लूका 7 - जीवन को च्यानणो (सेकावाटी नया नियम की पोथ्या)

बिस्वास को कमाल

¹ मिनखानै आपहाळी सुणाबा क पाछै ईसु कफरनूम गयो।

² बि बठै एक सुबेदार हो जिको एक दास बिमारीऊँ मरबाळोसो होर्यो हो इ दासऊँ सुबेदारनै लगाव बी बोळो हो।

³ बि सुबेदार क काना म ईसु की चरचा पड़ी, जणा बो यहूदि मिनखा का यहूदि नेतानै बाऊँ मिन्नत करबा भेज्यो क बे आर बिकाळा दास का पिराण बचा लेवै।

⁴ जणा बे आर ईसुऊँ सचा मनऊँ मिन्नत करी क, “म्हराज थे सुबेदार की मदद करो क्युं क बो इ जोगो ह।

⁵ क्युं क बो म्हारा यहूदि मिनखाऊँ प्यार-परेम राखै ह अर बो म्हानै अरदास करबा ताँई ठिडो बणार दिओ ह।”

⁶ जणा बे बाकै सागै होलिआ। पण जद बे बिकाळा घरा क सांकड़ै लाग्याक बि टेम बो सुबेदार क्युंक भाईला क हात आ खुवा भेजी क, “परबु म अत्तो बडो आदमी कोनी, क थे मेरी छात क तळै आओ।

⁷ इ बजेऊँई तो म खुद थारै कनै आबा की कोनी बिचारी। पण थे तो बस खे द्‍यो, मेरो दास निरोगो होज्यासी।

⁸ म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै, अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।”

⁹ आ सुणर ईसुनै बि मिनख प ताजूब होयो, बे मुड़र बाकै गेल आर्या मिनखाऊँ खया, “इ जंय्यांको पक्को बिस्वास तो म इजरायल का मिनखा म बी कोनी देख्यो।”

¹⁰ बे संदेसो लेर आबाळा जद पाछा घरा पुग्या, जणा बो दास बानै निरोगो लाध्यो।

मरेड़ा को जिंदो होबो

¹¹ इकै आगला दिन ईसु नाइन नाम की नगरी म गयो, जठै बाका चेला अर एक बडी भीड़ बाकै सागै होरी ही

¹² बे जंय्यांई नगरी का दरूजा प पुग्याक, जणा देख्या क बठिकी एक अरथी जारी ही, अर बो एक खाली होईड़ी को एकलोतो बेटो हो जि बजेऊँ नगरी का घणकराक बिका दाग म सामिल हा।

¹³ जणा बि खाली होईड़ीनै देखर ईसुनै बिपै तरस आयो अर बे बिऊँ बोल्या, “रोवै मना।”

¹⁴ जणा ईसु गया अर अरथी क हात लगाया अर कांध्या हा जखा डटगा। जणा ईसु बोल्या, “मोट्यार म तेरूँ खेऊँ हूँ उठ।”

¹⁵ अत्ता मई बो मरेड़ो आदमी उठर बेठ्यो होगो अर बाता करबा लागगो, ईसु बिनै बिकी माँनै समळा दिआ।

¹⁶ आ बातानै देख बे सगळा मिनख डरग्या अर ईस्बर को गुणगान गाबा लागगा। बे कह्या, “आपणै मांयनै एक बडो परमेसर की खेबाळो परगट होयो ह। परमेसर आपका मिनखानै बचाबा आयो ह।”

¹⁷ ईसु की आ खबर सगळा यहूदिआ दिसावर अर बिका च्यारूमेर का इलाका म फेलगी।

यहून्ना को सुवाल

¹⁸ अ बात यहून्नानै बिका चेला बताया,

¹⁹ जणा यहून्ना आपका दो चेलानै बुलार बानै ईसु कनै ओ बेरो पाड़बानै भेज्यो क, “थे कूण हो? कदै थे आबाळा बेई तो मसी कोनी हो नहिस फेर म्हें कोई ओरनै उडिकां?”

²⁰ जणा बे ईसु कनै जार बाऊँ खया, “बतिस्मो देबाळो यहून्ना म्हानै थारूँ आ बुजबा ताँई भेज्या हीं क थे आबाळा मसी हो के, नहिस म्हें कोई दुसरानै उडिकां?”

²¹ बि टेमई ईसु बोळा रोगलानै बाकी पिड़ाऊँ निरोगा कर्या, ओपरी बलायाऊँ मिनखानै छुटाया अर बोळा आँदानै आँख्या दि।

²² जणा ईसु बाऊँ कह्या, “जोक्यु थे सुण्या अर देख्या हो बो जार यहून्नानै खे द्‍यो क आँदा ओज्यु देखीं हीं, लंगड़ा चालीं हीं, कोढ्या को कोढ धोयो जार्यो ह अर बेरा सुणर्या हीं, मुरदानै जीवायो जार्यो ह अर गरीबा म चोखा समचार को परचार कर्यो जार्यो ह।

²³ भागहाळा ह बे जखा मेरै प बिस्वास करै ह।”

²⁴ बा चेला क जाबा क पाछै, ईसु बठै बेठी भीड़नै यहून्ना क बारां म बताबा लाग्या, “थे उजाड़ म काँई देखबा गया हा, के भाळऊँ हालता कूचानै?

²⁵ नइ, जणा थे काँई देखबा गया हा? के कोई चोखा गाबल्या पेरेड़ा मिनखनै? चोखा गाबल्या पेरबाळा अर मोजऊँ जिबाळा तो म्हेला म मिली हीं।

²⁶ जणा थेई बताओ, थे काँई देखबा गया हा? के कोई परमेसर की खेबाळानै? हाँ, थे जिनै देख्या बो परमेसर की खेबाळाऊँ बी बढकै ह।

²⁷ यहून्ना बोई ह जिकै बारां म पबितर सास्तर म ओ मंडर्यो ह, ‘देख म तेरूँ पेली मेरा हलकारानै भेजूँ हूँ जखो तेरो गेलो त्यार करसी।’

²⁸ म थारूँ बोलुँ हूँ, ‘लूगाईऊँ जलमेड़ा म यहून्नाऊँ बडो कोई कोनी। पण ईस्बर नगरी का राज म रेह्बाळो छोटाऊँ छोटो मिनख बी बिऊँ बडो ह।’”

²⁹ जणाई हर कोई अठै ताँई चुंगी लेबाळा बी बिनै सुणर परमेसर का गेलानै सचो मान लिआ क्युं क बे यहून्नाऊँ पाणी को बतिस्मो लिआ हा।

³⁰ पण फरिसी अर सास्तरानै सीखाबाळा, यहून्नाऊँ पाणी को बतिस्मो नइ लेर परमेसर बा ताँई जोक्यु ध्यार राखी ही बिनै टाळ दिआ।

³¹ ईसु ओज्यु बोल्यो, “जणा म इ पिडी का मिनखा की बराबरी किकै सागै कर सकूँ हूँ? क बे बिकी जंय्यां ह?

³² बे बजार म बेठ्या बा टाबरा की जंय्यां हीं जखा एक दुसरानै हेलो देर बोलीं हीं, ‘म्हें थारै ताँई बाजो बजाया पण थे नाच्याई कोनी। म्हें थारै ताँई बार घाली पण थे रोयाई कोनी।’

³³ खेबा को मतबल ओ ह क बतिस्मो देबाळो यहून्ना रोटी कोनी खातो अर नइ अँगूरी पीतो, अर थे बोलो हो बिमै ओपरी बलाय ह।

³⁴ अर इकै पाछै मिनख को बेटो आयो जखो खातो-पीतो हो, जिनै थे डचु अर दारूड़ो बतायो, चुंगी लेबाळा अर पाप्या को भाईलो बतायो।

³⁵ परमेसर की बुदी गेल चालबाळा बिकी बुदीनै सई साबित करीं हीं।”

पापण लूगाई

³⁶ एक फरिसी ईसुनै आपकै घरा मिजमानी को नूतो दिओ। जणा बे फरिसी क घरा गया अर मिजमानी खाबा बेठगा।

³⁷ अर बि नगरी म एक पापण ही, बिनै जद बेरो पड़्यो क ईसु फरिसी क घरा मिजमानी खार्या हीं, जणा बा संगमरमर की एक बरनी म ईतर लेर आई।

³⁸ बा बाकै गेलऊँ आर बाका पगा कनै खड़ी होगी। अर बा रोती जाय, अर आपका आसुआऊँ बाका पग धोती जाय, पग धोर आपका बाळाऊँ पगानै पु'छर पग पकड़ लिआ अर बि ईतरनै बिका पगा प उंदका दिनी।

³⁹ आ देखर ईसुनै मिजमानी घालबाळो फरिसी आपका हिया म बिचार्यो, “ज ओ परमेसर की खेबाळो होतो जणा जाण ज्यातो क आकै हात अड़ाबाळी आ कूण ह? अर कंय्यांकी ह? ओ जाणज्यातो क आ पापण ह।”

⁴⁰ जणा ईसु समोनऊँ खया, “समोन मनै तेरूँ क्युं खेणो ह।” इपै समोन खयो, “बोलो म्हराज।”

⁴¹ ईसु बोल्या, “सुण एक साऊकारऊँ दो मिनख करजो लिओ एक तो पानसो चाँदी हाळा सीक्का लिआ अर दुसरो पचास सीक्का।

⁴² पण बे दोन्युई बिको करजो कोनी चुकतो कर सक्या जणा साऊकारनै बापै दया आगी अर बो दोन्या को करजो माफ कर दिओ। इब तू बता बा दोन्या मऊँ बिनै बेत्ती परेम कूणसो करसी?”

⁴³ समोन खयो, “मेरा बिचारऊँ जिका बेत्ती पिसा माफ कर्या घणो प्यार तो बोई करसी।” जणा ईसु खया, “तेरो फेसलो सई ह।”

⁴⁴ जणा बि लूगाई कानि घू'मर ईसु समोनऊँ बोल्या, “तू इ लूगाईनै देखर्यो ह के? म तेरै घरा आयो अर तू मनै पग धोबा ताँई पाणी ताँई की कोनी बुजी अर आ मेरा पगानै आसुआऊँ धोर बानै आपका बाळाऊँ पुछी ह।

⁴⁵ तू मेरा स्वागत म मनै माखोई कोनी दिओ अर जदऊँ म आयो हूँ आ मेरा पगानै छोडरी कोनी।

⁴⁶ तू मेरा सीर प तेलऊँ अभिसेक कोनी कर्यो पण आ मेरा पगा प ईतर उंदकाई।

⁴⁷ जणा म तेरूँ बोलुँ हूँ क इको ओ आँदो परेम ओ दिखावै ह क इका बोळासारा पाप माफ कर्या गया हीं। पण जिका थोड़ा पाप माफ कर्या गया हीं बो थोड़ो प्यार दिखावै ह।”

⁴⁸ जणा ईसु बि लूगाईऊँ बोल्या, “तेरा पाप धुपगा हीं।”

⁴⁹ जणा बे जखा ईसु क सागै मिजमानी खार्या हा, बे आपका मन म सोच्या, “ओ कूण ह जखो पापनै बी धोवै ह?”

⁵⁰ पण ईसु बि लूगाईऊँ खया, “तू राजी-खुसी जा क्युं क तेरो बिस्वासई तनै बचायो ह।”