लूका 15 - जीवन को च्यानणो (सेकावाटी नया नियम की पोथ्या)

गुमेड़ी लल्डी

¹ एक बर चुंगी लेबाळा अर पापी ईसुनै सुणबा ताँई भेळा होया।

² जणा फरिसी अर सास्तरानै सीखाबाळा आपसरी म बड़बड़ाबा लाग्या, “ओ तो पाप्याऊँ मिलै अर बाकै सागै खावै।”

³ जणा ईसु बानै एक मिसाल दिनी:

⁴ “मानल्यो थारै मऊँ कोईसा क कनै सो लल्ड्या हीं अर बामैऊँ एक गुमज्या जणा थे काँई करस्यो? के बा निन्याणमनै उजाड़ म छोडर जद ताँई बा गुमेड़ी लल्डी कोनी मिलज्यावै बिनै कोनी ढुंढस्यो?

⁵ अर जद बा गुमेड़ी लल्डी लाध जावै जणा थे बिनै राजी होर थारा कांधा प चढार थारै घरा ल्याओ हो।

⁶ अर घरा आबा क पाछै थारा आसपड़ोस अर थारा भाईलानै बुलार बाकै सागै लल्डी मिलबा की खुसी मनाओ हो।

⁷ “म थानै बोलुँ हूँ अंय्यांई पापऊँ तौबा करबाळा पापी की खुसी ईस्बर नगरी म ओर बी घणी होसी। जत्तो की बा निन्याणमै धरम्या क बदलै कोनी होवै जानै मन फेरबा की जुर्तई कोनी।

गुमेड़ो चाँदी को सीक्को

⁸ “नहिस तो अंय्यां सोचो एक लूगाई ह अर बिकन दस चाँदी का सीक्का हीं जिमैऊँ एक गुमज्या, जणा बा जद ताँई बो सीक्को मिल नइ जा घरनै झाड़ती भारती अर दिओ लेर बिनै सूल टोती कोनी रेह्‍वै के?

⁹ अर जद बा बि सीक्कानै ढुंढले। जणा पाछै बा राजी होर आपकी भाईल्या अर आसपड़ोसनै बुलार बानै बोलै ह, ‘मेरो गुमेड़ो सीक्को पाछो मिलगो।’

¹⁰ म थारूँ बोलुँ हूँ ठिक अंय्यांई जद कोई पापी पापऊँ तौबा करै ह, जणा परमेसर का ईस्बर नगरी दुता क सामै खुसी मनाई जावै ह।”

खाऊ-उडाऊ बेटो

¹¹ इकै पाछै ईसु बोल्यो, “कोई मिनख हो बिकै दो छोरा हा।

¹² छोटक्यो छोरो हो जखो आपका बापऊँ आपकी पाँती माँग ली जणा बो बाप आपकी सगळी जायजाद दोन्यु बेटा म बाट दि।

¹³ “थोड़ाई दिन बित्या जणा बो छोटक्यो छोरो आपकी पाँती को सगळो धन भेळो कर दूर दिसावर चलेगो। अर बठै बि धननै उदफेली म उडा दिओ।

¹⁴ अर जद बो सगळो धन बिलै लगा दिओ, जणा बा दिना म बि देस म घणो जोरको काळ पड़्यो। अर बिकै तो खाबा का लाला पड़गा।

¹⁵ जणा बो बि देस का एक मिनख क मजुरी करबा गयो। अर बो बिनै आपका खेत म सूल्डा चराबा को काम दिओ।

¹⁶ बो आ सोचर की कमऊँ कम बठै पेट भरबा ताँई मटर का छिलकाई मिलज्यासी। जिनै सूल्डा खाया करीं हीं, पण कोई बिनै एक छिलकोई कोनी दिओ।

¹⁷ जद बो आपका आपा म आयो तो बड़बड़ाबा लाग्यो, ‘मेरा बाप क कनै कत्ताई मजुर ह जखा धापर खावीं हीं बिकै पाछै बी बाकन बच जावै ह। अर म अठै बास्यो मरूँ हूँ।

¹⁸ जणा इब म मेरा बापूजी क कनै जास्युं। अर बाऊँ खेस्युं बापूजी म परमेसर क अर थारै खिलाप पाप कर्यो हूँ।

¹⁹ मेरा करम अंय्यां का कोनी की इब म थारो बेटो खुवाऊँ। इब थारूँ हात जो'ड़र अरदास ह की थे मनै थारो मजुर समजर राखल्यो।’

²⁰ आ ध्यार बो आपका बाप कनै चाल पड़्यो, अर बो जद घराऊँ क्युंक दूर हो जणा बिका बाप की निगा बिपै पड़ी, आपका छोरानै देखर बिको हेज पावस्यायो अर बो भागर बिनै आपकी छातीऊँ लगार बिका माखा लिआ।

²¹ जणा पाछै बो छोरो आपका बापऊँ बोल्यो, ‘बापूजी म परमेसर अर थारै खिलाप बोळा पाप कर्यो हूँ, जणा इब म, इ जोगो कोनी की थे मनै बेटो खेओ।’

²² पण बिको बाप आपका दासानै बोल्यो, ‘जाओ अर तावळासा बडियाऊँ बडिया गाबो ल्यार मेरा छोरानै पिराओ इका हाता म मुन्दड़ी अर पगा म जुती पिराओ।

²³ अर मोटो तगड़ो ज्यानबर काटो अर बिनै आपा सगळा मिलर खास्यां अर खुसी मणास्यां।

²⁴ क्युं क मेरो छोरो जखो म्हारै कानि को मर्या समान हो, बो पाछो जीयायो ओ गुमगो हो, जखो इब लाध्यो ह।’ अर बे सगळा मिलर खुसी मनाबा लाग्या।

²⁵ अर बि टेम बिको बडोड़ो बेटो जखो खेतऊँ घरा आर्यो हो अर जंय्यांई बो घरा क कनै पुग्यो जणा बिकै काना म नाचबा-गाबा को रोळो पड़्यो।

²⁶ जणा बो एक दासनै बुलार बुज्यो, ‘ओ काँई होर्यो ह?’

²⁷ दास बिऊँ बोल्यो, ‘तेरो भाईड़ो पाछो घरा आगो ह। अर तेरो बाप बिकै राजी-खुसी आबा की बजेऊँ एक मोटो तगड़ो ज्यानबर कटायो ह।’

²⁸ अत्ती सुणताई बो लाल-तातो होगो अर मरोड़ कर मांयनैई कोनी गयो, जणा बिको बाप हो जखो बारनै आर बिनै मनाबा लाग्यो।

²⁹ बो आपका बापऊँ बोल्यो, ‘म बरसाऊँ थारी सेवा एक दास की जंय्यां करतो आर्यो हूँ, अर थारो अंय्यां को कोई हुकम कोनी जखो म कोनी मान्यो हो, इकै बावजुद बी थे मनै कदैई एक टाट को बच्योई कोनी दिओ की म बिनै मेरा भाईला क सागै मिलर खाऊँ।

³⁰ पण तेरो ओ बेटो जखो तेरी धन-दोलतनै रांडबाजी म उडा दि, बो आयो जणा मोटो-ताजा ज्यानबर कटवा दिओ।’

³¹ जणा बो बाप बोल्यो, ‘बेटा तू सदाई मेरै सागै हो अर जोक्यु मेरो ह बो सक्यु तेरोई तो ह।

³² पण इब आपानै राजी होणो अर खुसी मनाबो चाए। क्युं क ओ तेरो भाईड़ो जखो आपणै कानि को मर्यो समान हो पाछो जीयायो ओ गुमगो हो इब लाध्यायो।’”