लूका 20 - जीवन को च्यानणो (सेकावाटी नया नियम की पोथ्या)

ईसु का अधिकार को सुवाल

¹ एक दिन ईसु मनदर म मिनखानै सीख देर्यो हो। अर चोखो समचार सुणार्यो हो जणा परधान याजक अर सास्तरानै सीखाबाळा यहूदि नेता क सागै भेळा होर बिकन आया।

² अर बे बिऊँ खेबा लाग्या, “म्हानै बता तू अ सगळा काम कूणसा अधिकारऊँ करै ह? बो कूण ह जखो तनै अंय्यां करबा को अधिकार दिओ?”

³ जणा ईसु बानै बोल्यो, “म बी थानै एक सुवाल बुजूँ हूँ।

⁴ थे आ बताओ यहून्नानै पाणी को बतिस्मो देबा को हक ईस्बरऊँ मिल्यो नहिस मिनखाऊँ?”

⁵ इपै बे आपसरी म बतळाबा लागगा, “ज आपा खेवां की ईस्बर नगरीऊँ जणा ओ खेसी पाछै थे बिको बिस्वास क्युं कोनी कर्या?

⁶ अर ज आपा अंय्यां खेस्यां की बिनै ओ काम मिनख दिओ जणा आ सगळी भीड़ आपणा प भाठा बगासी, क्युं क अ सगळा यहून्नानै परमेसर की खेबाळो मानै ह।”

⁷ जणा बे कह्या, “म्हें तो कोनी जाणा की बिनै ओ हक कूण दिओ।”

⁸ बाको जुबाब सुणर ईसु बानै बोल्यो, “जणा म बी थानै कोनी बताऊँ की म ओ काम की हकऊँ करूं हूँ।”

बुरा ठेकेदारा की निती-कथा

⁹ जणा बो मिनखानै एक मिसाल दिनी, “एक आदमी अँगूरा को बाग लगार बिनै किसानानै ठेका प देर बोळी दूर चलेगो।

¹⁰ जद अँगूर लागबा की रुत आई। जणा बो अँगूरा मऊँ आपको हिस्सो लेबा ताँई एक नोकरनै अँगूरा का बाग म भेज्यो। पण बे ठेकेदार बिनै मार कुटर रितो-फाकोई पाछो काड दिओ।

¹¹ जणा बो एक दुसरा दासनै ओज्यु बाकन भेज्यो। पण बे बिनै बी मारकूटर बिकी दुरगती कर रितो-फाकोई पाछो काड दिओ।

¹² अंय्यांई बो तीसरानै भेज्यो पण बे बिनै बी अदमर्यो कर बारनै फेक दिओ।

¹³ जणा अँगूरा का बाग को मालिक बोल्यो, ‘म काँई करूं? म इब मेरा लाडला छोरानै भेजस्युं। कमऊँ कम बिको तो बे लिहाज राखसी!’

¹⁴ पण जद बे बिनै देख्या जणा आपसरी म खेबा लाग्या, ‘इब क तो मालिक को छोरोई आर्यो ह, आओ आपा मिलर इनै मार देवां। अर इ बाड़ी प कब्जो करल्याँ।’

¹⁵ अर बे बिनै अँगूरा का बागऊँ बारनै का'डर मार गेर्या।” जणा ईसु बाऊँ बुज्यो, “इब बाग को मालिक बाकै सागै काँई करसी?

¹⁶ बो आर बा ठेकेदारानै मार अँगूरा को बाग दुसरानै समाळबा ताँई दे देसी।” आ बात सुण बे बोल्या, “अंय्यां कदैई नइ हो।”

¹⁷ जणा ईसु बाकै कानि देखर बोल्यो, “जणा सास्तर म मंडेड़ा इ आंक को काँई मतबल ह, “‘जि भाठानै चेजारा क्युंई जोगो कोनी जाण्या, बोई कूणानै समाळबाळो होगो।’

¹⁸ “जखा बी, इ भाठा प पड़सी बे टुकड़ा-टुकड़ा होज्यासी। अर ओ भाठो जिपै पड़सी बिनै ओ पिस गेरसी।”

यहूदि नेता की जाळसाजी

¹⁹ बि घड़ीई सास्तरनै सीखाबाळा अर परधान याजक बिनै पकड़बो चावा हा। क्युं क बे समजगा हा की बो आ बात म्हारै प बोली ह, पण बे मिनखाऊँ डरता।

²⁰ अर बे सगळा इ ताक म रेह्बा लागगा की बो कोई गळती करै। बे जासुसानै हक देर बिकै गेल छोड्या। जखा ईमानदारी ताँई जाण्या जाता हा। अर इ आस म की बे ईसुनै बाता म फसार बिऊँ क्युं गळत खुवा देसी। जिऊँ बे बिनै रोमी सरकार क हाता म सूप दिं।

²¹ जणा बे जासुस बिनै फसाबा ताँई सुवाल बुज्यो, “गरूजी म्हें जाणा, तू जखी बी बोलै अर सीखावै बे साची ह अर तू कोईनै छोटो बडो देखर कोईको पक्सपात कोनी करै पण परमेसर को गेलो ईमानदारीऊँ बतावै ह ,

²² जणा थे म्हानै बताओ आपणा नेम-कायदा गेल रोमी समराटनै लगान देबो ठिक ह क कोनी?”

²³ ईसु बाकी बात पकड़ लिओ अर बाऊँ बोल्यो,

²⁴ “मनै एक रोमी सरकार को सीक्को दिखाओ। अर इनै देखर बताओ इपै किको नाम अर सकल ह?” बे कह्या, “रोमी समराट की।”

²⁵ जणा बो बोल्यो, “जखो रोमी समराट को ह बो समराटनै अर जखो परमेसर को ह बो परमेसरनै द्‍यो।”

²⁶ बिको जुबाब सुणर बे सूना होगा अर मिनखा क सामै इ बात म बिनै कोनी पकड़ सक्या।

ईसुनै फसाबा ताँई सदुकीया की जाळसाजी

²⁷ इब क्युंक सदुकी ईसु कनै आया, सदुकी बे हा जखा मर्या पाछै जी उठबानै कोनी मान्या करता हा।

²⁸ बे बिऊँ बुज्या, “गरूजी मूसा को म्हारै ताँई ओ नियम मांडेड़ो ह, क कोईको भाईड़ो आपकी लूगाई क होतासोता बिना ओलाद क मर जावै। जणा बिको भाई बिकी लूगाईनै ब्याले अर आपका भाईड़ा ताँई टाबर पैदा करै।

²⁹ इब देखो कोई सात भाईड़ा हा। पेलो हो जखो एक लूगाईऊँ ब्या कर बिना आस ओलादई मरगो।

³⁰ अर बिकै मर्या पाछै दुसरो भाई बिनै ब्याली। पण बो बी बिना ओलादई मरगो।

³¹ इब तीसरो बी अंय्यांई मरगो, अंय्यां करता-करता बे सात्यु का सात्यु भाईड़ा हा जखा बिना ओलादई मरगा।

³² अर आखरी म बा लूगाई बी मरगी।

³³ इब तू म्हानै आ बता बि दिन जद मरेड़ा ओज्यु जिसी जणा बा बामैऊँ कूणसा की लूगाई होसी? क्युं क बिका तो सात्यु का सात्युई धणी हा।”

³⁴ जणा ईसु जुबाब म बोल्यो, “इ जुग म तो ब्या सादि होवीं हीं,

³⁵ पण बे मिनख जखा मरेड़ा मऊँ ओज्यु जी उठबा क जोगा हीं आबाळा जुग म बाकी ब्या सादि कोनी होसी।

³⁶ अर बे मरेड़ा मऊँ ओज्यु जी उठबा की बजेऊँ परमेसर की ओलाद होसी। बिकै पाछै बे कदैई कोनी मरसी जिकी बजेऊँ बे ईस्बर नगरी दुता क जंय्यां होसी।

³⁷ अर मरेड़ा क जी उठबा की बातनै मूसा बी बळती झाड़ी हाळा आंक म परगट करी ह। क्युं क बो परमेसरनै अब्राहम, इसाक अर याकूब को परमेसर बतायो ह।

³⁸ परमेसर मरेड़ा को कोनी पण जीवता को परमेसर ह। क्युं क सगळा बि ताँई जीवता रेह्‍वै।”

³⁹ आ सुणर सास्तरनै सीखाबाळा मऊँ क्युंक बोल्या, “आ बात तो थे चोखी बोली गरूजी।”

⁴⁰ अर इकै पाछै बाकी ओर कोई सुवाल बुजबा की हिमत कोनी बगी।

मसी किको बेटो

⁴¹ ईसु बाऊँ बोल्यो, “बे बोलीं हीं, आ कंय्यां हो सकै ह की मसी दाऊद की ओलाद होसी?

⁴² क्युं क भजना हाळी पोथी म खुद दाऊद अंय्यां बोलै ह: ‘परबु मेरा परबुऊँ बोल्यो, मेरा दाया हात बेठ,

⁴³ जद ताँई म तेरा बेरीयानै तेरै पगा तळै को पाटो नइ कर द्‍युँ।’

⁴⁴ “दाऊद खुद बिनै परबु बोलै, जणा बो बिकी ओलाद कंय्यां हो सकै ह?”

सास्तरनै सीखाबाळाऊँ बचर रेह्ओ

⁴⁵ सगळा सुणर्या हा जणा बो आपका चेलाऊँ बोल्यो,

⁴⁶ “सास्तरनै सीखाबाळाऊँ बचज्यो जानै लामा-लामा चोळा पेरबो, बजारा म आदरमान, अरदास करबाळी झघा म उची अर ब्या-सावा म मानहाळी झघा भावै ह।

⁴⁷ बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।”