इबरानीआ 5 - जीवन को च्यानणो (सेकावाटी नया नियम की पोथ्या)1 हरेक म्हायाजक मिनखा मऊँई टाळ्यो जावै ह। अर मिनखा कानिऊँ परमेसरऊँ जुड़ेड़ी बातानै करबा ताँई बिनै म्हायाजक बणायो जावै ह, जंय्यां क पाप का छुटकारा ताँई भेंट अर बलि चढाबो। 2 बो अज्ञानी अर भटकेड़ा मिनखा क सागै नरमाईऊँ बरताव कर सकै ह। क्युं क बो खुद कमजोर्या क बस म ह। 3 इ ताँई बिनै चाए क जंय्यां बो मिनखा का पाप की माफी ताँई चढावो चढावै ह बंय्यांई खुदका पाप की माफी ताँई बी चढावो चढावै। 4 म्हायाजक बणबा को मान कोई बी मिनख खुदकी मरजीऊँ कोनी ले सकै पण ओ तो परमेसर कानिऊँ दिओ जावै ह जंय्यां हारुणनै परमेसर दिओ हो। 5 अंय्यांई मसी बी म्हायाजक बणबा को मान खुदऊँ कोनी लिओ। पण परमेसर बिऊँ बोल्यो, “तू मेरो बेटो ह; आज म तेरो बाप बण्यो हूँ।” 6 अंय्यांई बो एक ओर झघा बोल्यो ह क, “तू मिलिकीसिदक की रीत गेल, सदा-सदाई को याजक ह।” 7 ईसु जद काया म इ धरती प हो बा दिना म बो जोर-जोरऊँ अर रो-रोर बिऊँ अरज अर अरदास करतो रिह्यो जखो बिनै मोतऊँ बचा सको हो। अर बिकी भगती की बजेऊँई बिकी सुणी गई। 8 बो बिको बेटो होबा क बावजुद बी दुख भोग-भोगर हुकमानै मानबो सीख्यो। 9 बो सगळी बाता म निधान होर बा सगळा मिनखा ताँई जखा बिका हुकमानै मानै ह, जुग-जुग ताँई छुटकारा को आधार बणगो। 10 अर बिनै परमेसर, मिलिकीसिदक की रीत गेल म्हायाजक बणायो। गळत गेला जाबाळानै चेताबो 11 आकै बारां म खेबा ताँई म्हारै कनै बोळी बाता हीं, पण थानै समजाबो दोरो ह क्युं क थे सुणबा म कचा हो। 12 टेम देखता तो थानै इब ताँई सीखाबाळा होज्याणा चाए हा। पण थानै अंय्यां का मिनख की जुर्त पड़ै ह जखो थानै सरूआतऊँ ओज्यु परमेसर का बचना का सच की सीख देवै। थानै रोटी नइ पण इब ताँई बी दुद किई जुर्त पड़री ह। 13 क्युं क जखो दुद क पाण जीवै बो तो हाल ताँई टाबरई ह, बिनै धारमिक्ता की काँई पिछाण? 14 पण रोटी तो स्याणा ताँई होवै, जखा सीखता सीखता भला-बुरा म भेद करबो जाणज्यावीं। |
(c) 2010-2017, New Life Computer Institute. All rights reserved