कलुसीयो 1 - जीवन को च्यानणो (सेकावाटी नया नियम की पोथ्या)

राजी-खुसी का समचार

^1-2 म परमेसर की इंछ्या गेल मसी ईसुऊँ भेजेड़ो चेलो पोलुस अर आपणो बिस्वासी भाईड़ो तिमूतियूस आ चिठी कलुसीया नगरी म रेह्बाळा मसी प बिस्वास करबाळा बिस्वास जोगा परमेसर का मिनखानै मांडर्या हां। था सगळा प आपणा परम-पिता परमेसर की दया अर स्यांती होती रेह।

धनेवाद की अरदास

³ म्हें जद बी अरदास करां हां, जणा सदाई आपणा परबु ईसु मसी का परम-पिता परमेसरनै थारै ताँई धनेवाद देवां हां,

⁴ क्युं क थे मसी ईसु प बिस्वास अर सगळा परमेसर का मिनखाऊँ प्यार-परेम राखो हो, आ बाता क बारां म म्हें सुण्या हां।

⁵ अंय्यां बि आस करेड़ी चिज की बजेऊँ होयो ह जखी थारै ताँई ईस्बर नगरी म धरेड़ी ह। अर जिकै बारां म थे पेल्याऊँई चोखा समचार जखो सचो ह बिमै सुण लिआ हो।

⁶ चोखो समचार सगळा जगत म फळर्यो-फुलर्यो अर फेलर्यो बी ह। बंय्यांई जद थे परमेसर की दया क बारां म सुण्या अर सचमई बिनै समज्या हा जदऊँ लेर थारै म बी चोखो समचार फळर्यो-फुलर्यो अर फेलर्यो बी ह।

⁷ आपणो लाडलो भाई इफरास, जखो आपणै ताँई मसी को संगी बिस्वास जोगो दास ह बिऊँ थानै परमेसर की दया की सीख मिली ही।

⁸ पबितर आत्मा थानै परेम करबाळो हियो दिओ ह बिकै बारां म बो म्हानै बतायो ह।

⁹ इ बजेऊँ जनाड़ैऊँ म्हें थारै बारां म सुण्यो हो थारै ताँई अरदास करबो कोनी छोड्यो। म्हें अरदास करां हां क परमेसर थानै बिकी इंछ्या का गेरा ज्ञान अर बि सगळी बुदी अर समजऊँ भरै जखी आत्मिक ह।

¹⁰ जिऊँ थे परबु जंय्यां चावै ह बंय्यां जी सको अर हर बाता म सदाई परबु मसीनै राजी राख सको। थारै जीवन म भला कामा का फळ लागै अर थे परमेसर का ज्ञान म दिन-दिन बढता रह्यो।

¹¹ बो थानै आपकी मेमाभरी सक्‍तिऊँ मजबूत बणावै ह जिऊँ थे थ्यावस राख'र सक्यु सेह सको। अर राजी-खुसीऊँ

¹² परम-पितानै धनेवाद देता रह्यो, बो थानै इ जोगो बणायो ह क उजाळा का राज म जोक्यु परमेसर आपका मिनखा ताँई धर राख्यो ह बिमै थारी पाँती होवै।

¹³ परमेसर आपणानै अँधकार की सक्‍तिऊँ छुटार आपका लाडला बेटा क राज म बाड़्यो ह।

¹⁴ बिका बेटा की बजेऊँ आपणानै छुटकारो मिल्यो ह मतबल आपणा पाप की माफी।

मसी को सुभाव अर काम

¹⁵ दिखबाळो ईसु मसी नइ दिखबाळा परमेसर की जंय्यां ह। बो सगळी चिजा म पेलो अर सगळी सरस्टिऊँ बोळो म्हान ह।

¹⁶ बिऊँई परमेसर सगळी चिजा बणायो चाए बे ईस्बर नगरी अर धरती की, दिखबाळी हो अर नइ दिखबाळी उपरी सक्‍तियानै मिलार, चाए राजा हो चाए म्हराजा, चाए राजकरबाळो हो चाए कोई अधिकारी सक्यु बिऊँई रचायो गयो ह अर बि ताँई रचायो गयो ह।

¹⁷ सगळाऊँ पेल्या परमेसर क सागै मसी हो अर मसी की सक्‍तिऊँई सगळी चिजा बणी रेह्‍वै ह।

¹⁸ इ काया रूपी बिस्वासी मंडळी को सीर अर जीवन की सरूआत बोई ह। अर मरेड़ा मऊँ जी उठबाळा म पेलीपोत को बोई ह, इ बजेऊँ सगळी बाता म पेली झघा बिनैई मिलै।

¹⁹ क्युं क परमेसर की खुसी आ ही क बिका सगळा का सगळा गुण बिमै बास करै।

²⁰ अर बिऊँई परमेसर सगळा ब्रह्माण्डऊँ मेळमिलाप करबो चायो, बा सगळाऊँ बी जखा ईस्बर नगरी अर धरती का ह। बिकाळा लोयऊँई परमेसर मेळमिलाप करवायो जिनै मसी सुळी उपर बहायो हो।

²¹ बो बी एक टेम हो जद थे थारा बुरा बिचार अर बुरा कामा की बजेऊँ परमेसरऊँ आंतरै हा अर बिका बेरी हा।

²² पण इब, हाड-मास की काया म बिकी मोतऊँ परमेसर थारूँ बी मेळमिलाप कर लिओ। जिऊँ थानै पबितर, बिना कळंक अर निरदोस बणार आपकै सामै लेर आवै।

²³ ओ जणाई हो सकै ह जद थे बिस्वास म एक झघा अर अटल बण्या रह्यो अर जि चोखा समचारनै थे सुण्या हो बिऊँ मिलेड़ी बि आसनै मना तजो। ओ बोई चोखो समचार ह जिको म पोलुस गुलाम बण्यो हूँ अर इकी इ जगत का सगळा मिनखानै सीख दिनी गई ह।

बिस्वासी मंडळी ताँई पोलुस का काम

²⁴ मसी की सेवा करतो होयो म थारै ताँई दुख उठाबानै राजी हूँ, अर म मसी की काया मतबल बिस्वास्या की बिस्वासी मंडळी ताँई मसी का सेवका की पिड़ानै भोगर्यो हूँ।

²⁵ थारै भला ताँई परमेसर मनै जखो हुकम दिओ हो, बि बजेऊँई म बिस्वास्या की बिस्वासी मंडळी को दास बणायो गयो हूँ। जिऊँ म परमेसर का चोखा समचार को भरपुरीऊँ हेलो पाड़ूँ।

²⁶ ओ चोखो समचार भेद भर्यो सच ह जखो जुगादऊँई सगळी पिड्या की आँख्याऊँ ओला म हो। पण इब परमेसर का मिनखा प इनै परमेसर कानिऊँ परगट कर दिओ गयो ह।

²⁷ परमेसर आपका टाळेड़ा मिनखा प बि भेदभर्या सतनै परगट कर्यो जिकी बो मनस्या बणा राखी ही ओ सत बोळो मेमाभर्यो ह, अर ओ सगळा ताँई ह। ओ भेद भर्यो सत ओ ह क, मसी गैर-यहूदि मिनखा म बी रेह्‍वै ह जखो मेमा की आस ह।

²⁸ म्हें मसी को परचार कर हरेक मिनखानै चितावां अर सगळा ज्ञानऊँ बानै सीखावां, जिऊँ हरेक मिनखनै मसी म सिद कर परमेसर क सामनै हाजिर कर सकां।

²⁹ इ ताँई तो म, मेर म दम क सागै काम करबाळी बिकी सक्‍तिऊँ कड़ी मेनत करर्यो हूँ।