इबरानीआ 2 - जीवन को च्यानणो (सेकावाटी नया नियम की पोथ्या)

चेता म रेह्बा ताँई चेताबो

¹ आपा जखी बी बाता सुणी ह बापै आपानै हियो लगाणो चाए, जिऊँ आपा नइ भटकां।

² क्युं क ज ईस्बर नगरी दुता क जरिए दिओ गयो समचार पक्को हो, खयो नइ मानबाळानै अर नियमानै तोड़बाळानै ठिक-ठिक सजा दि गई

³ जणा पाछै आपा इ बडा छुटकारा की अनदेखी कर कंय्यां बच सकां हां? इ छुटकारा को पेलो हेलो परबु कानिऊँ पाड़्यो गयो हो अर जखा बी इ हेलानै सुण्या हा बे आपणा ताँई इनै पुक्‍तो कर्या।

⁴ अर परमेसर बी आपका बडा-बडा चमत्काराऊँ, सक्‍तिऊँ भरेड़ा भात-भात का कामाऊँ, सेलाणीऊँ अर पबितर आत्मा का बरदानाऊँ जखा बिकी इंछ्याऊँ बाट्या गया हा, इनै साबित कर्यो।

छुटकारा की निम

⁵ जि आबाळा जुग की चरचा आपा करर्या हां बिपै राज करबा ताँई परमेसर ईस्बर नगरी दुतानै कोनी गिण्यो।

⁶ सास्तर म एक झघा कोई अंय्यां बोल्यो ह, “मिनख काँई ह, जिनै तू याद करै? मिनख को बेटो काँई ह, जखो तू बिको ध्यान राखै?

⁷ तू मिनखनै ईस्बर नगरी दुताऊँ चिनोसोई कम बणायो ह, तू बिकै माथा प मेमा अर मान को मुकट धर्यो ह

⁸ अर बिकै पगा तळै सक्यु कर दिओ।” अर सक्यु बिकै बस म कर परमेसर क्युं बी कोनी छोड्यो जखो बिकै बस म नइ होवै। पण आजकाल देखबा म कोनी आवै क सक्यु बिकै बस म ह।

⁹ पण आपा ईसुनै जखो ईस्बर नगरी दुताऊँ चिनोसोई कम बणायो गयो हो, इब बिनै मेमा अर मान को मुकट पेर्या देखां हां, क्युं क बो मोत की पिड़ा भोगी ह। जिऊँ क बो परमेसर की दयाऊँ सगळा मिनखा ताँई मोत भोगै।

¹⁰ सगळी चिजा परमेसर ताँई ह अर सक्यु बिऊँई ह। परमेसरनै भायो क बो आपका घणकराक टाबरानै आपकी मेमा म ल्याबा ताँई ईसुनै दुख क जरिए सिद बणावै। बानै छुटकारो देबाळो ईसुई ह।

¹¹ क्युं क पापऊँ पबितर करबाळो ईसु अर पापऊँ पबितर होबाळा मिनख एकई बाप का हीं; इ ताँई ईसु बानै खुदका भाई खेबाऊँ कोनी सरमावै।

¹² अर बो खेवै ह, “म मेरा भाई-भाणा म तेरा नाम को हेलो पाड़स्युं, अर मिनखा की मंडळी क मांयनै म तेरो गुणगान गास्युं।”

¹³ अर बो अंय्यां बी बोलै ह, “म बिपै बिस्वास करस्युं।” ओज्यु बो बोलै ह, “म अर बा ओलाद जखी परमेसर मनै दिनी ह अठै हां।”

¹⁴ क्युं क बा ओलाद मास अर लोय की ही इ ताँई ईसु बी मास अर लोय को बण्यो। जिऊँ बो आपकी मोतऊँ सेताननै नास करै, सेतान जिकनै मारबा की सक्‍ति ही

¹⁵ अर जत्ता बी आपकै जीता-जीव मोत का डर की गुलामी म हा बानै छुड़ावै।

¹⁶ क्युं क पक्काई बे ईस्बर नगरी दुत कोनी जाकी बो मदद करै पण बे तो अब्राहम का वंस ह जाकी बो मदद करै।

¹⁷ इ ताँई बिनै हर बात म मिनखा जंय्यां को बणायो गयो, जिऊँ बो परमेसर की सेवा करबा ताँई दया करबाळो अर बिस्वास जोगो म्हायाजक बणै। अर मिनखा को परमेसरऊँ ओज्यु मेळ कराबा ताँई बलि होवै।

¹⁸ क्युं क ईसु खुदबी दुख भोग्यो जद बो बिचास्यो गयो जिऊँ बो बाकी मदद कर सकै ह जखा बिचास्या जावै ह।