इबरानीआ 12 - जीवन को च्यानणो (सेकावाटी नया नियम की पोथ्या)

आपणो बाप परमेसर

¹ इ ताँई आपणै च्यारूमेर गुवाया की भीड़ ह जणा आओ रोड़ो गेरबाळी हरेक चिजानै, उळजाबाळा पापनै दूर करर बा दोड़ जिमै आपानै दोड़णो ह थ्यावस क सागै दोड़ां।

² आओ ल्यो आपा आपणी आँख्या ईसु प लगावां। जखो बिस्वास को मालिक अर बिनै निधान करबाळो ह। बो आगला सुक क बारां म सोचतो होयो बेजती होबा की चिंत्या कर्या बिना सुळी प दुख भोग्यो अर परमेसर क सिंघासन क दायणै जार बिराजगो।

³ इ ताँई बिपै ध्यान द्‍यो, क्युं क बो पाप्याऊँ अंय्यां का विरोध सेलिआ जिऊँ क थे नइ थको अर नइ हार मानो।

⁴ थानै पाप क सागै थारी राड़ म अत्तोबी अड़बो कोनी पड़्यो क थारो लोय बाहणो पड़ै।

⁵ थे बि हिमत बंधाबाळा बचननै भूल बेठ्या हो, जखो थानै बेटो जाणर दिओ गयो हो: “ओ बेटा, परबु की सीखनै हळकी बात मना जाण, अर बिकी दकालऊँ कदैई निरास मना होजे।

⁶ क्युं क परबु बानैई सुदारै ह जाऊँ बो परेम करै ह, अर बो बानैई सजा देवै ह जानै बो आपको बेटो करर अपणावै ह।”

⁷ थे थारी कल्डाईनै सीख जाणर सेल्यो। क्युं क परमेसर थानै बेटो जाणर थारै सागै बरताव करै ह। बो कूणसो बेटो ह जिनै बिको बाप कोनी सुदारै?

⁸ ज तेरै बंय्यां की दकाल कोनी लागी जंय्यां सगळा क लगाई गई ही जणा तू तेरै बापऊँ पैदा होईड़ी ओलाद कोनी अर नइ तू सची ओलाद ह।

⁹ जदकी आपणा बाप जखा काया म हीं बे आपणै दकाल लगाया करता हा अर आपा बाकी ईज्जत बी कर्या करता हा। जणा पाछै खुदनै बि परम-पिता क हात म सूप देणो चाए जखो आपणी आत्मा को परम-पिता ह जिऊँ आपा जीवता रेह्‍वां।

¹⁰ आपणा बाप तो आपकी समजऊँ क्युंक टेम ताँई जंय्यां बानै सई लागतो हो आपानै दकालता हा, पण परमेसर तो आपणो भलो होबा ताँई आपणै दकाल लगावै ह, जिऊँ आपा बिकी पबितरता का भागी हो सकां।

¹¹ जि टेम का दकाल लगाई जावै ह जणा बा चोखी कोनी लागै पण दुख देबाळी होवै ह। पण क्युंक टेम पाछै बिऊँ जखा पक्का होगा हीं बानै धारमिक्‍ता की स्यांती को फळ देवै ह।

सीख अर चेतावनी

¹² इ ताँई थे थारा ढिला हातानै अर कमजोर गोडानै मजबूत करो।

¹³ अर खुदका पगा ताँई थे सिदो गेलो बणाओ जिऊँ क जखा मिनख लंगड़ा हीं बे आखड़ै नइ पण निरोगा होज्यावीं।

¹⁴ सगळा क सागै मेळमिलाप राखबा अर पबितर होबा ताँई हरेक जंय्यां कोसिस करो क्युं क बिना पबितरता क कदैई कोई परबुनै कोनी देख सकै।

¹⁵ थे ध्यानऊँ रेहज्यो कदै अंय्यां नइ होज्या क थारै मऊँ कोई परमेसर की दयाऊँ चूक ज्यावै। अर ध्यान राखज्यो क थारै मऊँ कोई खारी जड़ नइ निकळै जखी कयानै असुद अर दुख देबा की बजे बाजै।

¹⁶ ध्यान द्‍यो क कोई कुकरमी नइ होवै अर नइ कोई एसाव की जंय्यां बिना परमेसर क होवै, जखो एक टेमकी रोटी खाबा ताँई आपका पेलीपोतको होबा का हकनै बेच दिओ।

¹⁷ अर थे जाणो हो क बो इ आसिरबादनै लेबो चायो पण बो इकै जोगो कोनी गिण्यो गयो। अर रो-रोर बि आसिरबादनै ढुंढबा की कोसिस कर्यो पण हियो बदलबा को मोको कोनी पा सक्यो।

¹⁸ थे तो बी बळता डूँगर क कनै कोनी गया जिकै हात अड़ायो जा सकै हो। अर नइ थे अँधेरा, घोर अँधकार अर भंबुळिया क कनै गया।

¹⁹ बि टेम मिनख नरसिंगा अर सब्दा की उवाजई सुणी, अर जत्ता बी बिनै सुण्या बे अरदास करी क इकै अलावा कोई दुसरा सबद नइ सुणबो पड़ै।

²⁰ क्युं क जखो हुकम बानै दिओ गयो हो बिनै बे झेल कोनी सक्या। क्युं क बानै चेतार ओडायो गयो हो, “ज कोई जिनावर बी बि डूँगर क अड़ ज्यावै जणा बिकै भाठा मार्या जावै।”

²¹ अर बो नजारो अत्तो डरावनो हो क मूसा बी बोल्यो, “मेरै डर क मारै धुजणी छुटरी ह।”

²² पण थे तो सिओन डूँगर, जीवता परमेसर की नगरी, अर ईस्बर नगरी का यरूसलेम कनै आग्या हो। थे तो हझारो-हझारो ईस्बर नगरी दुता की राजी करबाळी बिस्वासी मंडळी कनै आग्या हो,

²³ थे परमेसर का पेलीपोत की बिस्वासी मंडळी कनै आग्या हो जाका ईस्बर नगरी म नाम दरज हीं। थे बि परमेसर क कनै आग्या हो जखो सगळा को न्याय करै ह। अर धरम्या की आत्मा कनै आग्या हो जखा सिद बणग्या हीं,

²⁴ अर नया करार का बिचोलिआ ईसु कनै आग्या हो अर छिड़कबाळा लोय क कनै आग्या हो जखो हाबिल का लोयऊँ बी चोखा बचन बोलै ह।

²⁵ ध्यान राखो, बि बोलबाळानै मना नकारो। ज बे बिनै नकारर कोनी बच पाया, जानै बो धरती पई चेतावनी दि ही, जणा ज आपा बिऊँ मुंडो फेरां, जखो ईस्बर नगरीऊँ चेतावनी देर्यो ह जणा बिऊँ कदैई कोनी बचस्यां।

²⁶ क्युं क बिकी उवाज बि टेम का धरतीनै हला दि ही पण इब बो बादो कर्यो ह क, “म एकर ओज्यु इ ईस्बर नगरी अर धरती दोन्यानै हलास्युं।”

²⁷ आ बात ओज्यु इ बातनै बतावै ह क जखो रच्यो गयो ह मतबल जखी चिजा हालबाळी ह नास होज्यासी। अर बेई चिजा बचसी जखी हालबाळी कोनी।

²⁸ इ ताँई आपानै अंय्यां को राज मिलबाळो ह जिनै हलायो कोनी जा सकै, जणा आओ आपा परमेसर को डर मानर बाको मान करता होया बिनै राजी करबाळी भगती क सागै बिको धनेवाद करां।

²⁹ क्युं क आपणो परमेसर भसम करबाळी आग ह।