इबरानीआ 3 - जीवन को च्यानणो (सेकावाटी नया नियम की पोथ्या)

ईसु मूसाऊँ बडो ह

¹ ईस्बर नगरी का बुलावा म पाँतीवाळ ओ मेरा पबितर बिस्वासी भाईड़ो, थे थारो ध्यान बि परमेसर का भेजेड़ा ईसु प जखो म्हायाजक ह अर जिनै म्हें माना हां बिपै लगाओ।

² अर जंय्यां मूसा परमेसर को काम करबा म बिस्वास जोगो हो, बंय्यांई ईसु बी आपका टाळबाळा परमेसर क सामै बिस्वास जोगो हो।

³ जंय्यां घरनै बणाबाळानै घरऊँ बेत्ती मान दिओ जावै ह बंय्यांई ईसुनै बी मूसाऊँ बेत्ती मान दिओ गयो।

⁴ क्युं क हरेक घरनै बणाबाळो कोईनै कोई होवै ह, पण सक्यानै बणाबाळो परमेसरई ह।

⁵ मूसा तो परमेसर क घर म बिस्वास जोगो दास बणर रिह्यो, जिऊँ बो बा बाता क बारां म गुवाई देवै जखी आबाळा टेम म बोली जाबाळी ही।

⁶ पण मसी बेटो होबा क नातै परमेसर का घर को मुखियो ह, अर ज आपा हिमत अर बि आसनै जिपै आपा बिस्वास करां हां थाम्या राखां जणा आपा बिका परिवार हां।

बिस्वास नइ करबाळा मिनखानै चेताबो

⁷ जणाई पबितर आत्मा खेवै ह, “ज थे आज बिकी उवाज सुणो,

⁸ जणा थे थारा हियानै थारा बडका की जंय्यां काठो मना करो, जखा बगावती दिना म कर्या हा, जि टेम का बे उजाड़ म बिचास्या जार्या हा।

⁹ बे चाळिस बरसा ताँई मेरा कामानै देख्या, बिकै वावजुद बी बे मनै बिचास्ता अर अजमाता रिह्या।

¹⁰ इ बजेऊँई म बि पिडीऊँ नराज रिह्यो, अर म बाऊँ बोल्यो, ‘थारो हियो सदाई भटकतो रेह्सी, अर थे मेरा गेलानै कोनी पिछाण्यो।’

¹¹ अर म बानै झाळ्या म आर आ सोगन खार खयो, ‘बे कदैई मेरी अराम हाळी झघा म कोनी बड़सी।’ ”

¹² मेरा लाडला बिस्वास्यो, चेता म रेहज्यो! कदै अंय्यां नइ होवै क कोईसाको हियो बुराई अर भेमऊँ भर जावै जखो बिनै जीवता परमेसरऊँ दूर कर देवै ह।

¹³ जद ताँई आज को दिन खुवावै ह रोजकी एक दुसरा की हिमत बंधाता रेहज्यो। जिऊँ थार मालो कोईसो बी पाप का धोका म आर आपका हियानै काठो नइ करै।

¹⁴ क्युं क ज आपा पेलड़ा बिस्वास म आखीर ताँई मजबूत बण्या रेहस्यां जणाई आपा मसी का पाँतीवाळ बणस्यां।

¹⁵ जंय्यां क बोल्यो बी गयो ह, “ज थे आज बिकी उवाज सुणो, जणा थे थारा हियानै काठो मना करज्यो, जंय्यां की बगावत की टेम म कर्या हा।”

¹⁶ बे सुणबाळा अर बगावती मिनख कूण हा? के अ बे कोनी जानै मूसा मिसरऊँ का'डर ल्यायो हो?

¹⁷ अर के अ बेई मिनख कोनी हा जाऊँ परमेसर चाळिस बरसा ताँई नराज रिह्यो? के अ बेई मिनख कोनी हा जखा पाप कर्या अर जाकी लास उजाड़ म पड़ीरी?

¹⁸ परमेसर किकै ताँई सोगन खाई ही क थे मेरी अराम हाळी झघा म कोनी बड़स्यो? के अ बे मिनख कोनी जखा बिका हुकमनै कोनी मान्या?

¹⁹ अर आपा देख सकां हां क बे मिनख भेम की बजेऊँई बठै कोनी बड़ सक्या।