लूका 1 - जीवन को च्यानणो (सेकावाटी नया नियम की पोथ्या)

¹ अजी थियूफिलूस, बोळाजणा आपणै मांयनै बितेड़ी बातानै मांडबा की कोसिस करी।

² अ सगळी बाता आपानै बे पुगाई जखा आ सगळी बातानै सरूँ घटता देखी। अर जखा बचन को हेलो पाड़बाळा होया।

³ इ बजेऊँ मनै लाग्यो क म बी थारै ताँई आ सगळी बातानै सूल मांडू। क्युं क म आ सगळी बातानै सरूआतऊँ सूल परखेड़ो हूँ।

⁴ म चाऊँ, थे आ जाण सको क थानै सीखायड़ी बाता पुक्‍ता हीं।

यहून्ना बतिस्मो देबाळा का जलम क पेल्याऊँई घोसणा

⁵ यहूदिआ का राजा हेरोद क दिना म याजक समाज का अबिया टोळी का कूणबा मऊँ एक जकरयाह नाम को याजक हो अर बिकी लूगाई इलिसीबा बी हारुण का कूणबा मऊँ ही।

⁶ परमेसर की नजर्या म बे दोन्युई धरमी हा अर बे परबु का सगळा हुकमानै मानबा म खरा हा।

⁷ बाकै कोई आस-ओलाद तो ही कोनी, क्युं क इलिसीबा बांझड़ी ही अर बे दोन्यु बूडा हा।

⁸ एकर जद बो आपकी टोळी का सरा म परमेसर क सामै याजक को काम करर्यो हो।

⁹ जणा याजका की रीत गेल परबु का मनदर म धूप जळाबा ताँई परची गेरी अर परची जकरयाह का नाम निकळी।

¹⁰ धूप जळाबा क टेम सगळा मिनखा की टोळी भेळी होर बारनै अरदास कर'री ही।

¹¹ बि टेम का जकरयाहनै परबु का एक ईस्बर नगरी दुत को दरसाव होयो अर बो दुत धूप जळाबाळी बेदी का दाया नाकै खड़्यो हो

¹² बि दुतनै देखर जकरयाह धुजगो अर बिऊँ बो बोळो डरगो।

¹³ पण ईस्बर नगरी दुत बिऊँ खयो, “जकरयाह डरै मना थारी अरदास सुणली अर थारी लूगाई इलिसीबा एक छोरानै जलम देसी जिको नाम तू यहून्ना राखजे।

¹⁴ जिऊँ थे राजी होस्यो अर सागै क सागैई बिकै होबाऊँ ओर बी बोळाजणा राजी होसी,

¹⁵ परमेसर की नजर्या म बो म्हान होसी अर बो अँगूरी अर नसिली चिजा कदैई कोनी पिसी, अर बो आपकी माँ का पेटऊँई पबितर आत्माऊँ भरेड़ो होसी।

¹⁶ बो ह जखो इजरायल का घणकराक मिनखानै बाका परबु परमेसर क कनै फेर ल्यासी

¹⁷ बो एलिआ जंय्यां की सक्‍ति अर आत्मा म परबु क आगै-आगै चालसी। बो बापा को मन बाका टाबरा कानि मोड़ देसी अर खयो नइ करबाळानै धारमिक्‍ता की बुदी कानि लेज्यासी अर मिनखानै परबु ताँई त्यार करसी।”

¹⁸ जणा जकरयाह ह जखो बि ईस्बर नगरी दुतऊँ खयो, “आ बात म कंय्यां मानू? क्युं क म तो बूडो-ठेरो हूँ अर मेरी लूगाई बी बूडी-ठेरी होगी।”

¹⁹ जणा बो ईस्बर नगरी दुत हो जखो बिऊँ बोल्यो, “म हूँ जिबराइल जखो परमेसर क सामै तण्यो खड़्यो रेह्ऊँ हूँ। अर मनै ईस्बर तनै इ चोखा समचार को हेलो पाड़बा ताँई भेज्यो हो।

²⁰ देख तू ह जखो मेरी बातानै साची तो मानी कोनी मेरा बोलेड़ा बचन तो आपका टेम म पूरा होसीई पण मेरी बाता प बिस्वास कोनी करबा की बजेऊँ आ बाता का घटबाळा दिन ताँई तू गुँगो रेह्सी।”

²¹ बठिनै मिनख हा जखा मनदर क बारनै जकरयाहनै उडिकर्या हा अर बा सगळा क ताजूब होर्यो क बिनै अत्तो टेम कंय्यां लागगो

²² अर जद बो बारनै आर बाऊँ बोल कोनी सक्यो जणा बे जाणग्या, हो ना हो , ओ मनदर म कोई दरसाव देख्यो ह। बो गुँगो होगो अर इसाराऊँ बात करतो।

²³ जद मनदर म बिका सेवा का दिन पूरा होगा जणा बो आपकै घरा चलेगो।

²⁴ क्युंक दिना पाछै बिकी घरहाळी ही जखी आसऊँ होई। अर पाच म्हेना ताँई घराऊँ बारनैई कोनी निकळी।

²⁵ अर अंय्यां बोलरी ही, “मिनखा म मेरी ईज्जत राखबा ताँई, परबु आ दिना म मेर प म्हेर करी ह।”

ईसु का जलम की घोसणा

^26-27 जद जकरयाह की घरहाळीनै छठो म्हेनो लागर्यो हो। जणा परमेसर जिबराइल ईस्बर नगरी दुतनै गलिल देस का नासरत नगर म एक मरीयम नाम की छोरी क कनै भेज्यो। बा हाल कुंआरी ही। बिकी सगाई दाऊद क कूणबा का युसूफ नाम का एक मिनखऊँ होईड़ी ही।

²⁸ ईस्बर नगरी दुत बिकन आर बोल्यो, “राजी रेह, थार प परबु की म्हेर होई ह अर बे थारै सागै ह।”

²⁹ आ बचनाऊँ बा घबरागी अर बा सोचबा लागी अंय्यां बोलबा को इको काँई मतबल ह।

³⁰ जणा ईस्बर नगरी दुत बिऊँ खयो, “मरीयम डरै मना परमेसर की दया तेरै प होरी ह।

³¹ सुण तू आसऊँ होसी अर एक छोरो जणसी अर तू बिनै ईसु खेर बुलासी।

³² बो म्हान होसी अर बो परम-परधान को बेटो खुवासी, परबु परमेसर बानै बडका दाऊद की गद्दि प बिठासी

³³ अर बो याकूब का कूणबा प सदाई राज करसी, अर बिको राज कदैई कोनी मिटसी।”

³⁴ जणा मरीयम ईस्बर नगरी दुतऊँ बोली, “ओ कंय्यां हो सकै ह? हाल तो म कुंआरी हूँ।”

³⁵ ईस्बर नगरी दुत खयो, “पबितर आत्मा तेरै प उतरसी अर परम-परधान की सक्‍ति तनै आपकी ओट म ले लेसी, इ बजेऊँ बो पबितर टाबर परमेसर को बेटो खुवासी,

³⁶ सुण तेरी रिस्तेदार इलिसीबानै सगळा बांझड़ी-बांझड़ी बोलता हा, अर आज बा बूडापा म आसऊँ ह अर बिनै ओ छठो म्हेनो लागर्यो ह।

³⁷ क्युं क परमेसर ताँई क्युंई अणहोतो कोनी।”

³⁸ अर मरीयम बोली, “म परबु की दासी हूँ, थारै खया गेल मेरै सागै होवै।” अर ईस्बर नगरी दुत बिकनऊँ चलेगो।

इलिसीबा क घरा मरीयम को जाबो

³⁹ क्युंक दिना पाछै मरीयम त्यार होर बेगीसी यहूदिआ का पहाड़ी इलाका की एक नगरी म चलगी।

⁴⁰ अर जकरयाह क घरा जार बिकाळी लूगाई इलिसीबाऊँ नमस्कार करी।

⁴¹ जद इलिसीबा क काना म मरीयम को नमस्कार पड़्यो जणा इलिसीबा का पेट को टाबरियो उछळबा लाग्यो अर इलिसीबा पबितर आत्माऊँ भरगी।

⁴² अर जोरऊँ बोली, “तू धरती की सगळी लूगाया म भागहाळी ह अर तेरै पेट को टाबर बी भागहाळो ह।

⁴³ मेरो अत्तो बडो भाग? क मेरै परबु की माँ मेरै कनै आई।

⁴⁴ क्युं क थारी उवाज म्हारै काना म पड़ताई म्हारै पेट को टाबरियो राजी होर उछळबा लागगो

⁴⁵ तू भागहाळी ह क्युं क तू परमेसर की खेईड़ी बात प बिस्वास करी क बे पूरी होसी।”

मरीयम का मुंडाऊँ परमेसर को भजन

⁴⁶ जणा मरीयम बोली, “मेरो पिराण परबु की बडाई करै ह।

⁴⁷ अर मेरी आत्मा मनै बचाबाळा परमेसर म राजी ह।

⁴⁸ क्युं क बो आपकी इ गरीबणी दासीनै याद कर्यो ह, अर इ मानऊँ राजी कर्यो ह, क इबऊँ लेर जुग-जुग का मिनख मनै भागहाळी खेसी,

⁴⁹ अत्तो बडो काम सऊँ सक्‍तिसाली परमेसर मेरै सागै कर्यो ह, इ बजेऊँ बिको नाम पबितर ह।

⁵⁰ अर बिनै मान देबाळा प बाकी दया बाकी पिड्या ताँई रेह्‍वै ह।

⁵¹ बो आपका हाताऊँ बडा-बडा काम कर बानै जखा आपका मन म गुमान करता हा निचो दिखायो।

⁵² बे राज करबाळानै गद्दिऊँ तळै पटक्यो अर बोदानै उचो उठायो।

⁵³ बो भूखानै चोखी-चोखी चिजाऊँ भर्यापूरा अर धायानै रिता फांका भेज दिओ।

^54-55 बानै बे बाता याद ही जखी बो आपणा बडका अब्राहम अर बिकी पिडीऊँ करी ही, क म अब्राहम अर बिकी पिडी प सदाई दया करस्युं। अर बे आपका कह्या गेल आपका दास इजरायलनै याद राखर मदद करी।”

⁵⁶ मरीयम करीब तीन म्हेना इलिसीबा क कनै रेह्‍र पाछी आपकै घरा आगी।

बतिस्मो देबाळा यहून्ना को जलम

⁵⁷ जद इलिसीबा क जापा की घड़ी आई अर बा एक छोरानै जलमी।

⁵⁸ परमेसर बिपै दया दिखाई ह, इ बात को समचार बिका रिस्तेदारानै अर जाणकारानै लाग्यो जणा बे सगळा बिकै सागै खूब राजी होया।

⁵⁹ इकै पाछै आठवा दिन बे सगळा मिनख बि छोरा को नाम काडबा अर बिकी सुन्नत करबा ताँई भेळा होया। बे बिको नाम बिकाळा बापू क नाम प जकरयाह काडबो चावै हा।

⁶⁰ पण बिकाळी माँ बोलपड़ी, “नइ इको नाम तो यहून्ना काडणो ह।”

⁶¹ जणा बे सगळा बिऊँ बोल्या, “तेरा कूणबा म इ नाम को कोई कोनी।”

⁶² अर इकै पाछै बे बिकाळा बापूनै इसारो कर्यो क इको नाम काँई होणो चाए।

⁶³ जणा जकरयाह हो जखो पटी मंगार बिपै बिको नाम यहून्ना मांड दिओ आ देख बे सगळा ताजूब म पड़गा।

⁶⁴ अंय्यां करताई बिकी जीब की आटी खुलगी अर बो परमेसर को गुणगान करबा लाग्यो।

⁶⁵ आ बाता क बजेऊँ आस-पास का रेह्बाळा डरग्या अर आ बाता की चरचा यहूदिआ का पहाड़ी इलाका म च्यारूमेर फेलगी।

⁶⁶ अर जत्ता बी बठै हा बाकै रेह-रेह ओई बिचार होवै हो क, “ओ टाबरियो ह जखो काँई बणसी?” इको कारण ओ ह क इकै सीर प परबु को हात ह।

जकरयाह को भजन

⁶⁷ बिको बाप जकरयाह पबितर आत्माऊँ भरगो अर बो परमेसर कानिऊँ खेबा लागगो,

⁶⁸ “इजरायल का परबु परमेसर की जे हो क बे आपका मिनखा प निगा करी अर बानै छुटायो।

⁶⁹ बे आपका भगत दाऊद का कूणबा मऊँ आपणा ताँई एक पराकरमी छुटकारो करबाळो खड़्यो कर्यो,

⁷⁰ जंय्यां क बे बोळी पेल्याई परमेसर की खेबाळा पबितर मिनखा का मुंडाऊँ खुवा दिआ हा,

⁷¹ बे म्हानै म्हारा दुस्मनाऊँ अर म्हारूँ नफरत राखबाळा की सक्‍तिऊँ बचासी।

⁷² बे आपका पबितर करारनै ध्यान म राख्यो ह क बो आपणा बडका प दया करसी।

⁷³ आ सोगन बो आपणा बडका अब्राहमऊँ खाई,

⁷⁴ क पक्काई म्हारो छुटकारो म्हारा दुस्मनाऊँ होसी। अर परबु की सेवा करबा ताँई म्हानै कोई डर नइ होवै,

⁷⁵ अर सगळी उमर आपा रोजकी बिकै सामै पबितर अर धरमी रेह्‍वां।

⁷⁶ ओ मेरा छोरा यहून्ना तू परम-परधान परमेसर की खेबाळो खुवासी। क्युं क तू परबु को गेलो त्यार करबा ताँई बिकै आगै-आगै चालसी,

⁷⁷ अर बानै सीखासी क थारा पाप की माफी मिलबा की बजेऊँ थे बचाया जास्यो।

⁷⁸ अर आपणा परमेसर की बडी दयाऊँ आपणा प छुटकारो देबाळो एक उगता सूरज का च्यानणा की जंय्यां ईस्बर नगरीऊँ चिलकसी।

⁷⁹ जिऊँ बो च्यानणो मोत की छाया म सोबाळा अर अँधकार म जिबाळा प चमकसी अर आपानै स्यांती म लेज्यासी।”

⁸⁰ अंय्यां बो टाबरियो होळ्या-होळ्या सागेड़ो मोट्यार होगो अर आत्मा म बी बढगो, अर इजरायली लोगा क सामै आबा क दिन ताँई बो उजाड़ मई रिह्यो।