भेजेड़ा चेला का काम 3 - जीवन को च्यानणो (सेकावाटी नया नियम की पोथ्या)

लंगड़ा मंगता को निरोगो होबो

¹ पतरस अर यहून्ना दोपारा क तीन बजै मनदर म अरदास करबा ताँई जार्या हा।

² अर बठै क्युंक मिनख एक जलम का लंगड़ा मिनखनै रोजकी ल्यार मनदर क बारना म बिठा देता। अर बि बारनानै बठै का मिनख “सोवणो बारनो” खेता हा जठै बो मनदर म जाबाळाऊँ भीक माँगतो हो।

³ बो जद पतरस अर यहून्नानै मनदर क मांयनै जाता देख्यो। जणा बो बाऊँ क्युं मिलबा की आस म बाकै सामै हात फिलाया।

⁴ जणा पतरस यहून्ना क सागै बिपै गोर धर्यो अर बिऊँ बोल्यो, “म्हारै कानि देख।”

⁵ जणा बो बाऊँ क्युं मिलबा की आस म बाकै कानि आँख्या गाड दिनी।

⁶ जणा पतरस बिऊँ बोल्यो, “पिसो-टक्को तो मेर कनै आथ कोनी। पण जोक्यु मेर कनै ह बो म तनै जरूर देस्युँ ईसु मसी नासरी का नामऊँ खड़्यो हो अर डोला फिरी कर।”

⁷ जणा बो बिको दाइणो बावळ्यो पकड़र बिनै खड़्यो कर्यो अर अंय्यां करताई बिका टकणा अर टांगड़ा म सत आग्यो।

⁸ जिऊँ बो उछळर आपका पगा प खड़्यो होगो अर बाकै च्यारूमेर डोलबा-फिरबा लाग्यो। जणा पाछै बो नाचतो कुदतो अर परमेसर को गुणगान गातो बाकै सागै मनदर म गयो।

⁹ अर बठै का सगळा मिनख बिनै डोलता-फिरता अर परमेसर को गुणगान गाता देखर

¹⁰ पिछाण्गा क ओ तो बोई ह जखो मनदर का सोवणा बारना म बेठ्यो-बेठ्यो भीक माँग्या करतो हो। बिकै सागै जोक्यु होयो बिनै देखर बे सगळा ताजूब म पड़गा।

मनदर म पतरस को परचार

¹¹ अर बो पतरस अर यहून्ना को हात पकड़्या बाकै सागै हो, जणा लोग ताजूब कर बाकन भागर आया अर बि दरूजा क कनै भेळा होगा जिनै सुलेमान को दरूजो बोल्या करता हा।

¹² आ देखर पतरस बा मिनखाऊँ बोल्यो, “अरै इजरायल का रेह्बाळो थे सगळा क्याले ताजूब करो हो। अर म्हानै अंय्यां आँख्या पा'ड़र क्याले देखर्या हो जंय्यां म्हेई इनै म्हारी सक्‍ति अर भगतीऊँ निरोगो कर्या होवां?

¹³ अब्राहम, इसाक अर याकूब को परमेसर आपणा बाप-दादा को परमेसर अंय्यां कर आपका दास ईसु की मेमा करी ह। जिनै थे अधिकार्यानै पकड़ा दिआ अर जद पीळातुस बिनै छोडबो चातो हो, पण थे बिनै तज दिओ।

¹⁴ बो पबितर अर धरमी हो। पण थे बिनै तज दिआ, अर एक हत्यारानै छोडबा की पीळातुसऊँ दरखास्त करी।

¹⁵ अर बि जिंदगी देबाळानै मार गेर्यो पण परमेसर बिनै मोतऊँ जिंदो कर दिओ, अर इ बात का म्हें गुवा हा।

¹⁶ अर ईसु हाळा नाम प बिस्वास करबाऊँई, ईसु इ मिनख म सत गेर्यो अर बो समुळो निरोगो होगो, जिनै थे सगळा जाणो अर देखो हो।

¹⁷ अर यहूदि भाई-भाणो, म जाणू हूँ क थे अर थारा यहूदि नेता जोक्यु बी कर्या बो अणभोळ म कर्या हा।

¹⁸ पण इ बातनै परमेसर बोळी पेल्याई परमेसर की खेबाळा क मुंडाऊँ खुवा दिओ हो, क मसी पिड़ा भोगसी जणा परमेसर बानै अंय्यांई पूरी कर्यो।

¹⁹ इ ताँई थे थारा पापऊँ तौबा करो अर हियानै ईस्बर कानि लगाओ जिऊँ परमेसर थारा पाप धो देसी।

²⁰ जद थे अंय्यां करस्यो जणा परबु क होतासोता स्यांती को टेम आज्यासी अर परमेसर मसी ईसुनै भेजसी जिनै बो थारै ताँई टाळ राख्यो ह।

²¹ मसी बि दिन ताँई ईस्बर नगरी म रेह्सी जद ताँई बे सगळी बाता पेली जंय्यां कोनी होज्यावै। जानै परमेसर आपकी खेबाळा पबितर मिनखा क मुंडाऊँ बोळी पेल्याई खुवायो ह।

²² जंय्यां मूसा आपणा बडकाऊँ बोल्यो हो, ‘परबु परमेसर थारै ताँई जंय्यां मनै भेज्यो बंय्यांई एक परमेसर की खेबाळो भेजसी। जखो थारा मालोई होसी। अर बो जोक्यु थानै बोलै थे बा सगळी बातानै मानज्यो।

²³ अर जखो बी बिकी कोनी सुणसीक, बिनै परमेसर का मिनखा मऊँ नाकै कर नास कर दिओ ज्यासी।’

²⁴ अर सेमुएल अर बिकै पाछै आएड़ा सगळा परमेसर की खेबाळा आ दिना क बारां मई बताया हा।

²⁵ अर थेई बा करार का वारिस हो जानै परमेसर आपका खेबाळा क जरिए कर्यो हो। ओ करार थारै ताँई ह जिनै परमेसर थारा बडकाऊँ कर्यो हो जंय्यां बो अब्राहमऊँ करार कर्यो हो क तेरी ओलादऊँ सगळी धरतीनै आसिरबाद मिलसी।

²⁶ अर परमेसर आपका दास ईसुनै टाळर बिनै सऊँ पेली थारै कनै भेज्यो। जिऊँ बो थानै थारा कुगेलाऊँ न्यारो कर आसिरबाद दे सकै।”