लूका 6 - जीवन को च्यानणो (सेकावाटी नया नियम की पोथ्या)

ईसु अरामहाळा दिन को बी परबु

¹ अरामहाळा दिन ईसु अर बिका चेला ग्युंवा का खेता मऊँ जार्या हा, जणा बिका चेला हा जखा बाळ्या तोड़-तोड़ बानै हाताऊँ मसळता जाय अर बाको फांको मारता जाय।

² जणा क्युंक फरिसी बाऊँ बोल्या, “थे बो काम क्युं कर्या हो? जखो अरामहाळा दिन करबो बरजेड़ो ह।”

³ जणा जुबाब म ईसु बानै कह्या, “जद दाऊद अर बिकाळा सिरी भूखा हा, जणा दाऊद काँई कर्यो हो? के थे आ कोनी बाच्या?

⁴ अर बो कंय्यां परमेसर का घर म जार चढावा म चढेड़ी रोटी खाई अर आपका सिर्यानै बी खुवाई। थे तो जाणोई हो बा रोट्यानै याजक क सिवाय दुसरा को खाणो बरजेड़ो ह।”

⁵ अर बो बाऊँ बोल्यो, “मिनख को बेटो अरामहाळा दिन को बी परबु ह।”

अरामहाळा दिन टुंडा मिनखनै निरोगो करबो

⁶ दुसरा अरामहाळा दिन बो अरदास करबाळी झघा म परबचन देर्यो हो। अर बठै एक अंय्यां को मिनख आयो जिको दाइणो हात सूकेड़ो हो।

⁷ सास्तरी अर फरिसी आँख गाड राखी क बो बिनै अरामहाळा दिन निरोगो करै क कोनी करै। क्युं क बे तो बिपै दोस मंढबा की तक म हा।

⁸ पण बो तो बाकै मना की बात जाणतोई हो जणा बो बि टुंडा मिनखऊँ बोल्यो, “खड़्यो हो अर सकै सामै आज्या” अर खेताई बो खड़्यो होगो।

⁹ जणा ईसु मिनखाऊँ बोल्यो, “म थारूँ बुजूँ हूँ अरामहाळा दिन बिधी गेल काँई ह कोईको भलो करबो नहिस बुरो करबो? कोईकी ज्यान बचाबाऊँ मारबो चोखो ह के?”

¹⁰ अर ईसु च्यारूमेर बानै देख-दाख, बिऊँ कह्यो, “तेरा हातनै सिदो करले।” अर ईसु क कह्या गेल बंय्यांई बो आपका हातनै सिदो कर लिओ अर बिको हात ओज्यु ठिक होगो।

¹¹ अंय्यां देखर बे लाल-ताता होगा अर भेळा होर बतळाबा लागगा की, “ईसु को काँई करां?”

बारा जणानै खास काम ताँई टाळबो

¹² बा दिना म बो अरदास करबा डूँगरी प गयो। अर सगळी रात परमेसरऊँ अरदास करतो-करतो आँख्या मई काड दि।

¹³ अर दिन उगताई बो आपका चेलानै बुलाया अर बामैऊँ बारानै टाळर बानै भेजेड़ा चेला नाम दिओ,

¹⁴ अर बाका नाम अ हीं समोन जिको दुसरो नाम पतरस जखो नाम ईसु को काडेड़ो हो। अर बिका भाईड़ा अंदरिआस, याकूब अर यहून्ना, फलिपूस, अर बरतुल्मै,

¹⁵ अर मत्ती, अर थोमा, अर हलफई को छोरो याकूब, अर देस भगत समोन।

¹⁶ अर याकूब को छोरो यहूदा, अर यहूदा इस्करोती जखो ईसुनै धोकाऊँ पकड़ाबाळो हो।

ईसु मिनखानै सीखायो अर रोगलानै निरोगो कर्यो

¹⁷ जणा बो डूँगरी पऊँ बाकै सागै तळै उतर्यो अर मैदान म आर खड़्यो होयो, अर बठै बिका बोळा चेला क सागैई सगळा यहूदिआ, यरूसलेम, सूर अर सैदा क समदर किनारा का मिनखा की घणीसारी भीड़ भेळी होरी ही।

¹⁸ बे बिनै सुणबा अर बिमार्याऊँ निरोगा होबा ताँई बठै भेळा होया हा, अर सूगली ओपरी बलायऊँ दुखी मिनखा को जापतो बी बठै होयो हो।

¹⁹ अर सगळा बिकै अड़बो चावा हा क्युं क बिमैऊँ सक्‍ति निकळरी ही जखी सगळानै निरोगो कर'री ही।

दुख अर खुसी का बचन

²⁰ इकै पाछै बो आपका चेला कानि देखर बोल्यो, “थे गरीब हो जणाई भागहाळा हो, इ बजेऊँई परमेसर को राज थारो ह।

²¹ थे भागहाळा हो जखा भूखा हो, थानै धपायो ज्यासी। थे भागहाळा हो जखा आज रोर्या हो, क्युं क आगै थे हसस्यो।

²² थे भागहाळा हो जद मिनख का बेटानै मानबा की बजेऊँ दुसरा मिनख थारूँ बेर राखीं, थानै समाज क बारनै करीं, थारी बेजती करीं अर थानै बुरा बतावीं हीं।

²³ बि दिन थे राजी होर नाचा-कूदि करज्यो क्युं क ईस्बर नगरी म थारै ताँई बडोसारो इनाम ह अर बाका बाप-दादा बी परमेसर की खेबाळा क सागै अंय्यांई करता हा।

²⁴ थार प हाय ह, थे जखा पिसाळा हो, क्युं क थे मजा ले लिआ हो।

²⁵ हाय थार प जखा धापेड़ा हो क्युं क थे बास्या मरस्यो हाय ह थार प जखा हसो हो, क्युं क पाछै थे बार घालता रोस्यो

²⁶ हाय ह थार प जाकी सगळा मिनख बडाई करीं हीं, क्युं क बाका बाप-दादा बी बा मिनखा क सागै अंय्यांई करता हा जखा खेता हा, म्हें परमेसर कानिऊँ बोलां हां पण बे सचमई परमेसर की खेबा की बजाय खुदकी खेता हा।

दुस्मनाऊँ परेम

²⁷ “सुणबाळो म थारूँ बोलुँ हूँ, दुस्मनाऊँ परेम करो जखा थारो बुरो करीं, बाको भलो करो।

²⁸ थानै सराप दे बिनै आसिरबाद द्‍यो अर जखा थारै सागै बुरो बरताव करै बा ताँई अरदास करो।

²⁹ अर कोई थारा गाल प थपड़ मारै जणा दुसरो गाल बी आगै करद्‍यो अर जखो थारो कोट खोसै बिनै थारो कुर्तीयो लेबाऊँ बी मना मत करो।

³⁰ अर जखो थारूँ क्युं माँगै थे बो देद्‍यो अर जखो थारी कोई चिज खोसले बा बिऊँ पाछी लेबा की कोसिस मना करो।

³¹ मिनखाऊँ बंय्यां को बरताव करो जंय्यां को थे बाऊँ चाओ हो।

³² अर थे बाऊँई जखा थारूँ प्यार-परेम राखै ह प्यार-परेम करो जणा काँई गुण-एसान? क्युं क आपकाऊँ तो पापी बी प्यार-परेम राखै।

³³ अर थे थारो भलो करबाळा को भलो करो जणा इमै काँई गुण-एसान? अंय्यां तो पापीई करीं हीं।

³⁴ थे थारा बिस्वास हाळानैई करजो द्‍यो हो इमै काँई गुण-एसान? क्युं क पापी बी तो पाप्यानै करजो देवीं हीं, क बे बत्तोई ओटो चूक सकै।

³⁵ पण थारा दुस्मनाऊँ बी प्यार-परेम राखो, बाकै सागै बी भलाई करो, अर क्युं बी पाछो नइ आबा की आस कर बानै करजो द्‍यो। अर अंय्यां करस्योक जणा थारै ताँई बडो इनाम होसी। अर थे परम-परधान परमेसर का टाबर खुवास्यो क्युं क बो तो बुरा अर बिको धनेवाद नइ करबाळा प बी दया दिखावै ह।

³⁶ जंय्यां थारो परम-पिता दयालु ह बंय्यांई थे बी दयालु बणो।

खुदनै जाचो

³⁷ “कोईको भलो-बुरो कर न्याय मना करो जणा परमेसर बी थारो न्याय कोनी करसी। गळत मना बताओ जणा परमेसर थानै बी कोनी बतासी। माफ करो जणा परमेसर थानै बी माफ करसी।

³⁸ दुसरानै दिआ करो जणा परमेसर थानै बी निका नाप तोलर दबा-दबा अर हला-हला चोखी ढाळ उंदकतो देसी। क्युं क जि नापऊँ थे दुसरानै द्‍यो हो बि नापऊँई थानै दिओ जासी।”

³⁹ जणा बो एक बात बोली, “आँदो-आँदानै गेलो दिखा सकै ह के? अंय्यां करसी जणा के बे दोन्युई खाडा म जार कोनी पड़सी?

⁴⁰ चेला गरूऊँ बडा कोनी, पण जखो चेलो पूरो ज्ञान लेले जणा बो आपका गरूजी जंय्यां को होज्या।

⁴¹ तनै डूँगर बळती तो दिखै पण पगा बळती कोनी दिखै।

⁴² थारी खुदकी गळत्या तो थानै दिखई कोनी अर चाल्या दुसरा की गळत्या सुदारबा। ओ ढोंगी पेली खुदकी बडी-बडी गळत्यानै तो सुदारले जणा पाछै कठै जार तू ओरा की छोटी-छोटी गळत्यानै पिछाण्बा म अर बानै सुदारबा म बाकी मदद कर सकै ह। जणा पाछै तू कंय्यां खे सकै ह आ भाईड़ा म तेरी गळत्यानै सुदार द्‍युँ।

जंय्यांको पेड़ बंय्यांको फळ

⁴³ “चोखा दरख्त प चोखा फळ लागै अर बुरा दरख्त प बुरा फळ लागै।

⁴⁴ इ बजेऊँई तो सगळा पेड़ आपका फळाऊँई पिछाण्या जावै ह मतबल ओ ह क झाड़ी क अंजीर कोनी लागै अर नइ झाड़ी क अँगूर लागै।

⁴⁵ चोखो मिनख आपका चितऊँ चोखी बात काडै अर बुरो बुरीई चितै, मतबल ओ ह क जखो मांयनै होसी बोई बारनै आसी।

दो भात का मिनख

⁴⁶ “जद थे मेरो खेणो मानोई कोनी जणा पाछै मनै हे परबु हे परबु क्याले बोलो हो?

⁴⁷ जखो मेरै कनै आवै अर मेरी सुणै अर मानै ह बिनै म बतास्युं बो कंय्यां को ह,

⁴⁸ बो बि मिनख की जंय्यां ह जखो आपको घर ढाड प बणायो। अर जद बाढ आई जणा पाणी की टकर बिकै लागी पण बि मकाननै हला कोनी सकी क्युं क बो पक्को चिणेड़ो हो।

⁴⁹ पण जखो सुणर कोनी मानै बो बि मिनख की जंय्यां ह जखो माटी प बिना निम क घर चिण्यो अर जद पाणी की धार लागी जणा बो हात्युहात तबा होगो अर सक्यु ढेग्यो।”