कलुसीयो 4 - जीवन को च्यानणो (सेकावाटी नया नियम की पोथ्या)

¹ मालको, याद राखो थारै उपर बी ईस्बर नगरी म एक मालिक ह, इ ताँई थारा गुलामाऊँ थारो बरताव सळीयो अर बाजीब होणो चाए।

बिस्वास्यानै पोलुस की राय

² ध्यानऊँ अरदास करबा म लाग्या रह्यो अर परमेसरनै धनेवाद देता रेह्ओ।

³ अर सागै की सागै म्हारै ताँई बी अरदास करो क परमेसर म्हानै मसी का भेदा को परचार करबा को मोको देवै। क्युं क परचार करबा क चलतई म जेळ म हूँ,

⁴ अर अरदास करो क म आनै साप-साप बोल सकूँ जंय्यां मनै बोलबो चाए।

⁵ अबिस्वास्या क सागै थारो बरताव सलिका को राखो अर हरेक मोका को चोखो फाईदो उठाओ।

⁶ थारो बोल मिठो अर मननै चोखो लागबाळो होणो चाए जिऊँ थे जाणल्यो की कूणसा आदमीनै कंय्यां को जुबाब देणो चाए।

चिठी की आखरी बाता

^7-8 म्हारो लाडलो बिस्वासी भाईड़ो तुखीकुस जखो एक बिस्वास जोगो काम करबाळो अर परबु म म्हारो साती-संगी दास ह, बो थानै मेरा सगळा समचार दे देसी बिनै म थारै कनै भेजूँ हूँ जिऊँ म्हारा हालचाल थानै बेरो पड़ज्या अर बो थारी हिमत बंधासी।

⁹ लाडलो अर बिस्वास जोगो बिस्वासी भाईड़ो जखो थारमालोई ह बि उनेसिमुसनै बी बिकै सागै भेजर्यो हूँ, बे थानै अठै जखी बाता बितरी ह बाकै बारां म बतासी।

¹⁰ मेरै सागै केद खाना म बंद अरिस्तखुस कानिऊँ थानै “जे मसी की” पुगै अर बरनाबास को भाई मरकुस बी थानै “जे मसी की बोल्यो ह” (मरकुस क बारां म थानै पेल्याऊँई आदेस मिलगो हो क जद मरकुस थारै कनै आवै जणा बिकी चोखी आवभगत करज्यो)

¹¹ यसु जिनै यूसतुस बी बोलै ह, बिकी बी थानै “जे मसी की” पुगै। परमेसर का राज ताँई अ तीन सुन्नत होयड़ा यहूदि बिस्वासी ह जखा मेरै सागै काम करै ह अर अ मेरो बोळो साथ दिआ हीं।

¹² थारै मालोई एक ओर ह जिको नाम इफरास ह अर मसी ईसु को दास ह बिकी बी थानै “जे मसी की” पुगै। ओ सदाई थारै ताँई जी ज्यानऊँ अरदास करै ह जिऊँ थे परमेसर की सगळी इंछ्या म समजदारी अर पूरा भरोसा क सागै खड़्या रेह सको।

¹³ थारै ताँई अर लोदिकीया अर हिरापुलिस नगर्या का मिनखा ताँई बो बोळी कड़ी मेनत करै ह इ बात की म खुद गुवाई दे सकूँ हूँ।

¹⁴ आपणो लाडलो बेद लूका अर देमास कानिऊँ थानै “जे मसी की” पुगै।

¹⁵ लोदिकीया म रेह्बाळा भाई बंदानै, नुमफास अर बिकै घरा भेळी होबाळी बिस्वासी मंडळीनै म्हारी “जे मसी की” पुगै।

¹⁶ आ चिठी थारै बाच्या पाछै लोदिकीया की बिस्वासी मंडळी म बी बाची जावै अर जखी चिठी लोदिकीया म रेह्बाळा मसी का बिस्वासी लेर आसी बिनै थे बी बाचज्यो।

¹⁷ अर परबु की सेवा ताँई जखा काम दियड़ा हीं बानै ढंगऊँ करबा ताँई अरखिप्पुसनै बोलजे।

¹⁸ अर म पोलुस खुदका हाताऊँ थानै “जे मसी की” मांडर्यो हूँ। म साकळा म बंदर्यो हूँ इ बातनै थे याद राखज्यो। परमेसर की दया थारै सागै बणी रेह। “अंय्यांई होज्यावै!”