याकूब 4 - जीवन को च्यानणो (सेकावाटी नया नियम की पोथ्या)दुनियादारीऊँ भाईलाचारी 1 थारै मांयनै राड़ अर कळै कठैऊँ आगी? अंय्यां होबा की बजे थारी बुरी इंछ्या ह जखी थारै मांयनै राड़ अर कळै करावै ह। 2 थे पाबा की इंछ्या तो राखो हो पण थानै मिलै कोनी, इ ताँई थे राड़ अर कळै करो हो, थे खून करो हो अर बळोकड़ोपूणो राखो हो जिऊँ थानै क्युं कोनी मिलै। थानै इ ताँई कोनी मिलै क्युं क थे परमेसरऊँ कोनी माँगो। 3 जद थे माँगो हो, जणा थानै मिलै कोनी क्युं क थे बुरी इंछ्याऊँ माँगो हो, जिऊँ जोक्यु थानै मिलै बिनै थे थारी भोगबिलास म उडाद्यो। 4 ओ कुकरमी मिनखो, के थे ओ कोनी जाणो क, इ दुनियादारीऊँ भाईलाचारी करबो परमेसरऊँ बेर राखबो ह ? इ ताँई जखो बी दुनियादारीऊँ भाईलाचारी करै ह बो खुदनै परमेसर को बेरी बणावै ह। 5 थानै अंय्यां नइ सोचबो चाए क, बिधी-बिधान बेफालतुई अंय्यां खेवै ह क, “परमेसर जखी आत्मा आपानै दि ह बि ताँई बोळी जळन राखै ह , क्युं क बो बिऊँ बोळो परेम करै ह।” 6 पण परमेसर आपणा प दया करी ह, इ ताँई बिधी विधान म मंडेड़ो ह क, “परमेसर गुमान करबाळा क खिलाप ह, पण नरमाईऊँ चालबाळा मिनखा प दया करै ह।” 7 इ ताँई खुदनै परमेसरनै सूप द्यो। अर सेतान को विरोध करो, जणा बो थारै सामैऊँ भागज्यासी। 8 परमेसर क कनै आओ जणा बो बी थारै कनै आसी। ओ पाप्यो! थे थारा हातानै साप करो, ओ सक करबाळो थे थारा हियानै पबितर करो। 9 सोक मनाओ, रोओ अर दुखी होवो। थारा हसबानै सोक म अर थारी खुसीनै उदासी म बदलल्यो। 10 थे परबु क सामै खुदनै छोटो करो जिऊँ बो थानै उचो उठासी। एक दुसरा प कळंक मना लगाओ 11 ओ मेरा लाडला बिस्वास्यो, थे एक दुसरा प कळंक मना लगाओ। अर ज कोई आपका पाड़ोसी भाईड़ा क खिलाप बोलै ह अर न्याय करै, जणा बो नेम-कायदा क खिलाप म बोलै अर न्याय करै ह। अर बे अंय्यां कर नेम-कायदा गेल कोनी चालै पण इको न्याय करबाळा बणज्यावीं हीं। 12 पण नेम-कायदा देबाळो अर न्याय करबाळो तो एकई ह , अर बोई बचाबाळो अर नास करबाळो ह। पण थे कूण हो जखा थारा पड़ोसी को न्याय करो हो ? गुमान मना करो 13 इब थे सुणो, जखा अंय्यां खेओ ह क, “आपा आज नहिस काल इ नगरी म नहिस बि नगरी म जार बरस दो बरस काम-धंधो कर पिसाळा बण सकां हां।” 14 पण थे तो अत्तोबी कोनी जाणो क काल थारै जीवन क सागै काँई होसी? काँई ह थारो जीवन? थे तो ओस की जंय्यां हो जखी क्युंक देर रेह्वै ह अर पाछै गायब होज्यावै ह। 15 पण इकै बदलै थानै तो अंय्यां बोलबो चाए क, “ज परबु चायो तो आपा जिस्यां अर ओ करस्यां नहिस बो करस्यां।” 16 पण थे तो थारा झूठा पाखंडाऊँ खुद प गुमान करो हो। अंय्यां को गुमान करबो बुरो ह। 17 अर जखो बी मिनख भलाई करबो जाणै ह पण कोनी करै जणा बो पाप करै ह। |
(c) 2010-2017, New Life Computer Institute. All rights reserved