गलातियो 4 - जीवन को च्यानणो (सेकावाटी नया नियम की पोथ्या)

¹ म बोलुँ हूँ, जद ताँई वारिस टाबर ह अर बो सगळी चिजा को मालिक बी ह, इकै वावजुद बी बिमै अर गुलाम म कोई फरक कोनी।

² बो आपका बाप का ते करेड़ा टेम ताँई घरका क अर भंडारी की निगरानी म रेह्‍वै ह।

³ अर अंय्यां आपणै सागै बि हो। आपा जद टाबरा हा, जणा आपा जगत की आत्मिक सक्‍तिया का गुलाम हा।

⁴ पण जद ते टेम आयो, जणा परमेसर आपका बेटानै भेज्यो बो लूगाईऊँ जलम्यो। अर बो नेम-कायदानै मान्यो,

⁵ जिऊँ बो बा मिनखानै जखा नेम-कायदा क बस म ह बानै किमत चुकार छुटा ले, अर आपानै गोद लेयड़ा बेटा को हक मिलै।

⁶ जदकी थे तो बिका बेटा हो, अर परमेसर आपका बेटा की पबितर आत्मानै जखी हे अब्बा, हे परम-पिता बोलर हेलो देवै ह, आपणा हिया म भेज्यो ह।

⁷ जणा इब थे दास कोनी हो, पण बिका बेटा हो। जणा थे बि बापोत का करेड़ा वादा का पाँतीवाळ हो।

गलातिया की बिस्वासी मंडळी का मिनखा ताँई पोलुस को परेम

⁸ पेल्या थे परमेसरनै कोनी जाणता हा, थे बाका दास हा जखा सच म परमेसर कोनी हा।

⁹ पण इब थे परमेसरनै पिछाण लिआ हो अर परमेसर थानै पिछाणै ह। जणा इब थे जगत की बाता कानि जामै दमहाळी बात कोनी अर जखी बेफालतू की ह, ओज्यु बाका गुलाम क्यु होबा जार्या हो?

¹⁰ थे खास दिनानै, म्हेनानै, रूतानै अर बरसानै मानो हो!

¹¹ म तो थारै बारां म आ सोचर डरूँ हूँ क, कदै अंय्यां नइ हो क जखी मेनत म थार ताँई करी ही बिपै पाणी फिरज्यावै।

¹² ओ मेरा लाडला बिस्वास्यो, म थारूँ अरदास करूं हूँ क थे मेरै जंय्यां बणो, क्युं क म बी थारी जंय्यां बण्यो हो। थे मेरो क्युंई बुरो कोनी कर्या।

¹³ थानै याद होगो क, जद म पेलीपोत मेरी बिमारी की दसा म थानैई चोखो समचार सुणायो।

¹⁴ अर मेरी आ बिमारी थारी बिचासबा की घड़ी होई, जणा बी थे मनै छोटो कोनी जाण्या अर नइ मेरूँ नफरत करी, पण परमेसर का ईस्बर नगरी दुत अर मसी ईसु की जंय्यां जा'णर मेरी आवभगत करी।

¹⁵ जणा फेर थारी बा धने भावना इब कठै गई? म इ बात को थारो गुवा हूँ, जि टेम का ज मोको पड़तो तो थे थारी आँख्या का'डर मनै दे देता।

¹⁶ जणा के म सच बोलबा की बजेऊँई थारो बेरी होगो?

¹⁷ बिधी-बिधान प चलाबाळा मिनख थार म मो तो राखै ह पण बाकी नीत सई कोनी। बे थानै मेरूँ न्यारो करबो चावीं हीं, जिऊँ थे बी बामै मो घालल्यो।

¹⁸ अर ओ बी चोखो ह क भली बाता म मो राखबो चाए, आ चोखी बात ह, पण इको ओ मतबल कोनी क जद म थारै सागै हूँ जणाई राखो।

¹⁹ ओ मेरा टाबरो, जद ताँई थार म मसी को सुभाव नइ आज्यावै, जद ताँई म जच्चा की सी पिड़ा भोगर्यो हूँ।

²⁰ मेरी तो आ इंछ्या होरी क इब थारै कनै आर ओरई ढंगऊँ बोलुँ, क्युं क थारै बारां म, म कोनी समज पार्यो क काँई कर्यो जावै!

सारा अर हाजिरा

²¹ नेम-कायदानै मानबाळो, थे मनै बताओ, के थे नेम-कायदा की इ बातनै कोनी सुण्या?

²² पबितर सास्तर म मंडेड़ो ह क, “अब्राहम क दो बेटा हा, एक तो बिकै परनायड़ी लूगाईऊँ जखी दासी कोनी ही अर दुसरो बिकी दासीऊँ।

²³ दासीऊँ जलमेड़ो काया को फळ हो, पण बिकी लूगाईऊँ जलमेड़ो परमेसर क करेड़ा करार को फळ हो।”

²⁴ आ बाता का होबा क पिछै निती-कथा ह, अ दोन्यु लूगाया दो करारानै दिखावै ह, एक तो सीनै डूँगर की जिऊँ दासई जलमै ह अर बा ह हाजिरा।

²⁵ हाजिरा मानो अरब देस को सीनै डूँगर ह, अर यरूसलेम की जंय्यां ह क्युं क बो आपका टाबर-टिकरा सेत्युं गुलामी म ह।

²⁶ पण दुसरी लूगाई बिस्वास करबाळा की माँ ह जखी परमेसर की खास नगरीनै दिखावै बो ईस्बर नगरी को यरूसलेम ह जखो गुलामी म कोनी।

²⁷ क्युं क पबितर सास्तर म मंडेड़ो ह क, “हे बांझड़ी तू राजी हो, क्युं क तू टाबर कोनी जणी। अर तनै टाबर जलम्बा की पिड़ा कोनी होई, तू जे-जैकार कर। क्युं क सुहागण लूगायो बेत्ती, टाबर-टिकर छोडेड़ी लूगाई क ह।”

²⁸ ओ मेरा लाडला बिस्वास्यो, आपा बी अब्राहम का बेटा इसाक की जंय्यां करेड़ा करार का टाबर हां। जखो परमेसर क करार गेल जलम्यो हो।

²⁹ पण जंय्यां बि टेम म काया म जलमेड़ो पबितर आत्मा गेल जलमेड़ानै सतातो हो बंय्यांई इब बी होवै ह।

³⁰ पण पबितर सास्तर म मंडर्यो ह, “दासी अर बिका बेटानै काड दे, क्युं क दासी को बेटो ब्याईड़ी लूगाई का बेटा क सागै बापोत को अधिकारी कोनी होवै।”

³¹ इ ताँई ओ मेरा बिस्वासी भाईड़ो, आपा दासी का कोनी पण परनायड़ी लूगाई का टाबर हां जखी दासी कोनी ही।