इबरानीआ 11 - जीवन को च्यानणो (सेकावाटी नया नियम की पोथ्या)

बिस्वास

¹ बिस्वास, आस करेड़ी चिजा मिलबा को पूरो भरोसो, अर नइ दिखबाळी चिजा को पुक्‍तो सबूत ह।

² अर अंय्यां को बिस्वास करबा की बजेऊँई पुराणा टेम का मिनखा की परमेसर क कानिऊँ बडाई करी गई।

³ बिस्वासऊँई आपा आ जाणा हां क परमेसर का बोल बोलबाऊँ इ सरस्टि की रचना होई। इ ताँई जखो दिखै ह, बो दिखबाळी चिजाऊँ कोनी बण्यो।

⁴ हाबिल क बिस्वास करबा की बजेऊँई बो कैनऊँ चोखो बलिदान परमेसर क चढायो। बिस्वास करबा की बजेऊँई बिकै धरमी होबा की बडाई करी गई अर परमेसर बिका चढावानै मान्यो अर बिकै मरबा क पाछै बी आपा इब ताँई बिऊँ सीखां हां।

⁵ बिस्वासऊँ हनोक उपर उठा लिओ गयो जिऊँ बो मोत कोनी भोगी, अर बिको बेरोई कोनी चाल्यो क बो कठै गयो, क्युं क परमेसर बिनै उठा लिओ अर बिकै उठाया जाबाऊँ पेलीई बिकी बडाई करी क बो परमेसरनै राजी कर्यो हो।

⁶ अर बिस्वास क बिना परमेसरनै राजी करबो अणहोतो ह, क्युं क परमेसर क कनै आबाळानै बिस्वास करबो चाए क बो ह अर परमेसरनै लगनऊँ ढुंढबाळानै बो फळ देवै ह।

⁷ बिस्वास करबा की बजेऊँई नूह बा बातानै जखी बि टेम का कोनी दिखरी ही। बानै परमेसर का डर क सागै चितावनी मानर आपका परवारनै बचाबा ताँई झाज बणायो हो, अंय्यां कर बो जगतनै दोसी गिण्यो अर बि धारमिक्‍ता को पाँतीवाळ होयो जखी बिस्वास करबाऊँ आवै ह।

⁸ बिस्वास करबा की बजेऊँई जद अब्राहमनै बुलायो गयो हो, जणा बो हुकम मानर बि झघा कानि चाल पड़्यो जिको बो वारिस बणबाळो हो। जदकी बो कोनी जाणतो हो क बो कठै जार्यो ह।

⁹ बिस्वास करबा की बजेऊँई जखी जमीन बिनै देबा को करार दिओ गयो हो बिकै उपर बो एक परदेसी की जंय्यां तम्मू बणार रिह्यो। अंय्यांई इसाक अर याकूब बी रिह्या जखा परमेसर का बिई करार का पाँतीवाळ हा।

¹⁰ क्युं क बो बि मजबूत निम हाळी नगरीनै उडिकर्यो हो जिको नक्सो बणाबाळो अर चिणबाळो परमेसर ह।

¹¹ बिस्वास करबा की बजेऊँई टाबर पैदा करबा की उमर बित्या पाछै बी सारा माँ बणी। क्युं क बिऊँ करार करबाळा परमेसरनै बा बिस्वास जोगो मानी।

¹² अर अंय्यांई एक मिनख अब्राहमऊँ जखो मरियलसो हो, आसमान का तारा अर समदर की बाळू की जंय्यां अणमेदा की ओलाद होई।

¹³ अ सगळा बिस्वास क सागैई मर्या। अर आ मिनखानै बे चिजा कोनी मिली जाको बादो कर्यो गयो हो पण अ बानै दूरऊँ देखर राजी होया। अर बे मान लिआ क बे इ जगत म अणजाण अर परदेसी ह।

¹⁴ अर जखा अंय्यां की बाता करीं हीं बे दिखावीं हीं क बे अंय्यां का देस की आस म ह जखो बाको खुदको ह।

¹⁵ ज बे बि देस क बारां म सोचता जठै बे रेह्ता हा, जणा बानै बठै ओटा जाबा को मोको हो।

¹⁶ पण बानै तो चोखा देस की चाह ही जखो ईस्बर नगरी ह, इ ताँई परमेसर बाको परमेसर बाजबाऊँ कोनी सरमावै, अर परमेसर बा ताँई एक नगरी त्यार करमाली ह।

^17-18 बिस्वास करबा की बजेऊँई अब्राहम जद बिचास्यो गयो बि टेम का इसाक की बलि चढाबा की पूरी त्यारी करली ही। जदकी परमेसर बिऊँ बोल्यो हो क, “इसाकऊँई तेरो वंस चालसी।” इकै बावजुद बी अब्राहम, जिऊँ करार कर्यो गयो हो आपका एकलोता बेटा की बलि देबानै त्यार होगो।

¹⁹ क्युं क अब्राहम सोच्यो क परमेसर मरेड़ानै जिंदो कर सकै अर ज इनै दुसरा तरिकाऊँ बोलां जणा बो इसाकनै मोतऊँ पाछो ले लिओ।

²⁰ इसाक बिस्वासऊँई याकूब अर एसावनै बाकी आबाळी जिंदगी को आसिरबाद दिओ।

²¹ बिस्वास करबा की बजेऊँई याकूब मरता टेम युसूफ का छोरानै बारी-बारीऊँ आसिरबाद दिओ अर आपकी लाठी को सारो लेर परमेसर क धोक खाई।

²² बिस्वास करबा की बजेऊँई युसूफ जद मरबाळो हो जणा इजरायलीआ की मिसरऊँ निकळबा की बात करी अर बो आपकी गाडेड़ी हाड्या लेज्याबा क बारां म बानै हुकम दिओ।

²³ बिस्वास करबा की बजेऊँई मूसा का माँ-बाप बिकै जलम क पाछै बिनै तीन म्हेना ताँई लुखार राख्या, क्युं क बे देख्या क बो बोळो सोवणो टाबर ह अर बे राजा का हुकमऊँ बी कोनी डर्या।

²⁴ बिस्वास करबा की बजेऊँई जद मूसा बडो होगो जणा बो फिरोन की छोरी को बेटो खुवाबाऊँ नट दिओ।

²⁵ क्युं क बिनै थोड़ा दिन रेह्बाळा पाप का सुक भोगबाऊँ परमेसर का मिनखा क सागै दुख भोगबो चोखो लाग्यो।

²⁶ बिनै मिसर का धनऊँ बेत्ती मसी ताँई बेजती कराबो घणो किमती लाग्यो, क्युं क बो आगै मिलबाळा इनामनै बेसबरीऊँ उडिकर्यो हो।

²⁷ बिस्वास करबा की बजेऊँई बो राजा की झाळ को डर कोनी मान्यो अर बो मिसरनै छोड दिओ। बो सक्यु सेण करग्यो क्युं क बो अंय्यां को भिवार कर्यो मानो नइ दिखबाळा परमेसरनै देख लिओ हो।

²⁸ बिस्वास करबा की बजेऊँई बो फसै को त्युंहार मनायो अर लोय छिड़कबा का हुकमनै मान्यो, जिऊँ क पेलीपोत का छोरा को नास करबाळो इजरायल का पेलीपोत का छोरा क क्युंई नइ करै।

²⁹ बिस्वास करबा की बजेऊँई इजरायली मिनख लाल समदर प अंय्यां चालर पार करग्या जंय्यां बे सूकी धरती प चालर्या हो। पण जद मिसरी मिनख अंय्यां कर्या जणा डूबगा।

³⁰ बिस्वास करबा की बजेऊँई जद इजरायली मिनख यरियो नगरी की च्यार दिवारी क सात दिन ताँई चकर दिआ, जणा बा ढह्गी।

³¹ बिस्वास करबा की बजेऊँई राहाब नाम की रांड हुकम नइ मानबाळा क सागै कोनी मारी गई, क्युं क बा भेध्या की आवभगत करी ही।

³² इब आगै काँई बताऊँ? गिदोन, बारक, सिमसोन, यिपताह, दाऊद, सेमुएल अर बा परमेसर की खेबाळा क बारां म बताबा ताँई मेरै कनै टेम कोनी।

³³ बे बिस्वास करबा की बजेऊँई राजपाटानै जीत लिआ, बे धरम का काम कर्या अर जोक्यु बी परमेसर बानै देबा को बादो कर्यो हो बो सक्यु बानै मिल्यो। बे नार का मुंडानै बंद कर दिआ,

³⁴ बळती लायनै बुत्ता दिआ अर तलवार की धारऊँ बच निकळ्या। बे कमजोर होबा क पाछै बी सक्‍तिसाली बणग्या अर युद म सक्‍तिसाली होगा अर दुसरा देसा की सेनानै तीनतेरा कर दिआ।

³⁵ बिस्वासऊँई लूगायानै बाका मरेड़ा जिंदा होर ओटा मिलग्या। बोळा मिनखानै सतायो गयो, पण बे छुटबाऊँ नट दिआ जिऊँ क बे चोखा जीवन म ओज्यु जिंदा हो सकै।

³⁶ कया को तमासो बणायो गयो, कया क बेत मारी गई, कयानै बां'दर जेळ म गेर्यो गयो।

³⁷ कयानै भाठाऊँ मारगेर्यो गयो, कयानै आरीऊँ चिर्या गया, कयानै तलवारऊँ मार्यो गयो। बे कंगाली की दसा म, कळेस म, अर दुख भोगता होया अर बकर्या अर लल्ड्या की खाल ओड्या अठिनै-बठिनै लात घूसा खाता हांडता फिर्या;

³⁸ बे उजाड़ म, डूँगरा म, अर गुफा म, धरती प बणेड़ा खाडा खोळा म लुखता फिर्या क्युं क जगत बाकै जोगो कोनी हो।

³⁹ आकै बिस्वास करबा की बजेऊँई आ सगळा की बडाई करी गई, जणाबी आमैऊँ कोईसानै बी बादो करेड़ी चिज कोनी मिली।

⁴⁰ क्युं क परमेसर क कनै बिकी इंछ्या गेल आपणा ताँई इऊँ बी चोखी बाता ह जिऊँ बानै बी आपणा सागैई सिद कर्यो जावै।