याकूब 2 - जीवन को च्यानणो (सेकावाटी नया नियम की पोथ्या)भेद-भाव मना करज्यो 1 मेमाभर्या परबु ईसु मसी प बिस्वास करबाळा मेरा लाडला बिस्वास्यो, थारै मांय भेद-भाव नइ होणो चाए। 2 थे अंय्यां मना करज्यो क, ज थारी सभा म कोई मिनख सोना की अँगूठी अर मेंगा गाबा पेर'र आवै अर बिकै गेलई कोई गरीब मिनख फाट्या पुराणा गाबा म बठै आवै, 3 जणा ज थे सोना की अँगूठी अर मेंगा गाबा पेर'र आबाळानै तो चोखी झघा बिठाओ अर बि गरीबऊँ बोलो क, “तू मेरै पगा क कनैई तळै बेठज्या,” 4 जणा थे आपसरी म भेद-भाव कोनी कर्या के? अर बुरी मनस्याऊँ भेवार कोनी कर्या के? 5 मेरा लाडला बिस्वास्यो, ध्यानऊँ सुणो, के ईस्बर बानै कोनी टाळ्यो जखा इ जगत का मिनखा की नजर्या म गरीब ह? जिऊँ बे बिस्वास म अमीर होज्यावै अर बि राज का अधिकारी बणै जिनै परमेसर बिऊँ परेम करबाळानै देबा को बादो कर्यो ह। 6 पण जणा बी थे बा गरीबा को अपमान कर्यो हो। के पिसाळा मिनख थार प जोर कोनी जिमावै अर थानै कचेरी म घिसर कोनी लेज्यावै? 7 के बे मसी का बि चोखा नाम की बुराई कोनी करै जखो थानै दिओ गयो ह? 8 पबितर सास्तर म सगळा हुकमा म स्याही हुकम ओ ह क, “थे थारा पड़ोसीऊँ खुदकी जंय्यांई प्यार करज्यो।” अर ज थे इनै मानो हो जणा चोखोई करो हो। 9 पण ज थे भेद-भाव करो हो जणा पाप करो हो अर नेम-कायदा थानै दोसी बतावै ह। 10 क्युं क ज कोई नेम-कायदा का सगळा नियमानै मानै पण ज एक बी बात म चूक ज्यावै जणा बो नेम-कायदा का सगळा नियमानै तोड़बाळो बाजै। 11 क्युं क जखो बोल्यो ह क, “कुकरम मना करज्यो” बोई आबी बोल्यो ह क, “हत्या मना करज्यो।” इ ताँई ज थे कुकरम तो कोनी करो पण हत्या करो हो, जणा अंय्यां कर थे नेम-कायदा का नियमानै तोड़बाळा बणग्या। 12 थे बा मिनखा की जंय्यां बोलो अर भेवार करो जखा को न्याय अजाद करबाळा नेम-कायदा गेल होवै ह। 13 क्युं क जखो दया कोनी करै बिको न्याय बी बिना दया होसी। पण दया न्यायनै जीतै ह। बिस्वास अर करम 14 मेरा लाडला बिस्वास्यो, ज कोई खेवै क मनै बिस्वास ह पण बो बिकै गेल करम कोनी करै जणा बिनै काँई फाईदो। अंय्यां को बिस्वास बिको छुटकारो कर सकै ह के? 15 अर मानल्यो कोई बिस्वासी भाई नहिस कोई बिस्वासी भाण भूखो तिसायो अर उघाड़ो होवै, 16 अर थार मऊँ कोई बिनै बोलै क, “राजी-खुसी चल्योजा, धाप्यो-धुस्यो अर गरम रेह।” पण बिकी काया की जुर्त हाळी चिजा नइ दे जणा काँई फाईदो? 17 अंय्यांई बिना करम क बिस्वास मतैई मर्यो समान ह। 18 पण कोई खेवै, “तेरै कनै बिस्वास ह अर मेरै कनै करम।” तू मनै थाकाळो बिस्वास बिना करम क दिखा अर म तनै माखाळो बिस्वास करम क सागै दिखास्युं। 19 तू बिस्वास करै ह क एकई परमेसर ह। चोखी बात ह! पण ओ बिस्वास तो ओपरी बलाय बी करै ह अर धुजै ह। 20 ओ बावळा मिनख, तू ओ जाणबो चावै ह के क, करम बिना बिस्वास बेकार ह ? 21 जद आपणो बाप अब्राहम आपका छोरा इसाकनै बेदी प चढायो हो जणा के बो करम गेलई धरमी कोनी खुवायो? 22 थे जाणो हो क बिको बिस्वास अर बिका करम एक सागै मिलरई काम कर्या , बिका करमऊँई बिको बिस्वास सिद होयो। 23 अर सास्तर म मंडेड़ो बचन पूरो होयो क, “अब्राहम परमेसर प बिस्वास कर्यो अर बिस्वास की बजेऊँ बो धरमी गिण्यो गयो,” अर बो परमेसर को भाईलो खुवायो। 24 जणा थे आ जाणल्यो क, मिनख करमऊँ धरमी बणै ह खाली बिस्वासऊँ मिनख धरमी कोनी खुवावै। 25 अंय्यांई राहाब रंडी बी आपका करमाऊँई धरमी बणी, क्युं क बा इजरायल का भेदियानै खुदका घर म सरण दि अर बानै बचाबा बेई दुसरा गेलाऊँ बिदा करी। 26 अर जंय्यां काया आत्मा क बिना मरेड़ी ह बंय्यांई बिस्वास करम बिना मरेड़ो ह। |
(c) 2010-2017, New Life Computer Institute. All rights reserved