यहून्ना 2 - जीवन को च्यानणो (सेकावाटी नया नियम की पोथ्या)

काना नगरी म ब्या

¹ आ बाता क होबा क पाछै तीसरै दिन गलिल का काना नगरी म कोई ब्या हो। अर ईसु की माँ बी बठै ही।

² ईसु अर बिका चेलानै बी इ ब्या म नूतेड़ो हो।

³ अर जद अँगूरी निमड़गी जणा, ईसु की माँ बिऊँ बोली, “आकै कनै अँगूरी निमड़गी।”

⁴ ईसु बोल्यो, “मावड़ी, मेरूँ क्युं बी करबा ताँई मना बोल। हाल मेरो टेम कोनी आयो।”

⁵ ईसु की माँ नोकर-चाकराऊँ बोली, “जोक्यु बो थानै करबा ताँई बोलै बंय्यांई करज्यो।”

⁶ बिधी-बिधान गेल न्हाबा-धोबा ताँई यहूदि मिनखा की एक रीत ही, जि ताँई बठै भाठा की छ बडी-बडी झाल म्हेलेड़ी ही। बा हरेक म करीब सो लिटर पाणी नावड़तो हो।

⁷ ईसु नोकर-चाकराऊँ बोल्यो, “आ झालानै पाणीऊँ भरद्‍यो।” जणा बे बाकै पोळ लगा दिनी।

⁸ जणा पाछै बो बोल्यो, “इब इमैऊँ का'डर कोठ्यारी कनै लेज्याओ।” अर बे लेग्या,

⁹ अर जद बो कोठ्यारी बि पाणीनै पीयो जखो अँगूरी बणगो हो। बो कोनी जाणतो हो क आ अँगूरी कठैऊँ आई। पण जखा नोकर-चाकर बि पाणीनै काड्या हा बे जाण्ता हा। जणा बो कोठ्यारी बनड़ानै बुलायो

¹⁰ अर बोल्यो, “सगळा मिनख पेली चोखी अँगूरी परोसी हीं, अर मिनखा क पीर धाप्या पाछै हळकी। पण तू तो चोखी अँगूरी हाल ताँई राख राखी ह।”

¹¹ अंय्यां गलिल का काना नगरी म ईसु पेलो चमत्कार कर आपकी मेमा दिखाई। अर बिका चेला बिपै बिस्वास कर्या।

¹² इकै पाछै ईसु अर बिकी माँ अर बिका भाई अर बिका चेला कफरनूम नगर जार बठै क्युंक दिन रिह्या।

ईसु को परमेसर का मनदर म जाबो

¹³ यहूदिआ को फसै को त्युंहार साकडैई हो, जि बजेऊँ ईसु यरूसलेम गयो।

¹⁴ ईसु बठै मनदर का चोक म आर काँई देखै ह क, ढांडा, लल्डी, कबूतर बेचबाळा अर रिपीआ-पिसा को लेणदेण करबाळा आपकी दुकान लगा राखी ह।

¹⁵ जणा ईसु जेवड़ी को कोल्डो बणार, लल्ड्या क सागै बा सगळा ढांडानै मनदर का चोक क बारनै घेर्यायो। अर पाछो मुड़र पिसा को लेणदेण करबाळा का सीक्का खिन्डा दिआ। अर बाका पाटिया उन्दा मार दिआ।

¹⁶ अर कबूतर बेचबाळानै बोल्यो, “आनै लेर अठैऊँ चल्या जाओ। मेरा परम-पिता का घरनै बजार बणाबा की थारी हिमत कंय्यां होई?”

¹⁷ जणा बिका चेलानै पबितर सास्तर म मंडेड़ी बात याद आई, “तेरै घर को मो मनै खाज्यासी।”

¹⁸ यहूदि अधिकारी ईसु कनै पाछा आर एक सुवाल कर्यो, “तू काँई चमत्कार दिखा सकै ह? जिऊँ ओ साबित होवै क, तनै अंय्यां करबा को हक ह।”

¹⁹ ईसु जुबाब दिओ, “इ मनदरनै ढा द्‍यो, अर म तीन दिना म इनै पाछो खड़्यो कर देस्युँ।”

²⁰ बे बिऊँ बोल्या, “के तू इनै तीन दिना म खड़्यो कर देसी? इ मनदरनै बणाबा म छियाळिस बरस लाग्या हा।”

²¹ पण ईसु जि मनदर की बात करर्यो हो बा बिकी काया ही।

²² अर जद बो मरेड़ा मऊँ जी उठ्यो जणा बिका चेलानै याद आयो क इकै बारां म बो बानै बोल्यो हो। अर बे धरमसास्तर प अर ईसु जखो बोल्यो हो बिपै बिस्वास कर्या।

²³ फसै का त्युंहार की टेम जद ईसु यरूसलेम हो, बोळा हा जखा बिका चमत्कारानै देखर जानै बो कर्या करतो हो बिस्वास कर्या।

²⁴ पण ईसु खुदनै बाकै भरोसै कोनी छोड्यो, क्युं क बो सगळानै जाणतो हो।

²⁵ बिनै इकी जुर्त कोनी ही क, कोई मिनख दुसरा मिनख क बारां म बतावै, क्युं क बो खुद जाण्या कर्तो हो क मिनखा क मन म काँई चालर्यो ह।