यहून्ना 13 - जीवन को च्यानणो (सेकावाटी नया नियम की पोथ्या)

ईसु आपका चेला का पग धोया

¹ फसै का त्युंहार क पेलीई ईसु आ जा'णर क, “मेर ताँई बा घड़ी आगी जद म इ दुनियानै तजर मेरा परम-पिता कनै जाऊँ।” बो धरती प जत्ता बी बिका हा बाऊँ आखरी ताँई एकसोई परेम करतो रिह्यो।

² ईसु अर बिका चेला आथण्या रोटी खार्या हा, जणा सेतान समोन का बेटा यहूदा इस्करोती क मन म ईसुनै धोकाऊँ पकड़ाबा की बात घाल दिओ हो।

³ ईसु जाणतो हो क परम-पिता बिकै हाता म सक्यु सूप दिओ ह। अर बो परमेसर क कनैऊँ आयो अर बिकनई पाछो जार्यो ह।

⁴ जणा बो आपकी खाबाळी चोकीऊँ खड़्यो होयो अर आपको कोटियो उतार एक गमछ्यो आपकी कड़त्यु प बांद्‍यो।

⁵ जणा पाछै बो बठळ म पाणी भर आपका चेला का पग धोबा लाग्यो, अर कड़त्यु प भंदेड़ा गमछ्याऊँ बानै पुछ्यो।

⁶ जद बो समोन पतरस क कनै आयो, समोन बोल्यो, “परबु, थे मेरा पग धोस्यो?”

⁷ ईसु बिनै जुबाब दिओ, “म जखो करूं हूँ बिनै तू हाल कोनी समज सकै, पण पाछै तेरै समज म आसी।”

⁸ पतरस बिऊँ बोल्यो, “नइ आ कदैई कोनी हो सकै क, थे मेरा पग धोओ!” ईसु बोल्यो, “ज म तेरा पग नइ धोऊँ जणा तू मेरो चेलो कोनी।”

⁹ समोन पतरस बोल्यो, “जणा परबु तू मेरा पगई क्युं, हात अर माथो बी धो दे!”

¹⁰ ईसु बोल्यो, “जखो न्हा लिओ बिनै पग धोबा किई जुर्त ह, क्युं क बो पूरो पबितर ह। एकनै छोडर थे सगळा साप हो।”

¹¹ ईसु पेल्याऊँ जाणतो हो क, बिनै कूण पकड़ासी जणाई तो बो बोल्यो हो क, “एकनै छोडर सगळा पबितर हो।”

¹² चेला का पग धोया पाछै, बो आपको कोटियो पेर पाछो आपकी झघा प जार बेठगो। बो बुज्यो, “म जखो थारै सागै कर्यो बिनै समज्या के?

¹³ थे मनै गरूजी अर परबु बोलो हो, आ बात सई ह, क्युं क म हूँ।

¹⁴ म थारो परबु अर गरूजी होर थारा पग धोयो, जणा थानै बी एक दुसरा का पग धोणो चाए।

¹⁵ म अंय्यां कर थारै सामै एक मिसाल दिनी ह। जिऊँ थे बी बंय्यांई करो जंय्यां म थारै सागै कर्यो हूँ।

¹⁶ म थारूँ साची बोलुँ हूँ, कोईबी दास आपका मालिकऊँ बडो कोनी, अर नइ भेजेड़ो आपका भेजबाळाऊँ बडो।

¹⁷ इब थे अ बाता जाणग्या हो, जद थे आनै करस्योक जणा परमेसर थानै आसिरबाद देसी।

¹⁸ “म थारी सगळा की बात कोनी करूं, म बानै जाणू हूँ जानै म टाळ्या हूँ। सास्तर म मंडेड़ो आंक पूरो होसी, ‘जखो मेरी रोटी खाई बोई मेरै लात मारी।’

¹⁹ “इकै होबाऊँ पेलीई म थानै आ बतार्यो हूँ, जिऊँ जद अ बाता होवै जणा थे बिस्वास करो क म बोई हूँ।

²⁰ म थारूँ सची बोलुँ हूँ, जखो बी बानै मानै जखानै म भेजूँ हूँ बो मनै बी मानै ह अर जखो बी मनै मानै, बो मनै भेजबाळानै बी मानै ह।”

बिस्वास घात क बारां म ईसु को अगाऊ बोलबो

²¹ आ खेबा क पाछै ईसु आपकी आत्मा म बोळो दुखी होया। अर साप-साप बोल्यो, “म थारूँ सची बोलुँ हूँ, थार मऊँ एक जणो मनै धोकाऊँ पकड़ासी।”

²² चेला एक दुसरा को मुंडो देखबा लाग्या, अर सोच म पड़गा क बिको इसारो की कानि ह।

²³ बाका चेला मऊँ एक जणो, जखो लाडलो खुवातो हो। बो ईसु क सारै बेठ्यो हो।

²⁴ समोन पतरस बिकै कानि इसारो कर बोल्यो, “ईसुऊँ बुज बो किकै बारां म खेर्यो ह।”

²⁵ जणा बो चेलो ईसु क कान क कनैसिक मुंडो कर बाऊँ बुज्यो, “परबु, बो कूण ह?”

²⁶ ईसु बोल्यो, “म ओ रोटी को टुक इ कचोळा म डूबार जिनै देस्युँ, बोई बो मिनख ह।” जणा बे रोटी को टुक तोड़र बिनै डबोर समोन का बेटा यहूदा इस्करोतीनै दिआ।

²⁷ रोटी को टुक लेताई यहूदा म सेतान बड़गो। जणा ईसु बिऊँ बोल्यो, “तू जखो करबो चावै ह, बो तावळोसो करकरा ले।”

²⁸ खाबा बेठ्या दुसरा चेला मऊँ कोईसा कई आ पलै कोनी पड़ी की ईसु बिऊँ आ बात क्युं बोली।

²⁹ यहूदा कनै रिपीआळी थेली रेह्ती ही, इ बजेऊँ क्युंक चेला सोच्या क ईसु बिनै इ बजेऊँ खेवै ह की बो जार त्युंहार ताँई बानै जखो चाए बिनै मोल लिआवै नहिस गरीबा म क्युं बाट देवै।

³⁰ रोटी को टुक लेताई यहूदा बारनै चलेगो। बो रात को टेम हो।

नयो हुकम

³¹ यहूदा क जाबा क पाछै, ईसु बोल्यो, “टेम आगो जद मिनख का बेटा की मेमा परगट होसी, अर बिकै जरिए परमेसर की मेमा परगट होसी।

³² ज परमेसर की मेमा बिकै जरिए होवै। जणा तावळोई परमेसर मिनख का बेटा की मेमा परगट करसी।

³³ “मेरा टाबरो म क्युंक टेम ताँई थारै सागै हूँ। थे मनै ढुंढस्यो, अर इब म थानै बी बात बोलुँ हूँ जखी यहूदि बडकाऊँ कही ही, क जठै म जार्यो हूँ, बठै थे कोनी आ सको।

³⁴ “अर इ टेम म थानै नयो हुकम देऊँ हूँ क एक दुसराऊँ प्यार-परेम राखो। जंय्यां को प्यार-परेम म थारूँ कर्यो, बंय्यांई आपसरी म थे बी करो।

³⁵ ज थे आपसरी म प्यार-परेम राखस्यो, जणा सगळा जाणसी की थे मेरा चेला हो।”

पतरस मनै जाणबाऊँ मुकरसी

³⁶ समोन पतरस बुज्यो, “परबु थे कठै जार्या हो?” ईसु बोल्यो, “जठै म जार्यो हूँ बठै हाल तू मेरै गेल कोनी आ सकै पण पाछै तू बठै मेरै गेल आसी।”

³⁷ पतरस बोल्यो, “परबु इ टेम म थारै सागै क्युं कोनी चाल सकूँ? इबकी स्यात म थारै ताँई मेरा पिराण दे सकूँ हूँ!”

³⁸ ईसु बिऊँ बोल्यो, “के तू साच्याई मेर ताँई पिराण दे सकै ह? पण म तेरूँ साची बोलर्यो हूँ, मुरगा क बांग देबाऊँ पेली तीन बार तू मनै पिछाण्बाऊँ मना कर देसी।”