यहून्ना 1 - जीवन को च्यानणो (सेकावाटी नया नियम की पोथ्या)

बचन देधारी होयो

¹ क्युबी रच्या जाबाऊँ पेली बचन हो। बचन परमेसर क सागै हो, अर बचनई परमेसर हो।

² क्युबी रच्या जाबाऊँ पेली बो परमेसर क सागै हो।

³ बिकै जरिए परमेसर सगळी चिजा बणाई। सगळी सरस्टि म एक बी अंय्यां की चिज कोनी जखी इकै बिना रची गई हो।

⁴ बिमै जीव हो। अर बो जीव सगळा मिनखा को च्यानणो हो।

⁵ च्यानणो अँधेरा म चमकै ह, अर अँधेरो बिनै कोनी बुझा सक्यो।

⁶ यहून्ना नाम का एक मिनखनै परमेसर भेज्यो।

⁷ यहून्ना मिनखा म बि च्यानणा की गुवाई देबानै गुवा बणर आयो। जिऊँ मिनख बिका हेलानै सुणी अर बिस्वास करीं।

⁸ बो खुद च्यानणो कोनी हो। पण बो बि च्यानणा की गुवाई देबानै आयो हो।

⁹ सगळा मिनखानै च्यानणो दिखाबाळो, सचो च्यानणो जगत की नजर्या म आर्यो हो।

¹⁰ बचन जगत म हो, पण कोई बिनै कोनी जाण्यो, जदकी परमेसर बिकै जरिए इ सरस्टि की रचना करी।

¹¹ बो आपका मिनखा म आयो। पण बे बिनै कोनी अपणाया।

¹² इकै बावजुद जत्ता बी बिनै अपणाया अर बिका नाम प बिस्वास कर्या, बानै बो परमेसर का टाबरिया होबा को हक दिओ।

¹³ एक टाबर, जंय्यां मिनखऊँ बिकी इंछ्या गेल जलमै ह, बि तरिकाऊँ जलम'र बे परमेसर का टाबर कोनी बण्या, पण परमेसर की इंछ्याऊँ आत्मिक रूपऊँ जलम लेर परमेसर का टाबर बण्या हीं।

¹⁴ बचन देधारी होयो। बो दया अर सच क सागै म्हारै मांयनै रिह्यो। अर म्हें बिकी अंय्यां की मेमा देखी जंय्यां परम-पिता का इकलोता बेटा की मेमा।

¹⁵ यहून्ना बिकै बारां म गुवाई दिनी। बो हेलो पाड़्यो, “ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो।’”

¹⁶ बिकी दया की भरपुरीऊँ आपानै एक क पाछै एक आसिरबाद मिल्यो ह।

¹⁷ मूसा क जरिए परमेसर नेम-कायदा दिआ। पण दया अर सच ईसु मसी की बजेऊँ आयो।

¹⁸ परमेसरनै कदैई कोई कोनी देख्यो। पण परमेसर को इकलोतो बेटो जखो परमेसर की छाती तळै ह, अर बो परमेसरई ह। बोई परमेसरनै परगट कर्यो।

बतिस्मो देबाळा यहून्ना को हेलो

¹⁹ यरूसलेमऊँ यहूदि अधिकारी जद याजका अर लेवीयानै यहून्ना कनै आ बुजबा भेज्या क, “तू कूण ह?”

²⁰ जणा यहून्ना बाकै मुंडा प सच बोल्यो क, “म मसी कोनी।”

²¹ बे बिऊँ बुज्या, “जणा तू कूण ह? के तू एलिआ ह?” बो बोल्यो, “म एलिआ कोनी।” जणा बे बुज्या, “के तू परमेसर की खेबाळो ह?” बो बोल्यो, “नइ, म बो बी कोनी।”

²² बे बिऊँ बोल्या, “जणा पाछै तू कूण ह म्हानै बता? जिऊँ म्हें म्हानै भेजबाळानै जुबाब देवां। तू खुद तेरै बारां म काँई खेवै ह?”

²³ यसाया परमेसर की खेबाळा क खया गेल यहून्ना बानै जुबाब दिओ: “म उजाड़ म, हेलो देबाळा को हेलो हूँ। ‘परबु क चालबा ताँई गेलो सिदो करो।’ ”

²⁴ फरिसी, जानै भेज्या गया हा

²⁵ बे बिऊँ बुज्या, “जद तू नइ तो मसी अर नइ एलिआ अर नइ परमेसर की खेबाळो, जणा पाछै तू पाणी को बतिस्मो क्याले देवै ह?”

²⁶ यहून्ना बानै जुबाब दिओ, “म तो पाणी को बतिस्मो देऊँ हूँ। पण थारै बिचमै एक मिनख खड़्यो ह, जिनै थे कोनी जाणो।

²⁷ बो मेरै पाछै आर्यो ह। पण म तो बिकाळा जूता का सळू खोलबा जोगोई कोनी।”

²⁸ अ सगळी बाता यरदन नदि क परली पार बेतनिया म होई। जठै यहून्ना पाणी को बतिस्मो दिआ कर्तो हो।

यहून्ना ईसु की गुवाई दिनी

²⁹ आगलै दिन ईसुनै आप कानि आतो देखर यहून्ना बोल्यो, “देखो, ओ परमेसर को उन्यो ह, जखो जगत का मिनखा का पाप ताँई बलिदान होसी।

³⁰ ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो।

³¹ पेली म बी बिनै कोनी जाण्तो हो क बो कूण ह? पण म इ ताँई पाणी को बतिस्मो देतो आयो क, बो इजरायल प परगट होवै।’”

³² जणा पाछै यहून्ना आ गुवाई दिनी, “म आसमानऊँ पबितर आत्मानै कबूतर की जंय्यां बिपै उतरता देखी।

³³ म तो बिनै कोनी पिछाण्तो हो। पण परमेसर जखो मनै पाणी को बतिस्मो देबा भेज्यो, बोई मेरूँ बोल्यो, ‘जिपै तू पबितर आत्मानै उतरता अर रूकता देखै, जणा जाण जाजै क पबितर आत्मा को बतिस्मो देबाळो ओई ह।’

³⁴ म आ बातानै होता देखी, जणाई गुवाई देऊँ हूँ क ओई परमेसर को बेटो ह।”

ईसु क पिछै चालबाळा पेलीपोत का चेला

³⁵ आगलै दिन यहून्ना अर बिका दो चेला ओज्यु बठैई हा।

³⁶ अर बो ईसुनै बठिकी जातो देखर बोल्यो, “देखो, परमेसर को उन्यो जार्यो ह।”

³⁷ बिकी आ बात सुणर, बे दोन्यु चेला ईसु क गेल होलिआ।

³⁸ ईसु गेलनै मुड़र बानै आपकै गेल आतो देखर बाऊँ बुज्यो, “काँई बात ह?” बे बोल्या, “ओ गरूजी, थे कठै रेह्‍वो हो?”

³⁹ बो बोल्यो, “आओ अर देखल्यो।” आ बात संज्या च्यारेक बजे की ह जणा बे बिकै सागै जार देख्या क बो कठै रेह्‍वै ह अर बे बि दिन बिकै सागैई रिह्या।

⁴⁰ यहून्ना की बात सुणर ईसु क गेल चालबाळा दोन्या मऊँ, एक जणो अंदरिआस हो जखो समोन पतरस को भाई हो।

⁴¹ बो सऊँ पेली आपका भाई समोननै ढुंढर बोल्यो, “म्हानै मसी मिलगो ह।” मसी को मतबल टाळेड़ो होवै।

⁴² जणा बो बिनै ईसु कनै ल्यायो। ईसु बिनै देखर बोल्या, “तू यहून्ना को बेटो समोन ह, तू केफा खुवासी।” केफा जिनै पतरस बी बोलै ह जिको मतबल ढाड होवै ह।

ईसु फलिपूस अर नतनएलनै बुलायो

⁴³ आगलै दिन ईसु गलिल जाबा की मन म करी। फलिपूसनै देखर बो बिऊँ बोल्यो, “मेरै गेल होले।”

⁴⁴ फलिपूस, अंदरिआस अर पतरस की नगरी बेतसदा को रेह्बाळो हो।

⁴⁵ फलिपूस नतनएलऊँ मिलर बिऊँ बोल्यो, “म्हानै बो मिलगो ह, जिकै बारां म मूसा नेम-कायदा म मांड्यो अर जिकै बारां म परमेसर की खेबाळा बताया हीं। बो युसूफ को बेटो नासरत को रेह्बाळो ईसु ह।”

⁴⁶ नतनएल बुज्यो, “नासरत! नासरतऊँ कोई चोखी चिज निकळ सकै ह के?” फलिपूस बोल्यो, “आर खुदई देखले।”

⁴⁷ ईसु नतनएलनै आपकै कनै आतो देखर बोल्यो, “देखो, ओ सचमई इजरायली ह, जिमै क्युंई कपट कोनी।”

⁴⁸ नतनएल ईसुऊँ बुज्यो, “थे मनै कंय्यां जाणो हो?” ईसु बिऊँ बोल्यो, “फलिपूसनै बुलाबाऊँ पेली, म तनै अंजीर का दरखत क तळै देख्यो हो।”

⁴⁹ नतनएल बिऊँ बोल्यो, “गरूजी थे परमेसर का बेटा हो, थे इजरायल का राजा हो।”

⁵⁰ ईसु बोल्यो, “म तनै बोल्यो क म तनै अंजीर का दरखत तळै देख्यो, के तू जणाई मेर प बिस्वास करै ह? तू इऊँ बी बडा-बडा काम देखसी।”

⁵¹ अर बो बाऊँ बोल्यो, “म थारूँ सच बोलर्यो हूँ, थे ईस्बर नगरीनै खुली अर परमेसर का ईस्बर नगरी दुतानै मिनख का बेटा क सामै आता-जाता देखस्यो।”