भेजेड़ा चेला का काम 6 - जीवन को च्यानणो (सेकावाटी नया नियम की पोथ्या)

सात मदद करबाळानै टाळबो

¹ बा दिना म जद परमेसरनै मानबाळा बिस्वास्या की गिणती बढरी ही, जणा यूनानी रिती-रिवाजानै मानबाळा यहूदि इबरानी रिती-रिवाजानै मानबाळा यहूदिआ प बड़बड़ाबा लाग्या क म्हारी खाली होईड़ीया क सागै रोजकी बरतबाळी चिजा बाटबा म दोगलचारो होर्यो ह।

² जणा बे बारा भेजेड़ा चेला सगळा बिस्वास्यानै एक सागै बुलार बोल्या, “म्हारै ताँई ओ चोखो कोनी क म्हें परमेसर का बचन को परचार छोडर थारै ताँई खाबा-पीबा की चिजा को बाटो करां।

³ इ ताँई यहूदि भाई-भाणो, थारै मऊँ थे सात चोखी पेठहाळा मिनखानै टाळल्यो जखा म पबितर आत्मा अर बुदी होवै अर बानै इ काम की जिमेदारी आपा दे देस्यां।

⁴ अर म्हें म्हारो सगळो टेम अरदास करबा अर बचन को परचार करबा अर सीखाबा म लगास्यां।”

⁵ भेजेड़ा चेला की आ बात सगळी बिस्वासी मंडळीनै चोखी लागी। जणा बे सतफनुस नाम का एक मिनखनै जखो बिस्वास अर पबितर आत्माऊँ भरेड़ो हो, अर फिलीप, परखोरस, निकानोर, तिमोन, परमिनास अर अंताकीया को रेह्बाळो निकोलस जखो यहूदि धरम पंथ म रळगो हो, आनै टाळ लिआ।

⁶ अर आनै भेजेड़ा चेला क सामै लेज्यार खड़्या कर दिआ जणा बे बापै हात धर'र अरदास कर दिनी।

⁷ अंय्यां यरूसलेम म परमेसर को बचन दिन-दिन फेलतो गयो। अर परमेसरनै मानबाळा की गिणती दिन-दिन बढती गई, अर घणकराक याजक बी ईसु प बिस्वास करबा लाग्या।

सतफनुस को पकड़्यो जाबो

⁸ सतफनुस परमेसर की दया अर बिकाळी ताकतऊँ भरेड़ो हो अर मिनखा म बडा-बडा चमत्कार अर अचरजभर्या काम कर्या करतो हो।

⁹ पण अजाद बिस्वासी मंडळी नाम की एक यहूदि अरदास करबाळी झघा का क्युंक यहूदि मिनख जखा कुरेन, सिकन्दरिआ, कलिकीया नगर्याऊँ अर एसिया परदेसऊँ आएड़ा हा, बे बिकै सागै जिरै करबा लाग्या।

¹⁰ पण सतफनुसनै जखी पबितर आत्मा दियड़ी ही अर जि बुदीऊँ बो बाता कर्या करतो जणा बे बिकै सामै कोनी टिक सक्या।

¹¹ जणा बे क्युंक मिनखानै बिकै खिलाप भड़कार खुवायो क, “म्हें इनै मूसा अर परमेसर की बुराई करता सुण्या हा।”

¹² अंय्यां कर बे यहूदि मिनखा, यहूदि नेता अर सास्तरानै सीखाबाळा का कान भर दिआ जिऊँ बे भड़कग्या अर चिड़गा अर बिनै पकड़र यहूदि पंचायत म लेग्या।

¹³ अर बे झूठी गुवाई देर बोल्या क, “ओ मिनख सदाई पबितर मनदर अर मूसा का नेम-कायदा क खिलाप बोलै ह।

¹⁴ म्हें इनै आ खेता सुण्या हा क नासरत को ईसु इ मनदरनै ढाह देसी अर मूसा का दियड़ा रिती-रिवाजानै बदल देसी।”

¹⁵ जणा पंचायत म बेठ्या सगळा मिनख आपकी आँख्या बिका मुंडा प गाड दिनी अर बानै बिको मुंडो ईस्बर नगरी दुत की जंय्यां दिख्यो।