यहून्ना 8 - जीवन को च्यानणो (सेकावाटी नया नियम की पोथ्या)

कुकरम करबाळी लूगाई

¹ पण ईसु जेतून डूँगरी प गयो।

² आगलै दिन भागपाट्याई बो ओज्यु मनदर गयो। सगळा बिनै च्यारूमेरूँ घेर लिआ, अर बो तळै बेठर बानै सीखाबा लाग्यो।

³ जणा बठै फरिसी अर सास्तरानै सीखाबाळा एक लूगाईनै पकड़र ल्याया अर बिनै सगळा क बिचमै खड़्यो कर दिओ। आ लूगाई कुकरम करती पकड़ी गई ही।

⁴ बे ईसुऊँ बोल्या, “गरूजी, आ लूगाई कुकरम करती पकड़ी गई ह।

⁵ मूसा का नेम-कायदा गेल अंय्यांलकी लूगाईनै भाठा मार-मार जानऊँ मारबा को हुकम ह। इ बारां म थे काँई बोलो हो?”

⁶ बे ईसुनै फसाबा ताँई अंय्यां बुजर्या हा जिऊँ बे बिपै दोस लगा सकै। पण ईसु उकड़ू बेठर जमीन प आँगळीऊँ क्यु मांड्यो।

⁷ पण जद बे रटोई लगा लिआ, जणा बो सिदो खड़्यो होर बाऊँ बोल्यो, “थारै मऊँ जखो दुद को धुलेड़ो ह बोई इकै पेलो भाठो मारै।”

⁸ जणा पाछै बो ओज्यु उकड़ू बेठर जमीन प मांड्यो।

⁹ आ सुणर बडोड़ाऊँ लेर छोटा ताँई एक-एक कर सरक लिआ अर बूडीया सऊँ पेली। आखीर म बि लूगाई अर ईसुनै छोडर बठै कोई कोनी बच्यो।

¹⁰ बो सिदो खड़्यो होर बिऊँ बुज्यो, “बे कठै हीं? के तनै सजा देबाळो कोई कोनी बच्यो?”

¹¹ बा बोली, “कोई कोनी म्हराज।” जणा ईसु बोल्यो, “म बी तनै सजा कोनी द्‍युँ। जा, आगैऊँ कदैई पाप मना करजे।”

सचा न्याय को धणी

¹² ईसु ओज्यु बोल्यो, “म इ जगत का मिनखा को च्यानणो हूँ। जखो बी मेरै गेल चालसी बो सचो जीवन जिसी, अर बो कदैई पाप का गेला प कोनी जावै।”

¹³ फरिसी बिऊँ बोल्या, “तू तेरी गुवाई खुदई देवै ह, आ सची कोनी मानी जावै।”

¹⁴ ईसु बोल्यो, “नइ, जदकी म मेरी गुवाई खुदई देऊँ हूँ पण मेरी गुवाई सची ह। क्युं क म जाणू हूँ, क म कठैऊँ आयो अर कठै जास्युं। पण थे इनै कोनी जाणो क म कठैऊँ आयो अर कठै जार्यो हूँ।

¹⁵ थे मिनखा का बणाएड़ा तरिकाऊँ न्याय करो हो। पण म कोईकोई न्याय कोनी करूं।

¹⁶ अर ज म न्याय बी करूं, जणा बो सचो ह। क्युं क इनै करबाळो म एकलो कोनी हूँ, पण मेरै सागै मनै भेजबाळो पिता-परमेसर ह।

¹⁷ अर जंय्यां क थारा नेम-कायदा म बी मंडर्यो ह, ज कोई दो गुवा एकसी गुवाई देवै जणा बाकी बात सची ह।

¹⁸ मेरा पक्ष म, म खुदई गुवाई देऊँ हूँ। अर इकै सागैई मेरो परम-पिता जखो मनै भेज्यो ह, बो मेरै पक्ष म गुवाई देवै ह।”

¹⁹ बे बिऊँ बोल्या, “तेरो परम-पिता कठै ह?” ईसु बाऊँ बोल्यो, “नइ तो थे मनै जाणो अर नइ मेरा परम-पितानै। अर ज थे मनै जाणता जणा मेरा परम-पितानै बी जाणता।”

²⁰ आ सीख ईसु मनदर का बि कोठा म दि, जठै दानहाळी पेटी पड़ी ही। अर कोईबी बिपै हात कोनी घाल सक्यो। क्युं क हाल बा घड़ी कोनी आई ही।

जठै म जार्यो हूँ बठै थे कोनी जा सको

²¹ ईसु ओज्यु बाऊँ बोल्यो, “म जास्युं अर थे मनै ढुंढस्यो पण थे थारा पाप मई मरज्यास्यो। जठै म जार्यो हूँ बठै थे कोनी आ सको।”

²² इपै यहूदि अधिकारी बोल्या, “कदै ओ खुदनै मारबा की बात तो कोनी करर्यो, क्युं क ओ बोलै ह क जठै बो जार्यो ह बठै म्हें कोनी जा सकां?”

²³ ईसु बोल्यो, “म इ दुनिया को कोनी जिका थे हो। थे धरती का हो पण म ईस्बर नगरीऊँ आयो हूँ।

²⁴ ज थे इ बात प बिस्वास कोनी करो क म बोई हूँ। जणा थे थारा पाप मई मरज्यास्यो। अर इ बजेऊँई म थारूँ आ बात कही क थे थारा पाप मई मरज्यास्यो।”

²⁵ जणा बे बिऊँ बुज्या, “तू कूण ह?” ईसु बाऊँ बोल्यो, “म सरूआतऊँ थानै बतातो आर्यो हूँ क म कूण हूँ।

²⁶ मेरै कनै थारा बारां म बोलबा ताँई बोळी बाता ह। अर बोळी बाता ह जा ताँई थानै सजा देणी ह। मनै भेजबाळो सचो ह अर म इ जगत का मिनखानै बाई खेवूँ हूँ जखी म बिऊँ सुण्यो।”

²⁷ बे आ कोनी समज सक्या क, ईसु परम-पिता का बारां म बाता करर्यो हो।

²⁸ जणा बो बाऊँ बोल्यो, “थे जद मिनख का बेटानै उचो उठास्यो, जणा थारी समज म आज्यासी क म कूण हूँ। अर बि टेम थे आबी जाण जास्यो क म मेरी मरजीऊँ क्युंई कोनी करूं। पण म तो बाई बोलुँ हूँ जखी परम-पिता मनै बोलबा ताँई बोलै ह।

²⁹ अर जखो मनै भेज्यो ह बो मेरै सागै ह। बो मनै ऐकलो कोनी छोडै, क्युं क म सदाई बोई करूं हूँ, जखो बिनै राजी करै ह।”

³⁰ ईसु जद अ बाता बोल्यो जणा बिनै सुणबाळा बोळाजणा बिपै बिस्वास कर्यो।

सच थानै अजाद करसी

³¹ जणा ईसु बाऊँ बोल्यो जखा बिपै बिस्वास कर्या हा, “ज थे मेरी सीख प चालो हो जणा सचमई थे मेरा चेला हो।

³² थे सचनै जाणस्यो, अर सच थानै अजाद करसी।”

³³ बे बोल्या, “म्हें तो अब्राहम का कूणबाऊँ हां अर म्हें कदैई कोईकाई गुलाम कोनी बण्या। जणा पाछै थे आ कय्यालै बोलो हो क, ‘थे अजाद होज्यास्यो?’”

³⁴ ईसु बाऊँ बोल्यो, “म थानै बोलुँ हूँ, जखो बी पाप करै ह, बो पाप को गुलाम ह।

³⁵ अर एक गुलामनै बिका मालिक का घर म क्युबी अधिकार कोनी होवै पण मालिक का बेटानै सदाई सक्या प अधिकार होवै।

³⁶ जणा ज बेटो थानै अजाद करै, थे सचमई अजाद हो जास्यो।

³⁷ म जाणू हूँ क थे अब्राहम क कूणबा का हो, पण इब थे मनै मारबा की तक म हो, क्युं क थे मेरी सीख प कोनी चालो।

³⁸ म बोई बोलुँ हूँ, जखी परम-पिता मनै दिखाई, पण थे बो करो हो जखो थे थारै बापऊँ सुण्या हो।”

³⁹ बे बिनै बोल्या, “म्हें अब्राहम की ओलाद हां।” जणा ईसु बोल्यो, “ज थे सचमई अब्राहम की ओलाद होता, जणा थे अब्राहम जंय्यांकाई करम करता।

⁴⁰ अर इब थे मनै मारबा की तक म हो क्युं क म थानै परमेसरऊँ सुणर सच बतायो। अब्राहम तो अंय्यां क्युंई कोनी कर्यो हो।

⁴¹ थे बोई करो हो जखो थारो बाप कर्यो।” बे बोल्या, “म्हें कुकरम की ओलाद कोनी, पण परमेसरई म्हारो सचो परम-पिता ह।”

⁴² ईसु बाऊँ बोल्यो, “ज सचमई परमेसर थारो परम-पिता होतो, जणा थे मेरूँ प्यार-परेम करता क्युं क म परमेसर क कनैऊँ आयो हूँ। म अठै मेरी मरजीऊँ कोनी आयो, पण बो मनै भेज्यो ह।

⁴³ म जोक्यु बी बोलुँ हूँ, थे मेरी सीखनै कोनी समजो, क्युं क थे मेरी बात कोनी सुणो।

⁴⁴ थारो बाप सेतान ह, अर थे बिकी इंछ्या प चालबो चाओ हो। बो तो सरूसई हत्यारो ह अर कदैई सच कानि कोनी रिह्यो क्युं क बिमै सच कोनी। बिको झूठ बोलबाळो सुभाव ह क्युं क बो झूठो अर झूठ को बाप ह,

⁴⁵ पण म साची बोलुँ हूँ, इ ताँई थे मेरो बिस्वास कोनी करो।

⁴⁶ थारै मऊँ कूण मेर प पापी होबा को दोस लगावै ह? ज म साची बोलुँ हूँ, जणा पाछै थे मेरो बिस्वास क्युं कोनी करो?

⁴⁷ जखो परमेसर को ह, बो परमेसर की बाता सुणै ह। अर थे इ ताँई कोनी सुणो, क्युं क थे परमेसर का कोनी।”

ईसु अर अब्राहम

⁴⁸ बे ईसुऊँ बुज्या, “के म्हें सच कोनी बोलर्या क, तू एक सामरी ह अर तेरै मांयनै ओपरी बलाय ह?”

⁴⁹ ईसु बाऊँ बोल्यो, “मेर म तो कोई ओपरी बलाय कोनी। म मेरा परम-पिता को मान करूं हूँ। अर थे मनै बद्दोई कोनी।

⁵⁰ म मेरो मान कोनी चाऊँ, पण एक ह जखो मेर ताँई मान चावै ह अर बोई न्याय करै ह।

⁵¹ म थारूँ सची बोलुँ हूँ, जखो बी मेरी सीखनै मानसी बो कदैई कोनी मरसी।”

⁵² बे बिऊँ बोल्या, “इब तो पुक्‍ता होगो तेरै म ओपरी बलाय ह। अब्राहम अर परमेसर की खेबाळा मरग्या अर तू बोलै ह क, ‘जखो बी मेरी सीखनै मानसी बो कदैई कोनी मरै।’

⁵³ तू म्हारा अब्राहमऊँ बडो कोनी। बो मरगो अर परमेसर की खेबाळा बी मरगा। तू खुदनै काँई समजै ह?”

⁵⁴ ईसु बोल्यो, “ज म खुद मेरो मान करूं, जणा बो कोई मान म मान ह के? पण मनै मान देबाळो मेरो परम-पिता ह, जिनै थे थारो परमेसर बतायो हो।

⁵⁵ थे बिनै कोनी जाण्या, पण म बिनै जाणू हूँ। अर ज म बोलतो क म बिनै कोनी जाणू, जणा म बी थारी जंय्यांई झूठो होतो। पण म बिनै जाणू हूँ, अर बिका खयानै मानू हूँ।

⁵⁶ थारो बाप अब्राहम, मेरा आबा का दिननै देखबा ताँई राजी होयो। बो देख्यो, अर राजी होयो।”

⁵⁷ बे बिऊँ बोल्या, “तू हाल पचास को बी कोनी जणा तू अब्राहमनै कंय्यां देख लिओ?”

⁵⁸ ईसु बोल्यो, “म थारूँ सची खेऊँ हूँ, अब्राहम क जलम्बाऊँ पेली, म हूँ।”

⁵⁹ जणा बे भाठा उठार बिनै मारबा ताँई त्यार होया, पण ईसु छानैसीक मनदरऊँ चलेगो।