यहून्ना 6 - जीवन को च्यानणो (सेकावाटी नया नियम की पोथ्या)

ईसु पाच झार मिनखा को पेट भर्यो

¹ अ बाता होबा क क्युंक दिना पाछै, ईसु गलिल झिल जिनै तिबरिआस बी खेवै ह, क परली पार चलेगो।

² अर मिनखा की भीड़ बिकै गेल होरी ही क्युं क बे बा चमत्कारानै देख्या हा, जाकै जरिए बो रोगलानै निरोगो कर्यो हो।

³ जणा ईसु डूँगरी प चढर आपका चेला क सागै बठै बेठगो।

⁴ यहूदि मिनखा को फसै को त्युंहार आबाळो हो।

⁵ अर जद ईसु नजर घूमार बि घणीसारी भीड़नै आपकै कनै आती देख्यो। जणा फलिपूसऊँ बोल्यो, “आपा आ ताँई रोटी कठैऊँ मोल ल्यावां?”

⁶ आ बात ईसु बस फलिपूसनै बिचासबा ताँई बुज्यो हो। क्युं क असल म ईसु जाणतो हो क काँई करनो ह।

⁷ फलिपूस बोल्यो, “आपा दो सो चाँदी का सीक्का की बी रोट्या ल्यावां जणा कम पड़सी। अर बे अत्ता मिनखा म थोड़ी-थोड़ी बी पाँती कोनी आवै।”

⁸ ईसु को एकोर चेलो अंदरिआस जखो समोन को भाई हो ईसुऊँ बोल्यो,

⁹ “अठै एक छोरो ह जिकै कनै जौवां की पाच रोट्या अर दो मछी ह। पण अत्ता मिनखा म अ कठै लागै?”

¹⁰ ईसु बोल्यो, “मिनखानै बिठा द्‍यो।” बठै बोळी घास ही जणा बे बठै बेठगा। अर बामै करीब पाच झार तो मोट्यार-मोट्यार हा।

¹¹ जणा ईसु रोटी ली अर परमेसरनै धनेवाद देर जखा बेठ्या हा बा मिनखा म जत्ती बे चावा हा बाट दि। अर अंय्यांई बो मछी ली अर धनेवाद देर बाट दि।

¹² जद बे सगळा खार धापगा, जणा ईसु आपका चेलानै बोल्यो, “बचेड़ी रोटी भेळी करल्यो, जिऊँ क्युंई बेकार नइ जावै।”

¹³ जणा बे भेळो कर्या अर पाच जौवां की रोटीऊँ बचेड़ी रोटी का बारा चोल्या भेळा होया।

¹⁴ मिनख ईसु का इ चमत्कारनै देखर बोल्या, “सचमई ओ बोई परमेसर की खेबाळो ह, जखो जगत म आबाळो हो।”

¹⁵ जणा ईसु आ भापर क बे बिनै ठडाईऊँ राजा बणाबा ताँई लेज्याबा आर्या हीं, जणा बो ऐकलोई डूँगरी प चलेगो।

ईसु पाणी प चाल्यो

¹⁶ जद दिन आथगो जणा बिका चेला झिल क किनारै गया,

¹⁷ अर अँधेरो होगो हो पण हाल ताँई ईसु बाकन कोनी आयो हो। जणा बे न्याव प चढर झिल क परली पार कफरनूम कानि रवानगी करी।

¹⁸ जोरकी आँधी की बजेऊँ झिल म झाल उठबा लागी।

¹⁹ अर जद बे दोएक कोस चलेगा हा जणा बे ईसुनै पाणी प चालता, अर न्याव क कनै आता देख्या, अर बे डरग्या।

²⁰ पण बो बाऊँ बोल्यो, “डरो मना, म हूँ।”

²¹ जणा बे बिनै राजी मनऊँ जंय्यांई न्याव म चढाया, चढाताई न्याव किनारा पुगगी।

²² आगलै दिन झिल क उरलै नाकै जखी भीड़ रेह्गी ही, बानै ओ बेरो पड़्यो क बठै एक न्याव ही। अर ओ बी बेरो पड़्यो क ईसु चेला क सागै बि न्याव प कोनी चढ्यो। पण चेला बिकै बिनाई चलेगा।

²³ जणा तिबरिआस नगरीऊँ क्युंक न्यावा बि झघा आई, जठै परबु क धनेवाद देबा क पाछै मिनख रोटी खाई ही।

²⁴ जद भीड़ आ देखी क नइ तो बठै ईसु ह अर नइ बिका चेला जणा बे सगळा बा न्यावा म चढर ईसुनै ढुंढता-ढुंढता कफरनूम आ पुग्या।

ईसु जीवन की रोटी ह

²⁵ अर जद बे बिनै झिल क परली पार देख्या, जणा बिऊँ बोल्या, “गरूजी, थे अठै कद आया?”

²⁶ ईसु बाऊँ बोल्यो, “म थानै सची खेऊँ हूँ, थे मेरा चमत्कारा की बजेऊँ मेरै गेल कोनी आया। पण म थानै धपार रोटी खुवाई, इ ताँई थे मेरै गेल आया हो।

²⁷ रोट्या ताँई मेनत मना करो क्युं क बे तो बुसज्यावै, पण अजर-अमर जीवन देबाळी रोटी ताँई मेनत करो। आ बा रोटी ह जखी मिनख को बेटो थानै देसी, क्युं क परम-पिता परमेसर बिनै ओ अधिकार दिओ ह।”

²⁸ जणा बे बिऊँ बोल्या, “परमेसर जखो चावै ह, बो करबा ताँई म्हें काँई करां?”

²⁹ ईसु जुबाब म बाऊँ बोल्यो, “परमेसर चावै ह क, जिनै बो भेज्यो ह, बिपै थे बिस्वास करो।”

³⁰ जणा बे बिऊँ बोल्या, “म्हानै चमत्कार दिखा जिनै देखर म्हें तेरै प बिस्वास करां। तू काँई कर सकै ह?

³¹ म्हारा बडका उजाड़ म मन्नो खाया, जंय्यां क पबितर सास्तर म मंडेड़ो ह, ‘बो बाकै खाबा ताँई आसमानऊँ रोटी बरसाई।’ ”

³² जणा ईसु बाऊँ बोल्यो, “म थारूँ सची बोलुँ हूँ, ईस्बर नगरीऊँ रोटी देबाळो मूसा कोनी हो। पण बो मेरो परम-पिता ह जखो ईस्बर नगरीऊँ थानै सची रोटी देवै ह।

³³ जखी रोटी परमेसर देवै ह, बा ईस्बर नगरीऊँ उतरी ह, अर बा जगत का मिनखानै जीवन देवै ह।”

³⁴ जणा बे बिऊँ बोल्या, “म्हराज थे आ रोटी म्हानै सदाई दिआ करो।”

³⁵ ईसु बाऊँ बोल्यो, “जीवन की रोटी म हूँ। जखो मेरै कनै आसी बो भूखो कोनी रेह्सी, अर बो जखो मेर प बिस्वास करसी कदैई तिसायो कोनी मरसी।

³⁶ पण जंय्यां क थानै ओबी खयो हो, थे मनै देखलिआ हो, पण हाल ताँई मेर प बिस्वास कोनी करो।

³⁷ जोक्यु परम-पिता मनै देवै ह, बो मेरै कनै आसी अर म बिऊँ मुंडो कोनी फेरूं।

³⁸ क्युं क म मेरी इंछ्या नइ पण मनै भेजबाळा की इंछ्यानै पूरी करबा ताँई ईस्बर नगरीऊँ धरती प उतर्यो हूँ।

³⁹ अर जखो मनै भेज्यो ह, बिकी इंछ्या आ ह क जोक्यु बो मनै दिओ ह बिमैऊँ क्युंई नइ खोऊँ। पण आखरी दिन म बानै जीवाऊँ।

⁴⁰ क्युं क मेरा परम-पिता की इंछ्या आ ह क जखो बी बेटानै देखै ह। अर बिपै बिस्वास ल्यावै ह बिनै अजर-अमर जीवन मिलै, अर आखरी दिन म खुद बिनै जीवा देस्युँ।”

⁴¹ जणा यहूदि बिपै बल्डाबा लाग्या, क्युं क बो बोल्यो हो क, “जखी रोटी ईस्बर नगरीऊँ उतरी ह बा म हूँ।”

⁴² अर बोलबा लाग्या, “ओ युसूफ को छोरो ईसु कोनी के, जिका माँ-बापनै आपा जाणा हां? जणा इब ओ कंय्यां खे सकै ह क, ‘म ईस्बर नगरीऊँ उतर्यो हूँ?’”

⁴³ ईसु जुबाब म बोल्यो, “आपसरी म मना बल्डाओ।

⁴⁴ मेरै कनै कोई कोनी आ सकै। जद ताँई क मेरो परम-पिता जखो मनै भेज्यो ह बो बिनै मेरै कनै नइ ल्यावै, अर आखरी दिन म बिनै जिंदो कर देस्युँ।

⁴⁵ परमेसर की खेबाळा पबितर सास्तर म आ मांडी ह, ‘सगळानै परमेसरई सीखासी।’ अर मेरै कनै बोई आवै ह जखो परम-पिताऊँ सुणै अर सीखै ह।

⁴⁶ पण जखो परमेसर कानिऊँ आवै ह बोई परम-पितानै देख्यो ह बिकै अलावा कोई कोनी देख्यो।

⁴⁷ “म थारूँ सची बोलुँ हूँ, जखो मेर प बिस्वास करै ह, अजर-अमर जीवन बि ताँई ह।

⁴⁸ जीवन की रोटी म हूँ।

⁴⁹ थारा बडका उजाड़ म मन्नो खाया, बिकै पाछै बी बे मरगा।

⁵⁰ पण आ बा रोटी ह जखी परमेसर ईस्बर नगरीऊँ उतारी, जखो बी इ रोटी मऊँ खासी बो कोनी मरसी।

⁵¹ बा जीवती रोटी म हूँ जखी ईस्बर नगरीऊँ उतरी। जखो बी इ रोटीनै खासी बो सदाई जिंदो रेह्सी। अर इ जगत का मिनखानै जीबा ताँई जखी रोटी म देस्युँ, बो मेरो मास ह।”

⁵² इ बात प यहूदि आपसरी म आ खेर जिरै करबा लाग्या, “ओ मिनख आपानै आपको मास खाबा ताँई कंय्यां दे सकै ह?”

⁵³ ईसु बाऊँ बोल्यो, “म थारूँ सची बोलुँ हूँ, जद ताँई थे मिनख का बेटा को मास कोनी खाल्यो अर बिको लोय कोनी पील्यो, थारै म जीवन कोनी आ सकै।

⁵⁴ जखो बी मेरो मास खावै अर मेरो लोय पिवै अजर-अमर जीवन बिको ह। अर आखरी दिन, म बिनै जीवास्युं।

⁵⁵ क्युं क मेरो मास सची रोटी अर मेरो लोय सची पीबा की चिज ह।

⁵⁶ जखो मिनख मेरो मास खावै अर मेरो लोय पिवै बो मेरै म अर म बिमै बण्यो रेह्ऊँ हूँ।

⁵⁷ जंय्यां जीवतो परम-पिता मनै भेज्यो ह, अर मेरा परम-पिता की बजेऊँ म जिंदो हूँ। ठिक बंय्यांई जखो मेरी काया खासी, बो बी मेरी बजेऊँ जिंदो रेह्सी।

⁵⁸ जखी रोटी ईस्बर नगरीऊँ उतरी ह, बा आई ह। आ बि मन्ना की जंय्यां कोनी, जिनै थारा बडका खाया अर मरगा, पण जखो बी आ रोटी खासी बो सदाई जिंदो रेह्सी।”

⁵⁹ अ बाता बो कफरनूम म अरदास करबाळी झघा म सीखाई।

अजर-अमर जीवन देबाळा बचन

⁶⁰ बिका घणकराक चेला आ सुणर बोल्या, “आ कल्डी सीख ह। इपै कूण चाल सकै ह?”

⁶¹ ईसु आपका मन म आ भापर क मेरा चेला आपसरी म इ बात प बल्डावै ह, जणा बाऊँ बुज्यो, “आ बात थानै बुरी लागी के?

⁶² जणा थे काँई करस्यो जद थे मिनख का बेटानै आसमान म उपर जाता देखस्यो, जठै बो पेली हो?

⁶³ परमेसर की आत्मा तो जीवन देवै ह, पण मिनख की ताकत ख्याई काम की कोनी। जखी बात म थारूँ खई ह, बे परमेसर की आत्माऊँ ह अर जीवन देवै ह।

⁶⁴ पण थारै मऊँ क्युंक अंय्यां का हीं जखा बिस्वास कोनी करीं।” क्युं क ईसु सरूआतऊँई बानै जाणतो हो, जखा बिस्वास कोनी करीं अर बो कूण ह जखो बिनै धोकाऊँ पकड़ासी।

⁶⁵ अर बो बोल्यो, “जणाई तो म थारूँ बोल्यो हो क, जद ताँई खुद परम-पिता कोईनै मेरै कनै आबा कोनी देवै, जद ताँई कोई मेरै कनै कोनी आ सकै।”

⁶⁶ इ बात की बजेऊँ बिका चेला मऊँ बोळाजणा बिकै पिछै चालबो छोड दिआ।

⁶⁷ जणा ईसु बा बाराऊँ बोल्यो, “थे बी जाबो चाओ हो के?”

⁶⁸ समोन पतरस बिनै जुबाब दिओ, “परबु, म्हें किकै कनै जावां? अजर-अमर जीवन देबाळी बाता तो तेरैई कनै ह।

⁶⁹ अर म्हें बिस्वास कर्यो अर जाणगा हां क थेई परमेसर का पबितर मिनख हो।”

⁷⁰ ईसु बाऊँ बोल्यो, “म थानै बारवांनै कोनी टाळ्यो के? इकै बावजुद थारै मांयनै एक जणो सेतान ह।”

⁷¹ आ बात बो समोन इस्करोती का बेटा यहूदा क बारां म बोली ही, क्युं क बा बारा मऊँ बोई बिनै धोकाऊँ पकड़ाबाळो हो।