लूका 4 - जीवन को च्यानणो (सेकावाटी नया नियम की पोथ्या)

ईसुनै बिचासबो

¹ ईसु पबितर आत्माऊँ भर'र यरदन नदिऊँ पाछो आयो। अर पबितर आत्मा बिनै उजाड़ म लेगो।

² अर उजाड़ म ईसुनै चाळिस दिना ताँई सेतान बिचास्यो। बा दिना म बो क्युंई कोनी खायो जि बजेऊँ आ चाळिस दिना पाछै बिनै भूख लागी।

³ अर सेतान बिऊँ बोल्यो, “ज तू असल मई परमेसर को बेटो ह जणा इ भाठानै बोल क ओ रोटी बण जावै।”

⁴ इपै ईसु बिनै जुबाब दिओ, “सास्तर म अंय्यां मंडर्यो ह क, ‘मिनख रोटीऊँई कोनी जीवै।’”

⁵ जणा सेतान बिनै उची झघा म लेज्यार आँख मीचताई जगत को सगळो राज दिखायो

⁶ अर बिऊँ बोल्यो, “इकै उपर को सगळो अधिकार अर ठाट-बाट तनै दे देस्युँ क्युं क ओ मनै दियड़ो ह अर म जिनै चाऊँ बिनै दे सकूँ हूँ

⁷ जणा इब अ सगळी चिजा तेरी हो सकै ह ज तू मनै धोकै।”

⁸ ईसु बिनै जुबाब दिओ, “सास्तर म अंय्यां मंडर्यो ह, ‘तनै तेरा परबु परमेसर की सेवा करबो चाए अर बिनैई ध्यारबो चाए।’”

⁹ जणा बो बिनै यरूसलेम का मनदर की सऊँ उपली चोटी प लेज्यार खड़्यो कर दिओ। अर बिऊँ बोल्यो, “ज तू सचमई परमेसर को बेटो ह जणा अठैऊँ तळै कुदज्या।

¹⁰ क्युं क सास्तर म मंडर्यो ह क, ‘परमेसर आपका ईस्बर नगरी दुतानै तनै बचाबा भेज देसी,’

¹¹ अर बे तेरा पग कोई कांकरा प पड़ै बिऊँ पेली तनै आपका हाता म उठा लेसी।”

¹² पण ईसु बिऊँ बोल्यो, “ओ बी मंडर्यो ह क, ‘तू तेरा परबु परमेसरनै मना बिचासजे।’”

¹³ जणा सेतान बिनै हरतर्याऊँ बिचासर चोखो मोको आबा ताँई बिनै छोडर चलेगो।

लोगा म ईसु का परबचन

¹⁴ जणा पाछै ईसु पबितर आत्मा की ताकतऊँ भरेड़ो गलिल म पाछो आयो। अर बिकी चरचा बि इलाका म च्यारूमेर फेलगी।

¹⁵ बो अरदास करबाळी झघा म सीख देतो अर सगळा बिकी बडाई करता।

नासरत म ईसु की बेजती

¹⁶ जणा पाछै बो नासरत नगरी म आयो जठै बो पळ्यो-बढ्यो हो, अर आपकी बाण गेल यहूदि मिनखा क अरामहाळा दिन अरदास करबाळी झघा गयो अर बो पाठ बाचबा ताँई खड़्यो होयो।

¹⁷ अर बाचबा ताँई बिनै परमेसर की खेबाळा यसाया की पोथी दि गई। अर बो पोथी खोलर बा झघा काडी जठै ओ मंडर्यो हो,

¹⁸ “परबु की पबितर आत्मा मेर प ह, क्युं क बे मेरो अभिसेक करर भेज्यो ह, क म बोदानै चोखो समचार सुणाऊँ, केद्‍या की अजादि को हेलो पाड़ूँ, आँदानै आँख्या द्‍युँ, दब्या-चिथ्यानै उठाऊँ,

¹⁹ अर बि टेम को हेलो पाड़ूँ जिमै परमेसर आपका मिनखानै बचासी।”

²⁰ इकै पाछै बो पोथी बंद कर बा तो दे दि बि सेवकनै, अर खुद निचै बेठगो। अर जत्ता बी बठै हा बा सगळा को ध्यान बिपैई हो।

²¹ जणा बो बाऊँ बोल्यो, “आज सास्तर म मंडेड़ा अ बचन पूरा होया जंय्यां की थे सुणर्या हो।”

²² सगळा बिकी वाह-वाई करर्या हा। अर बिका मुंडाऊँ निकळबाळा दयाऊँ भरेड़ा बचना प ताजूब करर्या हा। अर बोलर्या हा, “के ओ युसूफ को छोरो कोनी?”

²³ बो बाऊँ बोल्यो, “थे मनै आ बात बोलस्यो, ‘ओ बेद खुदनै निरोगो कर अर आबी बोलस्यो जोक्यु थे कफरनूम म कर्या हो बो थारी खुदकी नगरी म बी करो’

²⁴ म थारूँ सची-सची बोलुँ हूँ खुदकी भौम म परमेसर की खेबाळा की जमाई कदर कोनी होवै।

²⁵ म थारूँ साची बोलुँ हूँ, एलिआ का टेम जद साडे तीन बरसा ताँई एक छाँटई कोनी गिरी अर सगळा देस क मांयनै सागेड़ो काळ पड़्यो बि टेम का इजरायल म घणिई खाली होईड़ी लूगाया ही।

²⁶ पण सैदा नगरी का सारला गाँव सारपत की एक खाली होईड़ीनै छोडर एलिआनै बामैऊँ ओर कोईसा कनै कोनी भेज्यो गयो।

²⁷ अर अंय्यांई परमेसर की खेबाळा एलिसा का टेम म इजरायल म बोळा कोढी हा पण सिरीया देस का नामाननै छोडर दुसरा कोईको बी कोढ कोनी धोयो गयो।”

²⁸ जत्ता बी अरदास करबाळी झघा म हा बे अ बाता सुणर झाळ्या म भरगा।

²⁹ बे खड़्या होर बिनै धकामार नगरी क बारनै डूँगरी की चोटी प लेग्या जि डूँगरी प बाकी नगरी बसेड़ी ही जिऊँ क बे बिनै खड़ी चोटीऊँ तळै पटक सकै।

³⁰ पण बो चुपचाप बाकै मांयनैऊँ चलेगो।

एक आदमी मऊँ ओपरी बलाय काडी

³¹ इकै पाछै बो गलिल का कफरनूम नगर म गयो। अर यहूदि मिनखा क अरामहाळा दिन लोगानै परबचन देर्यो हो।

³² बे बिका बचनाऊँ ताजूब करर्या हा क्युं क बो अधिकार क सागै सीख देतो हो।

³³ बठै अरदास करबाळी झघा म एक मिनख हो जिमै एक सूगली ओपरी बलाय ही। बो जोरऊँ चिलाटी घाल्यो,

³⁴ “ओ ईसु नासरी थारो म्हारो काँई लेणदेण? तू के म्हानै नास करबा आयो ह? म तनै जाणू हूँ तू कूण ह? तू परमेसर को पबितर मिनख ह।”

³⁵ ईसु बिनै दकालर बोल्यो, “चुप रेह अर इमैऊँ निकळज्या।” जणा बा बलाय बिनै पटक'र बिको कोई नुकसान कर्या बिनाई बिमैऊँ निकळगी।

³⁶ आ देखर देखबाळा ताजूब करबा लाग्या अर सगळा आपसरी म बतळाबा लाग्या क, “ओ काँई बचन ह? अधिकार अर सक्‍ति क सागै ओ मिनख सूगली ओपरी बलायनै हुकम देवै अर बे निकळर भाग ज्यावीं।”

³⁷ अर ईसु की चरचा बि इलाका म च्यारूमेर फेलगी।

बिमारानै निरोगो करबो

³⁸ ईसु अरदास करबाळी झघाऊँ समोन क घरा गयो। अर समोन की सासू बि टेम बुखार म पड़ी ही, अर बे ईसुऊँ हात जो'ड़र खयो म्हराज इनै निरोगी करो।

³⁹ अर ईसु बिकै सीराणै खड़्यो होर अधिकारऊँ बुखारनै उतरबा ताँई दकाल लगाई अर बुखार हात्युहात उतरगी। अर बा जदकी जदई खड़ी होर बाकी सेवा-पाणी करबा लागगी।

⁴⁰ अर दिन आथबा की टेम लोग बा सगळानै ईसु कनै ल्याया जखा भात-भात की बिमार्या म पड़्या हा अर बो बा सगळा क माथा प हात धर'र सगळानै निरोगो कर्यो।

⁴¹ अर बामैऊँ घणकराक मऊँ ओपरी बलाय अंय्यां चिलाटी मारती निकळगी क, “तू परमेसर को बेटो ह।” पण ईसु बानै दकालतो अर बोलबा कोनी देतो, क्युं क बे जाणती ही की ओ मसी ह।

दुसरी नगर्या म ईसु को जाबो

⁴² भागपाट्याई बो एक उजाड़ म चलेगो। पण भीड़ बिनै ढुंढती-ढुंढती बिकन पुगी। अर बे सगळा बिका न्होरा खाया क बो बानै छोडर नइ जावै।

⁴³ पण बो बाऊँ बोल्यो, “परमेसर का राज को चोखो समचार मनै दुसरी नगर्या म बी सुणाणो ह, अर मनै इ ताँई धरती प भेज्यो गयो।”

⁴⁴ अर अंय्यां करता-करता बो यहूदिआ देस म अरदास करबाळी झघा म हेलो पाड़बा लागगो।