यहून्ना 7 - जीवन को च्यानणो (सेकावाटी नया नियम की पोथ्या)

ईसु अर बिका भाई

¹ आ बाता क पाछै ईसु गलिल म सफर करतो रिह्यो। बो यहूदिआ इलाका म कोनी जाबो चातो हो। क्युं क यहूदि अधिकारी बिनै मारबा की तक म हा।

² यहूदि मिनखा को मंडपा को त्युंहार आबाळो हो।

³ जणा बिका भाईड़ा बिऊँ बोल्या, “अठैऊँ यहूदिआ चल्योजा। जिऊँ तेरा चेला बी बा कामानै देख सकै, जिनै तू करै ह।

⁴ क्युं क अंय्यां को कोई कोनी जखो आपको नाम करबो चावै, अर ओलैछानै क्युं करतो हो। अर ज तू आ कामानै करै ह, जणा इ दुनिया का मिनखा प खुदनै परगट कर।”

⁵ क्युं क बिकाळा भाई बी बिपै बिस्वास कोनी करता हा।

⁶ जणा ईसु बाऊँ बोल्यो, “हाल त्युंहार म जाबा ताँई मेरो टेम कोनी आयो। पण थारै ताँई सगळो टेम सिद ह।

⁷ जगत थारूँ नफरत कोनी करै, पण मेरूँ करै ह, क्युं क म खेऊँ हूँ क, ‘तेरा करम बुरा हीं।’

⁸ त्युंहार मनाबा थेई जाओ। म हाल कोनी आऊँ, क्युं क हाल मेर ताँई सई टेम कोनी आयो।”

⁹ अ बाता बोलबा क पाछै बो गलिल म रेहग्यो।

¹⁰ पण बिका भायां क त्युंहार म जाबा क पाछै, छानैसीक बो बी त्युंहार म गयो।

¹¹ अर यहूदि अधिकारी बिनै त्युंहार म ढुंढै हा। अर बोलर्या हा क, “बो कठै ह?”

¹² अर भीड़ बी बिकै बारां म कानाफुसी करबा लागरी ही। क्युंक बोलर्या हा क, “बो चोखो मिनख ह।” क्युंक बोलर्या हा, “नइ, बो तो मिनखानै भंगरावै ह।”

¹³ पण कोईबी बिकै बारां म चोड़ै-धाड़ै कोनी बतळावै हा, क्युं क बे यहूदि अधिकारीयाऊँ डरता हा।

ईसु की सीख

¹⁴ पण जद त्युंहार का आदाक दिन बितगा। जणा बो मनदर म गयो अर सीख देबा लाग्यो।

¹⁵ जणा यहूदि अधिकारी ताजूब कर खेबा लाग्या, “ओ मिनख बिना सीख्याई ज्ञानी कंय्यां बणगो?”

¹⁶ जणा ईसु जुबाब देतोई बोल्यो, “आ सीख मेरी कोनी पण बिकी ह, जखो मनै भेज्यो ह।

¹⁷ ज कोई मिनख बिकी इंछ्या पूरी करबा ताँई राजी ह। जणा बो जाण ज्यासी क आ सीख मेरै कानिऊँ ह क परमेसर कानिऊँ।

¹⁸ जखो बी खुदकी मरजीऊँ बोलै ह, बो खुदकी बडाई चावै ह। पण जखो आपका भेजबाळा को मान चावै ह बो सचो ह। अर बिमै बुराई कोनी।

¹⁹ मूसा थानै नेम-कायदा कोनी दिओ हो के? इकै बावजुद बी थारै मऊँ कोई बी नेम-कायदानै कोनी मानै। थे क्याले मनै मारबा क चकरां म हो?”

²⁰ भीड़ मऊँ उवाज आई, “तेरै म तो भूत-पलीत रळर्यो ह! तनै मारबा की फिराक म कूण ह?”

²¹ ईसु बानै बोल्यो, “म एक चमत्कार कर्यो, अर थे सगळा बिपै ताजूब कर्यो।

²² अरामहाळा दिन मूसा का हुकम गेल, आदमी की सुन्नत कर थे बी तो काम करो हो। पण आ रीत तो मूसा का नियमऊँ पेली आपणा बडका का टेमऊँ चालती आरी ह।

²³ ज अरामहाळा दिन एक आदमी की सुन्नत करबा की बजेऊँ नेम-कायदा कोनी टूटै, जणा अराम हाळै दिन एक मिनखनै सागेड़ो निरोगो करबाऊँ, थे मेरै प झाळ्या क्याले काडर्या हो?

²⁴ मुंडा देखर टीका मना काडो, पण धरम गेल न्याय करो।”

के ईसु, मसी ह?

²⁵ जणा यरूसलेम का क्युंक मिनख बोलबा लाग्या, “के ओ बोई मिनख ह जिनै बे मारबा की तक म हीं?

²⁶ पण देखो बो तो चोड़ै-धाड़ै बतळार्यो ह अर बे इनै नामई कोनी लेर्या। कदै यहूदि नेतानै बी तो कोनी बेरो पड़गो, क ओई मसी ह?

²⁷ आपा जाणा हा क ओ मिनख कठै को ह। पण जद मसी आसी, जणा कोई कोनी जाणसी क बो कठैऊँ आयो ह।”

²⁸ जणा ईसु जोरकी उवाज म मनदर म सीख देता टेम बोल्यो, “के थे सचमई जाणो हो क म कूण हूँ अर कठैको हूँ? म मेरी मरजीऊँ कोनी आयो, पण जखो मनै भेज्यो ह बो सचो ह, जिनै थे कोनी जाणो।

²⁹ म बिनै जाणू हूँ। क्युं क म बिकनऊँ आयो हूँ, अर मनै भेजबाळो बी बोई ह।”

³⁰ जणा बे बिनै पकड़बा की कोसिस करबा लाग्या, पण कोई बिकै हात कोनी घाल सक्यो, क्युं क हाल बा घड़ी कोनी आई।

³¹ भीड़ मऊँ बोळाजणा बिपै बिस्वास कर्या अर बोल्या, “ओ मसी ह , जणाई तो बडा-बडा चमत्कार दिखाया हीं। कोई दुसरो अंय्यां का चमत्कार दिखा सकै ह के?”

ईसुनै पकड़बा ताँई मनदर का रूखाळानै भेजबो

³² फरिसी जद ईसु क बारां म मिनखानै अ सगळी बाता ओलै-छानै करता सुण्या। जणा बे अर परधान याजक ईसुनै पकड़बा ताँई क्युंक मनदर का रूखाळानै भेज्या।

³³ ईसु बोल्यो, “म थोड़ी-घणी टेम ताँई ओर थारै सागै हूँ। इकै पाछै म मेरै भेजबाळा क कनै चल्यो ज्यास्युं।

³⁴ थे मनै ढुंढस्यो पण म थानै कोनी लाधूं। क्युं क जठै म रेहस्युं, बठै थे कोनी जा सको।”

³⁵ जणा यहूदि अधिकारी आपसरी म बोलबा लाग्या, “ओ कठै जाबा की करै ह जिऊँ आपा इनै ढुंढ कोनी सकां? के ओ यूनानी नगर्या म जासी जठै आपणा मिनख रेह्‍वै ह, अर यूनानीयानै सीखासी?

³⁶ आ काँई बात ह जखी बो बोली ह, ‘थे मनै ढुंढस्यो पण म लाधूं कोनी,’ अर ‘जठै म हूँ बठै थे कोनी जा सको?’”

जीवन देबाळो पाणी को झरनो

³⁷ त्युंहार का आखरी दिन, जखो त्युंहार को बडो दिन हो। बि दिन ईसु खड़्यो होर जोरकी उवाज म बोल्यो, “जखो तिसायो ह बो मेरै कनै आवै अर पिवै।

³⁸ जखो बी मेर प बिस्वास करै ह, बिमैऊँ जीवन देबाळो पाणी को झरनो उजळबा लागज्यासी, जंय्यां क सास्तर म मंडेड़ो ह।”

³⁹ ईसु आ बात पबितर आत्मा क बारां म कही, जखी बिपै बिस्वास करबाळानै मिलबाळी ही। इ टेम ताँई पबितर आत्मा कोईनैई कोनी मिली ही, क्युं क ईसु हाल ताँई आपकी मेमा म कोनी उठायो गयो हो।

मिनखा म फूट

⁴⁰ ईसुनै सुणर भीड़ मऊँ क्युंक मिनख बोल्या, “ओ सचमई बोई परमेसर की खेबाळो ह।”

⁴¹ क्युंक बोलर्या हा, “ओ मसी ह!” पण क्युंक बोलर्या हा, “मसी गलिलऊँ थोड़ी आसी!

⁴² सास्तर म मंडेड़ो ह, क मसी राजा दाऊद का कूणबाऊँ होसी। अर बेतलम म जलमसी जठै दाऊद रिह्या करतो हो।”

⁴³ जणा ईसु की बजेऊँ मिनखा म फूट पड़गी।

⁴⁴ क्युंक बिनै पकड़बो चावै हा, पण कोईबी बिकै हात कोनी घाल सक्यो।

यहूदि नेता ईसु प बिस्वास कोनी कर्यो

⁴⁵ अर जद मनदर का पेरेदार पाछा आगा जणा परधान याजक अर फरिसी बाऊँ बुज्या, “खाली हातई कंय्यां आगा?”

⁴⁶ मनदर का पेरेदार बोल्या, “बि जंय्यां की बाता आज ताँई कोई कोनी करी!”

⁴⁷ फरिसी बानै बोल्या, “थे बी बावळा बणगा के?

⁴⁸ के थे एक बी फरिसी नहिस यहूदि नेतानै जाणो हो जखो बिपै बिस्वास कर्यो होवै?

⁴⁹ आ भीड़ मूसा का नेम-कायदानै कोनी जाणै। जणाई तो बे परमेसर का सराप तळै आगा हीं!”

⁵⁰ बठै फरिसीया मऊँ निकेदेमुस नाम को एक मिनख हो। जखो पेली ईसु क कनै गयो हो, बो ओराऊँ बोल्यो,

⁵¹ “के ओ आपणा नेम-कायदा गेल सई ह क, आपा कोईकी सुणाई कर्या पेली, अर आ जाण्या पेली क बो काँई कर्यो ह, बिपै दोस लगा सकां?”

⁵² जणा बे बिनै जुबाब म बोल्या, “के तू बी तो गलिल को कोनी ह? सास्तरनै बाचर बेरो पाड़, परमेसर की खेबाळो गलिल म तो पैदा होबाऊँ रिह्यो।”

⁵³ जणा बे सगळा आप-आपकै घरा चलेगा।