लूका 21 - जीवन को च्यानणो (सेकावाटी नया नियम की पोथ्या)

गरीबणी खाली होईड़ी लूगाई को दान

¹ ईसु आपकी आँख्या उठार देख्यो क पिसाळा आप-आपको दान दानहाळी पेटी म घालै हा।

² बो एक गरीबणी खाली होईड़ी लूगाईनै बी बिमै तामा का दो सीक्का घालता देख्यो।

³ जणा बो बोल्यो, “म थारूँ सची बोलुँ हूँ आ गरीबणी खाली होईड़ी लूगाई दुसरा सगळा मिनखाऊँ बेत्ती दान घाली ह।

⁴ क्युं क सगळा तो आपकी बढती मऊँ घाल्या पण आ खाली होईड़ी आपकी सगळी कमाई इमै घाल दि। इकै कनै अत्तोई हो जिऊँ इको चूलो बळतो।”

मनदर का बिनास क बारां म बतळाबो

⁵ जद क्युंक जणा मनदर क बारां म चरचा करर्या हा, की बडो अरदास घर सोवणा सोवणा भाठा अर परमेसरनै चढाईड़ी चिजाऊँ कतो सोवणो लागर्यो ह। जद ईसु बोल्यो,

⁶ “बे दिन बी आसी जामै थे जोक्यु बी देखर्या हो बामै एक भाठा प भाठो बी कोनी टिक्यो रेह्सी। बा सगळानै ढाह दिओ जासी।”

संकट अर कळेस की घड़ी

⁷ जणा बे बिऊँ बुज्या क, “गरूजी अ बात कद घटसी? अर अ बाता जखी होबाळी ह बाकी काँई सेलाणी होसी?”

⁸ ईसु बोल्यो, “चोकन्ना रेहज्यो कदै कोई थानै भंगर्या म नइ गेर दे, क्युं क मेरा नामऊँ बोळा आसी अर खेसी बे मसी हीं, अर बा घड़ी आगी ह। पण थे बाकै गेल मना होज्याज्यो।

⁹ राड़ अर बगावत की खबरा सुणर डरज्यो मना, क्युं क आ अंत की घड़ी कोनी होसी अर अ बाता तो पेली होणी जरूरी ह।”

¹⁰ बो बाऊँ खेबा लाग्यो, “एक राज दुसरा राज प चढाई करसी अर देस-देसऊँ लड़सी अर।

¹¹ सगळी झघा खतरनाक भूचाळ आसी, काळ पड़सी अर मरी फेलसी, बठै अकासऊँ अजिब-अजिब अर डराबाळी चिजा आसी।

¹² पण आ सगळी बाता क होबाऊँ पेली हर कठै थानै मेरी बजेऊँ पकड़्यो अर सतायो जासी। थानै अरदास करबाळी झघा म सूप्यो जासी अर जेळ म बंद कर्यो जासी थानै राजा अर राज करबाळा क सामै लेर जासी।

¹³ ओ थारै कनै चोखा समचारनै बोलबा को मोको होसी।

¹⁴ जणा आ बाता क होबाऊँ पेली थे थारा मननै त्यार करल्यो। अर थे थारो बचाव कंय्यां करस्यो इ बात की चिंत्या मना करो।

¹⁵ क्युं क म थानै अंय्यां का बचन अर बुदी देस्युँ जिऊँ जोक्यु बी थे बोलस्यो जणा थारा बेरी थारै सामै कोनी खड़्या रेह सकींगा अर नइ बिनै गळत साबित कर सकींगा।

¹⁶ थारा खुदका माँ-बाप, सगा-सम्बंदि, भाई-भाण अर भाईलाई थानै पकड़ासी अर थारै मऊँ क्युंकनै तो मरवा गेरसी।

¹⁷ अर मेरी बजेऊँ सगळा थानै देखबोई पसंद कोनी करसी।

¹⁸ पण थारा सीर को एक बाळई बाको कोनी होसी।

¹⁹ थे पक्का रेहज्यो जिऊँ थे खुदनै बचास्यो।

यरूसलेम को उजाड़

²⁰ “थे जद सेनानै यरूसलेम क बारकी फिरेड़ी देखो। जणा जाण जाज्यो यरूसलेम को उजाड़ होबाळो ह।”

²¹ बि घड़ी जखा यहूदिआ दिसावर म रेह्‍वै बानै डूँगरी प भाग ज्याणो चाए। अर जखा यरूसलेम नगरी म होवीं बानै नगरी छोड देणी चाए। अर जखा गाँव म रेह्‍वै बे गाँव छोड नगरी म नइ जावीं।

²² क्युं क बा ताँई बे दिन सजा भोगबा का होसी, जिऊँ पबितर सास्तर म मंडेड़ा सगळा आंक पूरा कर्या जासी।

²³ अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी। क्युं क बे इऊँ कोनी बच सकिंगी। क्युं क आ दिना म, इ धरती प परकोप होसी अर बा मिनखा प परमेसरनै घणी झाळ आसी।

²⁴ मिनख तलवाराऊँ काट्या जासी अर बाकी सगळा दुसरा देसा का केदि होसी। अर जद ताँई परमेसरनै नइ ध्यारबाळा मिनखा को टेम पूरो कोनी होसी बे यरूसलेमनै पगा तळै मसळींगा।

मिनख का जाया को पाछो आबो

²⁵ “बि टेम सूरज चाँद अर तारा म अनोरी बाता होसी अर धरती प झघा-झघा मिनखा म दुख आसी। अर समदर क गरजबाऊँ झाल उठसी अर बा झालाऊँ धरती का सगळा मिनख डर ज्यासी।

²⁶ लोग दुनिया प पड़बाळी मुसीबत अर डर की बजेऊँ निरास होज्यासी। अर आगै काँई होबाळो ह, इ डर म जिसी क्युं क अकास की सक्‍तिया आपकी झघाऊँ हटा दि जासी।

²⁷ जणा पाछै लोग मिनख का बेटानै मेमा भरी सक्‍ति क सागै बादळा म आता देखसी।

²⁸ थे जद अ सगळी बाता होबा लागै जणा बि टेम थे थारा सीरनै उपर उठाज्यो, क्युं क थारो छुटकारो सांकड़ैई होसी।”

ईसु को बचन अमर ह

²⁹ बो बानै एक मिसाल दिनी, “अंजीर का दरख्त अर आ सगळा दरख्तानै देखो।

³⁰ जंय्यांई बामै कुपळा फूटै जणा थे खुदई जाण ज्याओ क उंदयाळो आबाळो ह।

³¹ अंय्यांई जद थे आ बातानै होता देखो जणा जाणज्याज्यो परमेसर को राज आबाळो ह।

³² म थानै साची खेऊँ हूँ, जद ताँई अ सगळी बाता नइ होवीं जद ताँई इ पिडी को अंत कोनी होवै।

³³ अकास अर धरती टळ सकीं पण मेरो बोल्यो कदैई कोनी टळै।

चेता म रेह्ओ

³⁴ “इ ताँई चेता म रेह्‍वो, कदै अंय्यां नइ होज्या क थे तो लाग्या रेह्‍वो पीबा-खाबा अर आटा चून की चिंत्या म अर बो दिन थार प फंदा की जंय्यां आ पड़ै।

³⁵ क्युं क सगळी धरती का मिनख इ दिननै भोगसी।

³⁶ इ ताँई सदाई चेता म रेह्ओ अर सदाई अरदास करता रेह्ओ जिऊँ थे सगळी होबाळी बाताऊँ बच सको अर मिनख का बेटा क सामै खड़्या हो सको।”

³⁷ दिन म तो बो मनदर म उपदेस देतो अर रातनै जेतून नाम का डूँगरपै रेह्तो।

³⁸ अर सगळा रोजकी सुआरैई मनदर म बिका उपदेस सुणबा जाता हा।