यहून्ना 10 - जीवन को च्यानणो (सेकावाटी नया नियम की पोथ्या)

गुवाळ्या की निती-कथा

¹ ईसु ओज्यु बोल्यो, “म थारूँ सची बोलुँ हूँ, जखो मिनख रेवाड़ा म दरूजा की बजाय डोळी डाकर बड़ै बो मिनख चोर अर डाकू ह।

² अर जखो मिनख दरूजा होर रेवाड़ा म बड़ै, बो लल्ड्या को गुवाळ्यो ह।

³ दरूजा प पेरोदेबाळो बि ताँई दरवाजो खोलै ह, बो हरेक लल्डीनै नाम लेर बुलावै अर लल्ड्या बिकी बोली पिछाणै ह। बो बानै बारनै लेज्यावै ह।

⁴ जद बो बानै बारनै लेर आवै, जणा बो बाकै आगै-आगै चालै ह, अर लल्डी बिकै गेल-गेल, क्युं क बे बिकी बोली पिछाणै ह।

⁵ बे कदैई कोई दुसरा क गेल कोनी जावै पण बिऊँ बिदकै ह। क्युं क बे बिकी बोली कोनी पिछाणै।”

⁶ ईसु बाऊँ आ निती-कथा कही, पण बे बिको मतबल कोनी समज सक्या।

ईसु चोखो गुवाळ्यो ह

⁷ जणा ईसु ओज्यु बोल्यो, “म थारूँ सची बोलुँ हूँ, लल्ड्या ताँई बारनो म हूँ।

⁸ अर बे सगळा जखा मेरूँ पेली आया बे चोर अर डाकू हा, पण लल्ड्या बाकै गेल कोनी होई।

⁹ बारनो म हूँ, अर जखो बी मेरै जरिए मांयनै आसी बो बचायो जासी। बो बार-भीतर आई-जाई करसी अर धपायो जासी।

¹⁰ चोर चोरी करबा, मारबा, अर नास करबानै आवै ह। पण म जीवन देबा आयो हूँ, जखो भर्योपूरो जीवन ह।

¹¹ “म चोखो गुवाळ्यो हूँ, चोखो गुवाळ्यो खुदकी लल्ड्या ताँई पिराण देवै।

¹² पण बो मिनख जखो मजुरी प लल्ड्यानै चरावै ह, जखो बाको असली मालिक कोनी। बो ल्याळीनै कनै आता देखर लल्ड्यानै एकलोई छोडर भाग छुटै ह। अर ल्याळी बापै झपटो मार बानै तीनतेरा कर दे ह।

¹³ बंधाणी प लल्ड्या को गुवाळ्यो भाग छुटै ह, क्युं क बो तो एक मजुर ह। अर बिनै लल्ड्या की कोई परवा कोनी होवै।

¹⁴ “म चोखो गुवाळ्यो हूँ। क्युं क म मेरी लल्ड्यानै जाणू हूँ अर बे मनै।

¹⁵ ठिक बंय्यांई जंय्यां परम-पिता मनै जाणै ह अर म बिनै, अर म मेरी लल्ड्या ताँई पिराण द्‍युँ हूँ।

¹⁶ मेरी ओर बी लल्ड्या हीं, जखी इ रेवड़ की कोनी। मनै बानै बी ल्याणो जरूरी ह, बे मेरी सुणसी अर जणा बाको एक रेवड़ अर एकई गुवाळ्यो होसी।

¹⁷ परम-पिता मेरूँ प्यार-परेम करै ह क्युं क म मेरी मरजीऊँ पिराण द्‍युँ हूँ, जिऊँ मेरो पिराण पाछो मिल सकै।

¹⁸ मेरा पिराणा मेरूँ कोई कोनी ले सकै, पण बिनै म खुदई देऊँ हूँ। मनै ओ हक ह क म इनै दे सकूँ अर इनै पाछो ले सकूँ। अंय्यां करबा को हुकम मनै परम-पिता दिओ ह।”

¹⁹ इ बात की बजेऊँ ओज्यु यहूदि मिनखा म फूट पड़गी।

²⁰ बोळा हा जखा अंय्यां बोलर्या हा, “इमै कोई भूत-पलीत रळेड़ो ह! ओ बावळो ह! थे इकी क्याले सुणो हो?”

²¹ पण दुसरा बोलर्या हा, “भूत-पलीत रळेड़ो मिनख इकी जंय्यां कोनी बोल सकै! अर भूत-पलीत आँदा मिनखनै आँख्या कंय्यां दे सकै ह?”

ईसु प यहूदि मिनख बिस्वास कोनी कर्या

²² ओ स्याळा को टेम हो, अर बि टेम यरूसलेम म मनदर की जेनती मनाई जारी ही।

²³ ईसु मनदर म सुलेमान का बरामदा म घूमर्यो हो।

²⁴ जणा यहूदि मिनख बिकै च्यारूमेर भेळा होगा। अर बिऊँ बुज्या, “तू कद ताँई म्हानै दो मता म राखसी? म्हानै साप-साप बता दे। तू मसी ह के?”

²⁵ ईसु बोल्यो, “म थानै पेलीई खे दिओ हो, पण थे मेरो बिस्वास कोनी कर्या। जखा काम म परम-पिता का नाम का हकऊँ करूं हूँ, बे मेरै पक्ष म गुवाई देवीं हीं।

²⁶ थे बिस्वास कोनी करो क्युं क थे मेरी लल्ड्या कोनी हो।

²⁷ मेरी लल्ड्या मेरी बोली पिछाणै ह, म बानै जाणू हूँ, अर बे मेरै गेल-गेल चालै ह।

²⁸ म बानै अजर-अमर जीवन द्‍युँ हूँ, अर बे कदैई कोनी मरसी। बानै मेरूँ कोई कोनी खोस सकै।

²⁹ मेरो परम-पिता जखो बानै मनै दिओ ह, बो सगळी चिजाऊँ बढर ह। अर कोईबी बानै बिका हाताऊँ कोनी खोस सकै।

³⁰ म अर मेरो परम-पिता एकई हां।”

³¹ जणा ओज्यु यहूदि नेता बिपै बगाबा ताँई भाठा उठाया।

³² ईसु बाऊँ बोल्यो, “म थारै बिचमै बोळा चोखा काम कर्यो, जखा परम-पिता मनै करबा ताँई दिओ हो। बामैऊँ कूणसा ताँई थे मेर प भाठा बगाबो चाओ हो?”

³³ बे बोल्या, “म्हें तेरा चोखा कामा ताँई तेर प भाठा कोनी बगावां, पण तू मिनख होर खुदनै परमेसर बतार परमेसर की बुराई करै ह।”

³⁴ ईसु बोल्यो, “ओ थारा पबितर सास्तर म मंडर्यो ह जंय्यां परमेसर बोलै ह, ‘थे परमेसर जंय्यां का हो।’

³⁵ परमेसर बा मिनखानै परमेसर जंय्यां का खयो, जानै बिको बचन दिओ गयो अर आपा जाणा हां क पबितर सास्तर म मंडेड़ी बात कदैई झूठी कोनी होवै।

³⁶ जद म अंय्यां खयो क म परमेसर को बेटो हूँ, जणा थे क्युं खया म परमेसर की बुराई करूं हूँ। मनै टाळर इ जगत म भेजबाळो परम-पिताई तो ह।

³⁷ ज म मेरा परम-पिता का काम जखा बो मेरूँ चावै ह बानै कोनी करूं, जणा थे मेर प बिस्वास मना करो।

³⁸ ज म बे करूं, इकै बावजुद बी थे मेर प बिस्वास कोनी करो, पण कमऊँ कम मेरा कामा प तो बिस्वास करो। जिऊँ थे जाण सको क परम-पिता मेर म ह, अर म परम-पिता म।”

³⁹ एक बार ओज्यु बे ईसुनै पकड़बा की कोसिस करी पण बो बाका हाताऊँ बच निकळ्यो।

⁴⁰ जणा ईसु ओज्यु यरदन नदि पार चलेगो, जठै यहून्ना पाणी को बतिस्मो दिआ करतो। अर ईसु बठै क्युं क टेम ताँई रिह्यो।

⁴¹ बोळा मिनख बिकै कनै आर खेता हा, “यहून्ना कोई चमत्कार कोनी दिखायो, पण जखी बी बात यहून्ना इ मिनख क बारां म खई ह, बे सगळी सच ह।”

⁴² अर बठै बोळा मिनख बिपै बिस्वास कर्या।