इबरानीआ 9 - जीवन को च्यानणो (सेकावाटी नया नियम की पोथ्या)धरती अर ईस्बर नगरी म भगती 1 पेलड़ो करार जखो इजरायली मिनखा अर परमेसर क बिचमै हो, बिमै भगती करबा का नियम काईदा बी हा अर भगती करबा ताँई पबितर झघा बी बणाई गई ही। 2 मतबल एक पबितर तम्मू खड़्यो कर्यो गयो हो, जिका दो भाग हा, पेलड़ा भाग म दिपदान, पाटियो अर चढावा म चढाईड़ी रोट्या ही; इ हिस्सानै पबितर झघा बोलता हा। 3 इकै पाछै एक परदो हो, परदा क गेलड़ै नाकै एक भाग हो जिनै म्हापबितर झघा बोलता हा। 4 इ भाग म सोना की धूप जळाबाळी बेदी जिपै सुगंद देबाळी चिजा चढाई जाती ही, सोनाऊँ मंढेड़ो करार को बक्सो अर इ बक्सा क मांयनै सोनाऊँ बणेड़ो बरतन हो जिकै मांयनै मन्ना हो, हारुण की कुपळ फूटेड़ी लाठी अर करार मांडेड़ा भाठा बी हा। 5 अर करारहाळा बक्सा क उपर मेमा का तेजऊँ भर्या करूब ईस्बर नगरी दुता की मूरत्या ही अर अ माफी हाळी झघा प छाया करमाली ही। पण इब आ एकेक क बारां म बखान करबा को टेम कोनी। 6 पबितर तम्मू क मांयनै सक्यु इ हिसाबऊँ जचेड़ो हो अर याजक रोजकी पबितर तम्मू क पेलड़ा भाग म जार आपका सेवा का कामनै करता हा। 7 पण परदा क गेलड़ै नाकै का भाग म खाली म्हायाजकई जा सकतो हो, अर बो बी बरस म खाली एकबर। अर म्हायाजक बी बिना बि लोय क कोनी जा सकतो हो जखो बो खुदका अर मिनखा का अणभोळ म करेड़ा पाप क बदलै चढायो जातो हो। 8 इकै जरिए पबितर आत्मा आ दिखावै ह क, जद ताँई पबितर झघा का पेलड़ा भाग म सेवा को काम होर्यो ह जणा ताँई म्हापबितर हाळा भाग म जाबा को गेलो कोनी खोल्यो गयो। 9 अर ओ पबितर तम्मू आज का जुग ताँई मिसाल ह, जखो आ दिखावै ह क जखी भेंट अर बलिदान चढायो जार्यो ह बो भगती करबाळा मिनखा की अन्तर-आत्मानै समुळी सुद कोनी कर सकै। 10 क्युं क अ नियम तो बारला हीं जखा खाबा-पीबा अर भात-भात का सुद होबा का रिती-रिवाज ह अर अ जद ताँई रेह्सी जद ताँई नयो सिरो लागू नइ होज्यावै। मसी को लोय 11 पण इब मसी जखो चोखी बाता को म्हायाजक बणर आयो ह, बो हात का बणाएड़ा तम्मू म कोनी पण इऊँ बी बडा अर सिद तम्मू क मांयनै सेवा करै ह इको मतबल ओ ह क बो पबितर तम्मू इ सरस्टि को भाग कोनी। 12 बो बकरा अर बाछ्या का लोयऊँ नइ पण खुदका लोयऊँ एकबर मई म्हापबितर झघा क मांयनै गयो। अर जुग-जुग को छुटकारो पक्को कर दिओ। 13 क्युं क बकरा अर सांड को लोय अर बछड़ा की भगूती छिड़कर मिनखानै बारनैऊँ रिती-रिवाजा गेल सुद कर्यो जावै ह। 14 ज अ बाता साची ह जणा मसी को लोय कतो सक्तिसाली ह। अर अजर-अमर पबितर आत्मा क जरिए बो खुदनै निरदोस चढावा क रूप म परमेसरनै चढा दिओ, अंय्यां करबाऊँ अर लोयऊँ आपानै बो, मोत क गेलै लेज्याबाळा कामाऊँ सुद कर दिओ जिऊँ आपा जीवता परमेसर की सेवा कर सकां। 15 इ बजेऊँ मसी नया करार को बिचोलिओ ह जिऊँ जखा बुलाईड़ा हीं बानै बा बादो करेड़ी जुग-जुग ताँई की बापोत दि जावै। अर बा पापऊँ जखा पेलड़ा करार क तळै आता हा बाकी मर'र किमत चुकाई अर बानै अजाद कर्यो। 16 जठै ताँई बसियतनामा को सुवाल ह, जणा बि ताँई बसियतनामानै मंडाबाळा की मोत को सबूत मिलबो जरूरी ह। 17 क्युं क कोई बी बसियतनामो जदई पक्को होवै ह जद बिनै मंडाबाळा की मोत होज्यावै ह। अर जद ताँई, बिनै मंडाबाळो जीताजी ह, बि वसियतनामा को कोई मतबल कोनी। 18 आई बजे ह क पेलड़ा करारनै बिना लोय क लागू कोनी कर्यो गयो। 19 क्युं क मूसा नेम-कायदा का सगळा हुकमानै मिनखानै सुणाबा क पाछै बकरा अर बछड़ा को लोय पाणी म मिलार लाल ऊन अर जूफा की डाळ्याऊँ बा सगळा मिनखा प अर बि पोथी प छिड़क दिओ। 20 अर बो बोल्यो, “ओ बि करार को लोय ह जिनै मानबा को हुकम परमेसर दिओ ह।” 21 अर अंय्यांई मूसा पबितर तम्मू अर भगती क काम म आबाळी सगळी चिजा प लोय छिड़क्यो। 22 सचमई नेम-कायदा चावै ह क सगळी चिजानै लोयऊँ सुद कर्यो जावै। क्युं क बिना लोय बहाया माफी हई कोनी। मसी क बलिदान होबाऊँ पाप धुपग्या 23 इ ताँई आ जरूरी ह क जखी चिजा ईस्बर नगरी की नकल ह, बानै ज्यानबरा का बलिदानऊँ सुद कर्यो जाणो चाए। पण ईस्बर नगरी की चिजा तो आऊँ चोखा बलिदानऊँ पबितर करी जाणी चाए। 24 क्युं क मसी बि पबितर झघा म कोनी गयो जखी हातऊँ बणाएड़ी अर असली परमेसर का पबितर तम्मू की नकल ह पण बो तो ईस्बर नगरी मई गयो, जिऊँ क बो आपणै कानिऊँ परमेसर क सामै बिचोली करै। 25 अर नइ बो आपको बलिदान चढाबा ताँई बार-बार ईस्बर नगरी म गयो जंय्यांकी म्हायाजक लोय क सागै जखो बिको कोनी बिनै लेर म्हापबितर झघा म हर बरस जावै ह। 26 अर ज अंय्यां होतो जणा मसीनै इ सरस्टि की सरूआतऊँ लेर कई बार पिड़ा भोगणी पड़ती; पण इब बो इ जुग क आखरी म सगळा ताँई एकबरई परगट होगो, जिऊँ बो खुदई बलिदान होर पाप को नास कर दे। 27 अर जंय्यां मिनखा ताँई एकर मरबो अर बिकै पाछै बिको न्याय होबो जरूरी ह, 28 बंय्यांई मसी बी बोळा मिनखा का पापनै धोबा ताँई एकर बलिदान होयो; अर मसी बा मिनखा ताँई जखा बिनै उडिकै ह बाका पाप धोबा ताँई नइ पण बाका छुटकारा ताँई दुसरकै परगट होसी। |
(c) 2010-2017, New Life Computer Institute. All rights reserved