भेजेड़ा चेला का काम 27 - जीवन को च्यानणो (सेकावाटी नया नियम की पोथ्या)

पोलुसनै रोम भेजबो

¹ जद म्हारो पाणी क गेला इटली जाबो ते होगो हो, जणा बे पोलुस अर दुसरा केद्‍यानै रोम की सेना, “जिनै रोम का राजा की सेना खेता हा।” बिका सुबेदारा मऊँ एक सुबेदार युलियुस क हाता म सूप दिआ।

² म्हें अदरमुतियुमऊँ आबाळा एक पाणी हाळा झाज प चढर चाल पड़्या, जखो एसिया का समदरी भागाऊँ होतो होयो जाबाळो हो। अर एक थिसलूनिकी को रेह्बाळो एक मकीदुनी, जिको नाम अरिस्तखुस हो बो म्हारै सागै हो।

³ आगला दिन म्हें सैदा पुग्या। युलियुस पोलुस प दया दिखाई अर बिनै बिकै भाईला क कनै जार बाऊँ मिलबा की, अर जोक्यु बे बिनै दिं बा लेबा की छुट दे दि।

⁴ भाळ सामै की ही, इ बजेऊँ बठैऊँ बे साईपरस का टापू की ओट म चाल पड़्या।

⁵ म्हें कलिकीया अर पंफुलिया का गेला होताहोया लूसिया परदेस का मुरा कसबा म पुग्या।

⁶ बठै सुबेदारनै सिकन्दरिआ नगरी को एक झाज लाध्यो जखो इटली जार्यो हो। जणा बो म्हानै बिपै चढा दिआ।

⁷ म्हें बोळा दिना ताँई सफर कर बोळी मुसकीलाऊँ आखीर क कनिदुस नगरी क सांकड़ै पुग्या। अर भाळ म्हानै आगै कोनी चालबा देरी ही, जणा म्हें सलमोन क सामैऊँ होताहोया करेती का टापू की ओट म चाल्या।

⁸ अर म्हें किनारै-किनारै चालर बोळी मुसकीलऊँ एक झघा पुग्या जिको नाम “म्हेफुज बंदरगा” हो, अर लसाय नगरी बिकै सारैई पड़ै ही।

⁹ बठै म्हें बोळा दिन बिता दिआ जि बजेऊँ आगै चालबो खतरनाक होगो हो, अर बरत करबाळो त्युंहार बी बितगो हो। जणा पोलुस बानै राय दिनी,

¹⁰ “भला मिनखो, म देखूँ हूँ की अठैऊँ आपणो सफर खतरनाक होसी। अर इमै आपणा झाज अर माळ किई नइ पण पिराणा की हानी होबाळी ह।”

¹¹ पण सुबेदार पोलुस की बाता की परवा कर्या बिना झाज का मालिक अर कपतान की बात मानी।

¹² ओ बंदरगा स्याळा ताँई चोखो कोनी हो इ ताँई घणकराक ओई बिचार कर्यो क हो सकै तो कंय्यां जंय्यां फिनिक्स पुगर स्याळा-स्याळा बठैई रेह्‍वां। ओ करेती को अंय्यां को बंदरगा हो जिको मुंडो दिखणाद-पाछुणै अर उतराद-पाछुणै म खुलतो हो।

समदर म तौफान

¹³ अर जद दिखणादि भाळ होळ्या-होळ्या चालबा लागी। जणा बे सोच्या जंय्यां बे चावा हा बंय्यांई होर्यो ह। जणा बे लंगर उठार करेती का किनारै-किनारै झाजनै आगै बढाबा लाग्या।

¹⁴ पण क्युं क बारामई एक जोरकी भाळ आई जिनै उतरादी-अगुणी भाळ बोलै ह अर बा टापू कानिऊँ भेरी ही।

¹⁵ अर जद भाळ झाज क टकर मारी जणा बो भाळ की बजेऊँ आगै कोनी सरकर्यो हो। जणा म्हें बिनै बंय्यांई छोडर जठिनै भाळ भेवै ही बठिनैई बिनै जाबा दिओ।

¹⁶ अर कलोदा का छोटासाक टापू का दिखणाद हाळा हिस्सानै पार करती टेम म्हानै क्युंक ओट मिली, जिऊँ म्हें बचाव न्यावनै समाळर राख सकां।

¹⁷ इकै पाछै बे बिनै झाज क मांयनै लिआया, अर इ डरऊँ क कदै बो सूरतिस का गदळा पाणी की रेत म नइ फस जावै जणा झाज चलाबाळा जंय्यां तंय्यां कर झाजनै जेवड़ाऊँ लपेटर बांद अर झाज का पाळनै निचै कर दिआ अर भेताई चलेगा।

¹⁸ अर दुसरा दिन तौफान का जोरका थपेड़ा की बजेऊँ बे झाज को माळ पाणी म बगाबा लाग्या।

¹⁹ अर तीसरा दिन बे आपका हाताऊँ झाज का औजारानै बगा दिआ।

²⁰ अर जद बोळा दिना ताँई नइ तो सूरज दिख्यो अर नइ तारा अर उपरऊँ तौफान तगड़ा थपेड़ा मारर्यो हो, जणा म्हें बचबा की सगळी आस छोड दि।

²¹ बोळा दिना ताँई जद बे निरहार हा, जणा पोलुस बामै खड़्यो होर बोल्यो, “ज थे करेतऊँ नइ चालबा को मेरो खयो मान्यो होतो जणा आज इ बिनास अर इ हाणीऊँ बच ज्याता।

²² पण हाल बी म थारूँ अरदास करूं क, थे हिमत राखो क्युं क झाजनै छोडर कोईनै क्युंई कोनी होवै।

²³ क्युं क बिती रात बि परमेसर को ईस्बर नगरी दुत जि परमेसर को म हूँ अर जिकी म भगती करूं हूँ मेर कनै आयो अर बोल्यो,

²⁴ ‘पोलुस डरै मना! तेरो रोम का राजा क सामै खड़्यो होबो ते ह। अर परमेसर जत्ता बी तेरै सागै सफर करीं हीं बा सगळानै बी बचासी क्युं क तेरै प बिकी दया ह।’

²⁵ जणा इब थे सगळा हिमत राखो क्युं क म परमेसर प बिस्वास करूं हूँ, अर मेरूँ जंय्यां बोल्यो गयो ह ठिक बंय्यांई होसी।

²⁶ पण आ भाळ आपानै कोई टापू प लेज्यासी।”

²⁷ आ गेलड़ा चोदा दिनाऊँ म्हें तौफान की बजेऊँ भूमध्य सागर म भेताई जार्या हा। जणा मज रात क करीब झाज चलाबाळा अनुमान लगाया क म्हें जमीन क सांकड़ै हा।

²⁸ जणा बे बजन बां'दर एक डोरी समदर म गेर'र देख्या क गेराई करीब एक सो बिस फूट ह। अर क्युं क देर पाछै बे ओज्यु अंय्यांई कर बेरो पाड़्यो क इब नबै फूट ह।

²⁹ बे डरग्या क कदै झाज ढाड क नइ भिड़ज्या, जणा बे झाज क गेलड़ै नाकै च्यार लंगर गेर्या, अर दिन उगबा की अरदास करबा लाग्या।

³⁰ जणा झाजनै चलाबाळा झाज पऊँ भागबा ताँई लंगर गेरबा को भानो कर बचाव न्यावनै पाणी म उतार दि।

³¹ जणा पोलुस सुबेदार अर सिपाईड़ाऊँ बोल्यो, “ज अ झाज पऊँ चलेगाक जणा थे बी कोनी बचस्यो।”

³² जणा सिपाईड़ा बि न्याव का जेवड़ा का'टर बिनै पाणी म भेभा दि।

³³ अर जद भागपाट्याई जणा पोलुस बानै आ खेर रोटी खाबा ताँई अरदास कर्यो क, “इ चिंत्या म आज थानै ठिक चोदा दिन होगा बिना रोटी खाया।

³⁴ म थारूँ अरदास करूं हूँ क्युं खाल्यो जिऊँ थे जिंदा रेह्‍वो। क्युं क थारै मऊँ कोईसाको बाळई बाको कोनी होवै।”

³⁵ आ खेर पोलुस रोटी ली अर सगळा क सामै परमेसर को धनेवाद देर बिका टुकड़ा कर खाबा लाग्यो।

³⁶ जिऊँ बा सगळा की बी हिमत बढी अर बे रोटी खाई।

³⁷ झाज म म्हें कुल मिलार दो सो छिंतर मिनख हा।

³⁸ अर जद सगळा खार धापगा जणा बे अनाजनै पाणी म बगार झाजनै हळको कर्यो।

झाज को टूटबो

³⁹ अर जद दिन उग्यो जणा बानै किनारो दिख्यो पण बे पिछाण कोनी सक्या क आ कूणसी झघा ह, पण एक खाड़ी देखी जिको रेतिलो किनारो हो, अर बे बिचार कर्या क ज होज्या तो इपई झाजनै टिकावां।

⁴⁰ जणा बे लंगर की जेवड़ी का'टर समदर म गेर दिआ, अर सागैई हंडल की जेवड़ी खोलर आगलो पाळ ताणर किनारा कानि चाल पड़्या।

⁴¹ झाज को आगलो सिरो तो रेत म जार लाग्यो अर बिमै धसगो पण गेलड़ो सिरो झाल का थपेड़ाऊँ टूटबा लागगो।

⁴² जणा सिपाईड़ा हा जखा सगळा केद्‍यानै आ सोचर मारबा की मन म करी क कदै कोई तिरके भाग नइ छुटै।

⁴³ पण सुबेदार पोलुसनै बचाबा ताँई बानै रोक्यो अर बोल्यो जिनै बी तिरनो आवै बो पाणी म कूदर किनारा प चल्या जावै।

⁴⁴ अर बाकी का तक्‍ता अर झाज की दुसरी चिजा को सारो लेर चालै। अंय्यां सगळा का सगळा किनारा प पुग्या।