लूका 19 - जीवन को च्यानणो (सेकावाटी नया नियम की पोथ्या)

चुंगी लेबाळो जक्कई

¹ जद ईसु यरियो नगरी होतो होयो जार्यो हो।

² जणा बठै जक्कई नाम को एक मिनख हो जखो चुंगी लेबाळा को सरदार हो अर बो पिसाळो हो।

³ बो ईसुनै देखबा की तक म हो पण भापड़ो देख कोनी पार्यो, क्युं क भीड़ रेह्गी घणी अर बो रेह्गो बावन्यो।

⁴ जणा बो ईसुनै देखबा ताँई भीड़ऊँ अगाऊ भागर ईसु, जि गेलाऊँ जाबाळो हो बि गेला म एक अंजीर का दरख्त प जार चढगो।

⁵ जद ईसु बि दरख्त क कनै पुग्यो जणा बो बठै खड़्यो होर उपरनै देखर जक्कईऊँ बोल्यो, “जक्कई बेगोसो तळै उतर्या क्युं क आज म तेरै घराई बासो लेस्युं।”

⁶ जणा जक्कई बेगोसोक दरख्तऊँ तळै उतर्यो, अर बानै राजी-राजी आपकै घरा लेगो।

⁷ आ देखर जत्ता बी बठै भेळा होर्या हा बे सगळा आपसरी म बड़बड़ाबा लागगा क, “ओ तो पापी क घरा पावणा-पुड़ी खाबा गयो ह।”

⁸ पण जक्कई ह जखो भापड़ो खड़्यो होर परबुऊँ बोल्यो, “ओ म्हराज मेर कनै जत्ती बी धन-दोलत ह बिको आदो म गरीबा म बाट देस्युँ अर ज बेईमानीऊँ कोई भाईड़ा को क्युं बी दाब लिओ हो जणा म बिको बिनै चोगुणो पाछो दे देस्युँ।”

⁹ अत्ती सुणर ईसु बिनै बोल्यो, “इ कूणबा म आज छुटकारो आगो ह क्युं क ओ बिस्वास कर दिखा दिओ की ओ अब्राहम की ओलाद ह।

¹⁰ क्युं क मिनख को बेटो गुमेड़ानै ढुंढबा अर बानै बचाबाई धरती प आयो ह।”

परमेसर जोक्यु दे बिनै बरतो

¹¹ जद बे बिकी बाता सुणर्या हा जणाई बो बानै एक मिसाल ओर दिनी क्युं क ईसु यरूसलेम क सांकड़ैई हो अर मिनख आ मन म कर राखी ही क परमेसर को राज बस परगट होबाळोई ह।

¹² जणा बो खेबा लाग्यो, “एक आदमी जिकनै अणाप-सणाप धन-दोलत ही बो राज करबा की सीख लेबा ताँई दूर दिसावर चलेगो।

¹³ जाबाऊँ पेल्या बो आपका दस दासानै बुलाया, अर बुलार बानै एक-एक सोना की म्होर दिनी अर बोल्यो, ‘म जि दिन ताँई पाछो नइ आऊँ बि दिन ताँई आऊँ लेणदेण करज्यो।’

¹⁴ पण बिकी नगरी का दुसरा मिनख बिऊँ जळता-बळता हा बे बिकै गेल एक टोळी क हात आ खुवा भेज्यो की, ‘म्हें कोनी चावां क ओ म्हारै प राज करै।’

¹⁵ “पण बो राजा बणर पाछो आपकै घरा आग्यो। अर आताई बो बा दासानै बुलायो जानै बो सोना की म्होर देर गयो हो क्युं क बो आ जाणबो चावै हो क बे बा म्होराऊँ क्यु कमाया हीं क कोनी।

¹⁶ जणा पेलो आर बोल्यो, ‘मालिक थारी एक म्होरऊँ म दस म्होरा ओर कमाली।’

¹⁷ जणा बो मालिक बि दासनै बोल्यो, ‘तू मेरो चोखो दास ह जखो तू अत्तीसी बात म बी मेरै बिस्वास जोगो रिह्यो। जणा इब म तनै दस नगरा प हक द्‍युँ हूँ।’

¹⁸ दुसरो आर बोल्यो, ‘मालिक थारी म्होरऊँ म पाच ओर कमाई।’

¹⁹ पेला की जंय्यांई बो बिनै बी बोल्यो, ‘तू पाच नगरा प जमीदार होसी।’

²⁰ इब तीसरो आर बोल्यो, ‘अ ल्यो थारी म्होर जिनै म बि दिन इ गमछा म आटी देर बांद लिनी ही।

²¹ क्युं क म डरगो हो, थे हो जखा अंय्यां का आदमी हो जखो थारो कोनी बिनै लेल्यो अर जखो थे कोनी बोयो बिनै काटल्यो।’

²² जणा बो मालिक बिऊँ बोल्यो, ‘तू बुरो दास ह! म तेरा कह्या गेलई तेरै सागै करस्युं। तू जाणता बुजता क म टेडो आदमी हूँ जखो म कोनी धरूँ बिनै लेल्युँ अर जखो कोनी बोऊँ बिनै काट ल्युं।

²³ तू बिनै ब्याजुणा क्युं कोनी दिओ? जिऊँ म पाछो आर बानै ब्याज समेत ले लेतो।’

²⁴ जणा जखा बठै बिकन खड़्या हा बाऊँ बो बोल्यो, ‘इकी म्होर इऊँ पाछी लेल्यो अर जखो दस कमाई ह बिनै देद्‍यो।’

²⁵ आ सुणर बे बोल्या, ‘मालिक इकन तो पेलीऊँ दस म्होरा हीं।’

²⁶ मालिक बोल्यो, ‘म थानै बोलुँ हूँ जिकनै ह बिनै ओर दिओ जासी अर जिकनै कोनी बिऊँ जोक्यु बिकन ह बो बी पाछो खोस लिओ जासी।

²⁷ अर बे जखा मेरा बेरी हीं जखा मनै, इ राजगद्दि प बेठ्यो कोनी देख सकै बानै मेरै सामै ल्यार बाका सीर धड़ऊँ नाकै कर द्‍यो।’”

ईसु को यरूसलेम म आबो

²⁸ अ सगळी बाता खे-खार ईसु यरूसलेम कानि बाऊँ पेली आपका पाऊंडा बढाया।

²⁹ अर जद बो जेतून डूँगर प बेतफगे अर बेतनिया क सांकड़ै पुग्यो जणा बो आपका चेला मऊँ दोनै आ खेर भेज्यो,

³⁰ “सामला गाँव म जाओ अर जंय्यांई थे बड़स्यो थानै एक गधेड़ी को बच्यो भंदेड़ो लाधसी जिपै आज ताँई कोई कोनी बेठ्यो बिनै खोलर ल्याओ।

³¹ ज थानै कोई बुजै की थे इनै क्याले खोलर्या हो जणा थे बिनै बोल दिज्यो परबुनै इकी जुर्त ह।”

³² जानै भेज्या बे जार बठै देख्या जणा बानै ठिक बंय्यांई जंय्यां बानै बो बोल्यो हो लाध्यो।

³³ जंय्यांई बे बिनै खोलर्या हा जणा बि गधेड़ी का बच्या का धणी बाऊँ बुज्या, “इ बच्यानै क्याले खोलो हो?”

³⁴ जणा बे बोल्या, “परबुनै इकी जुर्त ह।”

³⁵ अर बे बि गधेड़ी का बच्यानै ईसु कनै ल्याया अर आपका गाबा बिपै गेर बिपै ईसुनै बिठा दिआ।

³⁶ अर ईसु जि गेलाऊँ जार्या हा बि गेला म ईसु क आगै-आगै लोग आपका गाबा बिछाता जार्या हा।

³⁷ अर जद बो जेतून की डूँगरी की ढाळ म आयो जणा सगळा का सगळा चेला राजी हो होर जोरऊँ परमेसर की बडाई करबा लागगा क्युं क बे बिका सगळा ताजूब का कामानै देख्या हा।

³⁸ बे जोर-जोरऊँ कह्या, “धने ह बो राजा जखो परबु क नामऊँ आवै। ईस्बर नगरी म स्यांती अर परमेसर की जे-जैकार होवै।”

³⁹ जणा भीड़ मऊँ क्युंक फरिसी बोल्या, “म्हराज थारा चेलानै थामो।”

⁴⁰ बो बानै जुबाब दिओ, “ज अ चुप होज्यासी जणा भाठा चिला उठसी।”

यरूसलेम प ईसु को रोबो

⁴¹ अर कनै आर जद बो यरूसलेमनै देख्यो जणा बिनै बिपै रोज आयो।

⁴² अर बोल्यो, “ज तू आज आ जाणतो क तनै स्यांती किऊँ मिलसी! पण हाल बिनै तू तेरी आँख्याऊँ कोनी देख सकै!

⁴³ अर बे दिन बी आसी जद तेरा बेरी तेरै च्यारूमेर आडी देर तनै दबोच लेसी।

⁴⁴ बे तनै अर तेरा टाबरानै धूळ म मिला देसी। अर तेरै मांयनै भाठा प भाठोई कोनी छोडसी। क्युं क तू बि टेमनै कोनी जाण्यो जद परमेसर तनै बचाबा आयो।”

ईसु मनदर म

⁴⁵ जणा ईसु मनदर का आँगणा म जार ब्योपारिआनै बारनै काडबा लागगो।

⁴⁶ अर बानै बोल्यो, “सास्तरा म मंडर्यो ह, ‘मेरा मनदरनै अरदास को घर बोल्यो ज्यासी।’ पण थे इनै डाकूआ की खोळ बणा लिनी ह।”

⁴⁷ अर ईसु रोजकी मनदर म सीख देतो हो। पण परधान याजक, सास्तरानै सीखाबाळा अर लोगा का नेता बिनै मारबा की ताक म रेह्बा लागगा।

⁴⁸ पण बाकै अंय्यां करबा को कोई मोको हात कोनी लाग्यो। क्युं क सगळा मिनख बिका बचनानै बोळा मानता हा।