यहून्ना 19 - जीवन को च्यानणो (सेकावाटी नया नियम की पोथ्या)

ईसुनै मोत की सजा

¹ जणा पीळातुस ईसुनै पकड़ा'र कोड़ा लगवाया।

² जणा पाछै सिपाईड़ा काटा की डाळीनै गूंथर एक मुकट बणार बिका सीर प धर दिआ। अर बिनै स्याही पोसाक पिराया।

³ अर बिकन आर खेबा लाग्या, “यहूदिआ का राजा की जे हो!” अर बिकै रेपटा मार्या।

⁴ पीळातुस ओज्यु बारनै आयो अर बाऊँ बोल्यो, “सुणो म बिनै थारै कनै बारनै ल्यार्यो हूँ, जिऊँ क थे जाण सको क मनै बिमै कोई खोट कोनी लाधी।”

⁵ जणा पाछै ईसु बारनै आयो। बे काटा को मुकट अर स्याही पोसाक पेर राख्या हा। जणा पीळातुस बोल्यो, “ओर्यो बो मिनख।”

⁶ बिनै देखर परधान याजक अर मनदर का पेरेदार चिलार बोल्या, “इनै सुळी प चढाओ। इनै सुळी प चढाओ।” पीळातुस बाऊँ बोल्यो, “थे इनै लेज्याओ अर सुळी चढाओ, मनै तो इमै कोई खोट कोनी दिखै।”

⁷ यहूदि मिनख बिऊँ बोल्या, “म्हारै नियमा गेल इनै मार देणो चाए, क्युं क ओ परमेसर को बेटो होबा को दावो कर्यो ह।”

⁸ आ सुणर पीळातुस बोळो डरगो।

⁹ अर दरबार क मांयनै जार ईसुऊँ बोल्यो, “तू कठैऊँ आयो ह?” पण ईसु बिनै जुबाब कोनी दिओ।

¹⁰ जणा पीळातुस बिऊँ बोल्यो, “तू मेरूँ बात क्युं कोनी करै? याद राख तनै सुळी प चढाबो अर छोडबो मेरै बस म ह।”

¹¹ ईसु बिऊँ बोल्यो, “ज परमेसर मनै थारै बस म नइ देतो जणा थे क्युंई कोनी कर सका हा। इ ताँई जखो मिनख मनै तेरै हाता म सूप्यो ह बो तेरूँ बी बडो पापी ह।”

¹² आ सुणर पीळातुस बिनै छोडबा को जुगाड़ ढुंढबा लाग्यो पण यहूदि नेता चिलाया, “ज तू इनै छोडसी, जणा तू रोम का राजा को भाईलो कोनी अर जखो बी खुद राजा होबा को दावो करै ह, बो रोमी समराट को बिरोदि ह।”

¹³ आ सुणर पीळातुस ईसुनै बारनै ल्याओ अर न्यायहाळी गद्दि प बेठगो, इ झघानै “भाठा को चबूतरो” खेता हा। इनै इबरानी भासा म “गब्बतो” बी खेवै ह।

¹⁴ ओ फसै का त्युंहार की त्यारी को दिन हो। दोपारासिक को टेम हो। पीळातुस यहूदि मिनखाऊँ बोल्यो, “ओर्यो थारो राजा!”

¹⁵ बे ओज्यु चिलाया, “इनै मार द्‍यो! इनै मार द्‍यो। इनै सुळी प चढाओ!” पीळातुस बाऊँ बोल्यो, “के थे चाओ हो क थारा राजानै सुळी दि जावै?” जणा परधान याजक बोल्या, “रोमी म्हराजनै छोडर म्हारो कोई राजा कोनी।”

¹⁶ जणा पाछै पीळातुस बिनै सुळी प चढाबा ताँई बाकै हाता म सूप दिओ। अंय्यां सिपाईड़ा ईसुनै हिरासत म ले लिआ।

ईसुनै सुळी प चढाबो

¹⁷ बो आपकी सुळी लिआ-लिआ बि झघा ताँई गयो जिनै, “खोपड़ी की झघा” बोल्या करता हा। इनै इबरानी भासा म “गुलगुता” बी बोलता हा।

¹⁸ बठै बे बिनै दो जणा क सागै सुळी प चढाया। एकनै दाया नाकै की सुळी प, दुजानै बाया नाकै की सुळी प अर बिच की सुळी प ईसुनै।

¹⁹ पीळातुस एक तकती प “ईसु नासरी, यहूदिआ को राजा” आ मांडर सुळी प टंगवा दिओ।

²⁰ बोळा सारका यहूदि मिनख बि तकती प मांडेड़ा इ एलाननै बाच्या क्युं क जि झघा ईसुनै सुळी प चढायो गयो हो बा नगरी क सारै ही। अर ओ एलान इबरानी, यूनानी अर लतीनी म मांडेड़ो हो।

²¹ जणा परधान याजक पीळातुस कनै जार बोल्या, “थे जखो तकती प, ‘यहूदिआ को राजा’ मंडवायो ह। बिनै बदलार ओ मंडवाओ क, ‘ओ खुद बोलै ह म यहूदि मिनखा को राजा हूँ।’ ”

²² पीळातुस बोल्यो, “म जखो मंडवा दिओ सो मंडवा दिओ।”

²³ ईसुनै सुळी प चढाबा क पाछै बे बिका गाबल्या उतार लिआ अर बाकी च्यार पाँती कर आपसरी म एक-एक बांट लिआ। इकै पाछै बे कुर्तो लिआ, बो कुर्तो बिना सिलाई को उपरऊँ निचै ताँई बुंदेड़ो हो।

²⁴ जिकी बजेऊँ बे आपसरी म बोल्या, “इनै पाड़बाऊँ चोखो तो इनै कूण ले, इ खातर आपा पासा गेरल्यां।” ओ इ ताँई होयो जिऊँ पबितर सास्तर को आंक पूरो होवै: “बे मेरा गाबल्यानै आपसरी म बांट लिआ अर मेरा कुर्तानै बाटबा ताँई पासा गेर्या।” जणा बे सिपाईड़ा अंय्यांई कर्या।

²⁵ ईसु की सुळी क कनै बिकी माँ, मासी, क्लोपास की घराळी मरीयम अर मरीयम मगदलिनी खड़ी ही।

²⁶ जद ईसु आपकी माँ अर बि चेलानै जखो लाडलो खुवातो हो, बानै कनै खड़्यो देख्यो जणा आपकी माँऊँ बोल्यो, “मावड़ी, ओ थारो बेटो ह।”

²⁷ इकै पाछै आपका चेलाऊँ बोल्यो, “आ तेरी माँ।” अर इकै पाछै बो चेलो बिनै आपकै घरा लेगो।

ईसु की मोत

²⁸ इकै पाछै ईसु जाणग्यो क सक्यु पूरो होलिओ ह, जणा सास्तर का आंक सच होवै इ ताँई बो बोल्यो, “म तिसायो हूँ।”

²⁹ बठै खाटी अँगूरीऊँ भरेड़ो एक बरतन पड़्यो हो। जणा बे एक फोवानै बिमै भेर हिस्सप मतबल जूफे की डाळी प धर'र उपरनै कर्या अर बिकै मुंडा क अड़ाया।

³⁰ ईसु बा खाटी अँगूरी चांखबा क पाछै बोल्यो, “पूरो होयो।” जणा बे आपकी नाड़ गेर दि अर पिराण तज दिआ।

³¹ ओ अरामहाळा दिन की त्यारी को दिन हो। अराम हाळै दिन बिकी लास सुळी प नइ टंगी रेह, इ ताँई यहूदि अधिकारी पीळातुसऊँ हात जो'ड़र बोल्या क बो हुकम देवै जिऊँ क बाकी टांग्या तोड़र बाकी लासानै सुळीऊँ उतार बठैऊँ हटायो जावै। क्युं क फसै को त्युंहार होबा की बजेऊँ ओ अरामहाळो दिन बोळो खास दिन हो।

³² जणा सिपाईड़ा आया अर ईसु क सागै सुळी प चढाया गया हा बा दो मिनखा की टांग्या तोड़ दिनी।

³³ पण जंय्यांई बे ईसु कनै आर देख्या क बे पेल्याई पिराण तज दिआ हीं जणा बे बाकी टांग्या कोनी तोड़ी।

³⁴ पण बामैऊँ एक सिपाईड़ो ईसु की कोल म भालो घोप्यो जिऊँ लोय अर पाणी भे निकळ्यो।

³⁵ आ बताबाळो बो ह, जखो अंय्यां होता देख्यो, जिऊँ क थे बी बिस्वास करो। बो जोक्यु बोल्यो हो बो सच हो अर बो जाणै ह क बो सच बोल्यो।

³⁶ ओ इ ताँई होयो क सास्तर म मंडेड़ो आंक पूरो होवै, “बिकी एक बी हाडी कोनी तोड़ी ज्यासी।”

³⁷ अर नेम-कायदा म मंडेड़ो ह, “जिकै बे भालो घोप्या बे बिनै देखसी।”

ईसुनै कबर म धरबो

³⁸ इकै पाछै अरमतिया नगरी को रेह्बाळो युसूफ जखो ईसु को चेलो हो पण यहूदि अधिकारीया क डर की बजेऊँ बो ओला म हो। बो पीळातुस कनै जार बिऊँ अरदास करी क बो बिनै ईसु की लास लेज्याबा दे जणा पीळातुस बिनै बोल्यो, “लेज्या।” जणा बो आर ईसु की लास लेगो।

³⁹ निकेदेमुस, जखो सऊँ पेली रातनै ईसुनै देखबा गयो हो, बो बठै गंधरस अर अरख मिलार बणाएड़ो लेप लेर आयो जखो करीब पेंतिस किलो हो।

⁴⁰ अर बे बिकी लास लेज्यार यहूदि मिनखा की लास गाडबा की रीत गेल बिनै सुगंद देबाळी चिजा क सागै कफन म लपेट दिआ।

⁴¹ जठै ईसुनै सुळी प चढायो गयो हो, बिकै सारैई एक बाग हो अर बि बाग क मांयनै ढाड म खुदेड़ी एक कबर ही जिमै हाल ताँई कोईनैई कोनी धर्यो गयो हो।

⁴² क्युं क अरामहाळो दिन होबाळो हो अर बा कबर बी कनै ही, इ ताँई बे ईसु की लासनै बिकै मांयनै धर दिआ।