लूका 16 - जीवन को च्यानणो (सेकावाटी नया नियम की पोथ्या)

चलाक मुनिम

¹ ईसु आपका चेलाऊँ बोल्यो, “कोई साऊकार हो! बिकै एक भंडारी हो जिपै ओ बलेम लगायो गयो क बो बिका धननै सनकै-सनकै ठिडै लगार्यो ह।

² जणा बो साऊकार हो जखो बिनै बुलार बोल्यो, ‘म तेरा बारां म आ काँई सुणर्यो हूँ? इब तू अंय्यां कर बे बही-खाता ल्यार मनै हिसाब-किताब दे, क्युं क इब म तनै भंडारीपुणा प कोनी राख सकूँ।’

³ जणा बो भंडारी आपका मना मई बोल्यो, ‘आ तो गड़बड़ होगी इब म काँई करस्युं? क्युं क इब साऊकार मनै भंडारीपुणा प तो राखै कोनी अर तगारी मेरूँ गिरै कोनी, माँग के खाबा म मनै सरम आवै।

⁴ इब म जाणगो मनै काँई करबो चाए जिऊँ मेरो भंडारीपुणो छुटबा क पाछै लोग आपकै घरा म मेरी आवभगत करीं।’

⁵ जणा बो साऊकार का सगळा करजदारानै एक-एक कर बुलाया। अर पेला मिनखनै बुज्यो, ‘तेर प मेरा मालिक को कतो करजो ह?’

⁶ जणा बो बोल्यो, ‘मुनिम जी मेर प तो साऊकार का सो पिपा तेल मंडर्या हीं।’ जणा बो मुनिम बोल्यो, ‘आ ले बही अर तावळोसो इनै पचास पिपा करदे।’

⁷ अंय्यांई दुसराऊँ बुज्यो, ‘हाँ बोल तेर प कतो करजो ह?’ बो बोल्यो, ‘मालिक अड़सट मण ग्युं।’ जणा बो बोल्यो, ‘आ ले बही अर अड़सट को चोवन मांड दे।’

⁸ आ देखर बो साऊकार बि बेईमान भंडारीनै खूब सरायो क्युं क बो तेजपुणाऊँ काम कर्यो। दुनिया का मिनख परमेसर का मिनखाऊँ बरताव म तेज पड़ी हीं।

⁹ जणा म थारूँ बोलुँ हूँ दुनिया का धनऊँ भाईला बणाओ, इको ओ फाईदो होसी की जि दिन ओ धन निमड़ ज्यासी जणा थारी आवभगत जुग-जुग रेह्बाळा घर म करी जासी।

¹⁰ जखो थोड़ा म बिस्वास जोगो ह, बो बोळा म बी बिस्वास जोगो ह, अर जखो थोड़ा म बिस्वास जोगो कोनी बो बोळा म बी कोनी रेह्‍वै?

¹¹ खेबा को मतबल ओ ह की जद थे दुनिया का धन मई बिस्वास जोगा कोनी रिह्या जणा थार प कूण बिस्वास करसी क थे बि सचा धन म बिस्वास जोगा हो सको हो?

¹² जद थे बि पराया धन मई बिस्वास जोगा कोनी रिह्या जणा जखो थारै ताँई धरेड़ो ह बो थानै कूण देसी?

¹³ कोईबी नोकर दो मालिका की सेवा एक सागै कोनी कर सकै, अंय्यां होसी तो एकऊँ तो बेर राखसी अर दुसराऊँ परेम, बो एक क सागै तो बफादार रेह्सी अर दुसरानै छोटो जाणसी। अंय्यांई थे परमेसर अर धन की सेवा एक सागै कोनी कर सको।”

ईसु की भात-भात की सीख

¹⁴ पिसा का भूखा फरिसी आ सुणर ईसु को मजाक उडाबा लागगा।

¹⁵ ईसु बाऊँ बोल्यो, “थे तो मिनखा म देख-दिखावा का धरमी हो। पण परमेसर तो थारा हियानै जाणै ह, क्युं क जखी चिज मिनखा की नजर्या म बोळी खास ह बिको परमेसर की नजर्या म काँई मोल?

¹⁶ “नेम-कायदा अर परमेसर की खेबाळा की मांडेड़ी बाता को हेलो बतिस्मो देबाळा यहून्ना का दिना ताँई पाड़्यो गयो। पण बतिस्मो देबाळा यहून्ना का टेमऊँ परमेसर का चोखा समचार को हेलो पाड़्यो जार्यो ह। अर सगळानै परमेसर का राज म बड़बा ताँई न्होरा खार नूतो दिओ जार्यो ह।

¹⁷ ईस्बर नगरी अर धरती मिट सकै ह पण नेम-कायदा को एक आंकई कोनी मिटै।

¹⁸ “जणा जखो बी मोट्यार आपकी लूगाईनै छोडर दुसरो ब्या करै बो कुकरम करै ह। अंय्यांई छोडेड़ी लूगाईऊँ ब्या करबाळो मिनख बी कुकरम करै ह।

पिसाळो आदमी अर गरीब लाजर

¹⁹ “एक साऊकार हो। अर बो मेंगा-मेंगा गाबा पेरतो अर रोजकी म्हेफिल बाजी करतो।

²⁰ अर बठै एक लाजर नाम को गरीब मिनख बी हो। जिकै झघा-झघा गुमड़ा निकळर्या हा बिनै बि साऊकार की थळी प ल्यार छोड दिओ जातो हो।

²¹ अर बिका घावानै गंडक्ड़ा चाटता रेह्ता। अर बो आपको पेट भरबा ताँई बि साऊकार की जूंठ का माखणा ताँई तरसतो हो।

²² एक दिन बो गरीब लाजर मरगो। अर बिनै लेज्याबा ताँई ईस्बर नगरी दुत आर बिनै सिदा अब्राहम की गोदि म लेग्या। एक दिन बो साऊकार बी मर्यो अर बिनै लोग लेज्यार गाड्याया।

²³ इब साय बो सिदो नरक म अर बि लाय म तोबा तिल्ली घालतो जद बो उपरनै देख्यो जणा बिनै अब्राहम की गोदि म लाजर दिख्यो।

²⁴ जणा बो बठैऊँ हेलो मार'र बोल्यो, ‘ओ बाबा अब्राहम मेर प तरस खा। अर लाजरनै भेजर बिनै बोल की बो आपकी आँगळी डबोर एक बूँद पाणी की मेरी जीब प गेर'र बिनै सिळी करै क्युं क, इ आग म, म बळर्यो हूँ।’

²⁵ पण अब्राहम बोल्यो, ‘बेटा याद राख की तू तेरी जिंदगी म सदाई चोखी-चोखी चिजा भोगी जदकी ओ बिचारो सदाई आपकी जिंदगी म दुख देख्यो। पण इब अठै ओ मजाऊँ ह, अर तू पिड़ा म।

²⁶ अ सगळी बात तो बळी बुझी इकै अलावा म्हारै अर तेरै बिच एक उंडी खाई ह जि बजेऊँ नइ तो अठिनैऊँ परनै कोई जा सकै अर नइ परनैऊँ अठिनै कोई आ सकै।’

²⁷ जणा बो बोल्यो, ‘ओ बाबा अब्राहम म हात जो'ड़र थारूँ बोलुँ हूँ थे लाजरनै मेरा बाप क घरा भेज द्‍यो।

²⁸ क्युं क मेरै पाच भाईड़ा ओर हीं ओ जार बानै चेतासी कमऊँ कम बे, इ पिड़ा हाळी झघा म आबाऊँ बच ज्यासी।’

²⁹ अब्राहम बिऊँ बोल्यो, ‘बानै मूसा अर दुसरा परमेसर की खेबाळा की पोथ्या की बातानै सुणबो अर मानबो चाए।’

³⁰ जणा बो बोल्यो, ‘इऊँ पार कोनी पड़ै बाबा अब्राहम पण ज मरेड़ा मऊँ कोई बाकन जासी जणा बे पक्काई पापऊँ तौबा कर लेसी।’

³¹ जणा बो बिऊँ बोल्यो, ‘जद बे मूसा अर परमेसर की खेबाळा की पोथ्या की बातानै कोनी मानी जणा बे मर्या पाछै जिबाळा की कंय्यां मानसी?’”