इबरानीआ 6 - जीवन को च्यानणो (सेकावाटी नया नियम की पोथ्या)

¹ इ ताँई आओ आपा मसी की सरूआती सीखनै छोडर स्याणा बणबा ताँई आगै बढता रेह्‍वां। अर आपानै ओज्यु बाई बाता म नइ पड़्यो रेह्बो चाए जखी बाता आपा सरूआत म सीखी ही जंय्यां क मोत कानि लेज्याबाळा करमाऊँ हियो फेरबो अर परमेसर प बिस्वास करबो,

² सुद होबा का रिती-रिवाजा की सीख, सीर प हात धरबो, मरेड़ा को ओज्यु जिबो अर आखरी न्याय।

³ ज परमेसर चायो तो आपा अंय्यांई करस्यां।

⁴ क्युं क जखा मिनखनै एकर परमेसर को ज्ञान मिलगो, जखो ईस्बर नगरी का बरदाना को सुवाद चखलिओ, जखो पबितर आत्मा को संगरो कर लिओ,

⁵ अर परमेसर का बचना की भलाई अर आबाळा जुग की उपरी सक्‍तियानै जाणग्यो ह।

⁶ जणा ज अ मिनख भटक जावै जणा आ मिनखा को हियो फेर'र ओज्यु परमेसर का गेला प ल्याबो बोळो ओखो ह, क्युं क बे परमेसर का बेटानै खुद ताँई ओज्यु सुळी चढावीं अर चोड़ै-धाड़ै बिको तमासो बणावीं हीं।

^7-8 क्युंक झाड़्या अर काटा उगाबाळी जमीन बेकार अर परमेसर कानिऊँ सरापित ह अर आखरी म आगऊँ जळाई जावै ह। पण उपळी जमीन प मी को पाणी बार-बार बरसै ह अर जमीन बि पाणीनै पीर किसान ताँई चोखी फसल उगावै ह अर बिनै परमेसर को आसिरबाद मिलै।

⁹ लाडलो, म्हें अंय्यां बोलर्या तो हां पण म्हानै बिस्वास ह क थारै सागै छुटकारा क बारां म ओर बी चोखो-चोखो होवै।

¹⁰ परमेसर अन्याय करबाळो कोनी। क्युं क थारा कामानै अर परमेसर का मिनखा की मदद कर जखो परेम थे बिका नामऊँ दिखाया अर दिखार्या हो बिनै परमेसर कदैई कोनी भूलै।

¹¹ म्हारी तो आई दिली इंछ्या ह क थे हरेक जणा आखीर ताँई इ लगनऊँ काम करता रेह्‍वो, जिऊँ थारी आस पूरी होज्यावै।

¹² क्युं क म्हें आ कोनी चावां क थे आळसी बणो, पण म्हें आ चावां हां क थे बा मिनखा किसी चाल चालो जखा बिस्वास अर थ्यावसऊँ बा बाता का वारिस हीं जाको करार परमेसर कर्यो हो।

परमेसर को पक्को बादो

¹³ परमेसर जद अब्राहमऊँ करार करर्यो हो, जणा बठै परमेसरऊँ बडो कोई कोनी हो, जिकी सोगन खाई जा सकै ही जणा परमेसर खुदकी सोगन खार

¹⁴ बोल्यो, “पक्काई म तनै आसिरबाद देस्युँ अर तनै निरी आस-ओलाद देस्युँ।”

¹⁵ जणा अब्राहम थ्यावस क सागै इ करारनै उडिक्यो अर परमेसर को करेड़ो करार पूरो होयो।

¹⁶ मिनखा म तो ओ चलन ह क बे आपऊँ बडा की सोगन खावै ह। अर अंय्यां कर सोगन खाबाळो आपकी बातनै सची साबित करै ह अर आ सोगन सगळी बहसनै खतम कर देवै ह।

¹⁷ सोगनऊँ परमेसर बिका करार का पाँतीवाळ मिनखानै ओ साप-साप दिखाबो चावै हो क बिको बादो कदैई कोनी टळै। अंय्यां बो सोगनऊँ करारनै पुक्‍तो कर्यो।

¹⁸ जणा अठै नइ बदलबाळी दो बाता ह, बिको बादो अर बिकी सोगन जाकै बारां म परमेसर कदैई झूठ कोनी बोल सकै। इ ताँई परमेसर की सरण म आबो आपानै बोळी हिमत बंधावै, जिऊँ आपा आपणै सामै धरेड़ी परमेसर का करेड़ा वादा क पूरो होबा की आसनै, मजबूती क सागै लगाए राखां।

¹⁹ आपणी आ आस बि निम का भाठा की जंय्यां ह जखी आपणा हियानै थाम्यो राखै जिऊँ आपणो बिस्वास नइ हालै। अर आपणी आस की बजेऊँई आपा अंय्यां का हां मानो आपा परमेसर की बि झघा म बड़गा जिमै खाली म्हायाजकई बड़ सकै ह जखी परदाऊँ ढकेड़ी ही।

²⁰ जठै आपणा कानिऊँ ईसु मसी आपणाऊँ पेली गयो। अर बो मिलिकीसिदक की रीत गेल सदा-सदाई को म्हायाजक बणगो।