलनै देखै बो परमेसर का राज जोगो कोनी।” |
(c) 2010-2017, New Life Computer Institute. All rights reserved