यहून्ना 11 - जीवन को च्यानणो (सेकावाटी नया नियम की पोथ्या)लाजर की मोत 1 बेतनिया नगरी म लाजर नाम को एक रोगलो मिनख आपकी भाणा मारथा अर मरीयम क सागै रिह्या करतो हो। 2 मरीयम बिमार लाजर की भाण ही, जखी परबु ईसु को ईतर उंदकार अभिसेक करी अर बिका पगानै आपका बाळाऊँ पुछी ही। 3 अ भाणा ईसुनै समचार पुगायो क, “परबु, थारो पक्को भाईलो बिमार ह।” 4 जद ईसु इकै बारां म सुण्यो जणा बोल्यो, “आ बिमारी लाजर की मोत ताँई कोनी ह, पण आ परमेसर की मेमा ताँई ह, जिऊँ क बिका बेटा की मेमा हो।” 5 ईसु, मारथा बिकी भाण मरीयम अर लाजरऊँ प्यार-परेम राखतो हो। 6 ईसुनै लाजर की बिमारी का समचार लाग्या पाछै बी, जठै बो हो बठै दो दिन ओर रिह्यो। 7 इकै पाछै बो आपका चेलाऊँ बोल्यो, “आयो ल्यो आपा पाछा यहूदिआ चालां।” 8 चेला बोल्या, “गरूजी, क्युंक दिना पेली यहूदि थार प भाठा बगाबो चावै हा, अर थे बठै ओज्यु जाबा की करो हो।” 9 ईसु बोल्यो, “दिन म बारा घंटा च्यानणा का होवै ह। जणा जखा दिन का च्यानणा म चाली हीं बे आखड़'र कोनी पड़ै, क्युं क बानै दिन का च्यानणा म सक्यु सुजै ह। 10 पण ज बे अँधेरा म चालीं जणा आखड़'र पड़ै, क्युं क अँधेरा म सुजै कोनी।” 11 अंय्यां खेर बो बाऊँ बोल्यो, “आपणो भाईलो लाजर निंद लेर्यो ह, पण म जार बिनै जगास्युं।” 12 चेला जुबाब म बोल्या, “परबु ज बो सोवै ह, जणा बो तावळोई निरोगो होज्यासी।” 13 ईसु क खेबा को मतबल हो क लाजर मरगो, पण चेला समज्या लाजर सुत्यो ह। 14 जणा ईसु बाऊँ साप-साप बोल्यो, “लाजर मरगो। 15 थारै कारण म राजी हूँ क म बठै कोनी हो, क्युं क इब थारो बिस्वास ओर बी बढ ज्यासी। आओ ल्यो आपा बिकन चालां।” 16 थोमा जिनै जोड़लो खेता हा। बो आपकै सागैहाळा चेलाऊँ बोल्यो, “ल्यो आपा बी गरूजी क सागै मरबा चालां।” ईसु को बेतनिया म आबो 17 ईसु क बठै पुगबा क च्यार दिन पेल्याई लाजर की लासनै गुफा म धर दिआ हा। 18 बेतनिया नगरी यरूसलेमऊँ करीब कोसेक दूर ही। 19 अर बोळा यहूदि मिनख मारथा अर मरीयमनै बाका भाई की मोत प तसली देबा आया हा। 20 जद मारथा आ सुणी की ईसु आर्यो ह जणा बा बिऊँ मिलबानै बारनै गई, पण मरीयम घराई रेह्गी। 21 मारथा ईसुऊँ बोली, “परबु ज थे अठै होता जणा मेरो भाई कोनी मरतो! 22 पण म जाणू हूँ क, इब बी थे जोक्यु बी परमेसरऊँ माँगस्यो बो थानै देसी।” 23 ईसु बिऊँ बोल्यो, “तेरो भाई, जी ज्यासी।” 24 इपै बा बोली, “हां म जाणू हूँ, आखरी दिन बो ओज्यु जी ज्यासी।” 25 ईसु बिऊँ बोल्यो, “म जीवन हूँ अर मर्या पाछै ओज्यु जी उठबो मेरै मई ह। जखा बी मेर प बिस्वास करसी, बे मर्या पाछै बी ओज्यु जी ज्यासी। 26 अर जखा मेर म जिवीं अर बिस्वास करी हीं बे कदैई कोनी मरसी। के तू इ बात प बिस्वास करै ह?” 27 बा बोली, “हाँ परबु, म बिस्वास करूं हूँ क, तू परमेसर को बेटो मसी ह जखो इ जगत म आबाळो हो।” ईसु की आँख्या म आसु 28 आ बोलर मारथा आपकै घरा पाछी जार आपकी भाण मरीयमनै छानैसीक बुलार बोली, “गरूजी अठैई ह, अर बो तेरै बारां म बुजर्यो हो।” 29 आ सुणर मरीयम खड़ी होर तावळिसी बिऊँ मिलबा गई। 30 हाल ताँई ईसु नगरी म कोनी पुग्यो हो। बे बठैई हा जठै मारथा बिऊँ मिली ही। 31 मरीयमनै तावळिसीक बारनै जाता देखर बे मिनख जखा तसली देबा मरीयम क सागै घरा हा, बे आ सोचर क आ कबर प रोबा जारी ह बिकै गेल होलिआ। 32 मरीयम जठै ईसु हो बठै पुगर बिनै देखताई बिकै पगा म पड़र कही, “परबु, ज थे अठै होता जणा मेरो भाई कोनी मरतो!” 33 मरीयम अर बिकै सागैहाळा को रोज देखर ईसु को काळज्यो पसीजगो अर बिकी अन्तर-आत्मा दुखी होई। 34 ईसु बाऊँ बुज्यो, “बिकी लास कठै ह?” बे बोल्या, “परबु, आओ ल्यो चालर देखल्यो।” 35 ईसु की आँख्या म आसु आगा। 36 आ देखर बे मिनख बोल्या, “देखो ओ बिऊँ कतो प्यार करै ह!” 37 पण बामैऊँ क्युंक बोल्या, “ओ कयानै आँख्या दि जणा के ओ लाजरनै मरबाऊँ कोनी बचा सकै हो?” लाजरनै जिंदो करबो 38 ओज्यु ईसु बोळो दुखी होयो अर कबर प गयो। बा एक गुफा ही अर बिका मुंडा प भाठो धरेड़ो हो। 39 ईसु बोल्यो, “भाठो हटाओ!” मरेड़ा लाजर की भाण मारथा बोली, “परबु इमैऊँ बोळी बुरी बाँस आसी, क्युं क इनै मर्या च्यार दिन होगा!” 40 ईसु बिऊँ बोल्यो, “के म तेरूँ कोनी बोल्यो हो, ज तू बिस्वास करै जणा परमेसर की मेमा देखसी?” 41 बे भाठानै हटायो, अर ईसु उपरनै देखर बोल्यो, “परम-पिता थारी जे हो, जखो थे मेरी सुणो हो। 42 म जाणू क थे सदाई मेरी सुणो हो। पण आ बात म अठै खड़्या मिनखा की बजेऊँ बोल्यो जिऊँ अ बिस्वास करै क थे मनै भेज्या हो।” 43 आ बोलर बो जोरऊँ हेलो दिओ, “लाजर, बारनै आ!” 44 जणा बो कफन म लिपटेड़ोई बारनै निकळ्यायो, अर बिको मुंडो गाबाऊँ ढकर्यो हो। ईसु बोल्यो, “इनै खोलो जिऊँ ओ चाल सकै।” ईसुनै मारबा की साजिस ( मत्ती 26:1–5 ; मरकुस 14:1 , 2 ; लूका 22:1 , 2 ) 45 जखा यहूदि मरीयमनै तसली देबा आया हा, बा मिनखा म बोळाजणा ईसु का इ कामनै देखर बिपै प बिस्वास कर्या। 46 पण बामैऊँ क्युंक फरिसीया क कनै जार, बानै ईसु का इ काम को समचार दिओ। 47 जणा फरिसी अर परधान याजक, सभा बुलाई अर बोल्या, “आपानै काँई करनो चाए? ओ मिनख तो बोळा चमत्कार करर्यो ह! 48 ज आपा अंय्यांई हात प हात धर्या बेठ्या रेहस्यां, जणा हरेक बिपै बिस्वास करबा लागसी। जणा रोमी सरकार हरकत म आज्यासी, अर आपणा मनदर अर यहूदि मिनखानै तबा कर देसी।” 49 बामैऊँ केफा नाम को, जखो बि बरस म्हायाजक हो बोल्यो, “अरै बावळो, थे क्युंई कोनी जाणो! 50 अर नइ इ बातनै समजो क, सगळा क बदला म एक को मरबो चोखो ह, जिऊँ यहूदि मिनख नास होबाऊँ बच जावै।” 51 बो खुदऊँ आ बात कोनी बोली, पण इ ताँई बोली ही, क बो बि बरस म्हायाजक हो, अर बो अगाऊई खेदी क, ईसु यहूदि मिनखा ताँई मरसी। 52 अर खाली यहूदि मिनखा ताँई नइ पण तीनतेरा होईड़ा परमेसर का मिनखानै एक काया की जंय्यां एक सागै भेळा करबा ताँई बी मरसी। 53 अर बि दिनऊँई यहूदि नेता बिनै मारबा की तरकीब ढुंढबा लाग्या। 54 जि बजेऊँ यहूदिआ म ईसु चोड़ै-धाड़ै कोनी घूमतो हो। पण बो यहूदिआ इलाकानै छोडर एक अफरैम नाम की नगरी क कनै का उजाड़ क सारै बसेड़ी ढाणी म आपका चेला क सागै रिह्यो। 55 फसै को त्युंहार सांकड़ै हो। सगळा देसऊँ यहूदि मिनख यरूसलेम म त्युंहारऊँ पेली सुद करबा की सूण निभाबा जार्या हा। 56 बे मनदर का चोक म भेळा होर ईसुनै उडिकर्या हा। अर बे एक दुसराऊँ बोल्या, “काँई सोचो हो? बो त्युंहार म आसी क कोनी?” 57 परधान याजक अर फरिसी आदेस काड दिआ हीं क, ज कोई आ जाणै क ईसु कठै ह, जणा बिको समचार दे, जिऊँ बे बिनै पकड़ सकै। |
(c) 2010-2017, New Life Computer Institute. All rights reserved