भेजेड़ा चेला का काम 4 - जीवन को च्यानणो (सेकावाटी नया नियम की पोथ्या)

पतरस अर यहून्ना म्हापंचायत क सामै

¹ जद पतरस अर यहून्ना मिनखानै बतार्या हा जणाई याजक, मनदर का सिपाईड़ा को सरदार अर क्युंक सदुकी बठै आया

² अर बे आ दो चेलाऊँ आखता होगा, क्युं क बे बठै मिनखानै आ सीख देर्या हा क ईसु मर के ओज्यु जिंदो होगो अर ओ इ बात को सबूत ह की मरेड़ा ओज्यु जिज्यासी।

³ जणा बे बानै पकड़र आगला दिन ताँई काळ-कोठड़ी म गेर दिओ क्युं क दिन आथगो हो।

⁴ पण जत्ता बाकी सुण्या हा बामै बोळाजणा बिस्वास कर्यो जिऊँ बाकी गिणती बढर करीब पाच झार होगी।

⁵ आगला दिन यहूदि नेता, बडका अर नेम-कायदानै सीखाबाळा यरूसलेम म भेळा होया

⁶ अर बे याजका म सऊँ परधान म्हायाजक हन्ना, केफा, यहून्ना, सिकन्दर अर परधान याजका का परवार का घणकराक मिनखाऊँ मिल्या।

⁷ अर बा भेजेड़ा चेलानै आकै सामै हाजिर कर बाऊँ बुजबा लाग्या, “थे ओ काम किका नाम अर किकी सक्‍तिऊँ कर्यो।”

⁸ जणा पतरस पबितर आत्माऊँ भर'र जुबाब देबा लाग्यो, “ओ यहूदि नेता अर बडको

⁹ ज आ थे इ लंगड़ा मिनख क सागै होई भलाई क बारां म पुछाताछी करर्या हो क बो कंय्यां निरोगो होयो।

¹⁰ जणा थानै अर इजरायल का सगळा रेह्बाळानै ओ बेरो होज्याणो चाए, क ओ मिनख जखो थारी आँख्या क आगै चोखो-भलो निरोगो खड़्यो ह ओ ईसु मसी नासरी का नामऊँ निरोगो होयो ह। ओ बोई ईसु ह जिनै थे सुळी प चढायो हो अर जिनै परमेसर मर्या पाछै ओज्यु जीवायो हो।

¹¹ ओ बोई ईसु ह जिकै बारां म सास्तरा म मंडर्यो ह की, ‘ओ बो भाठो ह, जिनै मिस्तरी ख्याई जोगो कोनी जाण्यो, पण बोई कूणा को भाठो होयो।’”

¹² “ईसु क सिवाय आपानै पापऊँ कोईबी कोनी बचा सकै। अर इ धरती प अंय्यां को दुसरो नाम आथई कोनी जखो मिनखानै बचा सकै। क्युं क परमेसर मिनखानै बचाबा ताँई ईसुनैई भेज्यो ह, अर बोई आपानै बचा सकै ह।”

¹³ जद पंचानै ओ बेरो पड़्यो क पतरस अर यहून्ना दोन्यु कम पढ्या-लिख्या आम आदमी हीं जणा बे बाकी हिमत देखर ताजूब म पड़गा। अर पाछै बानै बेरो पड़्यो क अ दोन्यु ईसु क सागै रेह्ता हा।

¹⁴ पतरस अर यहून्ना क आगै बाकी पावली कोनी चाली क्युं क जखो निरोगो होयो हो बो मिनख बठैई खड़्यो हो।

¹⁵ जणा बे बानै पंचायतऊँ बारनै भेज दिआ अर आपसरी म बतळाबा लाग्या क,

¹⁶ “आपा आकै सागै काँई कर सकां हां। क्युं क यरूसलेम का सगळा जणा जाणै ह क आकै हाता नइ होबाळो चमत्कार होयो ह अर बिनै आपा अनदेख्यो कोनी कर सकां।

¹⁷ पण आ बात ओर नइ फेलै इ ताँई आपा आनै धमकार छोड देवां क बे आईंदा ईसु क नाम की चरचा कोईसई नइ करीं।”

¹⁸ जणा बे बानै मांयनै बुलार आदेस दिआ, “ईसु का नामऊँ नइ तो कोईनै क्युं बतळाज्यो अर नइ बिका नामऊँ सीखाज्यो।”

¹⁹ पण पतरस अर यहून्ना बानै जुबाब दिओ, “इ बात को थेई न्याय करो क परमेसर की नजर्या म काँई चोखो रेह्सी थारी बात मानबो नहिस परमेसर की?

²⁰ क्युं क आ तो होय कोनी सकै क जोक्यु म्हें देख्यो अर सुण्यो ह बिनै कोनी खेवां।”

²¹ जणा पंच बानै सूल चेतार छोड दिआ, अर बानै सजा देबा को गेलो कोनी लाध्यो, क्युं क जोक्यु होयो हो बिकी बजेऊँ लोग परमेसर को गुणगान गार्या हा।

²² अर जि मिनख प ओ निरोगो होबा को चमत्कार होयो हो बो चाळिस क पार हो।

बिस्वास्या की अरदास

²³ बठैऊँ छुट-छुटार पतरस अर यहून्ना सिदा आपकी टोळी म जार बानै बे बाता बताई जखी परधान याजक अर यहूदि नेता बानै बोल्या हा।

²⁴ आ सुणताई बे सगळा बिस्वासी एक सागै एक चित होर परमेसरऊँ अरदास करबा लागगा क, “ओ मालिक तूई अकास अर धरती, समदर अर जोक्यु आमै ह बानै बणायो ह।

²⁵ अर थे थारी पबितर आत्माऊँ म्हारा कूणबा का बडका अर थारा दास दाऊद क मुंडा बुलवायो हो, ‘अ जखा परमेसरनै नइ ध्यारबाळा हीं बे क्याले झाळ्या भर्या? अर क्याले मिनख बेकार की बाता घड़ीं हीं?

²⁶ धरती का राजा अर राज करबाळा आपसरी म एको कर परबु परमेसर अर बिका अभिसेक करेड़ा मसी क सामै होगा।’

²⁷ सचमई थारा अभिसेक करेड़ा पबितर दास ईसु क खिलाप हेरोद अर पिन्तुस को पीळातुस इ नगरी क मांय इजरायल का मिनखा अर गैर-यहूदिआ क सागै कांदाऊँ कांदो मिलार खड़्या होगा।

²⁸ जोक्यु तू तेरी सक्‍ति अर इंछ्याऊँ पेलीई ते कर राख्यो हो, बिनैई बे पूरो कर्या।

²⁹ इब परबु जी थे गोर धरो अर थारा दासानै हिमत क सागै थारा बचनानै सुणाबा की सक्‍ति द्‍यो।

³⁰ थारा पबितर दास ईसु का नामऊँ मिनखानै निरोगा करबा ताँई, नइ होबाळा काम अर चमत्कार करबा ताँई थारा हात बढाओ।”

³¹ बाकै अरदास करताई बा झघा जठै बे भेळा होर्या हा हालबा लागगी अर बे सगळा पबितर आत्माऊँ भरगा अर हिमत क सागै परमेसर का बचनानै बोलबा लागगा।

एक हियो राखबाळी बिस्वासी मंडळी

³² बिस्वास्या की टोळी एक हिया अर एक बिचार की ही जोक्यु बाकन होतो बे बिनै आपसरी म बाट लेता हा, अर कोईबी तेरी मेरी कोनी करतो।

³³ भेजेड़ा चेला हिमतऊँ ईसु क ओज्यु जी उठबा की गुवाई देता रिह्या, अर बा सगळा प परमेसर की बोळी दया अर आसिरबाद हो।

³⁴ बाकी टोळी म कोईबी गरीब कोनी हो क्युं क जिकै कनै जमीन अर घर हा बे बानै बेचर बिकेड़ी चिजा का दाम ल्यार

³⁵ भेजेड़ा चेला क हाता म देता हा। अर बे बा दामानै जिकी जंय्यां जुर्त होती बामै बंय्यांई बाट देता हा।

³⁶ जणा बामै युसूफ नाम को लेवी हो जखो साईपरस को रेह्बाळो हो। जिनै भेजेड़ा चेला बरनाबास खेता हा, जिको मतबल हिमत देबाळो होवै ह।

³⁷ बिकन जमीन को एक टुकड़ो हो जिनै बो बेचर बिका दाम भेजेड़ा चेला क हाता म ल्यार दे दिआ।